TŨRATŨŨRA mahinda-inĩ maritũ mũno gũkĩra hĩndĩ ĩngĩ o yothe. (2 Tim. 3:1-5) Wendo witũ harĩ Jehova na itua riitũ rĩa gũtũũra kũringana na ithimi ciake cia ũthingu nĩ maũndũ mageragio o mũthenya. Jesu nĩ aamenyaga atĩ mahinda maya nĩ mangĩgaakorũo marĩ moru na akĩra arũmĩrĩri ake atĩ nĩ angĩkaamahe hinya nĩguo mahote gũkirĩrĩria nginya ithirĩro. (Mat. 24:3, 13; 28:20) Nĩguo amekĩre hinya, Jesu nĩ aamũrire ngombo ĩrĩa ĩĩhokekete nĩguo ĩmaheage “irio hĩndĩ ĩrĩa yagĩrĩire.”—Mat. 24:45, 46.

Kuuma rĩrĩa ngombo ĩyo yamũrirũo mwaka-inĩ wa 1919, ‘andũ a nyũmba ya mwathani’ milioni nyingĩ a thiomi ciothe nĩ macokanĩrĩirio ithondeka-inĩ rĩa Ngai na nĩ maraaheo irio cia kĩĩroho. (Mat. 24:14; Kũg. 22:17) O na kũrĩ ũguo, andũ a thiomi icio ciothe matiamũkagĩra irio cia kĩĩroho na gĩthimi kĩiganaine. Ningĩ ti andũ othe mangĩhota kuona indo ta video citũ, kana indo ingĩ iria ikoragwo rĩarĩro-inĩ riitũ rĩa jw.org. Hihi ũguo nĩ kuuga atĩ andũ amwe matiheagwo irio iria marabatara nĩguo maikare marĩ na hinya kĩĩroho? Nĩguo tũmenye ũndũ ũcio, rekei twĩcirie ũhoro wa macokio ma ciũria ici inya.

Rĩrĩa Shaitani aageragia Jesu agarũre mahiga matuĩke mĩgate, Jesu aacokirie ũũ: “Ti mũgate wiki ũtũũragia mũndũ muoyo, no kiugo o gĩothe kĩrĩa kiumaga kanua ka Ngai.” (Mat. 4:3, 4) Ciugo cia Jehova ikoragwo thĩinĩ wa Bibilia. (2 Pet. 1:20, 21) Nĩ ũndũ ũcio, Bibilia nĩyo ĩkoragwo ĩrĩ kĩndũ kĩrĩa kĩa bata mũno irio-inĩ citũ cia kĩĩroho.—2 Tim. 3:16, 17.

Ithondeka rĩa Jehova nĩ rĩrutĩte Bibilia ya Tafsiri ya Ulimwengu Mpya ĩrĩ yothe kana gĩcunjĩ kĩayo na thiomi 120, na thiomi ingĩ no irongererũo o mwaka. Makĩria ma Bibilia ĩyo ya Tafsiri ya Ulimwengu Mpya, bilioni nyingĩ cia Bibilia ingĩ nĩ icabĩtwo na thiomi ngiri nyingĩ, irĩ ng’ima kana icunjĩ. Ũndũ ũcio wa magegania nĩ ũringaine na wendi wa Jehova atĩ “andũ othe mahonokio na matuĩke a kũmenya ũhoro-wa-ma.” (1 Tim. 2:3, 4) Na tondũ ‘gũtirĩ kĩndũ o gĩothe kĩũmbe gĩtaguũrĩtio maitho-inĩ ma Jehova,’ no tũkorũo na ma atĩ Jehova nĩ ekũgucĩrĩria arĩa othe “mahũtagĩra maũndũ marĩa ma ũthingu, na makamanyotera” nĩguo moke ithondeka-inĩ rĩake amaheage irio cia kĩĩroho.—Ahib. 4:13; Mat. 5:6; Joh. 6:44; 10:14.

Nĩguo mũndũ akũrie wĩtĩkio ũrĩ na hinya, ndarabatara o gũthoma Bibilia tu. No mũhaka ataũkĩrũo na ahũthĩre maũndũ marĩa areruta. (Jak. 1:22-25) Ũcio nĩguo ũndũ ũrĩa Mũethiopia ũrĩa wa karine ya mbere aabataraga. Filipu aamũkorire agĩthoma Kiugo kĩa Ngai akĩmũũria ũũ: “Ũhoro ũcio ũrathoma, nĩũkũũmenya?” Nake Mũethiopia ũcio akĩmũcokeria atĩrĩ: “Kaĩ ingĩkĩhota kũũmenya atĩa itatongoretio nĩ mũndũ?” (Atũm. 8:26-31) Nake Filipu agĩteithia mũndũ ũcio agĩe na ũtaũku ũrĩa wagĩrĩire wa Kiugo kĩa Ngai. Mũethiopia ũcio nĩ aahutirio mũno nĩ maũndũ marĩa eerutire nginya agĩtua itua rĩa kũbatithio. (Atũm. 8:32-38) O ũndũ ũmwe na ũcio, mabuku maitũ nĩ matũteithĩtie kũgĩa na ũtaũku ũrĩa wagĩrĩire wa Kiugo kĩa Ngai. Ũhoro ũrĩa ũkoragwo thĩinĩ wamo nĩ ũhutagia ngoro citũ na ũgatũtindĩka kũhũthĩra maũndũ marĩa tũreruta.—Kol. 1:9, 10.

Kũgerera mabuku maitũ, ndungata cia Jehova nĩ iheagwo indo nyingĩ cia kĩĩroho cia kũrĩa na kũnyua. (Isa. 65:13) Kwa ngerekano, ngathĩti ya Mũrangĩri ĩrĩa yonekaga na makĩria ma thiomi 210, nĩ ĩtaaragĩria ũrathi wa Bibilia, ĩgatũteithia tũtaũkĩrũo wega nĩ ma iria ndikĩru cia Kiugo kĩa Ngai, na ĩgatwĩkĩra ngoro tũtũũre kũringana na mootaro ma Bibilia. Nayo ngathĩti ya Amkeni! ĩrĩa ĩcabagwo na thiomi 100, nĩ yandandũraga ũmenyo witũ wĩgiĩ ũũmbi wa Jehova na ĩgatuonia ũrĩa tũngĩhũthĩra ũtaaro wa Bibilia ũtũũro-inĩ witũ. (Thim. 3:21-23; Rom. 1:20) Ngombo ĩrĩa ĩĩhokekete ĩheanaga indo irĩ na ũhoro uumĩte Bibilia-inĩ na makĩria ma thiomi 680. Hihi nĩ ũhũthagĩra mahinda gũthoma Bibilia o mũthenya? Hihi nĩ ũthomaga ngathĩti o yothe njerũ na mabuku mothe merũ marĩa moimaga na rũthiomi rwanyu o mwaka?

Makĩria ma kũruta mabuku, ithondeka rĩa Jehova nĩ rĩhaaragĩria mĩario ya Bibilia ĩrĩa ĩheanagwo mĩcemanio-inĩ na igomano-inĩ citũ. Hihi nĩ ũkenagĩra mĩario, drama, cionereria, na icunjĩ cia kũhoyanwo ũhoro iria ikoragwo mĩcemanio-inĩ ĩyo? Hatarĩ nganja, Jehova nĩ atũheaga irio nyingĩ cia kĩĩroho!—Isa. 25:6.

Aca. Na tũtiagĩrĩirũo gũthumbũka atĩ tondũ ndungata imwe cia Jehova rĩmwe na rĩmwe, nĩ ikinyagĩrũo nĩ irio nyingĩ cia kĩĩroho kũrĩ iria ingĩ. Nĩkĩ? Ta wĩcirie ũhoro wa atũmwo. Maarutĩtwo maũndũ maingĩ gũkĩra arutwo angĩ aingĩ a karine ya mbere. (Mar. 4:10; 9:35-37) O na kũrĩ ũguo, arutwo arĩa angĩ nĩ maaheagwo irio iria maabataraga cia kĩĩroho na kwoguo matiarĩ na ng’aragu.—Ef. 4:20-24; 1 Pet. 1:8.

Ningĩ nĩ wega kũririkana atĩ maũndũ maingĩ marĩa Jesu oigire na agĩka rĩrĩa aarĩ gũkũ thĩ matiandĩkĩtwo thĩinĩ wa Injiri. Mũtũmwo Johana aandĩkire ũũ: “O na kwĩ maũndũ mangĩ maingĩ Jesu ekire, namo mangĩandĩkwo ũmwe ũmwe mathire, ngwĩgereria atĩ o na thĩ yothe arĩ yo ndĩngĩiganĩra mabuku marĩa mangĩandĩkwo.” (Joh. 21:25) O na gũtuĩka arũmĩrĩri a Jesu a karine ya mbere nĩ maamenyete ũhoro mũingĩ wĩgiĩ Jesu gũtũkĩra, ti kuuga atĩ ithuĩ harĩ kĩndũ tũũrĩirũo nĩkĩo. Jehova atigĩrĩire atĩ nĩ tũĩ maũndũ maiganu megiĩ Jesu marĩa mangĩtũteithia kũrũmĩrĩra makinya make.—1 Pet. 2:21.

Ningĩ ta wĩcirie ũhoro wa marũa marĩa atũmwo maandĩkagĩra ciũngano cia karine ya mbere. Rĩmwe rĩa marũa macio rĩandĩkirũo nĩ Paulo na rĩtikoragwo thĩinĩ wa Bibilia. (Kol. 4:16) Hihi nĩ kuuga tũtikoragwo na irio cia kũigana cia kĩĩroho atĩ tondũ tũtikoragwo na irũa rĩu? Aca. Jehova nĩ oĩ kĩrĩa tũbataraga na nĩ atũheete irio cia kũigana nĩguo tũikare tũrĩ na hinya kĩĩroho.—Mat. 6:8.

Mahinda-inĩ maya, andũ amwe a Jehova nĩ makoragwo na irio nyingĩ cia kĩĩroho gũkĩra arĩa angĩ. O na angĩkorũo no mabuku manini tu monekaga na rũthiomi rũrĩa waragia-rĩ, ririkana atĩ Jehova no akũrũmbũyagia. Thomaga mabuku marĩa ũrĩ namo, na kũngĩhoteka ũgathiĩ mĩcemanio ya rũthiomi rũrĩa ũngĩtaũkĩrũo nĩruo wega. Hatarĩ nganja weka ũguo, nĩ ũgũthiĩ na mbere gũkorũo na hinya kĩĩroho.—Thab. 1:2; Ahib. 10:24, 25.

Thĩinĩ wa jw.org, nĩ twĩkagĩra ngathĩti na mabuku mangĩ maitũ marĩ na ũhoro umĩte Bibilia-inĩ. Ningĩ thĩinĩ wa jw.org, nĩ gũkoragwo na ũhoro ũteithagia arĩa marĩ thĩinĩ wa kĩhiko, matinĩnja, na aciari arĩa marĩ na twana tũnini. Famĩlĩ nĩ igunĩkaga rĩrĩa iraarĩrĩria ũhoro ũcio hĩndĩ ya Ũthathaiya wa Famĩlĩ. Makĩria ma ũguo, riboti ciĩgiĩ tabarĩra cia mwanya ta kũrĩka gwa Cukuru ya Gileadi, na mũcemanio wa o mwaka, nĩ cionekaga thĩinĩ wa jw.org. Ningĩ jw.org. nĩ ĩteithagia ndungata cia Jehova thĩinĩ wa thĩ yothe kũmenya ũhoro wĩgiĩ icanjama cia ndũire, na maũndũ megiĩ maciira marĩa mangĩkorũo mahutĩtie andũ a Jehova. (1 Pet. 5:8, 9) Makĩria ma ũguo, jw.org. nĩ ĩteithagia mũno wĩra-inĩ wa kũhunjia, tondũ nĩ ĩkinyagia ũhoro ũrĩa mwega o na mabũrũri-inĩ marĩa wĩra witũ ũgirĩtio.

O na kũrĩ ũguo, no ũkorũo ũrĩ na hinya kĩĩroho, o na angĩkorũo nĩ ũkinyagĩrũo kana ndũkinyagĩrũo nĩ ũhoro ũrĩa ũkoragwo thĩinĩ wa jw.org. Ngombo ĩrĩa ĩĩhokekete nĩ ĩĩrutanĩirie kũheana ũhoro mũcabe wa kũigana nĩguo andũ othe a nyũmba ya Mwathani makorũo marĩ na hinya kĩĩroho. Kwoguo, ndwagĩrĩirũo kuona ta arĩ o mũhaka ũgũre kompiuta kana kĩndũ kĩngĩ gĩa gũgũteithia tu gũthoma ũhoro ũrĩa ũrĩ thĩinĩ wa jw.org. Kũrĩ andũ amwe marutaga kobĩ cia ũhoro ũmwe ũrĩa ũrĩ thĩinĩ wa jw.org. makahe arĩa matarĩ na ũhoti wa gũthiĩ thĩinĩ wa Intaneti, no ciũngano itirabatara gwĩka ũguo.

Nĩ tũkenaga mũno nĩ ũndũ wa Jesu kũhingia kĩĩranĩro gĩake gĩa gũtũhe mabataro maitũ ma kĩĩroho. No tũkorũo na ma atĩ Jehova nĩ egũthiĩ na mbere gũtũhe ‘irio cia kĩĩroho hĩndĩ ĩrĩa yagĩrĩire’ nginya mũthia wa mũtabarĩre ũyũ mũru ũkinye.