MŨRŨ WA ITHE WITŨ Guy Hollis Pierce, wa Kĩama Kĩrĩa Gĩtongoragia kĩa Aira a Jehova, nĩ aakuire Njumaine, Machi 18, 2014 arĩ na mĩaka 79. Tondũ nĩ ũmwe wa ariũ a Ithe na Kristo, nĩ aariũkirio na agĩthiĩ igũrũ akaheo ngerenwa yake.​—Ahib. 2:​10-​12; 1 Pet. 3:​18.

Guy Pierce aaciarĩirũo itũũra-inĩ rĩa Auburn, California, U.S.A., Novemba 6, 1934, na akĩbatithio 1955. Aahikirie mwendwa wake Penny 1977 na makĩgĩa ciana. Nĩ ũndũ wa gũkorũo arĩ mũciari, nĩ aahotaga kuonia andũ wendo ta wa mũciari. Marĩ na Penny nĩ maatuĩkire mapainia 1982, na kuuma 1986 agĩtungata mĩaka 11 arĩ mũrori wa mũthiũrũrũko thĩinĩ wa Amerika (U.S).

Mwaka wa 1997, Guy na Penny Pierce nĩ meetirũo Betheli ya Amerika (U.S). Pierce aatungatire thĩinĩ wa Rũhonge rwa Ũtungata, na 1998 akĩamũrũo atuĩke mũteithĩrĩria thĩinĩ wa Kamĩtĩ ya Erutĩri ya Kĩama Kĩrĩa Gĩtongoragia. Kũrĩ Oktomba 2, 1999, hĩndĩ ya mũcemanio wa o mwaka wa Watch Tower Bible and Tract Society of Pennsylvania, Mũrũ wa Ithe Witũ Pierce nĩ aanĩrĩirũo atĩ nĩ atuĩka wa Kĩama Kĩrĩa Gĩtongoragia. Mĩaka-inĩ yake ya thutha-inĩ aatungatire thĩinĩ wa Kamĩtĩ ya Erutĩri, Wandĩki, Ũcabi, na ya Mũtabarĩri.

Andũ a mĩthemba na mĩrerere yothe nĩ maagucagĩrĩrio mũno nĩ Mũrũ wa Ithe Witũ Pierce, nĩ ũndũ wa gũkorũo arĩ mũndũ mũkeni na mũcanjamũku. O na kũrĩ ũguo, ngumo iria ciatũmaga andũ mamwende mũno nĩ wendo, wĩnyihia wake, gũkorũo arĩ na wĩtĩkio mũrũmu harĩ Jehova na gũtĩa watho wa Ngai. Guy Pierce, aarĩ na wĩtĩkio biũ atĩ gũtirĩ kĩndũ kĩngĩgiria ciĩranĩro cia Ngai ihinge, na eendete kũmenyithia andũ othe ũũma ũcio.

Mũrũ wa Ithe Witũ Pierce ndaanogagio nĩ gũtungatĩra Jehova. Ookagĩra ruoro rũgĩtema na kaingĩ nĩ aarutaga wĩra nginya ũtukũ mũno. Nĩ aathiire kũndũ kũingĩ thĩinĩ wa thĩ agĩkagĩra aarĩ na ariũ a Ithe witũ ngoro. O na gũtuĩka nĩ aakoragwo na wĩra mũingĩ, nĩ aahũthagĩra mahinda na mũndũ ũmwe ũmwe harĩ arĩa matungataga Betheli na andũ angĩ arĩa mangĩendire gũkorũo hamwe nake, kũmũhoya ũtaaro kana ũteithio. O na thutha wa mĩaka mĩingĩ kũhĩtũka, aarĩ na ariũ a Ithe witũ no maririkanaga ũtaana wake, ũrata, na ũrĩa aahũthagĩra Maandĩko kũmekĩra ngoro.

Guy Pierce aatigire mũtumia na ciana ithathatũ, ciana cia ciana ciake, na tũcũkũrũ. Ningĩ aarĩ na ciana nyingĩ mũno cia kĩĩroho. Mĩario ya mathiko ya Mũrũ wa Ithe Witũ Pierce yarutĩirũo Betheli ya Brooklyn Njuuma, Machi 22, 2014, nĩ Mũrũ wa Ithe Witũ Mark Sanderson, ũrĩa maatungataga nake thĩinĩ wa Kĩama Kĩrĩa Gĩtongoragia. Thĩinĩ wa mĩario yake nĩ aaririe ũhoro wa kĩĩrĩgĩrĩro kĩa Pierce gĩa gũthiĩ igũrũ na agĩthoma ciugo ici cia Jesu: “Nyũmba ya Awa kwĩ na itũũro nyingĩ; . . . Ndathiĩ ndamũthondekera handũ, nĩ gũcoka ngacoka, ndĩmũtware mũgaikarage o harĩ niĩ, nĩguo harĩa ndĩ, na inyuĩ mũgĩage ho. Na kũu ngũthiĩ, nĩmũũĩ njĩra ya kuo.”​—Joh. 14:​2-4.

Hatarĩ nganja, nĩ tũrĩiguaga twagĩte Mũrũ wa Ithe Witũ Pierce mũno. Ĩndĩ, tũrĩ na gĩkeno tondũ nĩ ‘aamenyete njĩra’ ya gũthiĩ ‘gĩikaro-inĩ’ gĩake kĩa mĩndĩ na mĩndĩ.