MŨŨMBI witũ nĩ onanĩtie atĩ nĩ atũtĩĩte na njĩra ya gũtũhe kĩheo kĩa goro mũno kĩa wĩyathi wa gwĩthurĩra. Ningĩ, nĩ arathimaga mũno arĩa mahũthagĩra wĩyathi ũcio gũtwarithia na mbere ũthathaiya wa ma matarĩ na mwĩyendo, na makanyita itemi harĩ gũtheria rĩĩtwa rĩake itheru na kũnyita mbaru muoroto wake mũnene. Jehova ndakenagio nĩ arĩa mamũtungatagĩra tu nĩgetha mahingie watho. Ithenya rĩa ũguo, akenagio mũno nĩ arĩa mamũtungatagĩra nĩ ũndũ wa ngoro ciao kũiyũrũo nĩ wendo na ngatho nyingĩ.

Kwa ngerekano, rĩrĩa Aisiraeli maarĩ werũ-inĩ wa Sinai, Jehova nĩ aameerire maake handũ ha kũmũthathayagĩria. Aameerire ũũ: “Hothithaniai thĩinĩ wanyu indo cia kũrutĩrũo Jehova; mũndũ o wothe ũrĩa ũkũigua ngoro yake ĩkĩenda-rĩ, nĩarehage kĩndũ gĩa kũrutĩrũo Jehova.” (Tham. 35:5) Mũisiraeli o wothe nĩ angĩarutire mũhothi wa kwĩyendera kũringana na ũhoti wake. Gũtekũmakania nĩ wa mũthemba ũrĩkũ kana mũigana waguo, mũhothi ũcio nĩ ũngĩahũthĩrirũo na njĩra njega harĩ gũtwarithia na mbere muoroto wa Ngai. Aisiraeli maaiyũkirie ũndũ ũcio atĩa?

“Andũ othe arĩa maarĩ na ngoro ciahĩahĩaga” na “arĩa othe maarĩ na maroho megwĩtĩkĩra ũndũ ũcio” magĩtwara mĩhothi yao ya kwĩyendera, ‘marĩ na ngoro igwĩtĩkĩra ũndũ ũcio.’ Arũme na andũ a nja magĩgĩtwara indo meyendeire nĩ ũndũ wa wĩra wa Jehova: mbini ng’emie, icũhĩ cia matũ, icũhĩ cia ciara, thahabu, betha, gĩcango, ndigi cia rangi wa bururu, na wa zambarau, na wa gakarakũ, gatani ĩrĩa njega, ngore cia mbũri, njũa cia ndũrũme itoboketio rangi-inĩ igatunĩha, njũa cia pomboo, mbaũ cia mũgaa, tũhiga twa goro, mahuti marĩa manungaga wega, na maguta. Macũngĩrĩro-inĩ, indo ‘iria maarutĩte nĩ ciaiganĩte cia kũruta wĩra ũcio o na igakĩra.’​—Tham. 35:​21-​24, 27-​29; 36:7.

Kĩrĩa gĩakenirie Jehova mũno ti indo iria ciarutirũo, no nĩ roho wa kwĩyendera wa arĩa maanyitire mbaru ũthathaiya mũtheru. Ningĩ andũ acio nĩ meerutĩire kũhũthĩra hinya na mahinda mao. Bibilia yugaga atĩ ‘andũ-a-nja othe arĩa maarĩ na ngoro irĩ na ũũgĩ nĩ moogothire ndigi na moko mao.’ Hatarĩ nganja, “andũ-a-nja othe arĩa maarĩ na ngoro ciahĩahĩaga nĩ kũgĩa na ũũgĩ, makĩogotha ngore cia mbũri.” Makĩria ma ũguo, Jehova nĩ aaheire Bezaleli ‘ũũgĩ, ahiũhage kũigua ũrĩa maũndũ matariĩ, o na kũmamenya wega, na atuĩke mũũhĩgĩrĩru mawĩra ma mĩthemba yothe.’ Ma nĩ atĩ, Ngai nĩ aaiyũririe ũũgĩ ngoro-inĩ ya Bezaleli na Oholiabu makĩhota kũruta wĩra ũrĩa wothe maahetwo.​—Tham. 35:​25, 26, 30-​35.

Rĩrĩa Jehova eeraga Aisiraeli mamũrutĩre mũhothi, aarĩ na ma biũ atĩ arĩa “maarĩ na ngoro igwĩtĩkĩra ũndũ ũcio,” nĩ mangĩanyitire mbaru ũthathaiya wa ma. Nao arĩa moonanirie roho wa kwĩyendera, Jehova akĩmarathima na njĩra ya kũmahe ũtongoria na gĩkeno kĩnene. Nĩ ũndũ ũcio, akĩonania atĩ angĩrathima roho wa kwĩyendera wa ndungata ciake, indo na ũũgĩ wa kũhingia wendi wake itingĩaga. (Thab. 34:9) Rĩrĩa ũratungatĩra Jehova ũtarĩ na mwĩyendo, koragwo na ma atĩ nĩ arĩrathimaga roho waku wa kwĩyendera.