KŨHUNJIA ũhoro ũrĩa mwega nĩguo wĩra ũrĩa wa bata mũno ũrarutwo thĩinĩ wa thĩ ũmũthĩ. Nĩ gĩtĩo gũkorũo na itemi wĩra-inĩ ũcio wa gũtua andũ arutwo. O na kũrĩ ũguo, rĩmwe ndũkoragwo ũrĩ ũndũ mũhũthũ harĩ mapainia na ahunjia gũtũũria kĩyo ũtungata-inĩ.

Nĩ ũndũ wa gũkorũo andũ aingĩ matarĩ mĩciĩ-inĩ yao, ahunjia amwe nĩ magaga andũ a kũhunjĩria nyũmba kwa nyũmba. Nao andũ arĩa maakorũo mĩciĩ mahota kũrega gũthikĩrĩria kana marakare. Ahunjia angĩ nao nĩ matangĩkaga nĩ ũndũ wa gũkorũo marĩ na gĩcigo kĩnene na kĩrĩ na moimĩrĩro mega gĩa kũhunjia, makona ta gũtarĩ hĩndĩ makaahota kũhunjĩria andũ othe gĩcigo-inĩ kĩu. Angĩ nao nĩ mahunjĩtie mĩaka mĩingĩ na kwoguo magakua ngoro tondũ mũico ndũrĩ ũrakinya.

Nĩ kũrĩkoragwo na moritũ ũtungata-inĩ witũ marĩa mangĩtũma kĩyo gitũ kĩnyihe. Ningĩ tondũ tũratũũra thĩinĩ wa thĩ ĩratongorio nĩ ‘ũrĩa mũũru,’ Mũcukani, ndũrĩkoragwo ũrĩ ũndũ mũhũthũ kũhunjia ũhoro ũrĩa mwega.—1 Joh. 5:19.

Koragwo na ma atĩ Jehova nĩ arĩgũteithagia kũhiũrania na moritũ o mothe marĩa ũrĩcemanagia namo ũkĩhunjia ũhoro ũrĩa mwega. O na kũrĩ ũguo-rĩ, ũngĩka atĩa nĩguo wongerere kĩyo gĩaku ũtungata-inĩ? Rekei tũthuthurie maũndũ mamwe marĩa ũngĩka.

O mwaka, andũ ngiri nyingĩ nĩ mabatithagio magatuĩka Aira a Jehova. Angĩkorũo no hĩndĩ ũrabatithirio, hatarĩ nganja no wende kũgunĩka nĩ ũmenyeru wa arĩa mahunjĩtie ihinda iraya gũgũkĩra. Nawe angĩkorũo ũkoretwo ũrĩ mũhunjia mĩaka mĩingĩ-rĩ, na githĩ to ũkorũo ũrĩ ũndũ mwega na wa gũkũrehera irathimo ũngĩteithĩrĩria kũmenyeria ahunjia arĩa erũ?

Jesu nĩ aamenyaga atĩ arutwo ake nĩ maabataraga ũtongoria nĩguo matuĩke ahunjia marĩ na moimĩrĩro mega, na nĩ ũndũ ũcio nĩ aamonirie  ũrĩa maagĩrĩirũo nĩ kũhunjia. (Luk. 8:1) O na ũmũthĩ kũrĩ na bata wa kũmenyeria arĩa angĩ nĩguo matuĩke ahunjia marĩ na moimĩrĩro mega.

Tũtiagĩrĩirũo nĩ gũtua atĩ mũhunjia mwerũ nĩ ekũgĩa na ũmenyeru wa kũrutana nĩ ũndũ wa gũthiĩ kũhunjia tu. Nĩ ekũbatara gũteithio na njĩra ya wendo na ũtugi nĩ mũhunjia ũrĩ na ũmenyeru. Agĩrĩirũo gũteithio maũndũ-inĩ ta (1) kũharĩria na kwĩmenyeria ũrĩa egũthiĩ kuuga, (2) kwambĩrĩria ndeereti na mwene nyũmba kana mwĩhĩtũkĩri (3) kũheana indo ta mabuku, ngathĩti, trakti na broshua, (4) gũcokera andũ arĩa makenio nĩ ũhoro mwega, na (5) kwambĩrĩria wĩruti wa Bibilia na mũndũ. No kũhoteke mũhunjia ũcio agĩe na ũmenyeru, angĩrora na ahũthĩre njĩra iria irahũthĩrũo nĩ ũrĩa ũramũmenyeria wĩra-inĩ wa kũhunjia. (Luk. 6:40) Hatarĩ nganja, mũhunjia ũcio mwerũ nĩ egũkena mũno nĩ ũndũ wa kũrutithania wĩra hamwe na mũndũ ũramũthikĩrĩria na akamũteithia rĩrĩa kwabatarania. Ningĩ nĩ ekũgunĩka nĩ ũndũ wa kũgaathĩrĩrio na kũheo ũtaaro mwega.—Koh. 4:9, 10.

O na tũgĩkagĩra kĩyo nĩguo tũgĩe na ndeereti na ene nyũmba, kaingĩ ndeereti ĩrĩa njega mũno tũngĩkenera nĩ ĩrĩa tũngĩkorũo nayo na ũrĩa tũrahunjia nake. Ririkana atĩ Jesu aatũmire arutwo ake marĩ “erĩ, erĩ,” mathiĩ makahunjie. (Luk. 10:1) Makĩhunjia hamwe, nĩ maagĩaga na mĩeke ya gwĩkĩrana ngoro. Nĩ ũndũ ũcio, mahinda marĩa ahunjia erĩ marĩ ũtungata-inĩ, nĩ mweke mwega wa ‘o mũndũ kũmĩrĩria ũrĩa ũngĩ.’—Rom. 1:12.

Nĩ maũndũ marĩkũ mũngĩaria? Hihi ica ikuhĩ nĩ kũrĩ ũmwe wanyu wĩyoneire ũndũ mwega arĩ ũtungata-inĩ? Nĩ harĩ kaũndũ kerũ wĩrutĩte thĩinĩ wa wĩruti waku kana wa famĩlĩ? Hihi nĩ harĩ ũndũ ũraiguire mĩcemanio-inĩ ũragwĩkĩra ngoro? Kũrĩ hĩndĩ mũngĩkorũo mũkĩhunjia na mũndũ mũtamenyerete kũhunjia nake. Hihi nĩ ũĩ ũrĩa aamenyire ũhoro wa ma? Nĩ kĩĩ kĩamũteithirie agĩe na ma biũ atĩ rĩrĩ nĩrĩo ithondeka rĩa Jehova? Hihi nĩ maũndũ marĩkũ eyoneire? O nawe no ũmwĩre maũndũ mamwe marĩa wĩyoneire. Gũtekũmakania ũrĩa andũ maraiyũkia ndũmĩrĩri itũ rĩrĩa tũramahunjĩria, gũkorũo tũrĩ na mũhunjia ũngĩ ũtungata-inĩ nĩ gũtũheaga mweke wa ‘gwĩkanĩra hinya.’—1 Thes. 5:11.

Ũndũ ũmwe wa bata nĩguo mũndũ athiĩ na mbere gũkorũo na kĩyo ũtungata-inĩ, nĩ kũgĩa na mũbango mwega wa kwĩruta na kũũrũmia. “Ngombo ĩrĩa ĩĩhokekete na njũgĩ” nĩ ĩtũhaaragĩria ũhoro mũingĩ wĩgiĩ maũndũ matiganĩte. (Mat. 24:45) Nĩ ũndũ ũcio, maũndũ marĩa ũngĩthoma  hĩndĩ ya wĩruti waku nĩ maingĩ mũno. Rekei twĩcirie ũndũ ũmwe ũngĩthuthuria hĩndĩ ya wĩruti waku: Nĩkĩ wĩra wa kũhunjia ũhoro wa Ũthamaki nĩ wa bata mũno? Ithandũkũ rĩrĩa rĩrĩ gĩcunjĩ-inĩ gĩkĩ nĩ rĩonanĩtie itũmi imwe.

Gwĩciria ũhoro wa maũndũ marĩa monanĩtio thĩinĩ wa ithandũkũ rĩu, no gũgwĩkĩre ngoro ũthiĩ na mbere kũhunjia ũrĩ na kĩyo. Na githĩ to ũhũthĩre ithandũkũ rĩu wĩruti-inĩ waku na hihi wone nĩ itũmi irĩkũ ingĩ ũngĩongerera, ũcoke wĩcũranie ũhoro wa maũndũ macio o hamwe na maandĩko marĩa monanĩtio? Hatarĩ nganja, gwĩka ũguo nĩ gũgũtũma wongerere kĩyo ũtungata-inĩ.

Ithondeka rĩa Jehova nĩ rĩtuonagia njĩra iria twagĩrĩirũo nĩ kũhũthĩra nĩguo twagagĩrie ũtungata witũ. Kwa ngerekano, makĩria ma kũhunjia nyũmba kwa nyũmba, no tũhunjie na njĩra ya kwandĩkĩra andũ marũa, thimũ, kũhunjia barabara-inĩ kana kũndũ kwa mũingĩ, icigo-inĩ cia biacara na hĩndĩ ĩrĩa mĩeke yeyumĩria. Ningĩ no tũbange maũndũ maitũ nĩguo tũkahunjie kũrĩa kũrĩ na bata mũnene wa ahunjia.

Hihi nĩ ũgeretie kũhũthĩra imwe cia njĩra icio twagweta? Ahunjia aingĩ nĩ mekĩte ũguo na makagĩa na moimĩrĩro mega. Rekei twĩcirie ũhoro wa ngerekano ithatũ.

Ngerekano ya mbere nĩ ya moimĩrĩro ma ũndũ warĩ thĩinĩ wa Ũtungata wa Ũthamaki wĩgiĩ ũrĩa tũngĩambĩrĩria kwĩruta Bibilia na andũ. Ũndũ ũcio watũmire mwarĩ wa Ithe witũ ũmwe wĩtagwo April agerie kwambĩrĩria kwĩruta Bibilia na andũ atatũ maarutaga wĩra nao. Nĩ aagegire na agĩkena mũno rĩrĩa othe atatũ meetĩkĩrire kwĩruta Bibilia na ningĩ makĩambĩrĩria gũthiĩ mĩcemanio.

Ũndũ wa kerĩ ũkoniĩ kũheana ngathĩti citũ. Nĩ  tũkoretwo tũgĩkĩrũo ngoro tũcaragie andũ arĩa mangĩkenio nĩ gĩcunjĩ kĩna thĩinĩ wa ngathĩti citũ. Mũrori ũmwe wa mũthiũrũrũko thĩinĩ wa Amerika oigire atĩ kũrĩ hĩndĩ aaheire menenja othe a nduka iria ciendagia magũrũ ma ngaari gĩcigo-inĩ kĩmwe ngathĩti ya Amkeni! ĩrĩa yaaragĩrĩria ũhoro wa magũrũ ma ngaari. Ningĩ marĩ na mũtumia wake nĩ maatwarĩire makĩria ma mandagĩtarĩ 100 mũthiũrũrũko-inĩ wao Amkeni! iria ciarĩ na gĩcunjĩ “Kuwaelewa Madaktari.” Mũrori ũcio wa mũthiũrũrũko oigire atĩ njĩra ĩyo nĩ ĩteithĩtie andũ kũmenya mabuku maitũ na wĩra ũrĩa tũrutaga wa kũhunjia. Thutha wa kũmenyana na andũ wega thĩinĩ wa icigo ta icio, mũrori ũcio hamwe na mũtumia wake nĩ magĩaga na andũ aingĩ marathiĩ gũcokera.

Ũndũ wa gatatũ ũkoniĩ kũhunjia na thimũ. Mwarĩ wa Ithe witũ ũmwe wĩtagwo Judy nĩ aandĩkĩire wabici nene ya Aira a Jehova agĩcokia ngatho nĩ ũndũ wa ahunjia gwĩkĩrũo ngoro mahunjagie na thimũ. Oigire atĩ nyina, ũrĩa warĩ na mĩaka 86 na aarĩ na mathĩna maingĩ ma mwĩrĩ, kaingĩ nĩ aahunjagia na thimũ na nĩ ũndũ ũcio akĩambĩrĩria kwĩruta Bibilia na mũtumia warĩ na mĩaka 92.

Njĩra cia kũhunjia iria ikoragwo mabuku-inĩ maitũ nĩ irehaga moimĩrĩro mega. Nĩ ũndũ ũcio, cihũthagĩre tondũ no igũteithie gũthiĩ na mbere gũkorũo na gĩkeno na kĩyo ũtungata-inĩ.

Moimĩrĩro ma wĩra witũ wa kũhunjia matithimagwo kũringana na mũigana wa mabuku marĩa tũheanĩte, arutwo a Bibilia arĩa tũrĩ nao, kana andũ arĩa tũteithĩtie magatuĩka ndungata cia Jehova. Ta wĩcirie ũhoro wa Nuhu, tiga andũ a famĩlĩ yake gũtirĩ mũndũ ũngĩ aateithirie gũtuĩka ndungata ya Jehova. O na kũrĩ ũguo, Nuhu aarĩ mũhunjia warĩ na moimĩrĩro mega. Ũndũ ũrĩa wa bata nĩ gũtungatĩra Jehova tũrĩ ehokeku.—1 Kor. 4:2.

Ahunjia aingĩ nĩ monete atĩ nĩguo mathiĩ na mbere gũkenera wĩra wa kũhunjia, nĩ mabataraga kwĩigĩra matanya marĩa mangĩhota gũkinyĩra. Mamwe mamo nĩ marĩkũ? Rora maũndũ maigana ũna magwetetwo ithandũkũ-inĩ rĩrĩa rĩrĩ thĩinĩ wa gĩcunjĩ gĩkĩ.

Kũgerera ũteithio wa Jehova, geria gwĩka ũrĩa wothe ũngĩhota nĩguo ũtungata waku ũkorũo na gĩkeno na moimĩrĩro mega. Wakinyĩra matanya maku, nĩ ũkũgĩa na gĩkeno na kũiganĩra nĩ ũndũ wa kũmenya atĩ nĩ ũreka ũrĩa wothe ũngĩhota kũhunjia ũhoro ũrĩa mwega.

Ma nĩ atĩ, kũhunjia ũhoro ũrĩa mwega ti hingo ciothe gũkoragwo kũrĩ ũndũ mũhũthũ. O na kũrĩ ũguo, nĩ kũrĩ maũndũ ũngĩka nĩguo ũkoragwo ũrĩ mũhunjia ũrĩ na kĩyo. Ũmanagĩrĩriai na ũrĩa mũrahunjia nake, gĩa na mũbango mwega wa kwĩruta, hũthagĩra njĩra iria tuonagio nĩ ngombo ĩrĩa ĩĩhokekete, na wĩigagĩre matanya marĩa ũngĩhota gũkinyĩra. Makĩria ma ũguo, ririkanaga atĩ nĩ gĩtĩo kĩnene Ngai akũheete gĩa kũhunjagia ũhoro ũrĩa mwega ũrĩ Mũira wake. (Isa. 43:10) Weka ũguo, nĩ ũrĩkoragwo na gĩkeno kĩnene o ũkĩĩrutanagĩria gũthiĩ na mbere gũkorũo na kĩyo ũtungata-inĩ.