THUTHA wa kũhutio kĩande, Kingsley akambĩrĩria gũthoma Bibilia. Ĩno nĩyo mĩario yake ya mbere thĩinĩ wa Cukuru ya Ũtungata wa Gĩtheokrasi. Agatamũka wega ciugo ciothe ategũtigĩrĩra ndemwa o na ĩmwe. No ũndũ wa kũgegania nĩ atĩ Kingsley ndararora handũ agĩthoma.

Kingsley aikaraga bũrũri wa Sri Lanka, na akoragwo arĩ mũtumumu. Ningĩ nĩ arĩ thĩna wa kũigua na athiaga na gakaari ga gũtindĩkwo. No mũthuri ũyũ aamenyire atĩa ũhoro wa ma nginya agĩkinyĩrĩra kũingĩra Cukuru ya Ũtungata wa Gĩtheokrasi? Rekei ndĩmũtaarĩrie.

Rĩrĩa twacemanirie na Kingsley riita rĩa mbere, nĩ ndaakenire mũno nĩ kuona ũrĩa aanyoteire ũhoro wa ma. Nĩ aakoretwo erutĩte Bibilia na Aira a Jehova maigana ũna, na ibuku rĩake rĩa Ujuzi Uongozao Kwenye Uhai Udumuo Milele rĩa andũ atumumu rĩonekaga rĩkũrĩte mũno. * Nĩ eetĩkĩrire twambĩrĩrie kwĩruta nake rĩngĩ, no nĩ twacemanirie na moritũ merĩ.

Ũndũ wa mbere nĩ atĩ, Kingsley aaikaraga mũciĩ wa gũtumberia andũ akũrũ na arĩa marĩ mawathe manene ma mwĩrĩ. Ndaaragia nake nyanĩrĩire mũno tondũ gwakoragwo na inegene rĩingĩ na ningĩ Kingsley aarĩ na thĩna wa matũ. Mũndũ o wothe warĩ mũciĩ ũcio nĩ angĩaiguire tũgĩthoma wĩruti witũ wa o kiumia!

 Ũndũ wa kerĩ nĩ atĩ Kingsley ndaarĩ na ũhoti wa gũthoma na kũnyita maũndũ maingĩ riita rĩmwe. Nĩguo wĩruti witũ ũkorũo ũrĩ mwega Kingsley nĩ aabataraga kwĩharĩria na kĩyo. Aakoragwo athomete maita maigana ũna harĩa tũgaathoma na akarora maandĩko Bibilia-inĩ yake ya andũ atumumu, agacoka akaiga macokio ma ciũria icio meciria-inĩ. Gwĩka ũguo gwakoragwo na moimĩrĩro mega mũno. Twatua gũthoma aaikaragĩra kamũgeka agataarĩria na mũgambo mũnene akenete mũno maũndũ marĩa eerutĩte. Thutha wa kahinda kanini tũkĩambĩrĩria kwĩrutaga maita merĩ o kiumia na o riita tũkeruta mathaa merĩ!

Kingsley nĩ eeriragĩria mũno gũthiĩ mĩcemanio thĩinĩ wa Nyũmba ya Ũthamaki, no ũcio ndwarĩ ũndũ mũhũthũ. Nĩ aabataraga ũteithio nĩguo ahote gũikarĩra na kuuma gakaari-inĩ ga gũtindĩkwo, kũhaica na kuuma ngaari, na kuuma na kũingĩra thĩinĩ wa Nyũmba ya Ũthamaki. Aarĩ na ariũ a Ithe witũ nĩ maacenjanagia harĩ kũmũteithia, na moonaga gwĩka ũguo kũrĩ gĩtĩo. Hĩndĩ ya mĩcemanio, Kingsley aaigaga spika gũtũ-inĩ gwake, agathikĩrĩria na kinyi, na nginya agacokia ciũria!

Thutha wa kwĩruta kwa ihinda, nĩ aatuire itua rĩa kũingĩra Cukuru ya Ũtungata wa Gĩtheokrasi. Ciumia igĩrĩ mbere ya mũthenya wa kũruta mĩario yake nĩ ndaamũririe kana nĩ aremenyeria gũthoma gĩcunjĩ kĩrĩa aagaiĩrũo. Aanjokeirie ũũ arĩ na ũmĩrĩru: “Thomete ta maita 30.” Ngĩmũgaathĩrĩria nĩ ũndũ wa kĩyo gĩake, ngĩcoka ngĩmwĩra no nyende kũigua agĩthoma. Akĩhumbũria Bibilia yake ya atumumu, na akĩambĩrĩria gũthoma. No ndarora ngĩona atĩ ndarahũthĩra ciara ciake gũthoma ta ũrĩa atumumu mekaga. Aaigĩte gĩcunjĩ kĩu gĩothe kĩa Bibilia meciria-inĩ make!

Ũndũ ũcio nĩ watũmire njite maithori tondũ ndietĩkagia. Ngĩmũũria kwahotekete atĩa aririkane wega ũguo thutha wa kwĩmenyeria o maita 30 tu. Aanjokeirie ũũ: “Aca, thomaga kĩndũ maita 30 o mũthenya.” Kingsley aahũthĩrĩte makĩria ma mweri mũgima o aikaraga kamũgeka-inĩ gake, agathoma maita maingĩ nginya gĩcunjĩ kĩu kĩa Bibilia gĩkĩingĩra biũ mũtwe.

Mũthenya wa kũruta mĩario yake thĩinĩ wa Nyũmba ya Ũthamaki nĩ wakinyire. Rĩrĩa aarĩkirie, andũ kĩũngano-inĩ makĩhũũra hĩ makenete mũno, na aingĩ ao magĩita maithori nĩ ũndũ wa kuona kĩyo kĩa mũrutwo ũcio mwerũ. Mũhunjia ũmwe watigĩte kũruta mĩario thĩinĩ wa cukuru nĩ ũndũ wa guoya, akiuga atĩ nĩ ekwenda kũingĩra cukuru rĩngĩ. Nĩkĩ? Oigire ũũ: “Angĩkorũo Kingsley no ahote, o na niĩ ndingĩremwo!”

Kingsley nĩ eeyamũrĩire Jehova na akĩbatithio Septemba 6, 2008, thutha wa gũkorũo erutĩte Bibilia mĩaka ĩtatũ. Aatungatĩire Jehova arĩ mwĩhokeku nginya rĩrĩa aakuire Mĩĩ 13, 2014. Aarĩ na wĩtĩkio biũ atĩ nĩ agaathiĩ na mbere gũtungatĩra Jehova thĩinĩ wa thĩ njerũ atarĩ na gathĩna o na kanini ka mwĩrĩ. (Isa. 35:5, 6)—Ta ũrĩa rũheanĩtwo nĩ Paul McManus.