THUTHA wa mwarĩ wa Ithe witũ Anita * kũbatithio, mũthuri wake nĩ aambĩrĩirie kũmũkararia arĩ na ũũru mũingĩ mũno. Anita oigire ũũ: “Aangiragia gũthiĩ mĩcemanio na nginya kũgweta rĩĩtwa rĩa Ngai. Kũgweta rĩĩtwa Jehova tu nĩ ũndũ watũmaga arakare mũno.”

Kũruta ciana ciake ũhoro wa Jehova ndwarĩ ũndũ mũhũthũ harĩ Anita. “Nĩ ndagirĩtio gwĩkaga maũndũ ma kĩĩroho gwakwa mũciĩ. Ndingĩahotire kwĩruta na ciana ciakwa o na kana gũcitwara mĩcemanio.”

O ta ũrĩa maũndũ marĩa Anita ahĩtũkĩire maronania, ũkararia kuuma kũrĩ andũ a famĩlĩ no ũkorũo ũrĩ igerio inene harĩ wĩkindĩru wa Mũkristiano. Maũndũ ta ndwari ya ihinda iraya, gĩkuũ kĩa mwana kana mũndũ ũrĩa mũhikanĩtie nake, kana mũndũ wa famĩlĩ gũtiga Jehova, no makorũo marĩ magerio manene harĩ wĩkindĩru witũ. Kwoguo, nĩ ũndũ ũrĩkũ ũngĩteithia Mũkristiano gũtũũra arĩ mwĩhokeku harĩ Jehova?

Ũngĩcemania na magerio ta macio-rĩ, ũngĩka atĩa? Mũtũmwo Paulo oigire: ‘Nĩ mũrabatara ũkirĩrĩria.’ (Ahib. 10:36) No nĩ kĩĩ kĩngĩgũteithia kũgĩa na ũkirĩrĩria?

Njĩra ĩmwe ĩtũheaga hinya nĩguo tũhote gũkirĩrĩria magerio nĩ kwĩhoka Ngai kũgerera mahoya. Ta wĩcirie ngerekano ĩmwe. Mũthenya ũmwe wa Njumatatũ thutha wa mĩaraho famĩlĩ ya Ana nĩ yacemanirie na ũndũ ũterĩgĩrĩirũo. Mũthuri wake ũrĩa maatũũranĩtie hamwe mĩaka 30 nĩ aakuire hinahi. Ana oigire: “Athiĩ wĩra ndaigana gũcoka, na aarĩ na mĩaka 52 tu.”

Wĩra ũrĩa Ana aarutaga nĩ wamũteithirie tondũ nĩ watũmaga akorũo na maũndũ maingĩ ma gwĩka, no ndwamũninĩire ruo rũrĩa aarĩ naruo. Eekire atĩa? Oigire ũũ: “Nĩ ndaitũrũrĩire Jehova ngoro yakwa na ngĩmũthaitha andeithie kũhiũrania na thĩna ũcio.” Hihi Jehova nĩ aacokirie mahoya make? Ana aarĩ na ma biũ atĩ nĩ aacokirie. Oigire ũũ: “Thayũ ũrĩa ũheanagwo nĩ Ngai tu nĩ wahoreririe ngoro yakwa na ũgĩtũma ndigatangĩke mũno. Ndikoragwo na nganja atĩ Jehova nĩ akaariũkia mũthuri wakwa.”—Afil. 4:6, 7.

Jehova “mũigua wa mahoya” erĩire arĩa mamũtungatagĩra atĩ nĩ arĩmaheaga ũteithio ũrĩa wothe marabatara nĩguo mahote gũikara marĩ ehokeku harĩ we. (Thab. 65:2) Na githĩ kĩĩranĩro kĩu gĩtiĩkagĩra wĩtĩkio witũ hinya? Githĩ gĩtiragũteithia kuona atĩ o nawe no ũhote gũkirĩrĩria?

Jehova nĩ akoretwo agĩtirĩrĩra andũ ake kũgerera kĩũngano gĩa Gĩkristiano. Kwa ngerekano, rĩrĩa kĩũngano gĩa Thesalonike kĩanyariragwo mũno, Paulo eekĩrire Akristiano acio ngoro ‘momanagĩrĩrie o mũndũ na ũrĩa ũngĩ, na mekĩranage hinya, o ta ũrĩa maatũire mekaga.’ (1 Thes. 2:14; 5:11) Nĩ ũndũ wa kwendana na gũteithania, Akristiano acio nĩ maahotire gwĩtiiria magerio macio ma wĩtĩkio. Ũkirĩrĩria wao nĩ kĩonereria kĩega harĩ ithuĩ ũmũthĩ na nĩ ũtũteithagia kuona ũrĩa tũngĩkirĩrĩria.

Nĩ tũkũbatara kũgĩa na arata a hakuhĩ thĩinĩ wa kĩũngano na tũgekĩranaga ngoro mũndũ na ũrĩa ũngĩ, makĩria hĩndĩ ya mathĩna. (Rom. 14:19) Mũtũmwo Paulo nĩ aacemanirie na mĩnyamaro mĩingĩ na Jehova akĩmũhe hinya wa gũkirĩrĩria. Rĩmwe na rĩmwe Ngai nĩ aahũthagĩra Akristiano arĩa angĩ nĩguo momĩrĩrie mũtũmwo ũcio. Kwa ngerekano, rĩrĩa aatũmaga ngeithi kũrĩ kĩũngano gĩa Kolosai, Paulo oigire ũũ igũrũ rĩao: “Nĩo matũire manyũmagĩrĩria.” (Kol. 4:10, 11) Wendo wao harĩ Paulo nĩguo wamatindĩkaga mamũũmĩrĩrie na mamwĩkĩre hinya rĩrĩa arĩ mathĩna-inĩ. No kũhoteke o nawe wanekĩrũo ngoro na ũgatirĩrĩrũo nĩ andũ arĩa angĩ kĩũngano-inĩ.

Jehova ningĩ nĩ atiragĩrĩra andũ ake akĩhũthĩra athuri a kĩũngano. Athuri acio makoragwo matariĩ ‘ta handũ ha kwĩhitha rũhuho, o na ta handũ ha kwĩũa mbura ya kĩhuhũkanio, na o ta njũĩ cia maĩ irĩ kũndũ kũũmũ, o na ta kĩĩruru kĩa rũaro rũa ihiga inene rĩrĩ werũ mũhĩnju.’ (Isa. 32:2) Na githĩ ũcio ti ũndũ wa gũtũũmĩrĩria mũno! Kwoguo rĩrĩa wacemania na mathĩna, caragia ũteithio wa athuri. No magũteithie ũthiĩ na mbere gũtungatĩra Jehova ũrĩ na ũkirĩrĩria.

Ma nĩ atĩ, athuri matingĩhota gũgũteithia mathĩna-inĩ maku mothe. Nĩ andũ matarĩ akinyanĩru, na ‘mahaana o ta ithuĩ maũndũ-inĩ mothe.’ (Atũm. 14:15) O na kũrĩ ũguo, rĩrĩa maahoya nĩ ũndũ wa mathĩna maitũ, mahoya mao no matũteithie mũno. (Jak. 5:14, 15) Kwa ngerekano athuri a kĩũngano bũrũri-inĩ wa Italy, nĩ meekĩrire mũrũ wa Ithe witũ ũmwe ngoro ũrĩa ũkoretwo agĩthumbũrũo nĩ ndwari nene kwa ihinda rĩa mĩaka mĩingĩ. Mũrũ wa Ithe witũ ũcio oigire ũũ: “Wendo wa aarĩ na ariũ a Ithe witũ o hamwe na kũnjeragĩra kaingĩ nĩ kũndeithĩtie gũkirĩrĩria.” Angĩkorũo o nawe nĩ ũranyamarĩka, Jehova nĩ arenda ũcarie ũteithio wa athuri.

Nĩ kũrĩ na maũndũ mangĩ tũngĩka nĩguo tũhote gũkirĩrĩria. Ũndũ ũmwe nĩ gũkorũo na mũbango mwega wa gwĩka maũndũ ma kĩĩroho. Ta wĩcirie ũhoro wa mũrũ wa Ithe witũ John ũrĩa wamenyire atĩ arĩ na mũrimũ wa kansa arĩ na mĩaka 39. Oigire ũũ: “Nĩ ndaaiguire ũũru mũno, tondũ ndaarĩ o mũndũ mũnini.” Hĩndĩ ĩyo, mwana wake aarĩ na mĩaka ĩtatũ tu. Aathire na mbere kuuga ũũ: “Makĩria ma wĩra wa gũtungata kaana gaitũ, mũtumia wakwa aagĩire na wĩra wa kũndungata na kũndwaraga thibitarĩ.” Nĩ ũndũ wa ũrigitani ũrĩa aaheagwo, John aaiguaga orĩtwo nĩ hinya mũno na agakorũo na mathĩna ma nda. Makĩria ma ũguo, ithe wa John nĩ aanyitirũo nĩ mũrimũ wamũhinyĩrĩirie mũno na nĩ ũndũ ũcio nĩ aabataraga gũtungatwo nĩ andũ a famĩlĩ.

John marĩ na famĩlĩ yake maahiũranirie atĩa na mathĩna macio? Oigire ũũ: “O na gũtuĩka nĩ ndaaiguaga njũrĩtwo nĩ hinya mũno, nĩ ndaatigagĩrĩra atĩ famĩlĩ yakwa ĩrĩ na mũbango mwega wa maũndũ ma kĩĩroho. Twathiaga mĩcemanio yothe, tũkahunjia o kiumia, na tũkagĩa na ũthathaiya wa famĩlĩ o na rĩrĩa gũtaarĩ ũhũthũ gwĩka ũguo.” John nĩ eeyoneire atĩ hitho ya gũkirĩrĩria thĩna o wothe nĩ gũthiĩ na mbere kũgitĩra ũkuruhanu wake na Jehova. O na gũtuĩka kĩambĩrĩria-inĩ nĩ aamakire mũno, thutha wa kahinda kanini nĩ aagĩire na thayũ wa ngoro. Nĩ aamenyaga atĩ Jehova nĩ amwendete na nĩ aamũheaga hinya ũrĩa aabataraga. O nawe Jehova no akũhe hinya.

Hatarĩ nganja, nĩ ũndũ wa ũteithio wa Jehova no tũhote gũkirĩrĩria magerio kana moritũ marĩa tũngĩcemania namo rĩu kana mahinda marĩa maroka. Rekei tũthiĩ na mbere kũhoya ũteithio wa Jehova, gũkũria ũrata wa hakuhĩ na Akristiano arĩa angĩ, gũcaria ũteithio wa athuri a kĩũngano, na gũkoragwo na mũbango mwega wa maũndũ ma kĩĩroho. Tweka ũguo nĩ tũrĩonanagia atĩ nĩ tũraririkana ciugo ici cia Paulo: ‘Nĩ mũrabatara ũkirĩrĩria.’