1. Tũngĩhũthĩra atĩa ihoya rĩrĩa rĩrĩ thĩinĩ wa Mathayo 6:9-13 rĩrĩa tũrahunjia?

ANDŨ aingĩ no mahoe Ihoya rĩa Mwathani matekũrora handũ. Kaingĩ rĩrĩa tũrahunjia nyũmba kwa nyũmba nĩ tũhũthagĩra ihoya rĩu gũteithia andũ mataũkĩrũo atĩ Ũthamaki wa Ngai nĩ thirikari ya biũ na nĩ ũkaarehe mogarũrũku mega thĩinĩ wa thĩ. Ningĩ nĩ tũhũthagĩra gĩcunjĩ kĩa mbere kĩa ihoya rĩu kũruta andũ atĩ Ngai nĩ arĩ rĩĩtwa, rĩrĩa rĩagĩrĩirũo nĩ kwamũrũo.—Mat. 6:9.

2. Tũmenyaga atĩa atĩ muoroto wa Jesu ndwarĩ tũcokagĩre Ihoya rĩa Mwathani rĩrĩa tũrahoya?

² Hihi muoroto wa Jesu warĩ tũcokagĩre ciugo iria irĩ thĩinĩ wa ihoya rĩu hĩndĩ ciothe tũkĩhoya ta ũrĩa andũ aingĩ mekaga thĩinĩ wa ndini imwe? Aca. Atanarutana ihoya rĩu, oigire ũũ: “Rĩrĩa ũkũhoya ndũgacokagĩre maũndũ o marĩa marĩa.” (Mat. 6:7, New World Translation) Thutha ũcio nĩ aacokerire ihoya rĩu riita rĩngĩ, ĩndĩ akĩhũthĩra ciugo ngũrani. (Luk. 11:1-4) Kwoguo Jesu aatũteithagia kũmenya maũndũ marĩa twagĩrĩirũo  kũhoya, na kũmenya nĩ marĩkũ twagĩrĩirũo nĩ kũiga mbere. Nĩ ũndũ ũcio nĩ ũndũ mwagĩrĩru kũrĩĩta ihoya rĩa kĩonereria.

3. Nĩ ciũria irĩkũ tũngĩĩcũrania ũhoro wa cio rĩrĩa tũrathuthuria ihoya rĩu rĩa kĩonereria?

³ Gĩcunjĩ-inĩ gĩkĩ na kĩrĩa kĩrũmĩrĩire, nĩ tũgũthuthuria maũndũ marĩa makoragwo thĩinĩ wa ihoya rĩu rĩa kĩonereria. Tũgĩka ũguo nĩ wega wĩyũrie ũũ: ‘Ihoya rĩrĩ rĩa kĩonereria rĩngĩndeithia atĩa kwagagĩria mahoya makwa? Na makĩria ma ũguo-rĩ, hihi nĩ ndĩratũũra kũringana na ihoya rĩu?’

4. Ciugo “Ithe witũ” itũririkanagia atĩa, na Jehova nĩ “Ithe” wa arĩa marĩ na kĩĩrĩgĩrĩro gĩa gũgatũũra gũkũ thĩ na njĩra ĩrĩkũ?

⁴ Ciugo “Ithe witũ” itũririkanagia atĩ tũkoragwo tũrĩ thĩinĩ wa ũrũmwe wa ‘ariũ a Ithe witũ’ arĩa makoragwo mendaine mũno. (1 Pet. 2:17) Na githĩ kĩu ti gĩtĩo kĩnene mũno! Arĩa mathuurĩtwo nĩ Jehova magatũũre igũrũ nĩ matuĩtwo ariũ ake, nĩ ũndũ ũcio nĩ magĩrĩire mũno kũmwĩta “Baba.” (Rom. 8:15-17) O nao Akristiano arĩa marĩ na kĩĩrĩgĩrĩro gĩa gũgaatũũra gũkũ thĩ no mamwĩte “Baba,” tondũ nĩwe ũmaheete muoyo na nĩwe ũmahingagĩria mabataro mao. Arĩa marĩ na kĩĩrĩgĩrĩro gĩa gũgatũũra gũkũ thĩ makaagĩrĩra biũ gũtuĩka ciana cia Ngai rĩrĩa magacokerio ũkinyanĩru na monanie wĩhokeku wao hĩndĩ ya igerio rĩa mũico.—Rom. 8:21; Kũg. 20:7, 8.

5, 6. Nĩ kĩheo kĩrĩkũ kĩega aciari mangĩhe ciana ciao, na o mwana agĩrĩirũo gwĩka atĩa na kĩheo kĩu? (Rora mbica kĩambĩrĩria-inĩ gĩa gĩcunjĩ gĩkĩ.)

⁵ Aciari nĩ maheaga ciana ciao kĩheo kĩega mũno rĩrĩa maciruta kũhoya na kuona Jehova arĩ Ithe witũ wa igũrũ ũtũrũmbũyagia. Mũrũ wa Ithe witũ ũmwe ũrĩa rĩu ũtungataga arĩ mũrori wa mũthiũrũrũko Afrika ya Mũhuro, oigire ũũ: “Kuuma o mũthenya ũrĩa tũirĩtu twitũ twaaciarirũo ndaatigagĩrĩra nĩ twahoya na tuo ũtukũ o ũtukũ tiga o rĩrĩa ingĩakorirũo itarĩ mũciĩ. Moigaga matiririkanaga maũndũ marĩa ndagwetaga mahoya-inĩ macio. O na kũrĩ ũguo nĩ maririkanaga ũhoreru, thayũ, na ũgitĩri ũrĩa maaiguaga tũkĩaria na Ithe witũ Jehova. Rĩrĩa maamenyire kũhoya, nĩ ndaamekĩrire ngoro mahoyage na kayũ nĩguo ngaigua ũrĩa maraitũrũrĩra Jehova ngoro ciao. Ĩyo yakoragwo ĩrĩ mĩeke mĩega mũno ya kũmenya ũrĩa ngoro ciao itariĩ. Nĩ ndacokaga ngamateithia na ũhoreri kuona ũrĩa mangĩhũthĩra maũndũ ma bata marĩa marĩ ihoya-inĩ rĩa kĩonereria nĩguo maagĩrie mahoya mao.”

⁶ Airĩtu acio nĩ maathire na mbere gũkũra kĩĩroho. Rĩu makenagĩra ũtũũro wa kĩhiko magĩtungatĩra Jehova hamwe na athuri ao ũtungata-inĩ wa hĩndĩ-ciothe. Gũtirĩ kĩheo kĩngĩ kĩnene aciari mangĩhe ciana ciao gĩkĩrĩte gũciteithia ikũrie ũrata wa hakuhĩ hamwe na Jehova. O na kũrĩ ũguo nĩ itemi rĩa o mwana gũtũũria ũrata wake na Jehova. Ũndũ ũcio ũhutĩtie kwenda rĩĩtwa rĩa Ngai na kũrĩhe gĩtĩo mũno.—Thab. 5:11, 12; 91:14.

7. Nĩ gĩtĩo kĩrĩkũ andũ a Ngai makoragwo nakĩo, no ũndũ ũcio ũtũmaga tũbatare gwĩka atĩa?

⁷ Nĩ gĩtĩo kĩnene kũmenya rĩĩtwa rĩa Ngai na “gwĩtanio na rĩĩtwa rĩake.” (Atũm. 15:14; Isa. 43:10) Tũhoyaga Ithe witũ wa igũrũ ũũ: “Rĩĩtwa rĩaku nĩrĩamũrũo.” Kũhoya ũguo no gũgũtindĩke ũhoyage Jehova agũteithagie gwĩthema kuuga kana  gwĩka ũndũ ũngĩcambithia rĩĩtwa rĩake itheru. Tũtingĩenda kũhaana Akristiano amwe a karine ya mbere arĩa mateekaga kũringana na ũrĩa maahunjagia. Mũtũmwo Paulo amaandĩkĩire ũũ: “Rĩĩtwa rĩa Ngai nĩ gũcambio rĩcambagio ndũrĩrĩ-inĩ nĩ ũndũ wanyu.”—Rom. 2:21-24.

8, 9. Heana ngerekano ya kuonania ũrĩa Jehova arathimaga arĩa mendaga gũtĩithia rĩĩtwa rĩake.

⁸ Twĩkaga o ũrĩa wothe tũngĩhota nĩguo tũtĩithie rĩĩtwa rĩa Ngai. Thutha wa mwarĩ wa Ithe witũ ũmwe bũrũri-inĩ wa Norway gũkuĩrũo nĩ mũthuri, nĩ aatigirũo na kaana ka mĩaka ĩrĩ. Oigire ũũ: “Rĩu rĩarĩ ihinda iritũ mũno. Ndaahoyaga Jehova o mũthenya hakuhĩ o thutha wa ithaa ahe hinya wa kĩĩroho nĩguo nũmie wĩkindĩru wakwa na ndigatue itua rĩtarĩ rĩa ũũgĩ ndũme Shaitani agĩe na gĩtũmi gĩa kũnyũrũria Jehova. Nĩ ndendaga gũtĩithia rĩĩtwa rĩa Jehova na ningĩ nĩ ndendaga kamwana gakwa gakona baba wao thĩinĩ wa Paradiso.”—Thim. 27:11.

⁹ Hihi Jehova nĩ aacokirie mahoya make? Hatarĩ nganja. Nĩ ũndũ wa gũthiĩ na mbere kũnyitanagĩra na kĩũngano, mwarĩ wa Ithe witũ ũcio nĩ eekĩrirũo ngoro mũno nĩ Akristiano arĩa angĩ. Mĩaka ĩtano thutha ũcio nĩ aahikĩire mũthuri wa kĩũngano. Mwanake wake, ũrĩa rĩu ũrĩ na mĩaka 20 nĩ mũbatithie. Oigire ũũ: “Nĩ ngenaga mũno tondũ mũthuri wakwa nĩ aandeithirie kũrera mwanake ũcio.”

10. Nĩ kĩĩ kĩrabatarania nĩguo rĩĩtwa rĩa Ngai rĩtherio biũ?

¹⁰ Nĩ kĩĩ kĩrabatarania nĩguo rĩĩtwa rĩa Ngai rĩamũrũo na rĩtherio biũ? No mũhaka Jehova akoya ikinya rĩa kũnina arĩa othe mareganaga na ũnene wake na rũtũrĩko. (Thoma Ezekieli 38:22, 23.) Ningĩ kahora kahora nĩ agaacokeria andũ ũkinyanĩru. Na githĩ tũtiĩriragĩria mũno hĩndĩ ĩrĩa andũ na araika othe magatĩithagia rĩĩtwa rĩa Jehova! Macũngĩrĩro-inĩ Ithe witũ wa igũrũ ũrĩ wendo nĩwe ‘ũgatuĩka maũndũ mothe kũrĩ andũ othe.’—1 Kor. 15:28.

11, 12. Nĩ ũndũ ũrĩkũ Jehova aateithirie andũ ake mataũkĩrũo mwaka-inĩ wa 1876?

¹¹ Jesu atanacoka igũrũ, atũmwo ake maamũririe ũũ: “Mwathani, ihinda rĩrĩ nĩrĩo ũgũcokeria Aisiraeli ũthamaki wao?” Ũrĩa Jesu aamacokeirie nĩ wonanirie atĩ ihinda rĩao rĩa kũmenya nĩ rĩ Ũthamaki wa Ngai ũngĩambĩrĩirie gwathana rĩtiarĩ ikinyu. Eerire arutwo ake maige meciria mao harĩ wĩra ũrĩa wa bata mũno wa kũhunjia. (Thoma Atũmwo 1:6-8.) O na kũrĩ ũguo, Jesu nĩ aarutire arũmĩrĩri ake matanyage Ũthamaki wa Ngai. Nĩ ũndũ ũcio, kuuma o hĩndĩ ya atũmwo Akristiano makoretwo makĩhoya Ũthamaki ũcio ũke.

¹² Rĩrĩa ihinda rĩakuhĩrĩirie rĩa Jesu gũthamaka kũrĩa igũrũ, Jehova nĩ aateithirie ndungata ciake itaũkĩrũo nĩ mwaka ũrĩa Jesu angĩaambĩrĩirie gwathana. Mwaka-inĩ wa 1876, Charles Taze Russell nĩ aandĩkire gĩcunjĩ kĩarĩ na kĩongo, “Mahinda ma Ndũrĩrĩ: Makahingio Rĩ?” Aatarĩirie atĩ “mahinda mũgwanja” marĩa magwetetwo ũrathi-inĩ wa Danieli no ũndũ ũmwe na ‘mahinda marĩa ndũrĩrĩ ituĩrĩirũo,’ marĩa Jesu aagwetire thĩinĩ wa ũrathi wake. Gĩcunjĩ kĩu gĩatarĩirie atĩ mahinda macio mangĩathirire mwaka wa 1914. *—Dan. 4:16; Luk. 21:24.

13. Nĩ ũndũ ũrĩkũ wahanĩkire 1914, na maũndũ marĩa mekĩkĩte thĩinĩ wa thĩ kuuma hĩndĩ ĩyo monanĩtie atĩa?

 ¹³ Mwaka-inĩ wa 1914 nĩ kwagĩire na mbaara mabũrũri-inĩ ma Rũraya. Mbaara ĩyo yacokire ĩgĩtherema thĩinĩ wa thĩ yothe. Mwaka-inĩ wa 1918, mbaara ĩyo ĩgĩũka gũthira nĩ kwaagĩte na ng’aragu nene na gũgĩcoka gũkĩgĩa na mũrimũ mũru ũrĩa woragire andũ aingĩ gũkĩra arĩa maakuĩrĩire mbaara-inĩ. Nĩ ũndũ ũcio, “kĩmenyithia” kĩrĩa Jesu aaheanĩte kĩgiĩ we gũtuĩka Mũthamaki kũrĩa igũrũ gĩkĩambĩrĩria kũhinga. (Mat. 24:3-8; Luk. 21:10, 11) Kũrĩ na ũira mũingĩ wonanagia atĩ Jesu Kristo nĩ ‘aaheirũo thũmbĩ’ agĩtuĩka Mũthamaki mwaka-inĩ wa 1914. Aathiire ‘agĩtooranagia, nĩguo arĩkie ũtoorania wake.’ (Kũg. 6:2) Nĩ aaharũrũkirie Shaitani na ndaimono ciake gũkũ thĩ. Kuuma hĩndĩ ĩyo andũ nĩ meyoneire ũrathi ũyũ ũkĩhinga: “Thĩ ĩĩ na haaro-ĩ, o narĩo iria rĩrĩa inene! amu inyuĩ-rĩ, mũcukani nĩamũikũrũkĩire e na marũrũ manene, tondũ nĩoĩ atĩ no ihinda inyinyi atigairie.”—Kũg. 12:7-12.

14. (a) Nĩkĩ nĩ ũndũ wa bata gũthiĩ na mbere kũhoya Ũthamaki wa Ngai ũũke? (b) Tũrĩ na gĩtĩo gĩa kũruta wĩra ũrĩkũ wa bata mũno?

¹⁴ Ũrathi ũcio wa Kũguũrĩrio 12:7-12 nĩ ũtũteithagia gũtaũkĩrũo kĩrĩa gĩatũmire kwambĩrĩrie kũgĩa maũndũ moru mũno thĩinĩ wa thĩ rĩrĩa Jesu aatuĩkire Mũthamaki wa Ũthamaki wa Ngai. Nĩ tondũ Jesu aambĩrĩirie gũthamaka gatagatĩ ga thũ ciake. Tũgũthiĩ na mbere kũhoya Ũthamaki wa Ngai ũũke nginya rĩrĩa Jesu akaarĩkia  ũtoorania wake na eherie waganu thĩinĩ wa thĩ. Ningĩ no mũhaka tũtũũre kũringana na mahoya macio na njĩra ya gũkoragwo na itemi harĩ kũhingia gĩcunjĩ kĩngĩ kĩa bata mũno gĩa “kĩmenyithia” kĩu. Jesu aarathĩte ũũ: “Naguo Ũhoro-ũyũ-Mwega wa ũthamaki nĩũkahunjio thĩ yothe, ũtuĩke ũira kũrĩ ndũrĩrĩ ciothe; na hĩndĩ ĩo nĩrĩo ithirĩro rĩgakinya.”—Mat. 24:14.

15, 16. Tũngĩtũũra atĩa kũringana na ũrĩa tũhoyaga atĩ wendi wa Ngai wĩkwo gũkũ thĩ?

¹⁵ Kĩndũ mĩaka 6,000 mĩhĩtũku, wendi wa Ngai wekagwo gũkũ thĩ na njĩra nginyanĩru biũ. Nĩkĩo Jehova aarorire indo iria ombĩte akiuga ‘nĩ njega mũno.’ (Kĩam. 1:31) Thutha ũcio Shaitani nĩ aaremire, na kuuma hĩndĩ ĩyo no andũ anini tu thĩinĩ wa thĩ makoretwo magĩka wendi wa Ngai. Ũmũthĩ kũrĩ na Aira a Jehova ta milioni inyanya arĩa mahoyaga wendi wa Ngai wĩkwo gũkũ thĩ na ningĩ makerutanĩria gũtũũra kũringana na ihoya rĩu. Mekaga ũguo kũgerera mĩthiĩre yao na ningĩ na njĩra ya kũhunjia na kĩyo ũhoro wa Ũthamaki.

¹⁶ Kwa ngerekano, mwarĩ wa Ithe witũ ũmwe warĩ mũmishonarĩ thĩinĩ wa Afrika, ũrĩa wabatithirio mwaka-inĩ wa 1948 oigire ũũ: “Kũringana na ihoya rĩu rĩa kĩonereria, nĩ hoyaga kaingĩ atĩ andũ a mũhaano wa ng’ondu mahunjĩrio na mateithio kũmenya Jehova matanacererũo mũno. Ningĩ itanahunjĩria mũndũ nĩ hoyaga Jehova ahe ũũgĩ nĩguo hote kũmũkinyĩra ngoro. Nao arĩa metĩkĩrĩte ũhoro wa ma, ngahoya Jehova arathime kĩyo gitũ gĩa kũmateithia.” Mwarĩ wa Ithe witũ ũcio mũkũrũ ũrĩ na mĩaka 80 nĩ ateithĩtie andũ aingĩ matuĩke Aira a Jehova. O nawe no kũhoteke nĩ ũĩ andũ angĩ merutanagĩria mũno gwĩka wendi wa Ngai o na marĩ akũrũ.—Thoma Afilipi 2:17.

17. Ũiguaga atĩa igũrũ rĩgiĩ ũrĩa Jehova agekĩra andũ mahinda mokĩte?

¹⁷ Tũgũthiĩ na mbere kũhoya wendi wa Ngai wĩkwo nginya hĩndĩ ĩrĩa thũ cia Ũthamaki wa Ngai ikeherio thĩinĩ wa thĩ. Thutha ũcio nĩ tũkona wendi wa Ngai ũgĩĩkwo na njĩra nene makĩria rĩrĩa andũ bilioni nyingĩ makariũkio thĩinĩ wa thĩ njerũ. Jesu oigire ũũ: ‘Mũtikagege nĩ ũhoro ũcio; amu kwĩ hingo ĩroka arĩa othe me thĩinĩ wa mbĩrĩra makaigua mũgambo wakwa, na moime kuo.’ (Joh. 5:28, 29) Na githĩ rĩtigakorũo rĩrĩ ihinda rĩa gĩkeno mũno tũkĩnyita ũgeni endwa aitũ arĩa maakuire! Ngai ‘nĩagaatũgiria maithori mothe mathire maitho maitũ.’ (Kũg. 21:4) Andũ aingĩ arĩa makaariũkio nĩ “arĩa matarĩ athingu” arĩa maakuire matamenyete ma ĩgiĩ Jehova na Mũriũ wake. Gĩgaakorũo kĩrĩ gĩtĩo kĩnene mũno kũruta arĩa makaariũkio igũrũ rĩgiĩ wendi wa Ngai na muoroto wake, na nĩ ũndũ ũcio tũmateithie maagĩrĩre kũheo “muoyo wa tene na tene.”—Atũm. 24:15; Joh. 17:3.

18. Mabataro ma andũ marĩa ma bata mũno nĩ marĩkũ?

¹⁸ Rĩrĩa Ũthamaki wa Ngai ũgoka, nĩ ũgaatheria rĩĩtwa rĩake, na hĩndĩ ĩyo ciũmbe ciothe nĩ ikamũthathayagia irĩ na ũrũmwe. Hatarĩ nganja, Ngai nĩ akaahe andũ mabataro mao marĩa ma bata mũno rĩrĩa akaahingia maũndũ ma mbere matatũ marĩa tũhoyaga thĩinĩ wa ihoya rĩa kĩonereria. Gĩcunjĩ-inĩ kĩrĩa kĩrũmĩrĩire nĩ tũkaarĩrĩria maũndũ mangĩ ma bata marĩa Jesu aatũrutire tũhoyage.