BEZALELI na Oholiabu matiarĩ ageni wĩra-inĩ wa mĩako tondũ rĩrĩa maarĩ ngombo bũrũri-inĩ wa Misiri no kũhoteke nĩ maathondekete maturubarĩ maingĩ mũno. No rĩu wĩra ũrĩa warĩ mbere yao warĩ ngũrani. Mangĩatuĩkire mabundi manene mũno thutha wa kũheo wĩra wa gũtongoria gwakwo kwa hema ya gũtũnganwo. (Tham. 31:​1-​11) O na kũrĩ ũguo, nĩ andũ anini mũno maangĩonire indo imwe cia magegania iria mangĩathondekire. Hihi nĩ maakuire ngoro nĩ ũndũ wa kũmenya atĩ no andũ anini tu maangĩonire wĩra wao? Hihi no mũhaka andũ arĩa angĩ mone wĩra waku?

Indo imwe iria Bezaleli na Oholiabu maakire thĩinĩ wa hema ya gũtũnganwo ciarĩ cia kĩraathi kĩa igũrũ mũno. Kwa ngerekano ta wĩcirie ũhoro wa makerubi ma thahabu marĩa maarĩ igũrũ rĩa ithandũkũ rĩa kĩrĩkanĩro. Mũtũmwo Paulo oigire atĩ makerubi macio maarĩ na “riri.” (Ahib. 9:⁠5) Ta hũũra mbica ũthaka wa indo icio iria ciaturĩtwo na thahabu.​—Tham. 37:​7-9.

Korũo ũmũthĩ indo icio no cioneke, no kũhoteke cingĩigwo thĩinĩ wa nyũmba iria ciũĩkaine mũno iria ciigagwo indo cia tene, kũrĩa andũ aingĩ mangĩthiaga gũciĩrorera. No hĩndĩ ĩrĩa ciathondekirũo-rĩ, ũgwĩciria nĩ andũ aigana maagĩaga na mweke wa kwĩrorera ũthaka wa cio? Makerubi maaigagwo harĩa hatheru mũno, na nĩ ũndũ ũcio no Mũthĩnjĩri-Ngai-Mũnene wamonaga rĩrĩa aingĩra handũ hau riita rĩmwe o mwaka, hĩndĩ ya Mũthenya wa Kũhorohanĩria. (Ahib. 9:​6,  7) Kwoguo, nĩ andũ anini mũno maagĩire na mweke wa kũmona.

Korũo nĩwe Bezaleli kana Oholiabu-rĩ, ũngĩaiguire atĩa thutha wa kũruta wĩra mũnene wa gũthondeka indo thaka ũguo ũcoke ũmenye atĩ no andũ anini tu marĩcionaga? Ũmũthĩ andũ nĩ maiguaga wega mũno rĩrĩa angĩ mona wĩra wao na mamagathĩrĩria. Mathimaga bata wa mawĩra marĩa marutĩte kũringana na ũrĩa maragathĩrĩrio. No ũguo tiguo ndungata cia Jehova ikoragwo itariĩ. O ta Bezaleli na Oholiabu, gĩkeno gitũ kiumanaga na gwĩka wendi wa Ngai na gwĩtĩkĩrĩka nĩwe.

Hĩndĩ ya Jesu atongoria aingĩ a ndini nĩ maahoyaga nĩguo monwo nĩ andũ. Ĩndĩ Jesu oigire atĩ twagĩrĩirũo kũhoya tũtarĩ na ũhinga na tũtarĩ na  muoroto wa kũgathĩrĩrio nĩ andũ. Moimĩrĩro ma gwĩka ũguo nĩ marĩkũ? Oigire ũũ: “Thoguo ũrĩa wonaga hitho-inĩ nĩagakũhe ngatho.” (Mat. 6:​5, 6) Ũndũ ũrĩa wa bata ti ũrĩa andũ marona mahoya maitũ, ĩndĩ nĩ ũrĩa Jehova aramona. Nĩwe ũthimaga kana mahoya maitũ nĩ ma bata. Ũguo noguo kũrĩ harĩ ũndũ ũngĩ o wothe ũrĩa tũngĩhingia ũtungata-inĩ wake. Tũtiagĩrĩirũo nĩ kũwona ũrĩ wa bata nĩ ũndũ wa ũrĩa tũragathĩrĩrio nĩ andũ, ĩndĩ twagĩrĩirũo kũwona ũrĩ wa bata tondũ nĩ ũrakenia Jehova “ũrĩa wonaga hitho-inĩ.”

Rĩrĩa hema ya gũtũnganwo yarĩkire gwakwo, itu nĩ ‘rĩamĩhumbire, naguo riri wa Jehova ũkĩiyũra gĩikaro-inĩ kĩu.’ (Tham. 40:34) Ũndũ ũcio wonanirie biũ atĩ wĩra ũcio warĩ mwĩtĩkĩrĩku nĩ Jehova. Ũgwĩciria Bezaleli na Oholiabu maaiguire atĩa? O na gũtuĩka marĩĩtwa mao matiandĩkirũo indo-inĩ iria maathondekete, no mũhaka akorũo nĩ maakenire mũno nĩ ũndũ wa kũmenya atĩ wĩra wao warĩ na kĩrathimo kĩa Jehova. (Thim. 10:22) Mĩaka ĩrĩa yarũmĩrĩire, no mũhaka akorũo nĩ maaiguaga wega mũno nĩ kuona wĩra wa moko mao ũgĩthiĩ na mbere kũhũthĩrũo ũtungata-inĩ wa Jehova. Hatarĩ nganja, rĩrĩa makaariũkio thĩinĩ wa thĩ njerũ nĩ magaakena mũno maamenya atĩ hema ya gũtũnganwo yahũthĩrirũo ũthathaiya-inĩ wa ma makĩria ma mĩaka 500.

Thĩinĩ wa ithondeka rĩa Jehova ũmũthĩ, athondeki a thenema, arĩa macoraga, aini, ahũũri mbica, ataũri, na andĩki matitindaga makĩmenyithia andũ atĩ nĩo marutĩte wĩra ũcio. Na njĩra ĩyo nĩ ta gũtarĩ mũndũ wonaga wĩra ũrĩa marutaga. Ũguo noguo kũrĩ harĩ wĩra mũingĩ mũno ũrĩa ũrarutwo thĩinĩ wa ciũngano makĩria ma 110,000 thĩ yothe. Kwa ngerekano-rĩ, nũ wonaga mũrũ wa Ithe witũ ũrĩa wĩkaga mathabu akĩiyũria fomu iria irabatarania mũico-inĩ wa mweri? Nũ wonaga mwandĩki akĩhaarĩria riboti cia ũtungata cia kĩũngano? Rĩrĩa mũrũ kana mwarĩ wa Ithe witũ araruta wĩra mũna wa gũcokereria Nyũmba ya Ũthamaki nũ wonaga?

Ũtũũro-inĩ wao, Bezaleli na Oholiabu gũtirĩ hĩndĩ maaheirũo iheo kana indo cia kũmatũgĩria iria mangĩonanirie nĩ ũndũ wa wĩra ũrĩa mwega maarutire wa gũthondeka indo thaka mũno. No nĩ meetĩkĩrĩkire nĩ Jehova ũndũ ũrĩa warĩ wa bata makĩria. Hatarĩ nganja Jehova nĩ onire wĩra ũrĩa maarutĩte. Rekei twĩgerekanie na kĩonereria kĩao kĩa wĩnyihia na kwĩrutĩra biũ ũtungata-inĩ.