1, 2. (a) Nĩ irathimo irĩkũ cia kĩĩmwĩrĩ wĩriragĩria mũno gũgaakenera thĩinĩ wa Paradiso? (Rora mbica kĩambĩrĩria-inĩ gĩa gĩcunjĩ gĩkĩ.) (b) Nĩ irathimo irĩkũ cia kĩĩroho igaakorũo thĩinĩ wa thĩ njerũ?

“MUOYO ŨRĨA MUOYO MA.” Ciugo icio itũririkanagia ũhoro wa kĩĩrĩgĩrĩro gĩa gũgaatũũra tene na tene thĩinĩ wa Paradiso gũkũ thĩ. Mũtũmwo Paulo oigire atĩ “muoyo ũrĩa ũtagathira,” nĩguo “muoyo ũrĩa muoyo ma.” (Thoma 1 Timotheo 6:12, 19.) Twĩrĩgagĩrĩra ũtũũro wa tene na tene ũrĩa ũgatũrehera ũhurũko na gĩkeno gĩtagaathira. Ti ũndũ mũhũthũ kũhũũra mbica ũrĩa tũkaiguaga o mũthenya tuokĩra tũrĩ na ũgima mwega biũ wa mwĩrĩ, wa meciria, na wa ngoro. (Isa. 35:5, 6) Ta wĩcirie ũrĩa ũgaakorũo ũrĩ ũndũ wa gĩkeno gũtũũrania na endwa aitũ na arata, o hamwe na arĩa makaariũkio! (Joh. 5:28, 29; Atũm. 24:15) Ningĩ nĩ tũkaagĩa na mweke wa kwĩruta maũndũ maingĩ makĩria megiĩ sayanisi, nyĩmbo, gũcora kana maũndũ mangĩ.

² O na tũgĩtanyaga maũndũ mega ũguo-rĩ, irathimo iria nene thĩinĩ wa thĩ njerũ igakorũo irĩ cia kĩĩroho. Nĩ ũgaakorũo ũrĩ ũndũ wa gĩkeno mũno kũmenya atĩ rĩĩtwa rĩa Jehova nĩ rĩtheretio na ũnene wake ũgaatũgĩrio! (Mat. 6:9, 10) Nĩ tũgacanjamũka mũno tuona atĩ muoroto ũrĩa Jehova aarĩ naguo kĩambĩrĩria-inĩ  wĩgiĩ andũ na thĩ nĩ wahinga. Ningĩ ta wĩcirie ũrĩa ũgaakorũo ũrĩ ũndũ mũhũthũ gũkuhĩrĩria Jehova makĩria o ũrĩa tũgathiĩ tũgĩkinyanagĩra.—Thab. 73:28; Jak. 4:8.

3. Nĩ ũndũ ũrĩkũ twagĩrĩirũo gũkorũo tũkĩĩhaarĩria nĩ ũndũ waguo?

³ Tũrĩ na ma atĩ nĩ tũgaakenera irathimo icio tondũ Jesu oigire atĩ “maũndũ mothe mahotekaga nĩ Ngai.” (Mat. 19:25, 26) Ĩndĩ angĩkorũo nĩ tũrerĩgĩrĩra gũgaatũũra thĩinĩ wa thĩ tene na tene no mũhaka twĩrutanĩrie mahinda-inĩ maya nĩguo ‘twĩnyitĩre’ muoyo wa tene na tene. No mũhaka tũikarage tũkĩrĩgagĩrĩra mũthia wa thĩ ĩno njũru na ningĩ nĩ tũkũbatara kuoya makinya marĩa magĩrĩire nĩguo twĩhaarĩrie nĩ ũndũ wa ũtũũro thĩinĩ wa thĩ njerũ. Tũngĩhota atĩa gwĩka ũguo tũrĩ o thĩinĩ wa mũtabarĩre ũyũ mũru.

4. Heana ngerekano ĩronania ũrĩa tũngĩĩharĩria nĩ ũndũ wa ũtũũro thĩinĩ wa thĩ njerũ.

⁴ Tũngĩĩharĩria atĩa mahinda-inĩ maya nĩ ũndũ wa ũtũũro thĩinĩ wa thĩ njerũ ya Ngai? Ta tua atĩ ũrabanga gũthamĩra bũrũri ũngĩ. Ũngĩĩharĩria atĩa? No kũhoteke wambĩrĩrie kwĩruta rũthiomi rwa andũ arĩa maikaraga kũu. Kwĩruta ũhoro wĩgiĩ ũndũire wao no gũgũteithie. No wambĩrĩrie kwĩmenyeria irio imwe iria marĩaga. Wahota kwambĩrĩria gwĩka maũndũ ta ũrĩ mũtũũri wa bũrũri ũcio, tondũ ũguo nĩguo ũratanya gũgeekaga rĩrĩa ũgaathamĩra kuo. O ũndũ ũmwe na ũcio no twĩhaarĩrie nĩ ũndũ wa ũtũũro thĩinĩ wa thĩ njerũ na njĩra ya gwĩkaga maũndũ o ũrĩa wothe tũngĩhota ta ũrĩa tũratanya gũgeekaga hĩndĩ ĩyo. Ta wĩcirie ũhoro wa ngerekano ici.

5, 6. Gwathĩkĩra ũtongoria wa Ngai kũrĩtũmenyagĩria atĩa nĩ ũndũ wa ũtũũro thĩinĩ wa thĩ njerũ?

⁵ Thĩinĩ wa thĩ njerũ, ũnene wa Ngai nĩ ũgaatũgĩrio biũ. Maũndũ magaakorũo marĩ ngũrani biũ na ũrĩa marĩ wathani-inĩ wa andũ ũrĩa ũtongoragio nĩ Shaitani. Andũ amwe mendete kwĩyatha na gwĩka ũrĩa mekwenda. No hihi moimĩrĩro makoretwo marĩ marĩkũ? Kũrega ũtongoria wa Ngai nĩ kũmareheire mĩnyamaro, na mathĩna maingĩ. (Jer. 10:23) Nĩ twĩriragĩria mũno hĩndĩ ĩrĩa andũ othe makenyihĩria ũnene wa Jehova wa wendo.

⁶ Gĩgaakorũo kĩrĩ gĩkeno gũkorũo rungu rwa ũtongoria wa Jehova thĩinĩ wa thĩ njerũ tũkĩruta wĩra wa gũthakaria thĩ, gũthomithia arĩa makaariũkio, na kũhingia maũndũ mothe marĩa Jehova akenda twĩke. No rĩrĩ, ĩ tũngĩkaaheo wĩra mũna no twage gũkenio nĩguo? Hihi nĩ tũgaathĩkĩra ũtongoria ũcio na njĩra ya gwĩka o ũrĩa wothe tũngĩhota tũhingie wĩra ũcio na tũũkenere? Aingĩ aitũ tũngiuga ĩĩ! No rĩrĩ, hihi nĩ tũrathiĩ na mbere gwathĩkĩra ũtongoria wa Ngai mahinda-inĩ maya? Angĩkorũo nĩ tũreka ũguo-rĩ, nĩ kwĩharĩria tũrehaarĩria nĩ ũndũ wa muoyo wa tene na tene rungu rwa wathani wa Jehova.

7, 8. (a) Twagĩrĩirũo gũkũria roho wa kũnyitanĩra nĩkĩ? (b) Nĩ mogarũrũku marĩkũ Akristiano amwe macemanĩtie namo? (c) Nĩ ũndũ ũrĩkũ tũngĩkorũo na ma naguo wĩgiĩ ũtũũro thĩinĩ wa thĩ njerũ?

⁷ No twĩhaarĩrie nĩ ũndũ wa ũtũũro thĩinĩ wa thĩ njerũ na njĩra ya kwĩnyihĩria ũtongoria ũrĩa Jehova atũheaga mahinda-inĩ maya na ningĩ na njĩra ya kwĩrutanĩria gũkũria roho wa ũnyitanĩri na ngumo ya kũiganĩra. Kwa ngerekano, tũngĩheo wĩra ũngĩ ngũrani na ũrĩa tũmenyerete, twagĩrĩirũo kũwĩtĩkĩra na gwĩka o ũrĩa wothe tũngĩhota nĩguo tũũrute tũkenete. Tũngĩĩruta kũnyitanĩra na arĩa maratũtongoria mahinda-inĩ maya, no kũhoteke noguo tũgeka thĩinĩ wa thĩ njerũ. (Thoma Ahibirania 13:17.) Thĩinĩ wa Bũrũri wa Kĩĩranĩro, Aisiraeli nĩ kũgaĩrũo magaĩirũo o andũ kũrĩa megũikara. (Ndar.  26:52-56; Josh. 14:1, 2) Ithuĩ tũtiũĩ kũrĩa o mũndũ akaagaĩrũo thĩinĩ wa thĩ njerũ. O na kũrĩ ũguo, ũnyitanĩri witũ nĩ ũgaatũma tũiganĩre na tũkorũo na gĩkeno kĩnene tũkĩhingia wendi wa Jehova gũtekũmakania kũrĩa tũgaatũũra hĩndĩ ĩyo.

⁸ Kĩyo o gĩothe kĩrĩa tũngĩĩkĩra harĩ kũnyitanĩra na ithondeka rĩa Jehova na kũruta mawĩra ma kĩĩroho marĩa twĩhokeirũo ti kĩndũ gĩkĩringithanio na gĩtĩo kĩrĩa tũgaakorũo nakĩo rungu rwa Ũthamaki wa Ngai. O na kũrĩ ũguo, o ũrĩa mahinda marathiĩ maũndũ maitũ no macenjie. Kwa ngerekano, aarĩ na ariũ a Ithe witũ amwe arĩa maatungataga Betheli ya Amerika nĩ maaheirũo mawĩra mangĩ ũtungata-inĩ wa hĩndĩ-ciothe na rĩu nĩ marakenera irathimo nyingĩ cia kĩĩroho. Nĩ ũndũ wa ũkũrũ na maũndũ mangĩ, amwe arĩa maatungataga tene marĩ arori arĩa magendaga nĩ matuĩkĩte mapainia a mwanya. Tũngĩkũria mwerekera wa kũiganĩra, tũhoe Ngai atũhe ũteithio wake, na twĩke ũrĩa wothe tũngĩhota ũtungata-inĩ wake nĩ tũrĩkoragwo na gĩkeno na twamũkĩre irathimo nyingĩ. (Thoma Thimo 10:22.) Ĩ namo matanya maitũ ma mahinda marĩa mokĩte? No gũkorũo nĩ twĩciragia kũrĩa tũngĩenda gũgatũũra thĩinĩ wa thĩ njerũ, ĩndĩ no kũhoteke tũkeerũo tũthamĩre kũndũ kũngĩ. Gũtekũmakania kũrĩa tũgatungatĩra kana ũrĩa tũgakorũo tũgĩka, no tũkorũo na ma biũ atĩ nĩ tũgakorũo na gĩkeno na tũiganĩire.—Neh. 8:10.

9, 10. (a) Nĩ maũndũ-inĩ marĩkũ tũkabatara gũkũria wetereri thĩinĩ wa thĩ njerũ? (b) Tũngĩonania atĩa atĩ tũrĩ na wetereri?

⁹ No kũhoteke thĩinĩ wa thĩ njerũ kũrĩ mahinda tũkabatara kuonania wetereri. Kwa ngerekano, twahota gũkanaigua atĩ andũ amwe nĩ mariũkĩtio, na andũ a famĩlĩ na arata ao nĩ makenete mũno nĩ ũndũ ũcio. O na kũrĩ ũguo, no gũkorũo ithuĩ nĩ tũkabatara gweterera kũriũkio kwa endwa aitũ. Kũngĩthiĩ ũguo-rĩ, hihi nĩ tũgakenera na arĩa angĩ na tũkorũo na wetereri? (Rom. 12:15) Kwĩruta gũkũria wetereri harĩ kũhinga gwa ciĩranĩro cia Jehova mahinda-inĩ maya nĩ gũgatũteithia gũkũria wetereri hĩndĩ ĩyo.—Koh. 7:8.

¹⁰ Ningĩ no twĩhaarĩrie gũgatũũra thĩinĩ wa thĩ njerũ na njĩra ya kuonania wetereri rĩrĩa twamũkĩra mogarũrũku harĩ ũtaũku witũ wĩgiĩ Bibilia. Hihi nĩ twĩrutaga na tũkagĩa na wetereri o ũrĩa ũtaũku witũ wĩgiĩ ma cia Bibilia ũrathiĩ ũkĩguũragio mahinda-inĩ maya? Angĩkorũo nĩ twĩkaga ũguo, no kũhoteke tũtikaritũhĩrũo kũgĩa na wetereri thĩinĩ wa thĩ njerũ o ũrĩa Jehova agathiĩ atũguũrĩirie wendi wake gũtwerekera.—Thim. 4:18; Joh.16:12.

11. Nĩ ũndũ ũrĩkũ Jehova aratũruta wĩgiĩ ũrata witũ na arĩa angĩ, na ũndũ ũcio ũgatũguna atĩa thĩinĩ wa thĩ njerũ?

¹¹ Ngumo ĩngĩ ĩngĩtũteithia gũgatũũra thĩinĩ wa thĩ njerũ nĩ kuohanĩra. Hĩndĩ ya Wathani wa Mĩaka Ngiri wa Kristo, arĩa athingu na arĩa matarĩ athingu no gũkorũo nĩ makoya ihinda gũtuĩka akinyanĩru. (Atũm. 24:15) Hihi nĩ tũkahota kuonania wendo na gũkorũo tũrĩ na wohanĩri? Tweruta kuohanagĩra na gũkorũo na ũrata na arĩa angĩ, nĩ ũgakorũo ũrĩ ũndũ mũhũthũ gwĩka ũguo o na hĩndĩ ĩyo.—Thoma Akolosai 3:12-14.

12. Twagĩrĩirũo kwĩharĩria rĩu nĩ ũndũ wa ũtũũro thĩinĩ wa thĩ njerũ nĩkĩ?

¹² Thĩinĩ wa thĩ njerũ, ti hĩndĩ ciothe tũkoonaga kĩrĩa gĩothe tũrenda na rĩmwe na rĩmwe nĩ tũkabataraga kuonania wetereri. Kuonania ngatho na kũiganĩra maũndũ-inĩ mothe nĩ ũgakorũo ũrĩ ũndũ wa bata o tũkĩgunĩkaga kuumana na wĩnyihia witũ harĩ ũnene wa Jehova wa wendo. Nĩ tũkabataraga kuonania ngumo iria Jehova aratũruta gũkũria ũmũthĩ. Tũngĩĩmenyeria gũikara  ũrĩa tũgatũũra hĩndĩ ĩyo, tũgũkorũo tũgĩkũria ngumo iria tũkabataraga kuonania tene na tene. Tũgũkorũo tũgĩkĩra wĩtĩkio witũ hinya atĩ “thĩ ĩrĩa ĩgoka” nĩ ya ma biũ. (Ahib. 2:5; 11:1) Makĩria ma ũguo, tũronania atĩ nĩ tũrerirĩria mũno thĩ njerũ ĩrĩ na ũthingu. Tũrehaarĩria nĩ ũndũ wa gũgatũũra tene na tene thĩinĩ wa thĩ njerũ ya Ngai.

13. Nĩ maũndũ marĩkũ tũkaigaga mbere ũtũũro-inĩ witũ thĩinĩ wa thĩ njerũ?

¹³ Nĩ harĩ ũndũ ũngĩ ũmwe tũngĩĩharĩria nĩ ũndũ wa ũtũũro thĩinĩ wa thĩ njerũ. O na gũtuĩka nĩ twĩrĩirũo irio nyingĩ na indo ingĩ thĩinĩ wa thĩ njerũ, kũhingĩrio kwa mabataro maitũ ma kĩĩroho nĩ kuo gũgatũrehera gĩkeno kĩrĩa kĩnene makĩria. (Mat. 5:6) Maũndũ ma kĩĩroho nĩmo tũkaigaga mbere na nĩ tũkonania atĩ nĩ tũrakenera gũtungatĩra Jehova. (Thab. 37:4) Tũngĩiga maũndũ ma kĩĩroho mbere ũtũũro-inĩ witũ ũmũthĩ, nĩ kwĩharĩria tũreharĩria nĩ ũndũ wa muoyo ũrĩa wa ma mahinda-inĩ marĩa maroka.—Thoma Mathayo 6:19-21.

14. Nĩ mĩoroto ĩrĩkũ ya kĩĩroho ĩngĩteithia andũ ethĩ kwĩharĩria nĩ ũndũ wa muoyo wa tene na tene?

¹⁴ Tũngĩongerera gĩkeno gitũ atĩa maũndũ-inĩ ma kĩĩroho? Njĩra ĩmwe nĩ kwĩigĩra mĩoroto ya kĩĩroho. Angĩkorũo wee wĩ mũndũ mwĩthĩ na nĩ ũreciria na ũritũ ũhoro wĩgiĩ gũtungatĩra Jehova-rĩ, ũkuona atĩa ũngĩthuthuria ũhoro ũrĩa ũcabĩtwo mabuku-inĩ maitũ wĩgiĩ ũtungata wa hĩndĩ-ciothe na wĩigĩre ũmwe wa mĩoroto ĩyo? * No warie na amwe arĩa makoretwo kwa ihinda iraya ũtungata-inĩ wa hĩndĩ-ciothe. Ũngĩhũthĩra ũtũũro waku gũtungatĩra Jehova rĩu, ũreharĩria gũkamũtungatĩra thĩinĩ wa thĩ njerũ kũrĩa ũmenyeru waku ũgakorũo ũrĩ wa bata mũno.

15. Nĩ mĩoroto ĩrĩkũ ĩngĩ ya kĩĩroho tũngĩĩigĩra?

¹⁵ Nĩ mĩoroto ĩrĩkũ ya kĩĩroho tũngĩĩigĩra tũrĩ ahunjia a Ũthamaki? No twĩigĩre muoroto wa kwĩruta njĩra njerũ ya kũhũthĩra ũtungata-inĩ. Kana twĩrutanĩrie kwagĩria ũtaũku witũ wĩgiĩ mootaro ma Bibilia na ũrĩa mangĩhũthĩka. Na no twĩigĩre muoroto wa gũkũria ũhoti wa gũthoma na kwaria mbere ya andũ kana gũcokia ciũria mĩcemanio-inĩ. Na no wĩcirie ũhoro wa mĩoroto ĩngĩ. Ũndũ ũrĩa tũreruta nĩ atĩ, kwĩigĩra mĩoroto ya kĩĩroho nĩ gũgũgũteithia kuongerera kĩyo gĩaku ũtungata-inĩ, na ũndũ ũcio nĩ ũgũgũteithia kwĩharĩria gũgatũũra thĩinĩ wa thĩ njerũ.

16. Nĩkĩ gũtungatĩra Jehova nĩguo ũndũ ũrĩa mwega biũ ũtũũro-inĩ?

¹⁶ Hihi gũkorũo tũkĩĩharĩria nĩ ũndũ wa thĩ njerũ nĩ kuuga atĩ tũtingĩkenera ũtũũro mahinda-inĩ maya? Aca! Gũtungatĩra Jehova nĩguo ũndũ ũrĩa wĩ gĩkeno mũno ũtũũro-inĩ. Tũtimũtungatagĩra tondũ wa gũtindĩkĩrĩrio gwĩka ũguo kana no getha tũkahonoka thĩna ũrĩa mũnene. Jehova atũũmbĩte tũkoragwo na ũrata wa hakuhĩ hamwe nake, na ũndũ ũcio nĩ ũtũrehagĩra gĩkeno kĩnene ũtũũro-inĩ. Gũkorũo twendetwo nĩ Jehova na gũtongorio nĩwe nĩ kwa bata makĩria gũkĩra ũndũ ũngĩ o wothe. (Thoma Thaburi 63:1-3.) Nĩ ma, tũtirabatara gweterera thĩ njerũ nĩ getha tũgakenera irathimo cia kĩĩroho iria ciumanaga na gũtungatĩra Jehova na ngoro yothe tondũ tũrĩ nacio ũmũthĩ ũyũ. Hatarĩ nganja, amwe aitũ nĩ tũkoretwo tũkĩyonera irathimo icio kwa mĩaka mĩingĩ, na kuumana na maũndũ marĩa twĩyoneire nĩ tũĩ atĩ gũtirĩ ũtũũro ũngĩ ũngĩtũrehera gĩkeno.—Thab. 1:1-3; Isa. 58:13, 14.

17. Nĩ na njĩra ĩrĩkũ maũndũ ma gwĩkenia na kũhurũka magakorũo marĩ ma bata thĩinĩ wa Paradiso?

¹⁷ Thĩinĩ wa Paradiso, nĩ tũgakoragwo na mahinda ma gũkenera ũtũũro na gwĩka maũndũ marĩa twendete. Jehova ndangĩatũũmbire tũrĩ na merirĩria ma kũhingia maũndũ marĩa twendete na gũkenera ũtũũro angĩkorũo ndeendaga tũmahingagie. (Koh. 2:24) Kũgerera njĩra ĩyo na njĩra ingĩ, hĩndĩ ciothe Jehova nĩ akaahingagĩria ‘kĩrĩa gĩothe kĩĩ muoyo kĩrĩa gĩkwenda.’ (Thab. 145:16) Maũndũ ma gwĩkenia na kũhurũka nĩ ma bata no nĩ tũmakenagĩra makĩria rĩrĩa twaiga ũrata witũ na Jehova mbere. Noguo gũgakorũo thĩinĩ wa Paradiso. Na githĩ ndũkĩrĩ ũndũ wa ũũgĩ harĩ ithuĩ kwĩmenyeria kũigaga maũndũ ma Ũthamaki mbere na gũthingata irathimo cia kĩĩroho iria Jehova atũheete!—Mat. 6:33.

18. Tũngĩonania atĩa atĩ nĩ tũreharĩria gũgatũũra tene na tene thĩinĩ wa Paradiso?

¹⁸ Thĩinĩ wa Paradiso ũtũũro ũgakorũo wĩ mwega gũkĩra ũrĩa tũngĩĩcirĩria. Rekei tuonanie ũrĩa twĩriragĩria gũgakorũo kuo na njĩra ya kwĩharĩria rĩu nĩ ũndũ wa muoyo ũrĩa wa ma. Nĩ tũkũriei ngumo njega na tũkenagĩre biũ kũnyitanĩra wĩra-inĩ ũrĩa tũheetwo wa kũhunjia. Tũrogĩaga na gĩkeno kĩrĩa kiumanaga na gũthingata mĩoroto ya kĩĩroho. Tondũ tũrĩ na wĩtĩkio mũrũmu harĩ ciĩranĩro cia Jehova, rekei twĩhaarĩrie ũmũthĩ nĩ ũndũ wa ũtũũro thĩinĩ wa thĩ njerũ!