Hihi nĩ Ũraririkana?

Nĩ ũthomete na kinyi icunjĩ cia ica ikuhĩ cia Mũrangĩri? ta rora kana no ũhote gũcokia ciũria ici:

Nĩ ũira ũrĩkũ wa Kĩĩmandĩko wonanagia atĩ Ngai nĩ atũiguagĩra tha?

Rĩrĩa Aisiraeli maarĩ ngombo Misiri, Ngai nĩ oonaga mathĩna mao na akaigua ruo ta rũrĩa maaiguaga. (Tham. 3:7; Isa. 63:9) Tũmbĩtwo na mũhianĩre wa Ngai, na kwoguo no tũhote kuonania tha. Nĩ atũiguagĩra tha o na rĩrĩa tũraigua ta tũtagĩrĩire kũiguĩrũo tha nĩwe.​—wp18.3, kar. 8-9.

Morutani ma Jesu maateithirie andũ atĩa gũtooria mũthutũkanio?

Ayahudi aingĩ matukũ-inĩ ma Jesu nĩ maathutũkanagia andũ. Jesu nĩ aatĩtĩrithirie bata wa kwĩnyihia na akĩmenereria ũhoro wĩgiĩ mũndũ gwĩtĩa atĩ tondũ nĩ wa rũrĩrĩ rũna. Eekĩrire arũmĩrĩri ake ngoro monage Akristiano arĩa angĩ ta ariũ a Ithe ũmwe.​—w18.06, kar. 9-10.

Nĩ ũndũ ũrĩkũ tũngĩĩruta kuumana na kĩrĩa gĩatũmire Ngai agirie Musa kũingĩra Bũrũri wa Kĩĩranĩro?

Musa aarĩ na ũrata wa hakuhĩ hamwe na Jehova. (Gũcok. 34:10) Aisiraeli marĩ hakuhĩ kũniina mĩaka 40 werũ-inĩ, nĩ maatetire riita rĩa kerĩ nĩ ũndũ wa kwaga maĩ. Nake Ngai akĩra Musa aarĩrie rwaro rwa ihiga. No Musa akĩgũtha rwaro rũu rwa ihiga. No gũkorũo Jehova aarakarire tondũ Musa ndaarũmĩrĩire motaaro marĩa aamũheete kana tondũ Musa ndaagoocithirie Ngai kũgerera kĩama kĩu. (Ndar. 20:6-12) Ũndũ ũcio wagĩrĩirũo gũtũruta bata wa gwathĩkĩra Jehova na kũmũgoocithagia.​—w18.07, kar. 13-14.

Nĩkĩ no tũhĩtie tũngĩtuanagĩra na maũndũ marĩa monekaga na maitho?

Kũrĩ maũndũ matatũ marĩa kaingĩ matũmaga andũ matuanĩre kũringana na maũndũ marĩa marona na maitho, nĩmo rũrĩrĩ, ũtonga, na mĩaka. Nĩ harĩ bata twĩrute kuonaga andũ arĩa angĩ ta ũrĩa Jehova amonaga, handũ ha kũmathutũkania. (Atũm. 10:34, 35)​—w18.08, kar. 8-12.

Nĩ njĩra irĩkũ imwe Akristiano arĩa akũrũ mangĩteithĩrĩria arĩa angĩ?

Mũkristiano mũkũrũ ũcenjeirio wĩra ũrĩa ararutaga no akoragwo arĩ wa bata harĩ Ngai na akoragwo na ũteithio mũno harĩ andũ arĩa angĩ. No ahunjĩrie athuri kana atumia matetĩkĩtie a Akristiano, ateithie arĩa matigĩte kũnyitanĩra na kĩũngano, arute andũ Bibilia, na andandũre ũtungata wake.​—w18.09, kar. 8-11.

Nĩ indo irĩkũ Akristiano marĩ nacio thĩinĩ wa Gathandũkũ kao ka Indo cia Kũrutana?

Nĩ gũkoragwo na tũkandi twa jw.org na tũratathi twa kũnyita andũ ũgeni. Ningĩ nĩ tũkoragwo na trakti inyanya ihaarĩirio na njĩra njega o hamwe na ngathĩti ya Mũrangĩri na Amkeni! Gathandũkũ kau ningĩ nĩ gakoragwo na broshua cigana ũna, mabuku merĩ marĩa tũhũthagĩra kũruta andũ Bibilia, na video inya njega, iria nĩ hamwe na Wagĩrĩirũo Kwĩruta Bibilia Nĩkĩ?​—w18.10, kar. 16.

Mũkristiano ‘angĩgũra ũhoro wa ma’ atĩa ta ũrĩa Thimo 23:23 yonanagia?

Tũtigũraga ũhoro wa ma na mbeca. O na kũrĩ ũguo, nĩ tũbataraga kũhũthĩra ihinda na gwĩkĩra kĩyo nĩguo twĩgĩĩre naguo.​—w18.11, kar. 4.

Tũngĩĩruta atĩa kuumana na ũrĩa Hosea aahiũranirie na mũtumia wake Gomeri?

Gomeri nĩ eekire ũtharia rĩngĩ na rĩngĩ, no Hosea nĩ aamuoheire na agĩthiĩ na mbere gũikarania nake. Mũkristiano angĩingĩra ũtharia-inĩ, ũrĩa mahikanĩtie nake ũtarĩ na mahĩtia no amuohere. Angĩtua itua rĩa gũkomania na ũcio ũrĩ na mahĩtia, hatingĩkorũo na gĩtũmi kĩngĩ gĩa gũtũma matigane Kĩĩmandĩko.​—w18.12, kar. 13