1. Andũ mathondekaga ũrata na njĩra ĩrĩkũ?

KAINGĨ ũndũ wa mbere ũrĩa twĩkaga twacemania na mũndũ nĩgetha atuĩke mũrata witũ wa hakuhĩ nĩ kũhũthĩra mahinda hamwe nake. O ũrĩa mũraranĩria na mũkerana ũrĩa mũreciria, noguo ũrata wanyu ũthiaga ũgĩĩte na hinya. O na kũrĩ ũguo, nĩ harĩ moritũ tũngĩcemania namo tũkĩĩrutanĩria kũgĩa na ũrata wa hakuhĩ hamwe na Jesu. Nĩ moritũ ta marĩkũ hihi?

2. Ũritũ wa mbere ũrĩa tũcemanagia naguo nĩ ũrĩkũ?

² Ũritũ wa mbere nĩ atĩ tũtirĩ twacemania na Jesu ũthiũ kwa ũthiũ. O na Akristiano aingĩ a karine ya mbere maationete Jesu. O na kũrĩ ũguo mũtũmwo Petero ooigire ũũ: “O na gũtuĩka mũtiamuonire-rĩ, nĩ mũmwendete. O na gũtuĩka rĩu mũtiramuona, no muonanagia wĩtĩkio harĩ we.” (1 Pet. 1:8) Ũguo nĩ kuonania atĩ no tũhote kũgĩa na ũrata wa hakuhĩ hamwe na Jesu o na gũtuĩka tũtirĩ twacemania nake ũthiũ kwa ũthiũ.

3. Ũritũ wa kerĩ ũrĩa tũcemanagia naguo nĩ ũrĩkũ?

³ Ũritũ wa kerĩ nĩ atĩ tũtingĩhota kwaranĩria na Jesu. Rĩrĩa tũrahoya, tũkoragwo tũkĩaria na Jehova. O na akorũo rĩrĩa tũrahoya tũhoyaga kũgerera harĩ rĩĩtwa rĩa Jesu, tiwe tũkoragwo tũkĩaria nake. O na ũhoro wa ma nĩ atĩ Jesu ndendaga tũmũhoe. Nĩkĩ? Tondũ mahoya nĩ gĩcunjĩ kĩa ũthathaiya na Jehova nowe wiki tu wagĩrĩire gũthathaiyo. (Mat. 4:10) O na  kũrĩ ũguo, no tũhote kuonania atĩ nĩ twendete Jesu.

4. Ũritũ wa gatatũ ũrĩa tũcemanagia naguo nĩ ũrĩkũ? Na tũkwarĩrĩria maũndũ marĩkũ gĩcunjĩ-inĩ gĩkĩ?

⁴ Ũritũ wa gatatũ nĩ atĩ Jesu aikaraga kũrĩa igũrũ na kwoguo tũtingĩhota kũhũthĩra mahinda hamwe nake. O na kũrĩ ũguo, no tũhote kũmenya maũndũ maingĩ megiĩ Jesu o na tũtarĩ hakuhĩ nake. Tũkwarĩrĩria maũndũ mana tũngĩka nĩguo twĩkĩre hinya ũrata witũ hamwe nake. No rekei twambe tuone nĩkĩ nĩ ũndũ wa bata kũgĩa na ũrata wa hakuhĩ hamwe na Kristo.

5. Twagĩrĩirũo gũkorũo tũrĩ arata a Jesu nĩkĩ? (Ningĩ rora tũthandũkũ, “ Ũrata Hamwe na Jesu nĩ Ũtũmaga Mũndũ Agĩe na Ũrata Hamwe na Jehova” na “ Mawoni Marĩa Magĩrĩire Megiĩ Itemi rĩa Jesu.”)

⁵ No mũhaka tũkorũo tũrĩ arata a Jesu nĩguo tũkorũo na ũrata mwega hamwe na Jehova. Nĩkĩ? Ta wĩcirie maũndũ maya merĩ. Wa mbere, Jesu eerire arutwo ake ũũ: “Awa we mwene nĩ amwendete, tondũ nĩ mũkoretwo mũnyendete.” (Joh. 16:27) Ningĩ ooigire ũũ: “Gũtirĩ mũndũ ũũkaga kũrĩ Awa atagereire harĩ niĩ.” (Joh. 14:6) Kũgeria gũtuĩka mũrata wa Jehova ũtarĩ na ũrata wa hakuhĩ hamwe na Jesu, nĩ ta kũgeria kũingĩra nyũmba ũtagereire mũrango-inĩ. Jesu nĩ aahũthĩrire ngerekano ta ĩyo rĩrĩa ooigire atĩ we nĩ “mũrango wa ng’ondu.” (Joh. 10:7) Wa kerĩ, Jesu eegerekanirie biũ na Ithe. Eerire arutwo ake ũũ: “Mũndũ o wothe ũnyonete nĩ onete Awa o nake.” (Joh. 14:9) Kwoguo njĩra ĩmwe ya bata ĩngĩtũteithia kũmenya ũhoro wa Jehova nĩ kwĩruta ũhoro wĩgiĩ ũtũũro wa Jesu. O ũrĩa tũkwĩruta ũhoro wĩgiĩ Jesu, noguo wendo witũ harĩ we ũgũkũra, na o ũrĩa ũrata witũ hamwe na Jesu ũgũkũra noguo tũkwenda Ithe o na makĩria.

6. Ũndũ ũngĩ wagĩrĩirũo gũtũma tũkorũo na ũrata mwega hamwe na Jesu nĩ ũrĩkũ? Taarĩria.

 ⁶ No mũhaka tũkorũo na ũrata mwega hamwe na Jesu nĩgetha mahoya maitũ macokio. Ũguo nĩ kuonania atĩ, kuuga “kũgerera harĩ rĩĩtwa rĩa Jesu” gwiki tũkĩrĩkĩrĩria mahoya maitũ ti kũiganu. Nĩ twagĩrĩirũo gũtaũkĩrũo nĩ ũrĩa Jehova ahũthagĩra Jesu gũcokia mahoya maitũ. Jesu eerire atũmwo ũũ: “Ũndũ o wothe mũrĩhoyaga na rĩĩtwa rĩakwa, nĩ ndĩrĩmũhingagĩria.” (Joh. 14:13) O na gũtuĩka Jehova nĩwe ũthikagĩrĩria na agacokia mahoya maitũ, nĩ aheete Jesu wathani wa kũhingia matua make. (Mat. 28:18) Kwoguo, Ngai atanacokia mahoya maitũ, ambaga kũrora kana nĩ tũhũthĩrĩte ũtaaro ũrĩa Jesu aaheanire. Kwa ngerekano, Jesu ooigire ũũ: “Mũngĩohagĩra andũ mehia mao, Ithe wanyu wa igũrũ o nake nĩ arĩmuohagĩra; no angĩkorũo mũtirĩohagĩra andũ mehia mao, o nake Ithe wanyu ndarĩmuohagĩra mehia manyu.” (Mat. 6:14, 15) Na githĩ ndũkĩrĩ ũndũ wa bata gwĩkagĩra andũ arĩa angĩ maũndũ na njĩra ya ũtugi ta ũrĩa Jehova na Jesu matwĩkagĩra!

7. Nĩ a magunĩkaga kuumana na igongona rĩa ũkũũri rĩa Jesu?

⁷ Andũ arĩa makoragwo na ũrata wa hakuhĩ hamwe na Jesu no o tu magunĩkaga kuumana na igongona rĩake rĩa ũkũũri. Tũmenyaga ũguo atĩa? Jesu ooigire atĩ nĩ angĩarutire “muoyo wake nĩ ũndũ wa arata ake.” (Joh. 15:13) Andũ ehokeku arĩa maatũũraga mbere ya Jesu gũka gũkũ thĩ, no mũhaka makeeruta ũhoro wĩgiĩ Jesu na mamwende. Athuri na atumia ehokeku ta Iburahimu, Sara, Musa, na Rahabu nĩ makaariũkio, no nĩguo maheo muoyo wa tene na tene nĩ makaabatara gũkũria ũrata hamwe na Jesu.—Joh. 17:3; Atũm. 24:15; Ahib. 11:8-12, 24-26, 31.

8-9. O ta ũrĩa Johana 15:4, 5 ĩtaarĩirie-rĩ, gũkorũo na ũrata hamwe na Jesu gũtũteithagia gwĩka atĩa, na nĩkĩ ũndũ ũcio nĩ wa bata?

⁸ Nĩ tũkenagĩra kũrutithania wĩra hamwe na Jesu rĩrĩa tũrahunjia na tũkarutana ũhoro ũrĩa mwega wa Ũthamaki. Rĩrĩa Jesu aarĩ gũkũ thĩ aarĩ mũrutani. Na kuuma Jesu acoka igũrũ, akoretwo agĩthiĩ na mbere kũbanga wĩra wa kũhunjia na kũrutana tondũ nĩwe mũtwe wa kĩũngano. Nĩ onaga na agakenio nĩ kĩyo gĩaku gĩa gũteithia andũ aingĩ o ũrĩa wahota mamũmenye na mamenye Ithe. Tũhotaga wĩra ũcio nĩ ũndũ wa gũteithio nĩ Jehova na Jesu.—Thoma Johana 15:4, 5.

⁹ Kiugo kĩa Ngai nĩ kĩonanagia wega atĩ no mũhaka tũkũrie na tũtũũrie wendo harĩ Jesu nĩguo tũkenie Jehova. Nĩ ũndũ ũcio, rekei twarĩrĩrie maũndũ mana tũngĩka nĩguo tũtuĩke arata a Jesu.

10. Ũndũ wa mbere ũrĩa tũbatiĩ gwĩka nĩguo tũkũrie ũrata hamwe na Jesu nĩ ũrĩkũ?

¹⁰ (1) Kũmenya Jesu. No twĩke ũguo na njĩra ya gũthoma mabuku ma Mathayo, Mariko, Luka, na Johana. Tũngĩĩcũrania maũndũ marĩa marĩ Bibilia-inĩ megiĩ ũtũũro wa Jesu, no tũhote kũmwenda na kũmũtĩa nĩ ũndũ wa ũrĩa eekagĩra andũ maũndũ na njĩra ya ũtugi. Kwa ngerekano, o na gũtuĩka nĩwe warĩ Mwathi wa arutwo ake, ndaamonaga matariĩ ta ngombo. Handũ ha ũguo, nĩ aameraga ũrĩa areciria na ũrĩa araigua. (Joh. 15:15) Rĩrĩa marĩ na kĩeha, o nake nĩ aaiguaga kĩeha na akarĩranĩra hamwe nao. (Joh. 11:32-36) O na andũ arĩa maamũkararagia nĩ meeyonagĩra atĩ nĩ aatuĩkaga mũrata wa andũ arĩa metĩkĩra ndũmĩrĩri yake. (Mat. 11:19) Tũngĩĩgerekania na ũrĩa Jesu eekagĩra arutwo ake, ũrata witũ hamwe na andũ arĩa angĩ nĩ ũkũgĩa na hinya makĩria, nĩ tũrĩiguaga tũiganĩire na tũrĩ na gĩkeno, na  nĩ tũrĩiguaga twendete na tũgatĩa Kristo o na makĩria.

11. Ũndũ wa kerĩ tũngĩka nĩguo tũtuĩke arata a Jesu nĩ ũrĩkũ, na nĩkĩ ũndũ ũcio nĩ wa bata?

¹¹ (2) Wĩgerekanagie na mwĩcirĩrie na ciĩko cia Jesu. O ũrĩa tũkũmenya mwĩcirĩrie wa Jesu na twĩgerekanie nake, noguo ũrata witũ hamwe nake ũkũgĩa na hinya. (1 Kor. 2:16) Tũngĩĩgerekania na Jesu na njĩra ĩrĩkũ? Ta wĩcirie ũndũ ũmwe. Jesu eeciragia makĩria ũrĩa angĩteithia andũ arĩa angĩ gũkĩra ũrĩa angĩĩkenia we mwene. (Mat. 20:28; Rom. 15:1-3) Nĩ ũndũ wa gũkorũo arĩ na mwĩcirĩrie ũcio nĩ eeimaga na akohera andũ arĩa angĩ. Ndaarakaragio nĩ ũrĩa andũ mooigaga igũrũ rĩmwĩgiĩ. (Joh. 1:46, 47) Ningĩ ndaarekaga mahĩtia marĩa mũndũ eekĩte tene matũme akorũo na mawoni moru kwerekera mũndũ ũcio. (1 Tim. 1:12-14) Jesu ooigire ũũ: “Andũ othe nĩ marĩmenyaga atĩ mũrĩ arutwo akwa—mwakorũo na wendo gatagatĩ-inĩ kanyu.” (Joh. 13:35) Na githĩ ti wega wĩyũrie atĩrĩ, “Hihi nĩ ndĩregerekania na Jesu na njĩra ya gwĩka ũrĩa wothe ingĩhota gũtũũria thayũ hamwe na aarĩ na ariũ a Ithe witũ?”

12. Ũndũ wa gatatũ tũngĩka nĩguo tũtuĩke arata a Jesu nĩ ũrĩkũ, na tũngĩka ũndũ ũcio atĩa?

¹² (3) Nyitaga mbaru ariũ a Ithe na Kristo. Jesu onaga maũndũ marĩa tũrekĩra arĩa aitĩrĩrie maguta ta arĩ we tũrekĩra. (Mat. 25:34-40) Njĩra nene ĩrĩa tuonanagia nayo atĩ nĩ tũranyita mbaru arĩa aitĩrĩrie maguta nĩ gwĩka ũrĩa wothe tũngĩhota wĩra-inĩ wa kũhunjia Ũthamaki na gũtua andũ arutwo ũrĩa Jesu aathire arũmĩrĩri ake marutage. (Mat. 28:19, 20; Atũm. 10:42) Arĩa aitĩrĩrie maguta matingĩhota kũruta wĩra mũnene wa kũhunjia thĩ yothe ũrĩa ũrarutwo mahinda-inĩ maya mategũteithio nĩ arĩa a “ng’ondu ingĩ.” (Joh. 10:16) Angĩkorũo ũrĩ wa ng’ondu ingĩ, rĩrĩa rĩothe ũraruta wĩra wa kũhunjia wonanagia atĩ nĩ wendete arĩa aitĩrĩrie maguta na nginya Jesu.

13. Tũngĩhũthĩra atĩa ũtaaro wa Jesu ũrĩa ũrĩ thĩinĩ wa Luka 16:9?

¹³ Ningĩ no tũtuĩke arata a Jehova na Jesu na njĩra ya kũhũthĩra indo citũ gũteithĩrĩria wĩra wao. (Thoma Luka 16:9.) Kwa ngerekano, no tũrute mĩhothi nĩ ũndũ wa wĩra wa thĩ yothe ũrĩa ũkoragwo ũhutĩtie maũndũ ta gũteithĩrĩria kũhunjia ũhoro ũrĩa mwega icigo-inĩ iria irĩ kũraihu mũno, gwaka na kũmenyerera Nyũmba cia Ũthamaki na mĩako ĩngĩ ta ĩyo, na gũteithĩrĩria rĩrĩa kwagĩa icanjama cia ndũire, kana maũndũ mangĩ ta macio. Ningĩ no tũrute mĩhothi ya gũteithĩrĩria kĩũngano gitũ kana tũteithie andũ angĩ arĩa tũĩ atĩ nĩ marabatara ũteithio. (Thim. 19:17) No tũteithĩrĩrie ariũ a Ithe na Kristo na njĩra ta icio.

14. O ta ũrĩa Aefeso 4:15, 16 yonanĩtie-rĩ, ũndũ wa kana tũngĩka nĩguo tũtuĩke arata a Jesu nĩ ũrĩkũ?

¹⁴ (4) Nyitaga mbaru mĩbango ya kĩũngano gĩa Gĩkristiano. Nĩ twĩkĩraga hinya ũrata witũ hamwe na Jesu arĩ we mũtwe wa kĩũngano rĩrĩa twanyitanĩra na arĩa mamũrĩtwo nĩguo matũtongorie. (Thoma Aefeso 4:15, 16.) Kwa ngerekano, thikũ ici nĩ tũrerutanĩria gũtigĩrĩra atĩ Nyũmba cia Ũthamaki ciothe nĩ irahũthĩka wega biũ. Nĩ ũndũ ũcio, ciũngano imwe nĩ ituranĩirũo na ingĩ, na icigo ciacio cia kũhunjia igacenjio. Mũbango ũcio nĩ ũtũmĩte mĩhothi ĩhũthĩke wega. O na kũrĩ ũguo, ũndũ ũcio nĩ ũtũmĩte ahunjia amwe mabatare kũgarũrĩra maũndũ mao. Ahunjia amwe nĩ matungatĩte ciũngano-inĩ imwe kwa ihinda rĩa mĩaka mĩingĩ na kwoguo makagĩa ũrata wa hakuhĩ hamwe na aarĩ na ariũ a Ithe witũ a ciũngano icio. No rĩu nĩ marorio mathamĩre ciũngano ingĩ. Na githĩ to mũhaka akorũo Jesu nĩ akenaga mũno kuona arutwo acio ehokeku makĩnyitanĩra na mũbango ũcio!

15. Ũrata witũ hamwe na Jesu ũkaagĩa na hinya makĩria atĩa mahinda marĩa maroka?

¹⁵ Andũ arĩa maitĩrĩirio maguta kũgerera roho mũtheru nĩ makoragwo na kĩĩrĩgĩrĩro gĩa gũgaatũũrania na Jesu tene na tene marĩ athamaki Ũthamaki-inĩ wa Ngai. Magaakoragwo hamwe na Kristo, makamuona, makaria nake, na makahũthĩra mahinda hamwe nake. (Joh. 14:2, 3) Jesu nĩ akoonagia wendo na akarũmbũiya nginya andũ arĩa marĩ na kĩĩrĩgĩrĩro gĩa gũgaatũũra gũkũ thĩ. O na akorũo o matikona Jesu, ũrata wao hamwe nake ũgathiĩ na mbere ũkĩgĩaga hinya tondũ nĩ magaakenera ũtũũro mwega ũrĩa makaaheo nĩ Jehova na Jesu.—Isa. 9:6, 7.

16. Tũgĩaga na irathimo irĩkũ nĩ ũndũ wa gũkorũo tũrĩ arata a Jesu?

¹⁶ Rĩrĩa twetĩkĩra gũtuĩka arata a Jesu nĩ tũgĩaga na irathimo nyingĩ. Kwa ngerekano, nĩ atuonagia wendo na agatũteithia mahinda-inĩ maya. Tũrĩ na mweke wa gũgaatũũra tene na tene. Ningĩ ũndũ ũrĩa wa bata makĩria nĩ atĩ ũrata witũ hamwe na Jesu nĩ ũtũmaga tũgĩe na ũrata wa hakuhĩ hamwe na Ithe Jehova, na ũcio nĩguo ũrata ũrĩa mwega makĩria tũngĩgĩa naguo. Na githĩ ti gĩtĩo kĩa mwanya gũkorũo tũrĩ arata a Jesu!