1-2. (a) Jehova onaga ũndũ ũrĩkũ rĩrĩa andũ milioni nyingĩ macemania nĩ ũndũ wa Irio cia Hwaĩ-inĩ cia Mwathani? (Rora mbica ngothi-inĩ.) (b) Tũkwarĩrĩria ũndũ ũrĩkũ thĩinĩ wa gĩcunjĩ gĩkĩ?

ŨGWĨCIRIA Jehova onaga ũndũ ũrĩkũ rĩrĩa andũ milioni nyingĩ macemania nĩ ũndũ wa Irio cia Hwaĩ-inĩ cia Mwathani? Ndonaga o kĩrĩndĩ kĩnene tu kĩa andũ, no nĩ onaga o mũndũ o mũndũ harĩ arĩa macemanĩtie. Kwa ngerekano, nĩ onaga andũ arĩa matagaga gũka Kĩririkano o mwaka. Gatagatĩ-inĩ kao, nĩ gũkoragwo na angĩ mokaga o na makĩhiũranagia na moritũ manene. Angĩ nao matiũkaga mĩcemanio ĩno ĩngĩ kaingĩ, no monaga Kĩririkano kĩrĩ kĩa bata na kwoguo no mũhaka moke. Ningĩ Jehova nĩ onaga nginya arĩa mangĩkorũo mokĩte Kĩririkano rĩa mbere, hihi makĩenda kũmenya mũcemanio ũcio ũkoragwo ũhaana atĩa.

² Hatarĩ nganja Jehova nĩ akenaga kuona andũ aingĩ mokĩte Kĩririkano. (Luk. 22:19) O na kũrĩ ũguo, ũndũ ũrĩa ũkenagia Jehova mũno ti mũigana wa andũ arĩa mokaga. Jehova akenagio mũno nĩ kĩrĩa gĩtũmaga moke kana muoroto wao. Thĩinĩ wa gĩcunjĩ gĩkĩ, tũkwarĩrĩria kĩũria gĩkĩ kĩa bata: Nĩ kĩĩ gĩtũmaga tũthiĩ Kĩririkano o mwaka na mĩcemanio ĩrĩa ĩngĩ ya o kiumia ĩrĩa Jehova ahaaragĩria nĩ ũndũ wa andũ arĩa mamwendete?

3-4. (a) Tũthiaga mĩcemanio-inĩ nĩkĩ? (b) Gũthiĩ mĩcemanio kuonanagia ũndũ ũrĩkũ ũtwĩgiĩ? (c) Kũringana na ũrĩa 1 Akorintho 11:23-26 yugĩte-rĩ, nĩkĩ tũtiagĩrĩirũo gũtĩĩra Kĩririkano?

³ Gĩtũmi kĩrĩa kĩnene gĩtũmaga tũthiĩ mĩcemanio nĩ tondũ nĩ gĩcunjĩ kĩa ũthathaiya witũ. Ningĩ rĩrĩa twathiĩ mĩcemanio  nĩ tũrutagwo nĩ Jehova. Andũ arĩa etĩi mationaga ta marabatara kũrutwo ũndũ o na ũrĩkũ. (3 Joh. 9) Ngũrani nao, ithuĩ nĩ twĩriragĩria kũrutwo nĩ Jehova na ithondeka rĩake rĩrĩa ahũthagĩra.—Isa. 30:20; Joh. 6:45.

⁴ Gũthiĩ mĩcemanio nĩ kuonanagia atĩ tũrĩ enyihia na nĩ twĩhaarĩirie kũrutwo. Hwaĩ-inĩ wa Kĩririkano gĩa gĩkuũ kĩa Jesu, tũtithiaga mũcemanio ũcio wa bata nogetha tu tũhingie watho, ĩndĩ nĩ tondũ twendaga gwathĩkĩra ciugo ici cia Jesu tũrĩ na wĩnyihia: “Ĩkagai ũũ nĩguo mũndirikanage.” (Thoma 1 Akorintho 11:23-26.) Mũcemanio ũcio nĩ wĩkagĩra hinya kĩĩrĩgĩrĩro gitũ kĩa ihinda rĩrĩa rĩroka, na ũgatũririkania ũrĩa Jehova atwendete na njĩra nene. O na kũrĩ ũguo, Jehova nĩ oĩ atĩ nĩ tũbataraga gwĩkĩrũo ngoro na kũmĩrĩrio makĩria ma riita rĩmwe harĩ mwaka. Ũndũ ũcio nĩguo ũtũmaga ahaarĩrie mĩcemanio ya o kiumia na agatwĩkĩra ngoro tũtigatĩre. Wĩnyihia nĩ ũtũtindĩkaga gwathĩkĩra ũndũ ũcio. O kiumia nĩ tũhũthagĩra mahinda tũkĩhaarĩria na gũthiĩ thĩinĩ wa mĩcemanio ĩyo.

5. Andũ arĩa enyihia metĩkagĩra rĩĩtana rĩa Jehova nĩkĩ?

⁵ O mwaka, andũ aingĩ enyihia nĩ metĩkagĩra rĩĩtana rĩa Jehova rĩa gũka kũrutwo nĩwe. (Isa. 50:4) Aingĩ moka Kĩririkano nĩ makenagĩra na makambĩrĩria gũka mĩcemanio ĩyo ĩngĩ. (Zek. 8:20-23) Nĩ tũkenaga kũrutwo na gũtongorio tũrĩ hamwe nĩ Jehova o we ‘mũteithia na mũhonokia witũ.’ (Thab. 40:17) Kwaria ma-rĩ, nĩ ũndũ ũrĩkũ ũngĩ ũngĩkorũo ũrĩ mwega kana wa bata gũkĩra gwĩtĩkĩra kũrutwo nĩ Jehova na Jesu, Mũrũ wake ũrĩa endete mũno?—Mat. 17:5; 18:20; 28:20.

6. Wĩnyihia wateithirie mũthuri ũmwe atĩa gũthiĩ Kĩririkano?

⁶ O mwaka, nĩ twĩrutanagĩria kũnyita ũgeni andũ aingĩ o ũrĩa tũngĩhota moke Kĩririkano-inĩ gĩa gĩkuũ kĩa Jesu. Andũ aingĩ enyihia nĩ magunĩkĩte nĩ ũndũ wa gwĩtĩkĩra rĩĩtana ritũ. Ta wĩcirie ngerekano ĩno. Mĩaka ĩigana ũna mĩhĩtũku, mũthuri ũmwe nĩ aaheirũo karatathi ga kũnyita andũ ũgeni Kĩririkano, no akĩra mũrũ wa Ithe witũ ũrĩa wamũheire atĩ ndangĩahotire gũthiĩ. O na kũrĩ ũguo, hwaĩ-inĩ ũcio wa Kĩririkano mũrũ wa Ithe witũ ũcio nĩ aagegire kuona mũthuri ũcio akĩingĩra Nyũmba-inĩ ya Ũthamaki. Mũthuri ũcio nĩ aakenire nĩ ũrĩa aanyitirũo ũgeni nginya akĩambĩrĩria gũthiĩ mĩcemanio ĩyo ĩngĩ. Ihinda rĩa mwaka ũmwe ũrĩa warũmĩrĩire, aatĩrire o mĩcemanio ĩtatũ tu. Nĩ kĩĩ gĩatũmire atue itua rĩa gũthiaga mĩcemanio yothe? Eericũkirũo na agĩthiĩ Kĩririkano tondũ aarĩ mwĩnyihia. Mũrũ wa Ithe witũ ũrĩa wamũnyitĩte ũgeni aacokire akiuga ũũ: “Mũthuri ũcio nĩ mwĩnyihia mũno.” Hatarĩ nganja Jehova nĩwe wagucĩrĩirie mũthuri ũcio ũthathaiya-inĩ Wake, na rĩu nĩ mũrũ wa Ithe witũ.—2 Sam. 22:28; Joh. 6:44.

7. Maũndũ marĩa twĩrutaga mĩcemanio-inĩ na marĩa tũthomaga Bibilia-inĩ mangĩtũteithia atĩa gũkorũo tũrĩ enyihia?

⁷ Maũndũ marĩa twĩrutaga mĩcemanio-inĩ na marĩa tũthomaga Bibilia-inĩ no matũteithie gũkorũo tũrĩ enyihia. Ciumia cigana ũna mbere ya Kĩririkano kaingĩ mĩcemanio itũ yaragĩrĩria ũhoro wa kĩonereria kĩa Jesu, na wĩnyihia ũrĩa oonanirie na njĩra ya kũruta muoyo wake ũrĩ ũkũũri. Na thikũ cigana ũna mbere ya Kĩririkano, nĩ twĩkĩragwo ngoro tũthome thĩinĩ wa Bibilia ũhoro ũrĩa warĩrĩirie maũndũ marĩa meekĩkire hĩndĩ ya gũkua na kũriũka kwa Jesu. Maũndũ marĩa twĩrutaga hĩndĩ ĩyo thĩinĩ wa mĩcemanio na marĩa tũthomaga thĩinĩ wa icunjĩ icio cia Bibilia nĩ mongagĩrĩra ngatho citũ harĩ igongona rĩrĩa Jesu aarutire nĩ ũndũ witũ. Nĩ  tũiguaga tũkĩenda kwĩgerekania na wĩnyihia wake na gwĩka wendi wa Jehova o na rĩrĩa arĩ ũndũ mũritũ gwĩka ũguo.—Luk. 22:41, 42.

8. Jesu oonanirie ũmĩrĩru na njĩra ĩrĩkũ?

⁸ Ningĩ nĩ tũgeragia kwĩgerekania na Jesu harĩ kuonania ũmĩrĩru. Ta wĩcirie ũrĩa Jesu oonanirie ũmĩrĩru thikũ cigana ũna mbere ya gĩkuũ gĩake. Nĩ aamenyaga wega atĩ thutha wa kahinda kanini thũ ciake nĩ ingĩamũconorithirie, imũhũũre, na imũũrage. (Mat. 20:17-19) O na kũrĩ ũguo nĩ eetĩkĩrire kũũragwo. Ihinda rĩu rĩakinya, eerire atũmwo ake ehokeku arĩa maarĩ hamwe nake Gethisemane ũũ: “Ũkĩrai tũthiĩ. Atĩrĩrĩ, ũrĩa ũkũngunyanĩra arĩ hakuhĩ.” (Mat. 26:36, 46) Na rĩrĩa andũ aingĩ marĩ na matharaita mookire kũmũnyita, aathire mbere yao, akĩĩmenyithania kũrĩ o, na akĩra thigari ireke atũmwo ake mathiĩ. (Joh. 18:3-8) Na githĩ Jesu ndoonanirie ũmĩrĩru mũnene! Mahinda-inĩ maya, Akristiano aitĩrĩrie maguta na a ng’ondu ingĩ nĩ merutanagĩria kwĩgerekania na Jesu harĩ kuonania ũmĩrĩru. Na njĩra ĩrĩkũ?

9. (a) Nĩkĩ no tũbatare kuonania ũmĩrĩru nĩguo tũkahota gũthiĩ mĩcemanio tũtegũtĩrĩria? (b) Kĩonereria gitũ kĩhutagia atĩa aarĩ na ariũ a Ithe witũ arĩa mohetwo nĩ ũndũ wa wĩtĩkio wao?

⁹ Nĩguo tũthiĩ mĩcemanio tũtegũtĩrĩria, no tũbatare kuonania ũmĩrĩru rĩrĩa tũragerera maũndũ maritũ. Aarĩ na ariũ a Ithe witũ amwe mathiaga mĩcemanio o na rĩrĩa magũmĩirũo nĩ kĩeha, gũkua ngoro, kana ndwari. Angĩ nao mathiaga mĩcemanio o na magĩkararagio na njĩra nene nĩ andũ a famĩlĩ kana thirikari. Ta tithia wĩcũranie ũrĩa kĩonereria gitũ kĩhutagia aarĩ na ariũ a Ithe witũ arĩa mohetwo nĩ ũndũ wa wĩtĩkio wao. (Ahib. 13:3) Rĩrĩa maigua atĩ no tũthiaga na mbere gũtungatĩra Jehova o na tũkĩgeragĩra magerio, nĩ magĩaga na hinya wa gũtũũria wĩtĩkio, ũmĩrĩru, na wĩkindĩru wao. Mũtũmwo Paulo nĩ aacemanirie na ũndũ ta ũcio. Rĩrĩa oohetwo njera Roma, nĩ aakenaga kũigua atĩ aarĩ na ariũ a Ithe nĩ maatungatagĩra Ngai na wĩhokeku. (Afil. 1:3-5, 12-14) Ihinda inini thutha wake kũrekererio kuuma njera, nĩ aandĩkĩire Ahibirania marũa. Thĩinĩ wa marũa macio nĩ eekĩrire ngoro Akristiano acio ehokeku mathiĩ na mbere gũkorũo na “wendo ta wa andũ a nyina ũmwe,” na matikanatige gũcemania hamwe.—Ahib. 10:24, 25; 13:1.

10-11. (a) Nĩ a twagĩrĩirũo gwĩta moke Kĩririkano? (b) Aefeso 1:7 ĩtũheaga gĩtũmi kĩrĩkũ gĩa gwĩta arĩa angĩ?

¹⁰ Nĩ tuonanagia ũmĩrĩru rĩrĩa twanyita ũgeni andũ a famĩlĩ, arĩa tũrutithanagia wĩra nao, na arĩa tũriganĩtie nao moke Kĩririkano. Tũmetaga nĩkĩ? Nĩ tũkenaga mũno nĩ ũndũ wa ũrĩa Jehova na Jesu matwĩkĩire na nĩkĩo twĩtaga andũ arĩa angĩ moke Kĩririkano. Twendaga merute ũrĩa o nao mangĩgunĩka kuumana na ‘ũtugi mũnene’ wa Jehova ũrĩa oonanirie kũgerera ũkũũri.—Thoma Aefeso 1:7; Kũg. 22:17.

 ¹¹ Rĩrĩa twacemania, to ngumo ya ũmĩrĩru tu tuonanagia, no nĩ tuonanagia nginya ngumo ĩngĩ ya bata ĩrĩa Ngai na Mũrũ wake monanagia na njĩra nene.

12. (a) Mĩcemanio ĩtũmaga wendo witũ harĩ Jehova na Jesu wongerereke na njĩra ĩrĩkũ? (b) 2 Akorintho 5:14, 15 ĩtwĩkagĩra ngoro twĩgerekanie na Jesu na njĩra ĩrĩkũ?

¹² Wendo witũ harĩ Jehova na Jesu nĩ ũtũmaga tũthiĩ mĩcemanio. Namo maũndũ marĩa twĩrutaga thĩinĩ wa mĩcemanio nĩ matũmaga wendo witũ harĩ Jehova na Mũrũwe wongerereke. Twathiĩ mĩcemanio nĩ tũririkanagio kaingĩ maũndũ marĩa Jehova na Jesu matwĩkĩire. (Rom. 5:8) Makĩria rĩrĩa twathiĩ Kĩririkano, nĩ tũririkanagio wendo mũnene ũrĩa monanĩtie, o na harĩ andũ arĩa matoĩ bata wa ũkũũri. Tuonanagia ngatho na njĩra ya kwĩrutanĩria kwĩgerekania na Jesu kũgerera mũtũũrĩre witũ wa o mũthenya. (Thoma 2 Akorintho 5:14, 15.) Makĩria ma ũguo, ngoro citũ nĩ itũtindĩkaga kũgooca Jehova nĩ ũndũ wa ũkũũri. Njĩra ĩmwe tũngĩmũgooca nayo nĩ kũruta macokio ma kuuma ngoro tũrĩ mĩcemanio-inĩ.

13. Tũngĩonania ũrĩa wendo witũ harĩ Jehova na harĩ Mũrũwe ũigana na njĩra ĩrĩkũ? Taarĩria.

¹³ No tuonanie ũrĩa wendo witũ harĩ Jehova na harĩ Mũrũwe ũigana na njĩra ya gũkorũo twĩhaarĩirie kwĩima nĩ ũndũ wao. Kaingĩ nĩ twĩimaga na njĩra itiganĩte nĩguo tũhote gũthiĩ mĩcemanio. Ciũngano nyingĩ ciĩkaga mũcemanio ũmwe hwaĩ-inĩ mũthenya wa wĩra na andũ aingĩ makoragwo marĩ anogu. Naguo mũcemanio ũcio ũngĩ wĩkagwo mũthia-inĩ wa kiumia rĩrĩa andũ arĩa angĩ mahurũkĩte. Hihi rĩrĩa twathiĩ mĩcemanio o na tũrĩ anogu Jehova nĩ onaga? Ĩĩ nĩ onaga! Ũrĩa kũrĩ nĩ atĩ, o ũrĩa tũreima ũndũ mũnene, noguo Jehova akenaga makĩria nĩ ũndũ wa wendo witũ harĩ we.—Mar. 12:41-44.

14. Nĩ na njĩra ĩrĩkũ Jesu aatũigĩire kĩonereria gĩa kuonania wendo wa kwĩima?

¹⁴ Jesu nĩ aatũigĩire kĩonereria gĩa kuonania wendo na njĩra ya kwĩima. Makĩria ma gũkorũo atĩ nĩ eetĩkĩrire gũkua nĩ ũndũ wa arutwo ake, ũtũũro-inĩ wake wothe aaigaga maũndũ mao mbere ya make. Kwa ngerekano, nĩ aahũthĩrire mahinda hamwe na arũmĩrĩri ake o na rĩrĩa aarĩ mũnogu mwĩrĩ na meciria. (Luk. 22:39-46) Ningĩ eeciragia  mũno ũhoro wĩgiĩ kĩrĩa angĩaheire andũ arĩa angĩ no ti kĩrĩa angĩamũkĩrire kuuma kũrĩ o. (Mat. 20:28) Tũngĩkorũo na wendo mũnene ta ũcio harĩ Jehova na harĩ ariũ a Ithe witũ, nĩ tũrĩkaga o ũrĩa wothe tũngĩhota nĩguo tũgathiĩ Kĩririkano o hamwe na mĩcemanio ĩrĩa ĩngĩ yothe.

15. Twĩrutanagĩria gũteithia andũ arĩkũ makĩria?

¹⁵ Tũkoragwo thĩinĩ wa kĩũngano kĩrĩa tu kĩrĩ na Akristiano a ma, na nĩ twendete kũhũthĩra mahinda maingĩ o ũrĩa kwahoteka kũnyita arĩa angĩ ũgeni moke manyitanĩre na ithuĩ. Mũno makĩria twĩrutanagĩria gũteithia arĩa “twĩtainwo nao thĩinĩ wa wĩtĩkio,” arĩa matigĩte kũhunjia kana gũthiĩ mĩcemanio. (Gal. 6:10) Tuonanagia atĩ nĩ tũmendete na njĩra ya kũmekĩra ngoro moke mĩcemanio-inĩ, na makĩria Kĩririkano. O ta Jehova na Jesu, nĩ tũkenaga mũno rĩrĩa mũndũ ũratigĩte kũhunjia kana gũthiĩ mĩcemanio acokerera Jehova, o we Ithe witũ ũrĩ wendo na Mũrĩithi witũ.—Mat. 18:14.

16. (a) Tũngĩkĩrana ngoro na njĩra ĩrĩkũ, na mĩcemanio itũ ĩrĩtũteithagia atĩa? (b) Nĩkĩ rĩrĩ nĩrĩo ihinda rĩega rĩa mwaka rĩa kũririkana ciugo cia Jesu iria irĩ thĩinĩ wa Johana 3:16?

¹⁶ Ciumia iria irĩ mbere, geria gwĩta andũ aingĩ o ũrĩa ũngĩhota magoka Kĩririkano hwaĩ-inĩ wa Njumaa Ĩpuro 19, 2019. (Rora gathandũkũ, ““ Hihi nĩ Ũkaamanyita Ũgeni?”) Na kuuma rĩu gũthiĩ na mbere, rekei twĩrutanagĩrie gwĩkĩrana ngoro na njĩra ya gũthiaga mĩcemanio yothe ĩrĩa Jehova atũhaaragĩrĩria. O ũrĩa mũico wa mũtabarĩre ũyũ ũrakuhĩrĩria, noguo tũrabatara mĩcemanio itũ nĩguo ĩtũteithie gũkũria wĩnyihia, ũmĩrĩru, na wendo. (1 Thes. 5:8-11) Rekei tuonanagie na ngoro itũ yothe ũrĩa tũiguaga nĩ ũndũ wa wendo mũnene ũrĩa Jehova na Mũrũwe matuonetie.—Thoma Johana 3:16.