1-2. (a) Mwarĩ wa Ithe witũ Yoshiko oomĩrĩirio atĩa nĩ ndũmĩrĩri ĩrĩa ĩrĩ thĩinĩ wa Isaia 41:10? (b) Jehova aandĩkithirie ndũmĩrĩri ĩyo nĩ ũndũ wa ũ?

MWARĨ WA ITHE WITŨ ũmwe mwĩhokeku wĩtagwo Yoshiko nĩ aamũkĩrire riboti njũru. Ndagĩtarĩ wake aamwĩrire atĩ angĩaikarire o mĩeri mĩnini acoke akue. Aaiyũkirie ũhoro ũcio atĩa? Yoshiko aaririkanire mũhari eendete wa Bibilia, Isaia 41:10. (Thoma.) Agĩcoka agĩtaarĩria ndagĩtarĩ ahooreire atĩ ndeetigagĩra, tondũ Jehova nĩ aamũnyitĩte guoko. * Ndũmĩrĩri ya kũũmanĩrĩria ĩrĩa ĩkoragwo mũhari-inĩ ũcio nĩ yateithirie mwarĩ wa Ithe witũ ũcio kwĩhoka Jehova biũ. Mũhari ũcio no ũtũteithie o na ithuĩ gũikara tũhooreire rĩrĩa tũrahiũrania na moritũ manene. Nĩguo tũtaũkĩrũo ũrĩa mũhari ũcio ũngĩtũteithia, rekei twambe twarĩrĩrie kĩrĩa gĩatũmire Ngai ahe Isaia ndũmĩrĩri ĩyo.

² Kĩambĩrĩria-inĩ, Jehova aateithirie Isaia kwandĩka ciugo icio nĩguo ciũmĩrĩrie Ayahudi arĩa mangĩacokire gũtwarũo ithamĩrio Babuloni. O na kũrĩ ũguo, Jehova aandĩkithirie ndũmĩrĩri ĩyo nĩguo yũmĩrĩrie Ayahudi acio mangĩatwarirũo ithamĩrio o hamwe na andũ ake othe arĩa mangĩatũũrire kuuma hĩndĩ ĩyo. (Isa. 40:8; Rom. 15:4) Ũmũthĩ tũratũũra “mahinda ma ũgwati maritũ kũhiũrania namo,” na gũkĩra hĩndĩ ĩngĩ o yothe, nĩ tũrabatara kũũmĩrĩrio nĩ ndũmĩrĩri ĩrĩa ĩrĩ ibuku-inĩ rĩa Isaia.—2 Tim. 3:1.

3. (a) Nĩ ciĩranĩro irĩkũ irĩ thĩinĩ wa Isaia 41:10? (b) Nĩkĩ nĩ tũrabatara ciĩranĩro icio?

 ³ Thĩinĩ wa gĩcunjĩ gĩkĩ, tũkwarĩrĩria ciĩranĩro ithatũ kuuma kũrĩ Jehova cia gwĩkĩra wĩtĩkio witũ hinya iria irĩ thĩinĩ wa Isaia 41:10, rĩandĩko rĩrĩa rĩthuurĩtwo rĩa mwaka wa 2019: (1) Jehova arĩkoragwo hamwe na ithuĩ, (2) nĩwe Ngai witũ, na (3) nĩ arĩtũteithagia. Nĩ tũrabatara ciĩranĩro * icio tondũ o ta Yoshiko, nĩ tũcemanagia na moritũ ũtũũro-inĩ witũ. Ningĩ nĩ tũbataraga kũhiũrania na hatĩka iria ciumanaga na maũndũ moru marĩa marekĩka thĩinĩ wa thĩ. Amwe aitũ o na nĩ mabataraga gũkirĩrĩria nĩ ũndũ wa kũnyarirũo nĩ thirikari. Rekei twarĩrĩrie ciĩranĩro icio ithatũ kĩmwe thutha wa kĩrĩa kĩngĩ.

4. (a) Kĩĩranĩro kĩa mbere kĩrĩa tũkwarĩrĩria nĩ kĩrĩkũ? (Rora nginya kohoro ka magũrũ-inĩ.) (b) Jehova onanagia na njĩra irĩkũ ũrĩa aiguaga gũtwerekera? (c) Ciugo iria Ngai ooigire itũmaga ũigue atĩa?

⁴ Kĩĩranĩro kĩa mbere kĩrĩa Jehova atũheete nĩ: “Ndũgetigĩre, nĩ gũkorũo niĩ ndĩ hamwe nawe.” * Jehova onanagia atĩ arĩ hamwe na ithuĩ na njĩra ya gũtũrũmbũyia biũ na gũtuonia wendo. Ciugo ici nĩ ironania wendo ũrĩa akoragwo naguo harĩ ithuĩ na ũrĩa aiguaga nĩ ũndũ witũ, Jehova oigĩte ũũ: “Nĩ watuĩkire kĩndũ kĩa goro maitho-inĩ makwa, nĩ ũtĩĩkĩte, na nĩ ngwendete.” (Isa. 43:4) Gũtirĩ kĩndũ kĩrĩ igũrũ kana thĩ kĩngĩtũma Jehova atige kwenda arĩa mamũtungatagĩra tondũ wĩhokeku wake harĩ ithuĩ ndũngĩenyenyeka. (Isa. 54:10) Wendo na ũrata ũrĩa atuonagia nĩ itũheaga ũmĩrĩru. Nĩ arĩtũgitagĩra o ta ũrĩa aagitĩrire mũrata wake Aburamu (Iburahimu). Jehova aamwĩrire ũũ: “Aburamu, ndũgetigĩre. Niĩ nĩ niĩ ngo yaku.”—Kĩam. 15:1.

5-6. (a) Tũĩ atĩa atĩ Jehova nĩ akoragwo na wendi wa gũtũteithia kũhiũrania na moritũ maitũ? (b) Nĩ ũndũ ũrĩkũ tũngĩĩruta na kĩonereria kĩa Yoshiko?

⁵ Nĩ tũĩ atĩ Jehova nĩ akoragwo na wendi wa gũtũteithia kũhiũrania na moritũ maitũ tondũ erĩire andũ ake ũũ: “Rĩrĩa ũkaagerera  maĩ-inĩ, nĩ ngaakorũo hamwe nawe, o na wagerera njũũĩ-inĩ, itigagũthereria. Na rĩrĩa ũkaagerera mwaki-inĩ, ndũgaacinwo nĩguo, o na kana ũrĩrĩmbũkĩrũo nĩ rũrĩrĩmbĩ rwaguo.” (Isa. 43:2) Hihi ciugo icio ciugĩte atĩa?

⁶ Jehova ndatwĩragĩra atĩ no atwehererie maũndũ marĩa matũmaga ũtũũro ũkorũo ũrĩ mũritũ, no ndangĩtĩkĩria mathĩna matariĩ ta “njũũĩ” matũthererie kana magerio matariĩ ta “rũrĩrĩmbĩ” matwĩke ũndũ mũũru wa gũtũũra. Atwĩrĩire atĩ nĩ arĩkoragwo hamwe na ithuĩ agatũteithia tũkahota ‘kũgerera’ maũndũ-inĩ macio maritũ. Nĩ ũndũ ũrĩkũ Jehova arĩkaga? Nĩ arĩtũteithagia kũnyihanyihia mĩtangĩko itũ nĩgetha tũtũũrie wĩhokeku witũ o na tũngĩcemania na ũndũ ũngĩrehe gĩkuũ. (Isa. 41:13) Mwarĩ wa Ithe witũ Yoshiko ũrĩa ũkũgwetetwo nĩ eeyoneire ũũma wa ũndũ ũcio. Mũirĩtu wake ooigire ũũ: “Nĩ twakenire kuona ũrĩa Mami aahoorerete. Nĩ tuoonire na ma atĩ Jehova nĩ aamũheire thayũ wa ngoro. Aahunjagĩria mandagĩtarĩ na arwaru ũhoro wĩgiĩ Jehova na ciĩranĩro ciake, o nginya mũthenya ũrĩa aakuire.” Tũreruta ũndũ ũrĩkũ na kĩonereria kĩa Yoshiko? Twehoka kĩĩranĩro kĩrĩa Ngai atwĩrĩte atĩ “nĩ ngaakorũo hamwe nawe,” o na ithuĩ nĩ tũrĩkoragwo na hinya na ũmĩrĩru tũkahota gũkirĩrĩria magerio.

7-8. (a) Kĩĩranĩro gĩa kerĩ kĩrĩa tũkwarĩrĩria nĩ kĩrĩkũ, na kiugĩte atĩa? (b) Nĩ kĩĩ gĩatũmire Jehova ere Ayahudi arĩa mangĩatwarirũo ithamĩrio Babuloni ‘matigatangĩke’? (c) Nĩ ciugo irĩkũ irĩ thĩinĩ wa Isaia 46:3, 4 ingĩkorũo ciahooreririe ngoro cia andũ a Ngai?

⁷ Kĩĩranĩro gĩa kerĩ kĩrĩa Isaia aandĩkire nĩ: “Ndũgatangĩke, nĩ gũkorũo niĩ nĩ niĩ Ngai waku.” Kiugo ndũgatangĩke kiugĩte atĩa? Mũhari-inĩ ũyũ, kiugo kĩrĩa gĩtaũrĩtwo “gũtangĩka” gĩkoragwo na rĩciria rĩa “kũrora na thutha ũrĩ na guoya wa ũndũ mũũru ũngiumĩra” kana “kũrorarora na guoya ta mũndũ ũrĩ ũgwati-inĩ.”

⁸ Nĩ kĩĩ gĩatũmire Jehova ere Ayahudi arĩa mangĩatwarirũo ithamĩrio Babuloni ‘matigatangĩke’? Tondũ nĩ aamenyaga atĩ aikari a bũrũri ũcio nĩ maangĩagĩire na guoya. Nĩ ũndũ ũrĩkũ ũngĩatũmire metigĩre? Mũthia-inĩ wa mĩaka 70 ĩrĩa Ayahudi mangĩaikarire ithamĩrio, Babuloni nĩ ĩngĩatharĩkĩirũo nĩ mbũtũ irĩ na hinya cia Media na Perisia. Jehova aangĩahũthĩrire mbũtũ ĩyo kũrekereria andũ ake kuuma ithamĩrio Babuloni. (Isa. 41:2-4) Rĩrĩa andũ a Babuloni na andũ a mabũrũri mangĩ matukũ-inĩ macio maamenyire atĩ thũ yao nĩ ĩkuhĩrĩirie, maageririe kwĩyũmĩrĩria na njĩra ya kwĩrana mũndũ na ũrĩa ũngĩ: “Gĩa na hinya.” Ningĩ nĩ maathondekire ngai makĩria cia mĩhianano, makĩĩhoka atĩ nĩ ikũmagitĩra. (Isa. 41:5-7) Hĩndĩ ĩyo, nake Jehova nĩ oomĩrĩirie ngoro cia Ayahudi arĩa maarĩ ithamĩrio akĩmeera ũũ: “Wee Isiraeli-rĩ, [ngũrani na andũ arĩa makũrigicĩirie] ũrĩ ndungata yakwa . . . “Ndũgatangĩke, nĩ gũkorũo niĩ nĩ niĩ Ngai waku.” (Isa. 41:8-10) Rora wone atĩ Jehova ooigire: “Niĩ nĩ niĩ Ngai waku.” Jehova nĩ oomĩrĩirie andũ ake ehokeku kũgerera ciugo icio atĩ ndaariganĩirũo nĩo, we nowe warĩ Ngai wao, na atĩ maarĩ o andũ ake. Aamerire ũũ: “Nĩ ngaamũkuua . . . na ndĩmũhonokie.” No mũhaka angĩkorũo ciugo icio cia kũũmĩrĩria nĩ ciekĩrire hinya Ayahudi acio maarĩ ithamĩrio.—Thoma Isaia 46:3, 4.

9-10. Nĩkĩ tũtibatiĩ gwĩtigĩra? Heana ngerekano.

⁹ Gũkĩra hĩndĩ ĩngĩ o yothe, andũ mahinda-inĩ maya nĩ maramaka nĩ ũndũ wa ũrĩa maũndũ marathiĩ mathũkĩte thĩinĩ wa thĩ. Ũhoro wa ma nĩ atĩ, o na ithuĩ nĩ tũhutagio nĩ maũndũ macio. No tũtiagĩrĩirũo gwĩtigĩra.  Jehova atwĩraga ũũ: “Niĩ nĩ niĩ Ngai waku.” Nĩkĩ ciugo icio nĩ iratũhe gĩtũmi kĩega gĩa gũikara tũhooreire?

¹⁰ Ta wĩcirie ũhoro wa ngerekano ĩno: Jim na Ben marathiĩ rũgendo, makuuĩtwo nĩ ndege ĩrathingithio nĩ rũhuho rũnene. Ihinda-inĩ o rĩu ndege ĩrathingithio nĩ rũhuho, mũtwari wa ndege akaanĩrĩra akera andũ othe ũũ: “Ohai mĩcibi yanyu ya itĩ. Kwa ihinda, ndege ĩkũgerera kũndũ kũrĩ na kĩhuhũkanio kĩnene.” Jim agetigĩra mũno. No mũtwari wa ndege agacoka akoiga: “Niĩ ndĩraria nĩ niĩ mũtwari wa ndege. Mũtigatangĩke.” Ihinda-inĩ rĩu Jim akainia mũtwe, akoria, “Arenda kuuga atĩa?” No arora Ben, akona we ndaratangĩka o na hanini. Jim akoria Ben: “Kaĩ wee ũtaretigĩra?” Ben agathekatheka na akoiga: “Ndiretigĩra tondũ ũrĩa ũratwara ndege ĩno nĩ ndĩmũĩ wega. Nĩ baba!” Ben agacoka akoiga: “Reke ngwĩre ũhoro wĩgiĩ baba. Nĩ njũĩ atĩ wamũmenya na wamenya ũhoti wake, o nawe nĩ ũkũhoorera.”

11. Nĩ maũndũ marĩkũ tũngĩĩruta kuumana na ngerekano ĩyo ya Jim na Ben?

¹¹ Tũngĩĩruta maũndũ marĩkũ kuumana na ngerekano ĩyo? O ta Ben, tũtibatiĩ gwĩtigĩra tondũ nĩ tũĩ Jehova, Ithe witũ wa igũrũ wega. Nĩ tũĩ atĩ nĩ egũtũtongoria wega tũhote gũtooria mathĩna marĩa matariĩ ta kĩhuhũkanio matukũ-inĩ maya ma kũrigĩrĩria ma mũtabarĩre ũyũ mũũru. (Isa. 35:4) Nĩ twĩhokete Jehova, na ũndũ ũcio nĩ ũtũteithagia gũikara tũhooreire hĩndĩ ĩrĩa andũ thĩinĩ wa thĩ maratoorio nĩ guoya. (Isa. 30:15) Ningĩ nĩ twĩkaga ta Ben rĩrĩa tũrera andũ arĩa angĩ kĩrĩa gĩtũmaga twĩhoke Ngai. Ũndũ ũcio no ũtũme o nao makorũo na ma atĩ Jehova nĩ arĩmateithagia, gũtekũmakania moritũ marĩa maragerera.

12. (a) Kĩĩranĩro gĩa gatatũ kĩrĩa tũkwarĩrĩria nĩ kĩrĩkũ? (b) Kũgwetwo gwa kiugo “guoko” kwa Jehova kũratũririkania ũndũ ũrĩkũ?

¹² Wĩcirie kĩĩranĩro gĩa gatatũ kĩrĩa Isaia  aandĩkire: “Nĩ ngũgwĩkĩra hinya, ĩni, nĩ ngũgũteithia.” Isaia nĩ aarĩkĩtie gũtaarĩria ũrĩa Jehova angĩekĩrire andũ ake hinya rĩrĩa ooigire ũũ: “Jehova . . . nĩ agooka arĩ na hinya mũingĩ, na guoko gwake nĩkuo gũgaathamaka nĩ ũndũ wake.” (Isa. 40:10) Bibilia kaingĩ nĩ ĩhũthagĩra kiugo “guoko” na njĩra ya ngerekano kuonania hinya. Nĩ ũndũ ũcio, ciugo “guoko gwake nĩkuo gũgaathamaka,” iratũririkania atĩ Jehova nĩ Mũthamaki ũrĩ hinya. Nĩ aahũthĩrire hinya wake mũingĩ gũteithia na kũgitĩra ndungata ciake mahinda-inĩ mahĩtũku, na nginya ihinda-inĩ rĩrĩ no arathiĩ na mbere gwĩkĩra hinya na kũgitĩra arĩa mamwĩhokete.—Gũcok. 1:30, 31; Isa. 43:10, kohoro ka magũrũ-inĩ.

13. (a) Nĩ hĩndĩ ĩrĩkũ makĩria Jehova ahingagia kĩĩranĩro gĩake gĩa gũtwĩkĩra hinya? (b) Nĩ kĩĩranĩro kĩrĩkũ gĩtũmaga tũgĩe na hinya na ũmĩrĩru?

¹³ Jehova nĩ ahingagia kĩĩranĩro kĩrĩa eranĩire akoiga, “Nĩ ngũgwĩkĩra hinya,” makĩria rĩrĩa thũ citũ iratũnyarira. Kũndũ kũingĩ thĩinĩ wa thĩ ũmũthĩ, thũ citũ nĩ irageria mũno kũgiria wĩra witũ wa kũhunjia ũthiĩ na mbere kana o na ikahũũra marubuku ithondeka ritũ. No tũtitangĩkaga mũno nĩ ũndũ wa tharĩkĩro ta icio. Jehova nĩ atwĩrĩire ũndũ wa kwĩhokeka ũrĩa ũtũmaga tũgĩe na hinya na ũmĩrĩru. Atwĩrĩire ũũ: “Gũtirĩ itharaita rĩa mbaara rĩthondeketwo nĩ ũndũ waku rĩkaagaacĩra.” (Isa. 54:17) Ũndũ ũcio ũratũririkania maũndũ matatũ ma bata.

14. Nĩkĩ no twĩrĩgĩrĩre atĩ thũ cia Ngai no itũtharĩkĩre?

¹⁴ Ũndũ wa mbere nĩ atĩ, tũrĩ arũmĩrĩri a Kristo nĩ twĩrĩgagĩrĩra kũmenwo. (Mat. 10:22) Jesu nĩ aarathĩte atĩ arutwo ake nĩ mangĩkanyarirũo mũno matukũ-inĩ ma kũrigĩrĩria. (Mat. 24:9; Joh. 15:20) Ũndũ wa kerĩ, ũrathi wa Isaia nĩ wonanĩtie atĩ thũ citũ to gũtũmena igaatũmena, no nĩ ikaahũthĩra nginya matharaita matiganĩte gũtũũkĩrĩra. Matharaita macio nĩ hamwe na kũhũthĩra maheeni mehithanĩtie, igenyo, na kũnyarirũo na njĩra nene. (Mat. 5:11) Jehova ndagiragia thũ citũ itige kũhũthĩra matharaita  macio gũtũũkĩrĩra. (Ef. 6:12; Kũg. 12:17) No tũtirabatara gwĩtigĩra. Nĩkĩ?

15-16. (a) Ũndũ wa gatatũ ũrĩa tũrabatara kũririkana nĩ ũrĩkũ, na Isaia 25:4, 5 ĩranyita ũndũ ũcio mbaru na njĩra ĩrĩkũ? (b) Isaia 41:11, 12 ĩtaarĩirie atĩa ũrĩa gũgaathiĩ harĩ arĩa matũũkagĩrĩra?

¹⁵ Ta wĩcirie ũndũ wa gatatũ ũrĩa tũrabatara kũririkana. Jehova ooigire atĩ “gũtirĩ itharaita” rĩngĩhũthĩrũo gũtũũkĩrĩra “rĩkaagaacĩra” o na atĩa. O ta ũrĩa rũthingo rũgitagĩra andũ kuumana na mbura ya kĩhuhũkanio, noguo Jehova atũgitagĩra kuumana na “mũrurumo wa ahinyanĩrĩria.” (Thoma Isaia 25:4, 5.) Gũtirĩ hĩndĩ thũ citũ ikaahota gũtwĩka ũndũ mũũru wa gũtũũra.—Isa. 65:17.

¹⁶ Jehova ningĩ nĩ ekĩraga hinya mwĩhoko witũ harĩ we na njĩra ya gũtũhe ũhoro makĩria wĩgiĩ ũrĩa gũgaathiĩ harĩ arĩa ‘matũrakaragĩra.’ (Thoma Isaia 41:11, 12.) O na thũ citũ ingĩĩrutanĩria atĩa kũrũa na ithuĩ, kana mbaara ĩkorũo ĩrĩ nene atĩa, moimĩrĩro no mamwe: Thũ ciothe cia andũ a Ngai nĩ ‘ikaagithio kĩene na ithire.’

17-18. (a) Gũthoma Bibilia kũngĩtũteithia atĩa kwĩhoka Ngai makĩria? Heana ngerekano. (b) Gwĩcũrania rĩandĩko rĩa mwaka wa 2019 kũngĩtũteithia atĩa?

¹⁷ Rĩrĩa twamenya Jehova wega nĩ tũmwĩhokaga o na makĩria. Njĩra ĩrĩa tu tũngĩmenya Ngai wega nĩ kũgerera gũthoma Bibilia na gwĩcũrania ũhoro wa kĩrĩa twathoma. Bibilia nĩ ĩkoragwo na ũhoro wa kwĩhokeka wĩgiĩ ũrĩa Jehova aagitĩire andũ ake mahinda-inĩ mahĩtũku. Ũndũ ũcio nĩ ũtũmaga tũkorũo na ma atĩ nĩ arĩtũteithagia mahinda-inĩ maya.

¹⁸ Ta wĩcirie ũhoro wa ciugo njega cia kũgerekania iria Isaia ahũthĩrĩte kuonania ũrĩa Jehova atũgitagĩra. Aringithanĩtie Jehova na mũrĩithi, nacio ndungata ciake na tũgondu. Isaia ooigire ũũ akĩaria ũhoro wa Jehova: “Natuo tũgondu atũcokanĩrĩrie na guoko gwake, na atũkuue gĩthũri-inĩ gĩake.” (Isa. 40:11) Rĩrĩa twamenya atĩ Jehova nĩ atũhĩmbĩirie na moko make marĩ hinya, nĩ tũhooragĩra na tũkaigua tũrĩ na ũgitĩri. Nĩguo tũtigatangĩkage mũno o na rĩrĩa twacemania na moritũ, ngombo ĩrĩa njũgĩ na njĩhokeku ĩthuurĩte Isaia 41:10 rĩrĩ rĩandĩko rĩa mwaka wa 2019, “Ndũgatangĩke, nĩ gũkorũo niĩ nĩ niĩ Ngai waku.” Wĩcũranagie ũhoro wĩgiĩ ciugo icio cia kũũmĩrĩria. Nĩ irĩgwĩkagĩra hinya hĩndĩ ĩrĩa ũracemania na moritũ marĩa marĩ mbere.