1. Wendi wa Jehova nĩ ũrĩkũ mahinda-inĩ maya?

 MAHINDA-INĨ maya, nĩ wendi wa Ngai atĩ ũhoro ũrĩa mwega wa Ũthamaki ũhunjio thĩinĩ wa thĩ yothe. (Mar. 13:10; 1 Tim. 2:3, 4) Wĩra ũcio nĩ wa Jehova, na nĩ wa bata mũno ũũ atĩ athuurĩte Mũrũwe nĩguo aũtongorie. No tũkorũo na ma atĩ rungu rwa ũtongoria wa Jesu, wĩra wa kũhunjia nĩ ũkũrĩkio kũringana na wendi wa Jehova mũico ũtanakinya.​—Mat. 24:14.

2. Tũkwarĩrĩria maũndũ marĩkũ gĩcunjĩ-inĩ gĩkĩ?

² Gĩcunjĩ-inĩ gĩkĩ, nĩ tũkuona ũrĩa Jesu arahũthĩra “ngombo [yake] ĩrĩa njĩhokeku na njũgĩ” gũtũhe irio cia kĩĩroho, na kũbanga arũmĩrĩri ake nĩ ũndũ wa wĩra wa kũhunjia ũrĩa ũrarutwo na gĩkĩro kĩnene mahinda-inĩ maya. (Mat. 24:45) Ningĩ nĩ tũkuona ũrĩa o ũmwe witũ angĩnyita mbaru Jesu na ngombo ĩrĩa njĩhokeku.

3. Nĩ wathani ũrĩkũ Jesu aheetwo?

³ Jesu nĩ aratongoria wĩra wa kũhunjia. Nĩ kĩĩ kĩngĩtũma tũkorũo na ma na ũndũ ũcio? Kahinda kanini Jesu atanacoka kũrĩa igũrũ, nĩ aacemanirie na arũmĩrĩri amwe ake ehokeku kĩrĩma-inĩ kĩmwe kĩa Galili. Aameerire ũũ: “Nĩ heetwo wathani wothe kũrĩa igũrũ o na gũkũ thĩ.” Aacokire akĩmeera: “Nĩ ũndũ ũcio-rĩ, thiĩi mũgatue andũ arutwo kuuma ndũrĩrĩ-inĩ ciothe.” (Mat. 28:18, 19) Kwoguo, ũndũ ũmwe Jesu aheetwo wathani igũrũ rĩaguo nĩ gũtongoria wĩra wa kũhunjia.

4. Nĩ kĩĩ kĩngĩtũma tũkorũo na ma atĩ Jesu no arathiĩ na mbere gũtongoria wĩra wa kũhunjia?

 ⁴ Jesu aaugire atĩ wĩra wa kũhunjia na gũtua andũ arutwo ũngĩkarutwo “ndũrĩrĩ-inĩ ciothe” na atĩ nĩ angĩgaakorũo hamwe na arũmĩrĩri ake “mĩthenya yothe nginya ithirĩro rĩa mũtabarĩre wa maũndũ.” (Mat. 28:20) Ciugo icio ciake ironania atĩ wĩra wa kũhunjia ũngĩgathiĩ na mbere gũtongorio nĩ Jesu nginya mahinda-inĩ maya maitũ.

5. Nĩ itemi rĩrĩkũ tũrĩ narĩo harĩ kũhinga gwa Thaburi 110:3?

⁵ Jesu ndaarĩ na nganja atĩ nĩ kũngĩgakorũo na aruti wĩra a kũigana hĩndĩ ya ithirĩro rĩa mũtabarĩre wa maũndũ. Nĩ aamenyaga atĩ ciugo ici cia ũrathi irĩ thĩinĩ wa Thaburi nĩ ingĩkahinga: “Andũ aku makeerutagĩra meyendeire mũthenya wa mbũtũ yaku.” (Thab. 110:3) Angĩkorũo nĩ ũnyitanagĩra wĩra-inĩ wa kũhunjia, nĩ ũranyita mbaru Jesu na ngombo ĩrĩa njĩhokeku na ũgateithia harĩ kũhinga kwa ũrathi ũcio. Wĩra ũcio no ũrathiĩ na mbere kũrutwo, ĩndĩ kũrĩ na moritũ.

6. Ũritũ ũmwe ahunjia a Ũthamaki macemanagia naguo ũmũthĩ nĩ ũrĩkũ?

⁶ Ũndũ ũmwe mũritũ ahunjia a Ũthamaki macemanagia naguo nĩ ũkararia. Aregenyũki, atongoria a ndini, na ateti, nĩ meeraga andũ aingĩ maũndũ ma maheeni megiĩ wĩra witũ. Rĩrĩa andũ aitũ a famĩlĩ, andũ arĩa tũyaine nao, na arĩa tũrutithanagia wĩra nao metĩkia maheeni macio, no matũtindĩkĩrĩrie tũtige gũtungatĩra Jehova na tũtige kũhunjia. Mabũrũri-inĩ mamwe, thũ citũ nĩ ciĩhĩtagĩra aarĩ na ariũ a Ithe witũ, ikamatharĩkĩra, kana ikamanyita, o na kana ikamoha njera. Tũtigegagio nĩ ũndũ ũcio tondũ Jesu aarathĩte ũũ: “Nĩ mũgaathũũrũo nĩ ndũrĩrĩ ciothe nĩ ũndũ wa rĩĩtwa rĩakwa.” (Mat. 24:9) Gũkorũo atĩ nĩ tũthũirũo na njĩra ĩyo nĩ ũira wa kuonania atĩ nĩ twĩtĩkĩrĩkĩte nĩ Jehova. (Mat. 5:11, 12) Mũcukani nĩwe ũcogagĩra ũkararia ũcio. No Jesu arĩ na hinya mũingĩ kũmũkĩra. Nĩ ũndũ wa ũteithio wa Jesu, ũhoro ũrĩa mwega nĩ ũrahunjio kũrĩ andũ a ndũrĩrĩ ciothe. Rekei tuone ũira ũronania ũndũ ũcio.

7. Nĩ ũira ũrĩkũ wonete ũronania atĩ Kũguũrĩrio 14:6, 7 nĩ ĩrahinga?

⁷ Ũndũ ũngĩ mũritũ ahunjia a Ũthamaki macemanagia naguo nĩ gũkorũo atĩ andũ maragia thiomi nyingĩ ngũrani. Thĩinĩ wa ũhoro ũrĩa Jesu aaguũrĩirie mũtũmwo Johana, nĩ oonanirie atĩ matukũ-inĩ maitũ ũhoro ũrĩa mwega nĩ ũngĩgatooria mũhĩnga ũcio. (Thoma Kũguũrĩrio 14:6, 7.) Na njĩra ĩrĩkũ? Nĩ tũrahe andũ aingĩ o ũrĩa kũngĩhoteka mweke wa kũigua ũhoro wa Ũthamaki. Ũmũthĩ, andũ thĩinĩ wa thĩ yothe no mahote gũthoma ũhoro wa Bibilia thĩinĩ wa website itũ ya jw.org, tondũ ũhoro ũcio ũkoragwo ũtaũrĩtwo na thiomi makĩria ma 1,000. Kĩama Kĩrĩa Gĩtongoragia nĩ kĩaheanire rũtha rwa gũtaũra ibuku rĩrĩa tũhũthagĩra kwĩruta na andũ Bibilia rĩa Kenera Ũtũũro Tene na Tene! na thiomi makĩria ma 700. Ningĩ irio cia kĩĩroho nĩ ihaaragĩrio kũgerera video nĩ ũndũ wa andũ arĩa matarĩ ũhoti wa kũigua, na gũkarutwo mabuku ma braille nĩ ũndũ wa andũ arĩa matarĩ ũhoti wa kuona. Nĩ tũrona morathi ma Bibilia makĩhinga. Andũ “kuuma harĩ thiomi ciothe cia ndũrĩrĩ” nĩ mareruta kwaria “rũthiomi rũtheru” rwa ma cia Bibilia. (Zek. 8:23; Zef. 3:9) Maũndũ macio mothe marahotekeka kũgerera ũtongoria wa Jesu Kristo.

8. Wĩra witũ wa kũhunjia ũkoretwo na maumĩrĩro marĩkũ gũkinyĩria rĩu?

⁸ Ũmũthĩ, andũ makĩria ma 8,000,000 thĩinĩ wa mabũrũri 240 nĩ maranyitanĩra na ithondeka rĩa Jehova, na o mwaka andũ ngiri nyingĩ nĩ mabatithagio. No ũndũ wa bata makĩria o na gũkĩra mũigana ũcio, nĩ ngumo cia Gĩkristiano, kana “ũmũndũ mwerũ,” ũrĩa andũ  acio mabatithagio mehumbaga. (Kol. 3:8-10) Aingĩ ao nĩ maatigire mĩtugo ya ũũra thoni, ngũĩ, mũthutũkanio, na gũtũgĩria bũrũri wao. Ũrathi ũrĩa ũrĩ thĩinĩ wa Isaia 2:4, ũrĩa uugaga atĩ “matikeruta mbaara rĩngĩ,” nĩ ũrahinga. O ũrĩa tũrerutanĩria kwĩhumba ũmũndũ mwerũ, nĩ tũteithagia andũ gũkuhĩrĩria ithondeka rĩa Jehova na tũkonania atĩ nĩ tũrarũmĩrĩra mũtongoria witũ Jesu Kristo. (Joh. 13:35; 1 Pet. 2:12) Maũndũ macio matiĩkĩkaga o ũguo, no Jesu nĩwe ũtũheaga ũteithio ũrĩa tũrabatara.

9. Kũringana na Mathayo 24:45-47, nĩ ũndũ ũrĩkũ warathĩtwo wĩgiĩ mahinda ma mũthia?

⁹ Thoma Mathayo 24:45-47. Jesu aarathĩte atĩ matukũ-inĩ ma mũthia, nĩ angĩkaamũra “ngombo ĩrĩa njĩhokeku na njũgĩ” nĩguo ĩheanage irio cia kĩĩroho. Kwoguo no twĩrĩgĩrĩre ngombo ĩyo ĩkorũo ĩkĩruta wĩra ũcio na kĩyo mahinda-inĩ maya. Na ũguo nĩguo ĩkoretwo ĩgĩka. Mũtongoria witũ nĩ akoretwo akĩhũthĩra gakundi kanini ka arũme aitĩrĩrie maguta kũhe andũ a Ngai na andũ arĩa makenagio nĩ ũhoro “irio [cia kĩĩroho] ihinda rĩrĩa rĩagĩrĩire.” Arũme acio matiĩyonaga marĩ athani igũrũ rĩa wĩtĩkio wa andũ arĩa angĩ. (2 Kor. 1:24) Handũ ha ũguo, nĩ mamenyaga atĩ Jesu Kristo nĩwe “mũtongoria na mũnene” wa andũ ake.​—Isa. 55:4.

10. Nĩ ibuku rĩrĩkũ harĩ macio monanĩtio mbica-inĩ rĩagũteithirie kwambĩrĩria gũtungatĩra Jehova?

¹⁰ Kuuma mwaka wa 1919, ngombo ĩrĩa njĩhokeku nĩ ĩkoretwo ĩkĩhaarĩria mabuku matiganĩte ma gũteithia arĩa maroka ũhoro-inĩ wa ma kwambĩrĩria kwĩruta Bibilia. Mwaka-inĩ wa 1921, ngombo ĩyo nĩ yarutire ibuku rĩa The Harp of God rĩa gũteithia arĩa maakenagio nĩ ũhoro kũmenya morutani ma mũthingi ma Bibilia. O ũrĩa mahinda maathiaga, noguo kwarutirũo mabuku mangĩ. Nĩ ibuku rĩrĩkũ rĩagũteithirie kũmenya Ithe witũ wa igũrũ  na kũmwenda? Hihi nĩ “Let God Be True,” Ma Ĩrĩa Ĩtongoragia Muoyo-inĩ wa Tene na Tene, Unaweza Kuishi Milele Katika Paradiso Duniani, Ujuzi Uongozao Kwenye Uhai Udumuo Milele, Bibilia Ĩrutanaga Atĩa Kũna?, Bibilia Ĩtũrutaga Atĩa?, kana nĩ Kenera Ũtũũro Tene na Tene!, ibuku ritũ rĩrĩa rĩerũ biũ? Mabuku macio maahaarĩrĩirio nĩguo matũteithie gũtua andũ arutwo, na maarutirũo o ihinda-inĩ rĩrĩa maabataranagia.

11. Nĩkĩ nĩ ũndũ wa bata harĩ ithuothe kũrĩa irio cia kĩĩroho?

¹¹ Andũ arĩa maroka ũhoro-inĩ wa ma to o tu mabataraga irio nyũmũ cia kĩĩroho. Ithuothe nĩ tũcibataraga. Mũtũmwo Paulo aandĩkire ũũ: “Irio nyũmũ nĩ cia andũ agima.” Paulo oongereire atĩ kũrĩa irio icio nyũmũ no gũtũteithie “gũkũũrana wega na ũũru.” (Ahib. 5:14) No ũkorũo ũrĩ ũndũ mũritũ gũikara kũringana na ithimi cia Jehova, makĩria ihinda-inĩ rĩrĩ mĩtugo ĩthũkĩte na gĩkĩro kĩnene. No Jesu nĩ atigagĩrĩra atĩ kũgerera irio icio nĩ tũrona hinya ũrĩa tũbataraga wa gũtũteithia gũtũũria wĩtĩkio witũ ũrĩ mũrũmu. Kĩhumo kĩa irio icio nĩ Kiugo kĩa Ngai, Bibilia, kĩrĩa gĩtongoretio nĩ roho. Ngombo ĩrĩa njĩhokeku ĩhaaragĩria na ĩkaheana irio icio rungu rwa ũtongoria wa Jesu.

12. Tuonanagia atĩa atĩ nĩ tũtĩĩte rĩĩtwa rĩa Ngai o ta Jesu?

¹² O ta Jesu, nĩ tũheaga rĩĩtwa rĩa Ngai gĩtĩo kĩrĩa rĩagĩrĩire kũheo. (Joh. 17:6, 26) Kwa ngerekano, mwaka-inĩ wa 1931 nĩ twambĩrĩirie kũhũthĩra rĩĩtwa Aira a Jehova, rĩrĩa riumanĩte na Maandĩko, na ũndũ ũcio ũkonania atĩ nĩ tuonaga rĩĩtwa rĩa Ngai rĩrĩ rĩa bata mũno harĩ ithuĩ na atĩ nĩ twendaga gwĩtanio na Ithe witũ wa igũrũ. (Isa. 43:10-12) Na kuuma Oktomba mwaka ũcio, rĩĩtwa rĩu rĩa Ngai nĩ rĩkoragwo ngothi-inĩ ya mbere ya ngathĩti cia Mũrangĩri. Makĩria ma ũguo, Bibilia ya New World Translation of the Holy Scriptures nĩ ĩcoketie rĩĩtwa  rĩa Ngai harĩa hothe rĩagĩrĩire gũkorũo thĩinĩ wa Kiugo gĩake. Na githĩ ũguo ti ngũrani mũno na ndini iria ciĩĩtaga cia Gĩkristiano iria cieheretie rĩĩtwa rĩa Jehova kuuma Bibilia-inĩ nyingĩ iria itaũrĩte?

13. Nĩ kĩĩ gĩtũmaga ũkorũo na ma atĩ Jesu nĩ arahũthĩra “ngombo ĩrĩa njĩhokeku na njũgĩ” ũmũthĩ? (Johana 6:68)

¹³ Kũgerera “ngombo ĩrĩa njĩhokeku na njũgĩ,” Jesu nĩ abangĩte gũkorũo na ithondeka gũkũ thĩ rĩa gũtwarithia na mbere ũthathaiya mũtheru. Ũiguaga atĩa igũrũ rĩgiĩ ithondeka rĩu? No kũhoteke ũiguaga o ta mũtũmwo Petero ũrĩa woririe Jesu ũũ: “Tũgũgĩthiĩ kũrĩ ũ? Wee ũrĩ na ciugo cia muoyo wa tene na tene.” (Joh. 6:68) Tũngĩrĩ kũ korũo tũtiokire ithondeka-inĩ rĩa Jehova? Kũgerera ithondeka rĩu Jesu nĩ atigagĩrĩra atĩ nĩ tũhũnĩtio wega kĩĩroho. Ningĩ nĩ atũmenyeragia ũrĩa tũngĩhingia ũtungata witũ na njĩra njega. Makĩria ma ũguo, nĩ atũteithagia kwĩhumba “ũmũndũ mwerũ” nĩgetha tũhotage gũkenia Jehova.​—Ef. 4:24.

14. Ũgunĩkĩte atĩa nĩ ũndũ wa gũkorũo ithondeka-inĩ rĩa Jehova ihinda-inĩ rĩa kĩngʼũki gĩa Korona?

¹⁴ Jesu nĩ atũheaga ũtaaro wa ũũgĩ wa kũrũmĩrĩra rĩrĩa kwaumĩra mathĩna. Ũguni wa ũtaaro ũcio nĩ woonekire wega rĩrĩa kĩngʼũki gĩa Korona kĩaambĩrĩirie. Hĩndĩ ĩyo, andũ aingĩ thĩinĩ wa thĩ matiamenyaga ũrĩa megwĩka, no Jesu nĩ aatigĩrĩire atĩ nĩ twaheo motaaro mangĩtũteithia kwĩgitĩra. Nĩ twekĩrirũo ngoro gwĩkĩraga maski rĩrĩa tũrĩ mũingĩ-inĩ, na gũikara tũraihanĩrĩirie na arĩa angĩ. Athuri a kĩũngano nĩ maaririkanirio gũikara makĩaranagĩria na aarĩ na ariũ a Ithe witũ kĩũngano-inĩ, na kũrora kana nĩ harĩ ũteithio marabatara nĩguo mahote kwĩgitĩra kuumana na mũrimũ na gũikara marĩ na hinya kĩĩroho. (Isa. 32:1, 2) Ningĩ  nĩ twaamũkagĩra motaaro mangĩ na ũhoro wa gũtwĩkĩra ngoro kũgerera riboti cia Kĩama Kĩrĩa Gĩtongoragia ciĩgiĩ mũrimũ wa Korona.

15. Nĩ ũtongoria ũrĩkũ waheanirũo wĩgiĩ ũrĩa tũngĩka mĩcemanio na kũhunjia hĩndĩ ya kĩngʼũki, na maumĩrĩro maarĩ marĩkũ?

¹⁵ Hĩndĩ ĩyo ya kĩngʼũki, ningĩ nĩ twaamũkĩrire ũtongoria wĩgiĩ ũrĩa tũngĩthiĩ na mbere gwĩka mĩcemanio ya kĩũngano na kũhunjia. O na ihenya, tũkĩambĩrĩria kũhũthĩra Intaneti gwĩka mĩcemanio itũ ya Gĩkristiano na igomano. Ningĩ tũkĩambĩrĩria kũhunjia na gĩkĩro kĩnene kũgerera marũa na thimũ. Na Jehova nĩ arathimĩte kĩyo gitũ. Wabici nyingĩ cia honge nĩ ciugĩte atĩ nĩ cionete wongerereku mũnene harĩ mũigana wa ahunjia. O na ahunjia aingĩ nĩ meyoneire maũndũ maingĩ ma gwĩkĩra ngoro ihinda-inĩ rĩa kĩngʼũki.​—Rora gathandũkũ karĩ na kĩongo, “ Jehova nĩ Arathimĩte Wĩra Witũ wa Kũhunjia.”

16. Nĩ ũndũ ũrĩkũ tũngĩkorũo na ma naguo?

¹⁶ No kũhoteke andũ amwe nĩ moonaga ta ithondeka rĩrakĩria njano harĩ motaaro marĩa rĩraheana megiĩ kwĩmenyerera mũrimũ wa Korona. No hingo ciothe nĩ kuoonekaga atĩ motaaro marĩa rĩaheanaga maakoragwo marĩ ma ũũgĩ. (Mat. 11:19) O ũrĩa tũrecũrania ũrĩa Jesu akoretwo agĩtongoria andũ ake na njĩra ya wendo, noguo tũrĩkoragwo na ma atĩ o na maũndũ mangĩcenjia ihinda rĩũkĩte, Jehova na Mũrũwe Jesu nĩ marĩkoragwo hamwe na ithuĩ.​—Thoma Ahibirania 13:5, 6.

17. Ũiguaga atĩa nĩ ũndũ wa gũkorũo rungu rwa ũtongoria wa Jesu?

¹⁷ Nĩ kĩrathimo kĩnene gũkorũo tũkĩruta wĩra rungu rwa ũtongoria wa Jesu. Tũkoragwo thĩinĩ wa ithondeka rĩtagayũkanĩtio nĩ ũndũire, bũrũri, kana rũthiomi. Nĩ tũhaaragĩrio irio njega cia kĩĩroho, na tũkamenyerio wega nĩguo tũhote kũruta wĩra wa kũhunjia. Na tũrĩ mũndũ ũmwe ũmwe, nĩ tũteithagio kwĩhumba ũmũndũ mwerũ na tũkarutwo kwendana. Tũrĩ na itũmi nyingĩ cia kwĩrahĩra gũkorũo rungu rwa Jesu Mũtongoria witũ!