ŨNGĨKORŨO na ma atĩa atĩ Jehova nĩ akũrũmbũyagia? Ũndũ ũmwe nĩ atĩ Bibilia nĩ yugĩte ũguo. 1 Petero 5:7 yugaga: “Mũkĩmũikagĩria mĩtangĩko yanyu yothe, nĩ ũndũ nĩ amũrũmbũyagia.” Nĩ ũira ũrĩkũ ũrĩ naguo wa atĩ Jehova Ngai nĩ akenagio nĩwe?

Ũndũ ũmwe nĩ atĩ Ngai nĩ arĩ ngumo ta iria hihi ũcaragia harĩ arata aku a gĩtĩ kĩa mbere. Kaingĩ arĩa monanagia ũtugi na ũtaana nĩ matuĩkaga arata a hakuhĩ. Ma nĩ atĩ Jehova akoragwo arĩ mũtugi na mũtaana harĩ andũ hĩndĩ ciothe. Ta wĩcirie ũndũ ũyũ: “Atũmaga riũa rĩake rĩarĩre andũ arĩa oru na arĩa ega na agatũma mbura yurĩre andũ arĩa athingu na arĩa matarĩ athingu.” (Mat. 5:45) Riũa na mbura ihingagia maũndũ marĩkũ? Ũndũ ũmwe nĩ atĩ, kũgerera cio Ngai nĩ ‘ahũnagia andũ na irio na akaiyũria ngoro ciao gĩkeno.’ (Atũm. 14:17) Jehova nĩ atigagĩrĩra atĩ thĩ nĩ ĩraruta irio nyingĩ cia kũigana, na irio nĩ kĩndũ kĩmwe gĩtũmaga tũkorũo na gĩkeno.

Gũkĩrĩ ũguo-rĩ, nĩ kĩĩ gĩtũmaga andũ aingĩ makorũo na ng’aragu? Tondũ athani aingĩ arĩa marĩ kuo ũmũthĩ kaingĩ maroraga ũrĩa mangĩĩgĩra na ũnene na matonge handũ ha kwagagĩria mĩtũũrĩre ya andũ. Ica ikuhĩ, Jehova nĩ ekweheria athani acio akoroku na ithenya rĩao arũgamie Ũthamaki wa igũrũ ũrĩa Mũriũ wake agakorũo arĩ Mũthamaki. Hĩndĩ ĩyo gũtirĩ mũndũ ũgaakoragwo na ng’aragu. No ihinda-inĩ rĩrĩ, Ngai nĩ  ahingagĩria ndungata ciake njĩhokeku mabataro mao. (Thab. 37:25) Na githĩ ũndũ ũcio ndũronania atĩ nĩ atũrũmbũyagia?

Mũrata mwega nĩ ahũthagĩra mahinda make hamwe nawe. No ahũthĩre mathaa maingĩ nĩguo mwarie maũndũ mamũkenagia inyuerĩ. Na nĩ agũthikagĩrĩria na kinyi rĩrĩa ũramwĩra ũhoro wĩgiĩ mathĩna na mĩtangĩko yaku. Hihi Jehova nĩ atũthikagĩrĩria na njĩra ta ĩyo? Ĩĩ. Nĩ athikagĩrĩria mahoya maitũ. Nĩkĩo Bibilia ĩtwĩkagĩra ngoro ‘tũhoyage hingo ciothe.’—Rom. 12:12; 1 Thes. 5:17.

Jehova akoragwo ehaarĩirie kũhũthĩra mahinda maigana atĩa agĩthikĩrĩria mahoya maku? Ngerekano ĩmwe ĩrĩ Bibilia-inĩ nĩ ĩtũheaga macokio. Jesu atanathuura atũmwo ake, ‘aahũthĩrire ũtukũ mũgima akĩhoya Ngai.’ (Luk. 6:12) Kwahoteka Jesu nĩ aagwetire arutwo ake aingĩ na marĩĩtwa na akĩgweta ngumo ciao na mĩerekera yao mĩũru na akĩhoya Jehova amũteithie gũthuura arĩa maangĩagĩrĩire gũtuĩka atũmwo. Gũgĩũka gũkĩa Jesu nĩ aamenyaga atĩ aathurĩte arĩa maagĩrĩire biũ gũtungata marĩ atũmwo. Jehova arĩ “mũigua wa mahoya” nĩ akenaga gũthikĩrĩria mahoya ma kuuma ngoro. (Thab. 65:2) O na mũndũ angĩhũthĩra mathaa maingĩ akĩhoya nĩ ũndũ wa ũndũ ũramũthumbũra, Jehova ndanogaga kũmũthikĩrĩria.

Kuohanĩra gũtikoragwo kũrĩ ũndũ mũhũthũ nginya rĩmwe harĩ arata. Nĩ kũrĩ hĩndĩ andũ maniinaga ũrata wa ihinda iraya nĩ ũndũ wa kuona arĩ ũndũ mũritũ kuohanĩra. Jehova ndahaana ũguo. Bibilia ĩtwĩkagĩra ngoro tũmũhoe atuohere “nĩ ũndũ nĩakĩragĩrĩria wohanĩri.” (Isa. 55:6, 7) Nĩ kĩĩ gĩtũmaga Ngai atuohere na njĩra ta ĩyo?

Gĩtũmi nĩ tondũ arĩ wendo mũingĩ. Eendire kĩrĩndĩ gĩa thĩ nginya akĩruta Mũriũ wake Jesu nĩguo akũũre andũ kuumana na mehia na moimĩrĩro moru mamo. (Joh. 3:16)  Ũkũũri nĩ ũhingagia maũndũ mangĩ. Kũgerera igongona rĩa Kristo, Ngai nĩ ohagĩra andũ arĩa endete. Mũtũmwo Johana aandĩkire ũũ: “Tũngiumbũra mehia maitũ, we nĩ mwĩhokeku na nĩ mũthingu, na kwoguo nĩ egũtuohera mehia maitũ.” (1 Joh. 1:9) Nĩ ũndũ wa wohanĩri wa Jehova, andũ no mathiĩ na mbere gũkenera ũrata hamwe nake, na kũmenya ũguo nĩ gũtũhutagia ngoro.

Mũrata wa ma nĩ ateithagia arĩa angĩ rĩrĩa marabatara ũteithio. Hihi Jehova nĩ ekaga ũguo? Kiugo gĩake kiugaga ũũ: “O na aagũa [ndungata ya Jehova], ndangĩtengemana o gũtengemana, tondũ Jehova akoragwo amũnyitĩrĩire guoko.” (Thab. 37:24) Jehova ‘anyitagĩrĩra ndungata ciake’ na njĩra itiganĩte. Ta rora ũndũ wekĩkire gĩcigĩrĩra-inĩ gĩa St. Croix thĩinĩ wa Caribbean.

Kairĩtu kamwe nĩ gookĩrĩirũo nĩ ciana iria ingĩ maathomaga nacio tondũ gatiahũrĩire bendera thurutia nĩ ũndũ wa wĩtĩkio wako. Thutha wa kũhoya Jehova nĩ gaatuire itua rĩa kũhiũrania na ũndũ ũcio. Nĩ kaarĩrĩirie ũhoro wĩgiĩ kũhũrĩra bendera thurutia kĩrathi-inĩ kĩao. Gakĩhũthĩra Ibuku Rĩakwa rĩa Ng’ano cia Biblia, gaataarĩirie ũrĩa rũgano rwa Shadraka, Meshaka, na Abedinego rwagateithirie gũtua itua rĩu. Koigire ũũ: “Jehova nĩ aagitĩire Ahibirania acio atatũ tondũ matiathathairie mũhianano.” Arĩkia kũmeera ũhoro wa ibuku rĩu, arutwo ikũmi na ũmwe kĩrathi-inĩ kĩao makiuga no marĩende. Nĩ ũndũ wa kũmenya atĩ Jehova nĩ aakaheire hinya na ũũgĩ wa kũruta ũira wĩgiĩ ũndũ ũcio warĩ mũritũ, kairĩtu kau nĩ gaakenire mũno.

Ũngĩona ta ũrĩ na nganja kana Jehova nĩ akũrũmbũyagia, no wĩcũranie Maandĩko ta Thaburi 34:17-19; 55:22; na 145:18, 19. Ningĩ no ũũrie ndungata cia Jehova iria itungatĩte kwa ihinda iraihu ũrĩa Jehova acirũmbũĩtie. Na rĩrĩa wabatara ũteithio wa Ngai, mũhoyage agũteithie. Na weka ũguo nĩ ũrĩonaga atĩ Jehova ‘nĩ akũrũmbũyagia.’