Marũgamagĩrĩra mbũtũ cia matu-inĩ iria ciahũthĩkire hĩndĩ ya kwanangwo kwa Jerusalemu na nocio ikahũthĩrũo kũniina mũtabarĩre ũyũ mũru wa Shaitani hĩndĩ ya Hari-Magedoni. Nĩkĩ ũtaũku ũyũ mwerũ nĩ ũragĩrĩra?

Thutha wa Ezekieli kuona maũndũ moru marĩa meekagwo Jerusalemu mbere ya kwanangwo mwaka wa 607 Mbere ya Kristo, nĩ onirio kĩoneki kĩa maũndũ marĩa mangĩekĩkire. Oonire andũ atandatũ marĩ na hiũ cia mbaara. Ningĩ nĩ oonire mũndũ ũngĩ warĩ gatagatĩ-inĩ kao ‘wehumbĩte nguo cia gatani’ na aarĩ na “rũhĩa rũa rangi rũa mwandĩki-marũa.” (Ezek. 8:6-12; 9:2, 3) Mũndũ ũcio eerirũo ũũ: “Thiĩ ũtuĩkanie itũũra, . . . wĩkĩre rũũri mathiithi ma andũ arĩa megũcakaya na makarĩrĩra maũndũ mothe ma thahu marĩa mekagwo gũkũ thĩinĩ warĩo.” Thutha ũcio, andũ arĩa maarĩ na hiũ cia mbaara makĩrũo mathiĩ itũũra-inĩ rĩu na morage mũndũ wothe ũtaarĩ na rũũri rũu. (Ezek. 9:4-7) Kĩoneki gĩkĩ kĩratũruta atĩa, na mũndũ ũcio warĩ na rũhĩa rwa rangi rwa mwandĩki-marũa nũ?

Ũrathi ũcio waheanirũo mwaka wa 612 Mbere ya Kristo, na wahingire rĩa mbere rĩrĩa Jerusalemu yanangirũo nĩ mbũtũ ya Babuloni ũndũ ũrĩa wekĩkire mĩaka ĩtano thutha ũcio. O na gũtuĩka Babuloni nĩo maanangire itũũra rĩu, nĩ Jehova wamahũthagĩra. (Jer. 25:9, 15-18) Gĩtũmi nĩ tondũ Jehova aamahũthĩrire kũherithia andũ ake arĩa maregenyũkĩte. O na kũrĩ ũguo, ti andũ othe mangĩaninirũo. Arĩa athingu matingĩaninanĩirio hamwe na arĩa aganu. Nĩ ũndũ wa wendo wake, Jehova nĩ aabangire ũrĩa angĩahonokirie Ayahudi arĩa mataanyitanagĩra na maũndũ marĩa moru meekagwo itũũra-inĩ rĩu.

Ezekieli ndaahũthĩkire harĩ gwĩkanĩra rũũri o na kana kũniinana. Handũ ha ũguo, wĩra ũcio ũngĩatongoririo nĩ araika. Kwoguo kũhĩtũkĩra ũrathi ũyũ, nĩ tũhotaga kũmenya maũndũ marĩa maathiaga na mbere kũrĩa igũrũ. Jehova aahete araika ake wĩra wa kũbanga ũrĩa arĩa aganu mekũniinwo na kwamũrania arĩa athingu nĩguo amahonokie. *

Hau mbere twataaragĩria atĩ mahinda-inĩ maya mũndũ ũcio warĩ na rũhĩa rwa rangi rwa mwandĩki-marũa arũgamĩrĩire aitĩrĩrie maguta arĩa matigarĩte. Gweciragio atĩ arĩa mamũkagĩra ũhoro ũrĩa mwega na njĩra njega nĩ mekagĩrũo rũũri nĩguo makaahonoka. No mĩaka-inĩ ya ica ikuhĩ nĩ kuonekete atĩ nĩ kũrabatara gwĩkwo ũgarũrũku ũndũ-inĩ ũcio. Kũringana na Mathayo 25:31-33, Jesu nĩwe ũtuagĩra andũ. Agaatuĩra andũ hĩndĩ ya thĩna ũrĩa mũnene, amũranie arĩa a mũhaano wa ng’ondu mahonoke, nao arĩa a mũhaano wa mbũri maniinwo.

Nĩ ũndũ ũcio-rĩ, tũreruta atĩa kuumana na ũtaũku ũyũ mwerũ wa kĩoneki kĩa Ezekieli? Harĩ na maũndũ ta matano tũreruta.

1.  Mbere ya Jerusalemu kwanangwo, Ezekieli aatungataga arĩ ta mũrangĩri hamwe na Jeremia o ta ũrĩa Isaia eekĩte hau kabere. Mahinda-inĩ maya Jehova arahũthĩra gakundi kanini ka aitĩrĩrie maguta kũhe andũ ake irio cia kĩĩroho na kũhe arĩa angĩ mũkaana mbere ya thĩna ũrĩa mũnene wambĩrĩirie. Nao andũ othe a nyũmba ya Kristo marĩ na itemi harĩ kũheana mũkaana ũcio.—Mat. 24:45-47.

2.  Ezekieli ndaarĩ na itemi harĩ gwĩkĩra andũ rũũri nĩguo mahonokio, na o na ndungata cia Jehova ũmũthĩ itihetwo wĩra ũcio. Itemi rĩao nĩ gũkinyĩria  andũ ndũmĩrĩri ya Jehova kũgerera wĩra wa kũhunjia ũrĩa ũratongorio nĩ araika.—Kũg. 14:6.

3.  Mahinda-inĩ ma Ezekieli, gũtirĩ mũndũ wekĩrirũo rũũri ruonekaga thiithi-inĩ wake na noguo kũrĩ nginya ũmũthĩ. Nĩ ũndũ ũrĩkũ andũ marabatara gwĩka nĩguo magekĩrũo rũũri rwa mũhaano nĩguo makaahonoka? Magĩrĩirũo gwĩtĩkĩra ndũmĩrĩri ĩrĩa ĩrahunjio, makũrie ngumo cia Gĩkristiano, meyamũrĩre Jehova na manyite mbaru ariũ a Ithe na Kristo marĩ na wĩhokeku. (Mat. 25:35-40) Arĩa megwĩka ũguo nĩ magekĩrũo rũũri hĩndĩ ya thĩna ũrĩa mũnene nĩguo makaahonoka.

4.  Mũndũ ũcio warĩ na rũhĩa rwa rangi rwa mwandĩki-marũa mahinda-inĩ maya arũgamagĩrĩra Jesu Kristo, ũrĩa ũgekĩra rũũri arĩa makaahonoka. Andũ a kĩrĩndĩ kĩnene magekĩrũo rũũri rĩrĩa magaatuĩrũo atĩ nĩ a mũhaano wa ng’ondu hĩndĩ ya thĩna ũrĩa mũnene. Ũndũ ũcio nĩ ũgaatũma maheo muoyo wa tene na tene thĩinĩ wa thĩ.—Mat. 25:34, 46. *

5.  Mahinda-inĩ maya, andũ arĩa atandatũ maarĩ na hiũ cia mbaara marũgamĩrĩire mbũtũ ya Jesu ya matu-inĩ marĩ na Jesu arĩ we mũtongoria wao. Ica ikuhĩ nĩ mekũniina ndũrĩrĩ na waganu wothe.—Ezek. 9:2, 6, 7; Kũg. 19:11-21.

Gũtaũkĩrũo nĩ maũndũ macio gũtũteithagia gũkorũo na ma atĩ Jehova ndaninanagĩria andũ arĩa athingu hamwe na arĩa aganu. (2 Pet. 2:9; 3:9) Ningĩ no tũraririkanio bata wa wĩra wa kũhunjia matukũ-inĩ maya. Andũ othe nĩ marabatara kũigua mũkaana ũcio mbere ya mũico ũkinyĩte.—Mat. 24:14.