Mũhunjia ũmwe ũtabatithĩtio wĩtagwo Haykanush ũikaraga Armenia, nĩ onire passport hakuhĩ na mũciĩ gwake. Thĩinĩ wa passport ĩyo nĩ haarĩ na kandi cia bengi na mbeca nyingĩ. Nĩ eerire mũthuri wake, ũrĩa o nake warĩ mũhunjia ũtaarĩ mũbatithie.

O na gũtuĩka maarĩ na mathĩna ma mbeca na thirĩ, maatuire itua rĩa gũcokia mbeca icio kũrĩ mwene passport ĩyo. Mwene indo icio na famĩlĩ yake nĩ maagegire mũno. Haykanush na mũthuri wake maataarĩirie atĩ maarĩ ehokeku nĩ ũndũ wa kwĩruta Bibilia. Monire no mũhaka makorũo marĩ ehokeku na makĩoya mweke ũcio kwaria ũhoro wĩgiĩ Aira a Jehova na magĩtigĩra famĩlĩ ĩyo indo mangĩthoma.

Famĩlĩ ĩyo meendaga kũhe Haykanush mbeca imwe irĩ ta kĩheo no akĩrega. Nĩguo monanie ngatho, mũthenya ũrĩa warũmĩrĩire mũtumia wake nĩ aamacereire kwao na akĩringĩrĩria Haykanush oe mbete ya goro ĩrĩa aamũreheire.

O ta famĩlĩ ĩyo, andũ aingĩ no magegio nĩ wĩhokeku ũrĩa Haykanush na mũthuriwe monanirie. No hihi Jehova no agegio? Aangĩonire atĩa wĩhokeku wao? Hihi wĩhokeku wao warĩ wa bata?

Macokio ma ciũria icio ti maritũ. Gĩtũmi nĩ tondũ ndungata cia Ngai ciĩtĩkĩtie atĩ kuonania ngumo ta cia Jehova nĩ kwa bata maitho-inĩ make gũkĩra mahiga ma goro kana indo ingĩ cia kĩĩmwĩrĩ. Mawoni ma Jehova megiĩ indo iria onaga irĩ cia bata na iria itarĩ cia bata nĩ ngũrani na mawoni ma andũ aingĩ. (Isa. 55:8, 9) Nacio ndungata ciake cionaga kuonania ngumo ta ciake ũrĩ ũndũ wa bata mũno.

Ũndũ ũcio nĩ wonekaga wega thĩinĩ wa Bibilia ĩkĩaria ũhoro wa ũtaũku na ũũgĩ. Thimo 3:13-15 yugaga: “Gũkena-rĩ, nĩ mũndũ ũrĩa wonete ũũgĩ-ũrĩa-wa-ma, na mũndũ wĩrutagĩra ũtaũku mũthithũ-inĩ wake. Amu wonjoria waguo nĩ mwega kũrĩ wonjoria wa betha, uumithio waguo ũgagĩkĩra wa thahabu ĩrĩa theru mũno. Mũtumia ũcio ũgwĩtwo Ũũgĩ-ũrĩa-wa-ma e bata gũkĩra ruru iria ndune, na indo ciothe iria ũngĩĩrirĩria gũtirĩ kĩngĩhota kũgerekanĩka nake.” Hatirĩ nganja atĩ Jehova onaga ngumo ta icio irĩ cia bata gũkĩra indo cia kĩĩmwĩrĩ.

Ĩ naguo wĩhokeku?

Jehova nĩ mwĩhokeku, na ‘ndaheenanagia.’ (Tit. 1:2) Aatongoririe mũtũmwo Paulo kwandĩkĩra Akristiano Ahibirania a karine ya mbere ũũ: “Tũhoyagĩrei, nĩ gũkorũo tũrehoka atĩ thamiri citũ nĩ theru, na twendaga gũkorũo tũrĩ ehokeku maũndũ-inĩ mothe.”—Ahib. 13:18.

Jesu Kristo nĩ aigire kĩonereria kĩega kĩa wĩhokeku. Kwa ngerekano, ta ririkana rĩrĩa Mũthĩnjĩri-Ngai-Mũnene Kaiafa aamwĩrire ũũ: “Ndakwĩhĩtithia na Ngai ũrĩa ũrĩ muoyo ũtwĩre kana wee nĩ we Kristo Mũrũ wa Ngai!” Jesu atekũhithĩrĩra oigire atĩ we nĩwe Mesia, o na gũtuĩka nĩ aamenyaga kuuga ũguo nĩ kũngĩatũmire Sanhedrini ĩtue atĩ nĩ mũrumi Ngai na ũndũ ũcio nĩ ũngĩatũmire oragwo.—Mat. 26:63-67.

Ĩ ithuĩ na ithuĩ? Hihi nĩ tũrĩkoragwo tũrĩ ehokeku nginya hĩndĩ ĩrĩa tũngĩkorũo na mweke wa kwĩĩgĩra na indo cia kĩĩmwĩrĩ na njĩra ya kũhũthĩra tũmaheeni tũnini?

Ũhoro wa ma nĩ atĩ ti ũhũthũ gũkorũo tũrĩ ehokeku mahinda-inĩ maya ma mũico  tondũ andũ aingĩ nĩ ‘eyendi, na endi mbeca.’ (2 Tim. 3:2) Mathĩna ma kĩĩmbeca na kwaga mawĩra nĩ gũtũmĩte andũ aingĩ makorũo matarĩ ehokeku. Aingĩ meciragia atĩ kũiya, kũheenania, kana gwĩka ũndũ ũngĩ ũtarĩ wa wĩhokeku ti maũndũ moru. Ũndũ ũcio ũtheremete mũno ũũ atĩ hakinya nĩ kũgĩa indo cia kĩĩmwĩrĩ andũ aingĩ matiĩciragia ũhoro wa wĩhokeku. O na Akristiano amwe nĩ matuĩte matua matarĩ ma ũũgĩ ũndũ-inĩ ũcio na makegĩĩra indo cia kĩĩmwĩrĩ na njĩra ĩtarĩ ya wĩhokeku na kwoguo magakorũo matarĩ na mũrũgamo mwega kĩũngano-inĩ.—1 Tim. 3:8; Tit. 1:7.

O na kũrĩ ũguo Akristiano aingĩ megerekanagia na Jesu. Monaga gũkorũo na ngumo ta cia Ngai kũrĩ kwa bata gũkĩra ũtonga kana ũguni ũngĩ o wothe. Nĩ ũndũ ũcio Akristiano ethĩ arĩa marĩ cukuru matiheenanagia atĩ nĩguo mahĩtũke kĩgeranio. (Thim. 20:23) Ti hĩndĩ ciothe gũkorũo tũrĩ ehokeku kũrehage ũguni ta ũrĩa kwarĩ harĩ Haykanush. O na kũrĩ ũguo, maitho-inĩ ma Ngai nĩ ũndũ wa bata gũkorũo tũrĩ ehokeku na nĩ gũtũmaga tũtũũrie thamiri theru, ũndũ ũrĩa wa bata mũno.

Mũrũ wa Ithe witũ Gagik nĩ kĩonereria kĩega kĩa ũndũ ũcio. Oigaga ũũ: “Itanatuĩka Mũkristiano ndaarutaga wĩra kambuni-inĩ nene na mwene nĩ aaheenanagia ũhoro-inĩ wĩgiĩ mbeca iria kambuni ĩyo yathũkũmaga nĩguo ndakarute igooti inene. Tondũ nĩ niĩ ndaarũgamagĩrĩra wĩra kũu, ndeerĩgagĩrĩrũo he ũrĩa wonganagia igooti ihaki nĩguo ahithĩrĩre maũndũ mataarĩ ma wĩhokeku marĩa kambuni ĩyo yekaga. Kwoguo ndiakoragwo ndĩ mwĩhokeku. No rĩrĩa nderutire ũhoro wa ma nĩ ndaaregire gwĩkaga ũguo, o na gũtuĩka nĩ ndaarĩhagwo wega. Handũ ha ũguo ngĩambĩrĩria kambuni yakwa. Nĩ ndaamĩandĩkithirie kĩĩwatho na nĩ ndĩhaga igooti ũrĩa kwagĩrĩire.”—2 Kor. 8:21.

Gagik oigaga ũũ: “Mbeca iria ndaathũkũmaga cianyihire na nuthu kwoguo warĩ ũndũ mũritũ kũhingĩria famĩlĩ yakwa mabataro.No rĩu nĩ ngoragwo na gĩkeno na thamiri njega mbere ya Jehova. Ngoragwo ndĩ kĩonereria kĩega harĩ ciana ciakwa igĩrĩ na nĩ hotete gũkinyĩra mĩeke ya ũtungata kĩũngano-inĩ. Rĩu ngoragwo njũĩkaine ndĩ mũndũ mwĩhokeku nĩ arĩa monganagia igooti na arĩa tũrutithanagia wĩra nao.”

Jehova nĩ endete arĩa magoocithagia ũrutani wake na njĩra ya kuonania ngumo ciake njega iria nĩ hamwe na wĩhokeku. (Tit. 2:10) Aatongoririe Mũthamaki Daudi kwandĩka ciugo ici cia gwĩkĩra ngoro: “Ndarĩ mũnyinyi, na rĩu ndĩ mũkũrũ, na ndirĩ ndona mũndũ mũthingu atiganĩirio, kana mbeũ yake ĩkĩhoyanga irio.”—Thab. 37:25.

Ngerekano ya Ruthu nĩ yonanagia ũguo. Ndaigana gũtiganĩria nyaciarawe Naomi ũkũrũ-inĩ. Aathamĩire Isiraeli kũrĩa angĩathathairie Ngai ũrĩa wa ma. (Ruth 1:16, 17) Ruthu arĩ kũu Isiraeli onanirie atĩ nĩ mwĩhokeku na mũruti wĩra na kĩyo na njĩra ya kũhaara mĩgũnda-inĩ ta ũrĩa Watho wetĩkĩrĩtie. O ta ũguo Daudi eeyoneire, Jehova ndaatiganĩirie Ruthu na Naomi. (Ruth 2:2-18) Makĩria ma kũhingĩria Ruthu mabataro make ma kĩĩmwĩrĩ, harĩ ũndũ ũngĩ wa bata aamwĩkĩire. Aamũthuurire atuĩke cũwe wa Mũthamaki Daudi na wa Mesia ũrĩa weranĩirũo.—Ruth 4:13-17; Mat. 1:5, 16.

Rĩmwe no ũkorũo ũrĩ ũndũ mũritũ harĩ ndungata imwe cia Jehova kuona mbeca ikũigana kũhingia mabataro mao. Handũ  ha gwĩka maũndũ matarĩ ma wĩhokeku nĩguo mateithĩke, merutanagĩria kũruta wĩra na kĩyo. Na njĩra ĩyo makonania atĩ gũkorũo na ngumo njega ta cia Ngai iria nĩ hamwe na wĩhokeku, ũrĩ ũndũ wa bata mũno gũkĩra kĩndũ o gĩothe gĩa kĩĩmwĩrĩ.—Thim. 12:24; Ef. 4:28.

O ta Ruthu, Akristiano thĩinĩ wa thĩ yothe nĩ monanĩtie atĩ nĩ makoragwo metĩkĩtie atĩ Jehova nĩ arĩmateithagia. Mehokete biũ Ũrĩa watongoririe kĩĩranĩro gĩkĩ kĩandĩkwo kiugo-inĩ gĩake: “Ndirĩ hĩndĩ ngaagũtiga, na ndirĩ hĩndĩ ngaagũtirika.” (Ahib. 13:5) Jehova nĩ onanĩtie atĩ no ahote na nĩ arĩteithagia arĩa othe marĩ na moritũ na monanagia wĩhokeku hĩndĩ ciothe. Nĩ ahingĩtie kĩĩranĩro gĩake gĩa kũhingagĩria andũ mabataro mao.—Mat. 6:33.

Andũ no mone mahiga ma goro na indo ingĩ irĩ cia bata. Ĩndĩ no tũkorũo na ma atĩ Ithe witũ wa igũrũ onaga atĩ mũndũ gũkorũo arĩ na wĩhokeku na ngumo ingĩ ciake, ũrĩ ũndũ wa bata mũno gũkĩra mahiga ma goro!