NJUMATATŨ, Septemba 1, 1919, gwakĩire kũrĩ na ũrugarĩ na riũa, thutha wa gũkorũo na rũhuho na mbura thikũ nyingĩ. Mathaa ma mĩaraho, andũ matakinyĩte 1,000 nĩo maakinyĩte gĩcunjĩ kĩa mbere gĩa kĩgomano gĩkĩambĩrĩria, kĩrĩa gĩekĩirũo kũndũ kũngĩaiganĩire andũ 2,500 thĩinĩ wa Cedar Point, Ohio, U.S.A. Gũkinyĩria hwaĩ-inĩ andũ angĩ 2,000 nĩ maakinyĩte na mokĩte na tũtarũ, ngaari na mĩgithi. Njumaine, gwokĩte andũ aingĩ ũũ atĩ gĩcunjĩ kĩrĩa gĩatigarĩte kĩa programu gĩekĩirũo nja rungu rwa mĩtĩ yarĩ mĩnene.

Riũa rĩamũrĩkaga mathangũ, nacio ciĩruru ciamo igecora nguo-inĩ cia athuri. Namo maguoya ma ngũbia cia atumia maahurutagwo nĩ rũhuho rũrĩa ruoimaga iria-inĩ rĩa Erie. Mũrũ wa Ithe witũ ũmwe oigire ũũ: “Kũndũ kũu twekagĩra kĩgomano kwarĩ gũthaka na kũhoreru gũtarĩ na andũ maratũthumbũra, na nĩ ũndũ ũcio aarĩ na ariũ a Ithe witũ maaiguaga ta maarĩ paradiso.”

Kũndũ kũu gũtiarĩ gũthaka gũkĩringithanio na mothiũ makengu ma andũ arĩa maarĩ kuo. Ngathĩti ĩmwe yoigire atĩ “o na gũtuĩka othe moonekaga meerutĩire biũ, maarĩ akenu mũno.” Arutwo a Bibilia maarĩ na gĩkeno gũkorũo hamwe na Akristiano arĩa angĩ thutha wa magerio manene marĩa maacemanĩtie namo mĩaka mĩnini ĩrĩa yahĩtũkĩte ta: gũũkĩrĩrũo hĩndĩ ya mbaara, ngarari njũru thĩinĩ wa ciũngano, Betheli ya Brooklyn kũhingwo, aingĩ kuohwo njera nĩ ũndũ wa maũndũ ma Ũthamaki, hamwe na ariũ a Ithe witũ anana arĩa maatongoragia gũtuĩrũo kĩoho kĩa mĩaka 20. *

Arutwo amwe a Bibilia nĩ maatigĩte kũhunjia nĩ ũndũ wa gũkua ngoro na ningĩ nĩ moritũ marĩa maacemanagia namo. No aingĩ nĩ maathire na mbere na wĩra ũcio o na thirikari yamagirĩrĩria. Hĩndĩ ĩmwe, mũtuĩria ũmwe wa maũndũ oigire atĩ o na gũtuĩka Arutwo a Bibilia nĩ maahetwo mĩkaana mĩritũ, arĩa oragia ciũria moigaga atĩ “megũthiĩ na mbere kũhunjia kiugo kĩa Ngai nginya mũthia.”

Ihinda-inĩ rĩu rĩothe rĩa magerio, Arutwo a Bibilia ehokeku nĩ maahoyaga na makehoka ũtongoria wa Ngai hĩndĩ ciothe. Na rĩu nĩ maacemanirie rĩngĩ kĩgomano-inĩ marĩ na gĩkeno kũu Cedar Point. Mwarĩ wa Ithe witũ ũmwe onanirie ũndũ andũ aingĩ moigaga wĩgiĩ ũrĩa “mekuongerera ũtungata wao na mahunjie rĩngĩ marĩ na mũbango mwega.” Gũtirĩ wĩra ũngĩ meendaga gwĩkĩrĩra ta wa kũhunjia.

Kiumia-inĩ kĩu gĩothe, arĩa mokĩte kĩgomano-inĩ matiamenyaga kĩrĩa kĩarũgamagĩrĩrũo nĩ ndemwa “GA” iria ciandĩkĩtwo programu-inĩ ya kĩgomano, kandi-inĩ cia kũnyitana ũgeni, na ibandĩko iria ciathiũrũrũkĩirie kũrĩa kĩgomano gĩekagĩrũo. Mũthenya wa Njumaa, Joseph F. Rutherford nĩ aateithirie andũ 6,000 arĩa maarĩ kĩgomano-inĩ kũmenya kĩrĩa kĩarũgamagĩrĩrũo nĩ ndemwa icio. “GA” ciarũgamagĩrĩra ngathĩti njerũ ya kũhũthĩra ũtungata-inĩ yetagwo The Golden Age. *

Mũrũ wa Ithe Witũ Rutherford akĩaria ũhoro wa Akristiano aitĩrĩrie maguta oigire ũũ: “Tondũ maarĩ na wĩtĩkio, handũ ha kuona moritũ marĩa maacemanagia namo, monaga ihinda rĩega rĩarĩ mbere rĩa wathani wa Mesia. . . . Moonaga kũmenyithia andũ ũhoro wĩgiĩ gũka kwa ihinda rĩu rĩega ũrĩ wĩra wao na gĩtĩo kĩa mwanya. Wĩra ũcio maahetwo nĩ Ngai.”

The Golden Age, “Ngathĩti ĩheanaga Maũndũ ma Ma, Kĩĩrĩgĩrĩro na Wĩtĩkio,” ĩngĩahũthĩrirũo kwambĩrĩria njĩra njerũ ya gũtheremia ũhoro wa ma, ya gũthiĩ nyũmba kwa nyũmba kwandĩkithia arĩa mangĩendire kũrehagĩrũo ngathĩti. Rĩrĩa mooririo nĩ aigana mangĩendire kũruta wĩra ũcio, othe makĩrũgama. Ningĩ “makenete na marĩ na kĩyo kĩrĩa gĩkoragwo tu na arĩa marũmagĩrĩra Jesu,” makĩina: “Mwathani tũma ũtheri na ma yaku.” J. M. Norris oigire atĩ ndakariganĩrũo ũrĩa maainire manĩrĩire nginya mĩtĩ ĩkoneka ta ĩrainaina.

Thutha wa kĩgomano, andũ maarire raini mathaa maingĩ nĩguo makorũo marĩ a mbere kwĩyandĩkithia ngathĩti ĩyo. Aingĩ maiguire ta ũrĩa Mabel Philbrick aaiguaga ũrĩa woigire ũũ: “Warĩ ũndũ wa gũcanjamũra kũmenya atĩ nĩ tũngĩakorirũo rĩngĩ na wĩra wa kũruta.”

Hakuhĩ Arutwo a Bibilia 7,000 nĩ meehaarĩirie nĩ ũndũ wa wĩra ũcio. Kĩmenyithia kĩa Organization Method na kabuku geetagwo To Whom the Work Is Entrusted ciaheanĩte ũhoro ũyũ: Rũhonge rwerũ rwa Ũtungata wabici-inĩ nene ya Aira a Jehova nĩruo rũngĩaheanire ũtongoria. Kamĩtĩ ya Ũtungata yagĩrĩire gũthondekwo kĩũngano-inĩ na kwamũrũo mũrũgamĩrĩri ũrĩa ũrĩheanaga maũndũ ma kũrũmĩrĩrũo. Icigo ciabatiĩ kũgayanio, ikorũo na mĩciĩ gatagatĩ ka 150 nginya 200. Gwakoragwo na Mũcemanio wa Ũtungata mũthenya wa Aramithi hwaĩ-inĩ nĩguo ariũ a Ithe witũ maheane maũndũ marĩa meeyoneire na maiyũrie riboti cia ũtungata.

Herman Philbrick oigire ũũ: “Twacoka mĩciĩ gwitũ, ithuothe twekĩrire kĩyo gũcaria andũ arĩa mangĩendire kwĩyandĩkithia nĩguo marehagĩrũo ngathĩti.” Kũrĩa guothe maathiaga nĩ maathikagĩrĩrio. Beulah Covey oigire atĩ “kuonekaga atĩ thutha wa mbaara na kĩeha kĩingĩ, andũ aingĩ nĩ meendaga mũno kũigua ũhoro wa ihinda rĩu rĩega.” Nake mũrũ wa Ithe witũ Arthur Claus aandĩkire ũũ: “Andũ othe thĩinĩ wa kĩũngano nĩ maagegirio mũno nĩ mũigana wa arĩa meyandĩkithĩtie.” Handũ-inĩ ha mĩeri ĩĩrĩ kuuma riuma rĩa mbere rĩa The Golden Age, hakuhĩ kobĩ nuthu milioni nĩ ciaheanĩtwo na andũ 50,000 nĩ meyandĩkithĩtie.

Gĩcunjĩ kĩmwe kĩarĩ na kĩongo “Gospel of the Kingdom,” thĩinĩ wa ngathĩti ya The Watch Tower ya Julaĩ 1, 1920, A. H. Macmillan oigire atĩ nĩkĩo kĩarĩ kĩa mbere gwĩkĩra aarĩ na ariũ a Ithe witũ ngoro thĩ yothe marute wĩra wa kũhunjia. Gĩcunjĩ kĩu gĩekĩrire ngoro aitĩrĩrie maguta othe “maheane ũira thĩinĩ wa thĩ atĩ Ũthamaki wa igũrũ nĩ ũkuhĩrĩirie.” Ũmũthĩ ariũ a Ithe na Kristo “arĩa mehokeirũo wĩra” nĩ manyitagwo mbaru nĩ mamilioni ma andũ arĩa mahunjagia na kĩyo metereire ihinda rĩega rĩrĩa rĩkaarehwo nĩ wathani wa Mesia.