1-3. (a) Nĩ mogarũrũku marĩkũ mangĩtũritũhĩra gwĩka thutha wa kũbatithio? (b) Nĩ ciũria ta irĩkũ tũngĩĩyũria rĩrĩa tuona gũthiĩ na mbere gwĩka mogarũrũku arĩ ũritũ kũrĩ ũrĩa twerĩgagĩrĩra? (Rora mbica kĩambĩrĩria-inĩ gĩa gĩcunjĩ gĩkĩ.)

HĨNDĨ ĩrĩa Kevin ^[1] eerutire ũhoro wa ma, nĩ eendaga mũno kũgĩa na ũkuruhanu wa hakuhĩ na Jehova. No kwa ihinda rĩa mĩaka mĩingĩ aakoretwo agĩũtha kamarĩ, kũnyua thigara, kũhũthĩra njohi ũũru o hamwe na ndawa cia kũrebia. Nĩguo etĩkĩrĩke nĩ Ngai, Kevin nĩ aabataraga gũtigana na mĩtugo ĩyo ĩkaananĩtio nĩ Maandĩko. Nĩ aahotire gwĩka ũguo nĩ ũndũ wa kwĩhoka Jehova na ũteithio wa Kiugo gĩake.—Ahib. 4:12.

² Hihi Kevin nĩ aatigire gwĩka mogarũrũku mũtũũrĩre-inĩ wake thutha wa kũbatithio? Aca. Nĩ aabataraga kũrutĩra wĩra na kwagĩria ngumo ciake cia Gĩkristiano. (Ef. 4:31, 32) Kwa ngerekano, warĩ ũndũ mũritũ harĩ we kwĩgirĩrĩria kũrakaraga  na ihenya. Oigire ũũ: “Kwĩruta kwĩgirĩrĩria marakara kwarĩ kũritũ gũkĩra gũtiga mĩtugo ĩyo ĩngĩ mĩũru yothe.” No nĩ aahotire gwĩka mogarũrũku kũgerera gũthaitha Jehova amũteithie na kwĩruta Bibilia na kĩyo.

³ O ta Kevin, aingĩ aitũ nĩ twabataraga gwĩka mogarũrũku manene mbere ya kũbatithio nĩguo mũtũũrĩre witũ ũtwarane na ũrĩa Bibilia yugaga. Thutha wa kũbatithio nĩ twataũkĩirũo atĩ nĩ twabataraga gũthiĩ na mbere gwĩka mogarũrũku o na marĩa manini nĩguo tũhote kwĩgerekania na Ngai na Kristo. (Ef. 5:1, 2; 1 Pet. 2:21) Kwa ngerekano, no tuone atĩ nĩ tũkoragwo na mwerekera wa gũtuĩra arĩa angĩ, gwĩtigĩra andũ, kwaria ndeto ciene, kana thĩna ũngĩ. Hihi kũgeria kweheria mĩerekera ta ĩyo nĩ gũkoretwo gwĩ kũritũ kũrĩ ũrĩa twerĩgagĩrĩra? Angĩkorũo nĩguo-rĩ, ũndũ ũcio no ũtũme wĩyũrie ũũ: ‘Thutha wa gwĩka mogarũrũku manene-rĩ, nĩ kĩĩ kĩratũma nditũhĩrũo nĩ gwĩka marĩa manini? Ingĩka atĩa nĩguo hũthagĩre Bibilia kwagĩria ũmũndũ wakwa?’

4. Nĩ kĩĩ gĩtũmaga tũremwo gũkenia Jehova hĩndĩ ciothe?

⁴ Nĩ ũndũ wa kũmenya Jehova na kũmwenda nĩ twĩriragĩria na ngoro itũ yothe gwĩka wendi wake. No nĩ ũndũ wa kwaga gũkinyanĩra, ti hingo ciothe tũhotaga gwĩka wendi wa Ngai. Tũiguaga o ta ũrĩa mũtũmwo Paulo aiguaga. Aandĩkire ũũ: “Nĩ ndĩriragĩria gwĩka ũndũ ũrĩa wagĩrĩire no ndikoragwo na ũhoti wa kũwĩka.”—Rom. 7:18; Jak. 3:2.

5. Nĩ mogarũrũku marĩkũ twekire mbere ya kũbatithio, ĩndĩ nĩ mĩerekera ĩrĩkũ tũngĩthiĩ o na mbere kũrũa nayo?

⁵ Nĩ tũtiganĩte na maũndũ moru marĩa mangĩtũma twage kwagĩrĩra gũkorũo tũrĩ kĩũngano-inĩ gĩa Gĩkristiano. (1 Kor. 6:9, 10) O na kũrĩ ũguo, tũtirĩ akinyanĩru. (Kol. 3:9, 10) Nĩ ũndũ ũcio, ti wega kwĩrĩgĩrĩra atĩ tũtirĩhĩtagia, kana tũtingĩgwa ũndũ-inĩ twahotete gũtiga kana gũthumbũka nĩ ũndũ wa mĩerekera mĩũru thutha wa kũbatithio, o kana thutha wa gũkorũo ũhoro-inĩ wa ma mĩaka mĩingĩ. Mĩerekera ĩmwe no ĩikare mĩaka mĩingĩ ĩngĩgaathira.

6, 7. (a) Nĩ kĩĩ gĩtũhotithagia gũkorũo na ũrata hamwe na Jehova o na gũtuĩka tũtirĩ akinyanĩru? (b) Nĩkĩ tũtiagĩrĩirũo gwĩtigĩra kũhoya Jehova atuohere rĩrĩa twehia?

⁶ Kwaga gũkinyanĩra gwitũ gũtiagĩrĩire gũtũma twage gũkorũo na ũrata na Jehova kana gũthiĩ na mbere kũmũtungatĩra. Ta wĩcirie ũndũ ũyũ: Rĩrĩa Jehova aatũgucĩrĩirie harĩ we, nĩ aamenyaga atĩ rĩmwe na rĩmwe nĩ tũrĩhĩtagia. (Joh. 6:44) Tondũ Ngai nĩ atũĩ na nĩ amenyaga kĩrĩa kĩrĩ ngoro-inĩ citũ, nĩ oĩ nĩ mĩerekera ĩrĩkũ ĩngĩtũthumbũra na atĩ rĩmwe na rĩmwe nĩ tũrĩhĩtagia. No ũndũ ũcio ndwatũmire Jehova age gwĩtĩkĩra tũtuĩke arata ake.

⁷ Wendo nĩ watũmire Ngai atũhe kĩheo kĩa goro mũno, igongona rĩa ũkũũri rĩa Mũrũ wake endete. (Joh. 3:16) Tũngĩthiĩ na mbere kwĩrira rĩrĩa twahĩtia na kũhoya Jehova atuohere kũgerera mũthingi wa igongona rĩu, nĩ tũrĩkoragwo na ma atĩ ũrata witũ hamwe nake no ũgũthiĩ na mbere. (Rom. 7:24, 25; 1 Joh. 2:1, 2) Hihi nĩ twagĩrĩire kwaga kũhoya Jehova atuohere atĩ tondũ tũreyona tũrĩ ehia? Aca o na hanini. Gwĩka ũguo no ta kũrega kũhũthĩra maĩ gwĩthamba moko twagĩa gĩko. Ũkũũri waheanirũo nĩ ũndũ wa arĩa meriraga mehia. Na nĩ ũndũ waguo, no tũkorũo na ũrata na Jehova o na tũtarĩ akinyanĩru.—Thoma 1 Timotheo 1:15.

8. Nĩkĩ tũtiagĩrĩirũo kũrekereria mĩerekera itũ mĩũru?

 ⁸ No ũguo ti kuuga atĩ twage gũtindanĩra na mĩerekera itũ mĩũru. Nĩguo tũkũrie ũrata na Jehova nĩ tũbataraga kwĩrutanĩria kwĩgerekania nake na Kristo na tũikarage ũrĩa mendaga. (Thab. 15:1-5) Ningĩ no kũhutĩtie kwĩrutanĩria kũgirĩrĩria mĩerekera itũ ya kwaga gũkinyanĩra na kweheria ĩrĩa tũngĩhota. O na tũngĩkorũo tũrabatithirio ica ikuhĩ kana tũikarĩte ũhoro-inĩ wa ma mĩaka mĩingĩ, no mũhaka ‘tũthiĩi na mbere kũrũngagwo.’—2 Kor. 13:11.

9. Tũmenyaga atĩa atĩ no tũhote gũthiĩ na mbere kwĩhumba ũmũndũ mwerũ?

⁹ Nĩ tũbataraga gũthiĩ na mbere gwĩkĩra kĩyo nĩguo ‘tũrũngwo’ na tũgĩe na “ũmũndũ mwerũ.” Paulo aaririkanirie Akristiano ũũ: “Mwarutirũo kwĩyaũra ũmũndũ ũrĩa wa tene ũringaine na mĩtugo yanyu ya hau kabere na rĩu nĩ ũthũkĩtio nĩ merirĩria maguo ma maheeni. Na mwagĩrĩirũo gũthiĩ na mbere gwĩtĩkĩria hinya mwerũ ũtongorie meciria manyu, na mwĩhumbe ũmũndũ mwerũ ũrĩa wombirũo kũringana na wendi wa Ngai, na ũthingu wa ma na wĩhokeku.” (Ef. 4:22-24) Ciugo “gũthiĩ na mbere gwĩtĩkĩria hinya mwerũ” cionanagia atĩ kwĩhumba ũmũndũ mwerũ nĩ ũndũ ũthiaga na mbere. Ũcio nĩ ũndũ wa gwĩkĩra ngoro tondũ gũtekũmakania tũtungatĩire Jehova ihinda rĩigana atĩa, no tũthiĩ na mbere gũkũria na kwagĩria ngumo cia Gĩkristiano iria ithondekaga ũmũndũ mwerũ. Hatarĩ nganja, Bibilia no ĩthiĩ na mbere kũgarũra mũtũũrĩre witũ.

10. Tũbatiĩ gwĩka atĩa nĩguo tũthiĩ na mbere gwĩka mogarũrũku tũgĩteithio nĩ Bibilia, na nĩ ciũria irĩkũ tũngĩĩyũria?

¹⁰ No mũhaka twĩrutanĩrie angĩkorũo nĩ tũkwenda Kiugo kĩa Ngai gĩthiĩ na mbere gũtũgarũra. No tũrabatara gwĩkĩra kĩyo biũ nĩkĩ? Angĩkorũo Jehova nĩ arathimaga kĩyo gitũ-rĩ, na githĩ gũkũra kĩĩroho gũtiagĩrĩirũo gũkorũo arĩ ũndũ mũhũthũ? Na githĩ Jehova to eherie mĩerekera itũ mĩũru nĩguo tũhotage gũkũria ngumo njega tũtegwĩkĩra kĩyo kĩingĩ?

11-13. Nĩ kĩĩ gĩtũmaga Jehova erĩgĩrĩre twĩkĩre kĩyo nĩguo tũtoorie mĩerekera itũ mĩũru?

¹¹ Twecũrania ũhoro wa igũrũ na thĩ, nĩ tũmenyaga atĩ Jehova nĩ arĩ hinya mũingĩ mũno. Kwa ngerekano, o sekondi, riũa nĩ rĩgarũraga tani milioni ithano cia indo iria irĩ thĩinĩ warĩo igatuĩka hinya. O na gũtuĩka no hinya mũnini warĩo ũkinyaga gũkũ thĩ, nĩ ũhotaga gũtũhe ũrugarĩ na ũtheri ũrĩa ũbataranagia nĩguo ũtũũro ũthiĩ na mbere gũkũ thĩ. (Thab. 74:16; Isa. 40:26) Jehova nĩ akenaga kũhe ndungata ciake hinya ũrĩa irabatara. (Isa. 40:29) Ngai no atũhe hinya wa gũtooria ũndũ o wothe ũtarĩ mwega o na tũtegũtinda tũgĩkĩra kĩyo kana kwĩruta na mahĩtia maitũ. No agaga gwĩka ũguo nĩkĩ?

¹² Jehova nĩ atũheete kĩheo kĩa goro mũno kĩa wĩyathi wa gwĩthurĩra. Rĩrĩa twathuura gwĩka wendi wa Ngai na twerutanĩria kũwĩka, tuonanagia nĩ twendete Jehova na nĩ twendaga kũmũkenia. Ningĩ nĩ tuonanagia atĩ nĩ tũnyitaga mbaru wathani wake. Shaitani nĩ eekĩrĩire nganja kĩhooto kĩa Jehova gĩa gwathana, kwoguo rĩrĩa twerutanĩria biũ kũnyita mbaru wathani wake nĩ akenaga mũno. (Ayub. 2:3-5; Thim. 27:11) No Jehova angĩtwehereria biũ mĩerekera itũ mĩũru ũndũ tũtekũbatara gũtinda tũkĩĩrutanĩria kũrũa nayo nĩguo tũmũkenie, tũtingiuga atĩ nĩ tũranyita mbaru wathani wake tũrĩ na wĩhokeku.

¹³ Nĩ ũndũ ũcio, Jehova atwĩraga ‘twĩrutanĩrie  biũ’ gũkũria ngumo ta ciake. (Thoma 2 Petero 1:5-7; Kol. 3:12) Erĩgagĩrĩra twĩkĩre kĩyo gũtongoria meciria na merirĩria maitũ. (Rom. 8:5; 12:9) Twekĩra kĩyo ũndũ-inĩ ũcio, tũiguaga tũiganĩire mũno kũmenya atĩ Bibilia no ĩragarũra mũtũũrĩre witũ.

14, 15. Tũngĩka atĩa nĩguo tũkũrie ngumo iria Jehova endete? (Rora gathandũkũ “ Bibilia na Mahoya nĩ Ciagarũrire Mĩtũũrĩre Yao.”)

¹⁴ Tũngĩka atĩa nĩguo tũkũrie ngumo igũkenia Jehova? Handũ ha kwĩyamũrĩra maũndũ marĩa tũbatiĩ kũgarũrĩra, twagĩrĩire kũreka Ngai atũtongorie. Aroma 12:2 yugaga ũũ: “Mũtige kwĩgerekanagia na andũ a mũtabarĩre ũyũ wa maũndũ, ĩndĩ mũgarũrũke na njĩra ya kũgarũrĩra meciria manyu, nĩ getha mwĩmenyagĩre wendi ũrĩa mwagĩrĩru wa Ngai, mũkinyanĩru, na wa gwĩtĩkĩrĩka.” Kũgerera Kiugo na roho wake mũtheru, Jehova atũteithagia gũtaũkĩrũo nĩ wendi wake, kũwĩka na kũgarũrĩra mũtũũrĩre witũ kũringana na ithimi ciake. Maũndũ marĩa twagĩrĩirũo gwĩka nĩ ta gũthoma Bibilia o mũthenya na tũgecũrania, na kũhoya tũheo roho mũtheru. (Luk. 11:13; Gal. 5:22, 23) Twetĩkĩra gũtongorio nĩ roho mũtheru wa Ngai na mwĩcirĩrie witũ ũkorũo ũringaine na wa Jehova ta ũrĩa ũguũrĩtio Kiugo-inĩ gĩake, meciria maitũ, ciugo na ciĩko nĩ igũtwarana na ũrĩa Ngai endaga. O na kũrĩ ũguo, nĩ tũkũbatara kwĩmenyerera mũno tũtigatoorio nĩ mĩerekera itũ mĩũru.—Thim. 4:23.

¹⁵ Makĩria ma gũthoma Bibilia o mũthenya, twagĩrĩirũo kwĩruta Kiugo kĩa Ngai tũkĩhũthĩra mabuku maitũ ma Gĩkristiano tũrĩ na muoroto wa kwĩgerekania na ngumo njega cia Jehova. Amwe monaga arĩ wega gũcokanĩrĩria na gũthomaga Maandĩko mamwe na icunjĩ cia Mũrangĩri na Arahũkai! iria ingĩmateithia gũkũria ngumo cia Gĩkristiano kana gũtooria mĩerekera ĩtarĩ mĩega.

16. Nĩkĩ tũtiagĩrĩirũo gũkua ngoro tũngĩona atĩ nĩ tũroya ihinda inene gwĩka mogarũrũku?

¹⁶ Ũngĩona ta ũrakũra kĩĩroho kahora, ririkana atĩ ũndũ ũcio nĩ woyaga ihinda. Gũkũria ngumo cia kĩĩroho gũtikoragwo na mũico. No mũhaka tũkorũo na ũkirĩrĩria tũkĩĩrutanĩria kũreka Bibilia ĩthiĩ na mbere kũgarũra mũtũũrĩre witũ. Kĩambĩrĩria-inĩ no tũbatare kwĩrutanĩria mũno nĩguo twĩke kũringana na Maandĩko. No thutha wa ihinda, gwĩciria na gwĩka kũringana na wendi wa Ngai gũgũkorũo kũrĩ kũhũthũ tondũ meciria na ciĩko citũ nĩ irĩtwaranaga na ũrĩa Jehova endaga.—Thab. 37:31; Thim. 23:12; Gal. 5:16, 17.

17. Nĩ mweke ũrĩkũ tũngĩrĩgĩrĩra ihinda rĩũkĩte twathiĩ na mbere gũkorũo tũrĩ ehokeku harĩ Jehova?

¹⁷ Ihinda rĩũkĩte athathaiya ehokeku a Jehova magakorũo na mweke wa kũmũtungatĩra tene na tene marĩ akinyanĩru. Hĩndĩ ĩyo, ndũgaakoragwo ũrĩ ũndũ mũritũ kuonania ngumo ta cia Ngai no ũgaakoragwo ũrĩ ũndũ wa gũcanjamũra. Ihinda-inĩ rĩrĩ, ũkũũri nĩ ũtũhotithagia gũthathaiya Ngai witũ ũrĩ wendo. No twĩke ũguo o na tũtarĩ akinyanĩru angĩkorũo nĩ tũgũthiĩ na mbere kwĩrutanĩria gwĩtĩkĩria hinya wa Kiugo gĩake ũtũgarũre.

18, 19. Tũngĩkorũo na ma atĩa atĩ Bibilia ĩrĩ na hinya wa gũthiĩ na mbere kũgarũra ũtũũro witũ?

¹⁸ Kevin, ũrĩa ũkũgwetetwo kĩambĩrĩria-inĩ, nĩ eerutanĩirie biũ kũgirĩrĩria marakara make. Nĩ eecũranirie na akĩhũthĩra motaaro ma Bibilia o hamwe na motaaro marĩa aaheirũo nĩ Akristiano arĩa angĩ. Thutha wa mĩaka mĩnini, Kevin nĩ eekĩte mogarũrũku manene. Nĩ aacokire akĩamũrũo arĩ ndungata ya kĩũngano (mũteithia wa ũtungata), na kwa ihinda rĩa mĩaka 20 akoretwo agĩtungata arĩ mũthuri wa kĩũngano. O na kũrĩ ũguo, no erutanagĩria kwĩmenyerera nĩguo ndagacoke na thutha kĩĩroho.

¹⁹ Kĩonereria gĩa Kevin kĩronania atĩ Bibilia nĩ ĩteithagia andũ a Ngai gũthiĩ na mbere gwĩka mogarũrũku ũtũũro-inĩ wao. Kwoguo, rekei tũthiĩ na mbere gwĩtĩkĩria Kiugo kĩa Ngai gĩtũgarũrage na gĩtũteithagie kũgĩa na ũkuruhanu mwega na Jehova. (Thab. 25:14) O ũrĩa tũkuona Jehova akĩrathima kĩyo gitũ, nĩ tũgũkorũo na ũũma biũ atĩ Bibilia no ĩthiĩ na mbere kũgarũra ũtũũro witũ.—Thab. 34:8.