1-3. Thĩna gatagatĩ ka Yudia na Sintike ũngĩkorũo woimĩrire na njĩra ĩrĩkũ, na mathĩna ta macio mangĩĩthemwo atĩa? (Rora mbica kĩambĩrĩria-inĩ gĩa gĩcunjĩ gĩkĩ.)

NDUNGATA cia Jehova nĩ itĩĩte Bibilia mũno. Tondũ tũtirĩ akinyanĩru, nĩ tũbataraga ũtaaro wa Bibilia. Rĩrĩa twaheo ũtaaro ũcio-rĩ, tũwamũkagĩra atĩa? Ta wĩcirie ngerekano ya Yudia na Sintike, aarĩ a Ithe witũ a karine ya mbere. Nĩ haarĩ na thĩna mũnene gatagatĩ-inĩ ka aarĩ a Ithe witũ acio arĩa maarĩ aitĩrĩrie maguta. Hihi thĩna warĩ ũrĩkũ? Bibilia ndiugĩte. No ta rekei twĩcirĩrie ũrĩa hihi kũngĩkorũo kwarĩ.

² Tũtue atĩ Yudia aanyitĩte ũgeni aarĩ na ariũ a Ithe witũ amwe gwake mũciĩ nĩguo marĩanĩre. Sintike ndaanyitirũo ũgeni, no nĩ aaiguire atĩ arĩa maanyitĩtwo ũgeni nĩ maakeneire. No gũkorũo Sintike eeciririe ũũ: ‘Ndingĩtĩkia atĩ Yudia no age kũnyita ũgeni. Njugaga atĩ tũrĩ arata.’ Nĩ ũndũ wa Sintike kũigua ekĩtwo ũũru, akĩambĩrĩria gwĩkĩrĩra Yudia nganja. Nĩ ũndũ ũcio, Sintike akĩnyita ũgeni aarĩ na ariũ a Ithe witũ o arĩa maanyitĩtwo ũgeni nĩ Yudia no ndaanyitire Yudia ũgeni. Thĩna  ũrĩa warĩ gatagatĩ ka Yudia na Sintike nĩ ũngĩathũkirie thayũ wa kĩũngano gĩothe. Bibilia ndĩtwĩrĩte ũrĩa gwacokire gũthiĩ, ĩndĩ no kũhoteke atĩ aarĩ a Ithe witũ acio nĩ maamũkĩrire ũtaaro wa mũtũmwo Paulo na njĩra njega.—Afil. 4:2, 3.

³ O na mahinda-inĩ maya, maũndũ ta macio no matũme kũgĩe na moritũ kĩũngano-inĩ. O na kũrĩ ũguo, mathĩna ta macio no maniinwo kana methemwo tũngĩhũthĩra ũtaaro wa Kiugo kĩa Ngai. Na angĩkorũo nĩ tũgĩtĩĩte, nĩ tũrĩtũũraga kũringana na motaaro ma kĩo.—Thab. 27:11.

4, 5. Nĩ ũtaaro ũrĩkũ Bibilia ĩtũheaga wĩgiĩ kwĩgirĩrĩria marakara?

⁴ Rĩrĩa twekwo ũndũ ũtarĩ wa kĩhooto kana tuona ta twahũthio, ndũkoragwo ũrĩ ũndũ mũhũthũ kwĩgirĩrĩria kũrakara. No tũigue ũũru mũno tũngĩkwo ũndũ ũtarĩ mwega hihi nĩ ũndũ wa kũrĩa tuumĩte, ũrĩa tũroneka tũhaana, kana maũndũ mangĩ. Ũndũ ũcio no ũkorũo na ruo makĩria angĩkorũo nĩ Mũkristiano ũratwĩka ũguo. Hihi Kiugo kĩa Ngai nĩ gĩkoragwo na ũtaaro ũngĩtũteithia tũngĩcemania na ũndũ ta ũcio?

⁵ Kuuma rĩrĩa mũndũ ombirũo, Jehova nĩ akoretwo akĩona ũrĩa mĩikaranĩrie ya andũ ĩhaana. Nĩ amenyaga ũrĩa tũiguaga na maũndũ marĩa twĩkaga. Marakara no matũme tuuge kana twĩke ũndũ tũgũcoka kwĩrira. Na githĩ ti ũndũ wa ũũgĩ kũhũthagĩra ũtaaro wa Bibilia wa kwĩgiragĩrĩria marakara na kwaga kũrakaraga na ihenya! (Thoma Thimo 16:32; Kohelethu 7:9.) Hatarĩ nganja, ithuothe nĩ tũkũbatara kwĩrutanĩria kuohanagĩra na kwaga kũrakara na ihenya. Jehova na Jesu nĩ moyaga na ũritũ mũno ũhoro wa kuohanĩra. (Mat. 6:14, 15) Hihi nĩ ũkũbatara kwĩrutanĩria kuohanagĩra kana kwĩgiragĩrĩria marakara?

6. Twagĩrĩirũo gwĩthema marũrũ nĩkĩ?

⁶ Andũ arĩa matahotaga kwĩgirĩrĩria marakara, kaingĩ makoragwo na marũrũ. Ũndũ ũcio no ũtũme andũ aingĩ mametheme. Mũndũ ũkoragwo na marũrũ no akorũo na ũgucania mũru kĩũngano-inĩ. No agerie kũhithĩrĩra marũrũ kana rũmena rwake, ĩndĩ meciria macio moru marĩ ngoro-inĩ yake “no [makoimbũka] mbere ya kĩũngano.” (Thim. 26:24-26) Athuri a kĩũngano no mateithie andũ ta acio mone atĩ marũrũ, rũmena, na kwaga kuohanagĩra ti maũndũ magĩrĩire ithondeka-inĩ rĩa Jehova. Kiugo kĩa Ngai nĩ kĩarĩtie ũhoro wĩgiĩ maũndũ macio. (Alaw. 19:17, 18; Rom. 3:11-18) Hihi nĩ wĩtĩkanĩtie na ũguo kiugĩte?

7, 8. (a) Jehova atongoragia gĩcunjĩ gĩa gũkũ thĩ gĩa ithondeka rĩake atĩa? (b) Nĩ motaaro ta marĩkũ makoragwo Kiugo-inĩ kĩa Ngai, na tũbatiĩ kũmathĩkĩra nĩkĩ?

⁷ Jehova atongoragia na akahe arĩa makoragwo gĩcunjĩ-inĩ gĩa gũkũ thĩ gĩa ithondeka rĩake irio cia kĩĩroho kũgerera “ngombo ĩrĩa njĩhokeku na njũgĩ,” rungu rwa ũtongoria wa Kristo, ũrĩa nĩwe “mũtwe wa kĩũngano.” (Mat. 24:45-47; Ef. 5:23) O ta ũrĩa kĩama kĩrĩa gĩatongoragia karine ya mbere gĩekaga, ngombo ĩrĩa njĩhokeku na njũgĩ ĩrũmagĩrĩra Kiugo kĩa Ngai na nĩ ĩgĩtĩĩte mũno. (Thoma 1 Athesalonike 2:13.) Nĩ ũtongoria ũrĩkũ kana nĩ motaaro ta marĩkũ ma gũtũguna makoragwo thĩinĩ wa Bibilia?

⁸ Bibilia ĩtwĩrĩte tũthiage mĩcemanio tũtegũtĩrĩria. (Ahib. 10:24, 25) Ĩtwĩkĩraga  ngoro tũkorũo na wĩtĩkio ũmwe. (1 Kor. 1:10) Kiugo kĩa Ngai gĩtwĩraga tũige maũndũ ma Ũthamaki mbere ũtũũro-inĩ witũ. (Mat. 6:33) Ningĩ Maandĩko nĩ matĩtĩrithagia wĩra ũrĩa tũkoragwo naguo wa kũhunjia nyũmba kwa nyũmba, kũndũ kwa mũingĩ, na kũhunjia nginya rĩrĩa tũtarĩ ũtungata-inĩ. (Mat. 28:19, 20; Atũm. 5:42; 17:17; 20:20) Kũgerera Bibilia, Jehova nĩ erĩte athuri a kĩũngano maigage kĩũngano kĩrĩ gĩtheru. (1 Kor. 5:1-5, 13; 1 Tim. 5:19-21) Ningĩ endaga arĩa othe marĩ ithondeka-inĩ rĩake makoragwo marĩ atheru kĩĩmwĩrĩ na kĩĩroho.—2 Kor. 7:1.

9. Nũ Jesu athurĩte nĩguo atũteithagie gũtaũkĩrũo nĩ Kiugo kĩa Ngai?

⁹ Andũ amwe meciragia atĩ matirabatara gũteithĩrĩrio nĩ mũndũ ũngĩ nĩguo mataũkĩrũo nĩ Bibilia. O na kũrĩ ũguo, Jesu nĩ athurĩte “ngombo ĩrĩa njĩhokeku” ĩheanage irio cia kĩĩroho. Kuuma mwaka wa 1919, Jesu Kristo akoretwo akĩhũthĩra ngombo ĩyo gũteithĩrĩria arũmĩrĩri ake mataũkĩrũo nĩ Kiugo kĩa Ngai na magĩathĩkĩre. Tũngĩrũmagĩrĩra motaaro marĩa makoragwo Bibilia-inĩ, no tũteithie kĩũngano gĩkoragwo kĩrĩ gĩtheru, kĩrĩ na thayũ, na kĩrĩ na ũrũmwe. Kwoguo o mũndũ agĩrĩire kwĩyũria ũũ: ‘Hihi niĩ nĩ njathĩkagĩra ũtongoria wa ngombo ĩrĩa njĩhokeku?’

10. Ibuku rĩa Ezekieli rĩtaarĩirie atĩa gĩcunjĩ kĩa igũrũ gĩa ithondeka rĩa Jehova?

¹⁰ Bibilia nĩ ĩtũteithagia kũmenya ũhoro wĩgiĩ gĩcunjĩ kĩa igũrũ kĩa ithondeka rĩa Jehova. Kwa ngerekano, mũnabii Ezekieli nĩ onirio kĩoneki kĩgiĩ ngaari nene ĩrĩa ĩrũgamĩrĩire gĩcunjĩ kĩa igũrũ kĩa ithondeka rĩa Jehova. (Ezek. 1:4-28) Jehova nĩwe ũtongoragia ngari ĩyo na ĩthiaga kũrĩa guothe roho wake ũramĩtongoria. Nĩ ũndũ ũcio, gĩcunjĩ gĩa gũkũ thĩ kĩa ithondeka rĩake nĩ gĩtwaranaga na gĩcunjĩ gĩa kũrĩa igũrũ. Hatarĩ nganja, ngari ĩyo ĩkoretwo ĩgĩthiĩ. Ta wĩcirie mogarũrũku marĩa mekĩtwo thĩinĩ wa ithondeka rĩa Jehova ihinda-inĩ rĩa mĩaka ikũmi mĩhĩtũku, na ndũkariganĩrũo atĩ Jehova nĩwe ũtongoragia mogarũrũku macio. Ihinda rĩtarĩ kũraihu, Kristo na araika nĩ mekũnina mũtabarĩre ũyũ mũru, ũndũ ũrĩa ũgũtũma ũnene wa Jehova ũteterũo na rĩĩtwa rĩake rĩtherio.

11, 12. Nĩ maũndũ ta marĩkũ marahingio nĩ ithondeka rĩa Jehova?

¹¹ Ta wĩcirie maũndũ marĩa gĩcunjĩ gĩa gũkũ thĩ gĩa ithondeka rĩa Jehova gĩkoretwo gĩkĩhingia matukũ-inĩ maya ma kũrigĩrĩria. Wĩra wa mĩako. Aarĩ na ariũ a Ithe witũ nĩ marutĩte wĩra na kĩyo mũno gwaka wabici nene ya Aira a Jehova thĩinĩ wa Warwick, New York, U.S.A. Erutĩri ngiri nyingĩ nĩ mararuta wĩra na kĩyo gwaka Nyũmba cia Ũthamaki na kũnenehia wabici cia honge makĩrũmĩrĩra ũtongoria wa Rũhonge rwa Gũcora/Mĩako rwa Thĩ Yothe. Nĩ tũkenaga mũno nĩ ũndũ wa erutĩri  arĩa marutaga wĩra na kĩyo mĩako-inĩ ĩyo. Ririkana atĩ Jehova nĩ arathimaga ahunjia a Ũthamaki thĩinĩ wa thĩ yothe arĩa manyitaga mbaru wĩra wa mĩako ta ĩyo kũgerera mĩhothi yao.—Luk. 21:1-4.

¹² Gĩthomo. Ta wĩcirie ũhoro wa cukuru itiganĩte iria tũkoragwo nacio ithondeka-inĩ rĩa Jehova. (Isa. 2:2, 3) Gũkoragwo na Cukuru ya Ũtungata wa Ũpainia, Cukuru ya Ahunjia a Ũthamaki, Cukuru ya Gileadi, Cukuru ya Arĩa Metwo Gũtungata Betheli, Cukuru ya Arori Arĩa Magendaga na Atumia ao, Cukuru ya Athuri a Kĩũngano, Cukuru ya Ũtungata wa Ũthamaki, na Cukuru ya Arĩa marĩ Kamĩtĩ-inĩ cia Wabici cia Honge na Atumia ao. Jehova nĩ endete mũno gũthomithia andũ ake. Ningĩ website itũ ya jw.org nĩ ĩkoragwo na mabuku na indo ingĩ iria ciaragĩrĩria Bibilia na thiomi itiganĩte. Website ĩyo nĩ ĩkoragwo na icunjĩ cia ciana na cia famĩlĩ, o hamwe na gĩcunjĩ kĩa mohoro. Hihi nĩ ũkoretwo ũkĩhũthĩra jw.org ũtungata-inĩ na ũthathaiya-inĩ wa Famĩlĩ?

13. Tũrĩ ndungata njĩhokeku cia Jehova twagĩrĩirũo nĩ gwĩka atĩa?

¹³ Nĩ gĩtĩo kĩnene mũno gũkorũo ithondeka-inĩ rĩa Jehova. Tondũ nĩ tũmenyete wendi wa Ngai na ithimi ciake, twagĩrĩirũo gwĩka ũrĩa endaga na tũnyite mbaru ũnene wake. O ũrĩa ũmaramari ũrathiĩ ũingĩhĩte thĩinĩ wa thĩ, noguo tũrabatara ‘gũthũũra ũũru,’ o ta ũrĩa Jehova aũthũire. (Thab. 97:10) Twĩthemaga mwerekera wa andũ arĩa matuaga “maũndũ moru mega, . . . namo marĩa mega makamatua moru.” (Isa. 5:20) Tondũ nĩ twendaga gũkenia Ngai, twĩrutanagĩria gũkorũo tũrĩ atheru kĩĩmwĩrĩ, kĩĩmĩtugo, na kĩĩroho. (1 Kor. 6:9-11) Kwenda Jehova na kũmwĩhoka gũtũmaga tũkorũo tũrĩ ehokeku harĩ we na tuonanagia ũguo na njĩra ya gũikara kũringana na ithimi ciake iria irĩ Bibilia-inĩ. Na nĩ twĩrutanagĩria gwĩka ũguo tũrĩ mĩciĩ-inĩ itũ, kĩũngano-inĩ, wĩra-inĩ, cukuru, kana handũ hangĩ o hothe. (Thim. 15:3) Ta rora njĩra ingĩ tũngĩonania nacio atĩ tũrĩ ehokeku harĩ Jehova.

14. Aciari Akristiano mangĩonania wĩhokeku wao harĩ Ngai atĩa?

¹⁴ Kũrera ciana. Aciari Akristiano monanagia wĩhokeku wao harĩ Jehova na njĩra ya kũrera ciana ciao kũringana na ũrĩa Kiugo kĩa Ngai kiugĩte. Matirũmagĩrĩra ũndũire wa kũrĩa maikaraga ũhoro-inĩ wĩgiĩ kũrera ciana. Mũkristiano ndagĩrĩire gũtongorio nĩ roho wa gũkũ thĩ. (Ef. 2:2) Mũrũ wa Ithe witũ ũrĩ na mwana ndagĩrĩirũo gwĩciria ũũ: ‘Bũrũri-inĩ witũ, atumia nĩo marutaga ciana.’ Bibilia ĩkĩarĩrĩria ũhoro ũcio yugĩte ũũ: “Inyuĩ maithe-rĩ, . . . thiĩi na mbere [kũrera ciana cianyu] mũgĩcirũngaga na mũgĩcitaaraga na njĩra cia Jehova.” (Ef. 6:4) Aciari arĩa mendete Jehova nĩ mendaga ciana ciao ihaane ta Samueli, tondũ Jehova aarĩ hamwe nake agĩkũra.—1 Sam. 3:19.

15. Tuonanagia wĩhokeku harĩ Jehova atĩa rĩrĩa tũratua matua maritũ?

¹⁵ Gũtua matua. Njĩra ĩmwe tũngĩonania nĩ twĩhokete Ngai rĩrĩa tũratua matua maritũ, nĩ gũcaria ũteithio wake kuuma Bibilia-inĩ na kuuma harĩ ithondeka rĩake. Nĩguo tuone bata wa gwĩka ũguo, rekei twĩcirie ũndũ ũmwe ũhutagia aciari aingĩ. Andũ amwe arĩa mathamĩire bũrũri ũngĩ nĩ makoragwo na mũtugo wa gũtwara twana twao tũnini kũrĩ andũ ao bũrũri-inĩ ũrĩa moimĩte, nĩguo o mathiĩ na mbere gũthũkũma marĩ bũrũri-inĩ ũngĩ. O  na gũtuĩka mũndũ nĩwe wagĩrĩire gwĩtuĩra matua, twagĩrĩirũo kũririkana atĩ Jehova nĩ agatũtuĩra kũringana na ciĩko citũ. (Thoma Aroma 14:12.) Hihi nĩ ũndũ wa ũũgĩ gũtua matua marahutia famĩlĩ citũ kana wĩra tũtambĩte gũcaria ũtongoria Kiugo-inĩ kĩa Ngai? Aca. Tũbataraga ũteithio wa Jehova tondũ tũtingĩhota gwĩtongoria.—Jer. 10:23.

16. Nĩ itua rĩrĩkũ mũtumia ũmwe aabatarire gũtua rĩrĩa agĩire mwana, na nĩ kĩĩ kĩamũteithirie gũtua itua rĩega?

¹⁶ Thutha wa mũtumia ũmwe wathamĩire bũrũri ũngĩ kũgĩa kaana, nĩ eendaga gũgatwarĩra aciari ake bũrũri-inĩ wao nĩguo makarere. No ihinda-inĩ rĩu akĩambĩrĩria kwĩruta Bibilia na Aira a Jehova. Nĩ aathire na mbere gũthoma, na akĩĩruta atĩ nĩwe wĩhokeirũo wĩra wa kũrera mwana wake na njĩra ĩgũteithia mwana ũcio arũmĩrĩre ithimi cia Jehova. (Thab. 127:3; Thim. 22:6) Mũtumia ũcio agĩitũrũrĩra Jehova ngoro yake o ta ũrĩa Maandĩko matwĩraga twĩke. (Thab. 62:7, 8) Ningĩ nĩ aaririe ũhoro ũcio na mũndũ ũrĩa wamũrutaga Bibilia, o hamwe na andũ angĩ kĩũngano-inĩ. O na gũtuĩka nĩ aahatĩkagwo mũno nĩ andũ ao na arata atwarĩre aciari ake mwana, aatuire itua rĩa gwĩka ũrĩa kwagĩrĩire. Mũthuri wake nĩ aakenirio mũno nĩ ũrĩa kĩũngano gĩateithirie mũtumia wake na mwana wao, nginya agĩtĩkĩra kwĩruta Bibilia na akĩambĩrĩria gũthiaga mĩcemanio hamwe nao. Hihi mũtumia ũcio nĩ onire atĩ Jehova nĩ aacokirie mahoya make? Hatarĩ nganja nĩ onire.

17. Nĩ ũtongoria ũrĩkũ tũheetwo wĩgiĩ arutwo a Bibilia?

¹⁷ Kũrũmĩrĩra ũtongoria. Tuonanagia wĩhokeku harĩ Jehova rĩrĩa twarũmĩrĩra ũtongoria ũrĩa atũheaga kũgerera ithondeka rĩake. Kwa ngerekano, ta wĩcirie ũtongoria ũrĩa tũheagwo wĩgiĩ arutwo aitũ a Bibilia. Twĩrĩtwo atĩ twambĩrĩria kwĩruta Bibilia na mũndũ, tũkahũthĩra ndagĩka nini thutha wa kwĩruta ibuku rĩa Bibilia Ĩrutanaga Atĩa Kũna? kũmũteithia amenye ithondeka rĩa Jehova. No twĩke ũguo na njĩra ya kũhũthĩra video ya Nĩ Maũndũ Marĩkũ Mekagwo Nyũmba-inĩ ya Ũthamaki? na broshua ya Nĩa Mareka Wendi wa Jehova Ũmũthĩ? Twarĩkia kwĩruta ibuku rĩa Bibilia Ĩrutanaga na mũrutwo ũrathiĩ na mbere, twĩrĩtwo twĩrute nake ibuku rĩa ‘Mwĩigei Wendo-inĩ wa Ngai’ o na angĩkorũo nĩ mũbatithie. Ithondeka rĩheanĩte ũtongoria ũcio nĩguo arutwo erũ ‘marũme wĩtĩkio-inĩ.’ (Kol. 2:7) Hihi nĩ ũrũmagĩrĩra ũtongoria ta ũcio tũheagwo nĩ ithondeka rĩa Jehova?

18, 19. Tũkoragwo na itũmi irĩkũ cia gũcokagĩria Jehova ngatho?

¹⁸ Nĩ tũkoragwo na itũmi nyingĩ cia gũcokeria Jehova ngatho. Nĩwe ũtũhete muoyo na nĩwe ũtũtũũragia. (Atũm. 17:27, 28) Nĩ atũheete Bibilia, kĩheo kĩa goro mũno. Tũmĩonaga ĩrĩ Kiugo kĩa Ngai ta ũrĩa Akristiano a Thesalonike maamĩonaga.—1 Thes. 2:13.

¹⁹ Bibilia nĩ ĩtũteithĩtie gũkuhĩrĩria Jehova, nake agatũkuhĩrĩria. (Jak. 4:8) Jehova nĩ atũheete mweke wa goro mũno wa gũkorũo tũrĩ ithondeka-inĩ rĩake. Na githĩ tũtikenagĩra mũno irathimo icio? Mwandĩki wa Thaburi oigire ũũ: “Gĩcokeriei Jehova ngatho, tondũ nĩ mwega, tondũ ũtugi wake nĩ wa tene na tene.” (Thab. 136:1) Thĩinĩ wa Thaburi 136, ciugo “ũtugi wake nĩ wa tene na tene” icokeretwo maita mĩrongo ĩĩrĩ na matandatũ. Twatũũra tũrĩ ehokeku harĩ Jehova na ithondeka rĩake nĩ tũkona ũũma wa ciugo icio cia gwĩkĩra ngoro, tondũ nĩ tũgatũũra tene na tene.