NDACIARIRŨO mwaka wa 1934. Nĩ ngenaga nĩ kũrerũo nĩ aciari Akristiano, Fred na Edna Molohan, arĩa maandutire gwĩtigĩra Ngai. Gũkinyĩria hĩndĩ ĩyo ndaciarirũo, maakoretwo marĩ Arutwo a Bibilia (Aira a Jehova) marĩ na kĩyo ihinda rĩa mĩaka 20. Famĩlĩ itũ yaikaraga taũni-inĩ nini thĩinĩ wa Kansas ĩtagwo Parsons. Twanyitanagĩra na kĩũngano gĩa kũu kĩrĩa hakuhĩ andũ othe maarĩ Akristiano aitĩrĩrie maguta. Famĩlĩ itũ yarĩ na mũtaratara mwega wa gũthiaga mĩcemanio ya kĩũngano na kũhunjĩria andũ arĩa angĩ ũhoro wa ma wa Kiugo kĩa Ngai. Njuuma thutha wa mĩaraho twathiaga mahunjio ma kũndũ kwa mũingĩ, marĩa mooĩkaine ta mahunjio ma barabara-inĩ hĩndĩ ĩyo. Rĩmwe nĩ twanogaga, no hingo ciothe twarĩkia baba nĩ aatũtwaraga tũkarĩe ice cream tũgacanjamũka.

O na gũtuĩka kĩũngano gitũ kĩarĩ kĩnini, kĩarĩ na gĩcigo kĩnene gĩa kũhunjia kĩrĩa kĩarĩ na taũni nini cigana ũna o hamwe na mĩgũnda mĩingĩ. Tũkĩhunjĩria arĩmi, kaingĩ twacenjanagia mabuku maitũ na irio cia mũgũnda, matumbĩ, o na kana ngũkũ. Na tondũ baba nĩ aakoragwo arutĩte mũhothi wa mabuku macio, indo icio ciakoragwo irĩ irio cia famĩlĩ.

Aciari akwa nĩ maagũrire kĩnanda gĩa kũhũthagĩra makĩhunjia. Ndiahotaga gũkĩhũthĩra tondũ ndaarĩ mũnyinyi, no nĩ ndakenaga gũteithĩrĩria Baba na Mami rĩrĩa marathaaka mĩario ya Mũrũ wa Ithe Witũ Rutherford kũrĩ arĩa macokera na arutwo a Bibilia.

Baba aathondekire ngaari itũ mũthemba wa Ford 1936 ĩgĩtuĩka ngaari ĩrĩa yetagwo ya kũmemerekia, yakoragwo yohereirũo ikero nene igũrũ rĩayo. Ngaari ĩyo nĩ yateithagia mũno harĩ kũhunjia ndũmĩrĩri ya Ũthamaki. Kaingĩ rwĩmbo nĩruo rwambaga gũthaakwo nĩgetha rũguucĩrĩrie andũ, thutha ũcio mĩario ya Bibilia ĩrekondetwo ĩgathaakwo. Mĩario ĩyo yathira, twacokaga tũkaheana mabuku kũrĩ andũ arĩa makenio nĩ ũhoro.

Taũni-inĩ nini ya Cherryvale, Kansas, thigari cierire baba atĩ itingĩetĩkĩririe ngaari ya kũmemerekia ĩigwo handũ harĩa andũ aingĩ maahurũkaga mũthenya wa Kiumia taũni-inĩ ĩyo, no nĩ ingĩetĩkĩririe ĩigwo nja. Nake Baba ategũkararania nao agĩtwara ngaari ĩyo barabara yang’ethanĩire na hau andũ maahurũkaga nĩgetha andũ arĩa maaikarĩte  ho mahote kũigua ndũmĩrĩri, na agĩthiĩ na mbere na programu. Hingo ciothe nĩ ndakenagĩra mahinda ta macio twakoragwo na Baba na Jerry mũrũ wa maitũ ũrĩa mũkũrũ.

Mũthia-inĩ wa mĩaka ya 1930 nĩ twakoragwo na kambĩini cia mwanya cia kũhunjia icigo iria ciakoragwo na ũkararia mũnene nĩgetha tũkahota kũrĩkangia icigo icio na ihenya. Tuokĩraga tene gũtanathererũka (ta ũrĩa twekire Joplin, Missouri) tũkambĩrĩria gũikia trakti kana mabuku tũtekũiguwo rungu rwa mĩrango ya nyũmba ciothe gĩcigo-inĩ kĩu. Twacokaga tũgacemania nja ya taũni nĩguo tuone kana nĩ harĩ mũndũ ũnyitirũo nĩ thigari.

Ũndũ ũngĩ wa ũtungata witũ twakenagĩra mũno mĩaka-inĩ ĩyo nĩ ũrĩa wetagwo mũrũrũngano wa kũheana ũhoro. Nĩguo tũmenyithie andũ ũhoro wĩgiĩ Ũthamaki, twekĩraga ibandĩko na tũgatuĩkanĩria itũũra-inĩ tũrũmanĩrĩire. Nĩ ndirikanaga mũrũrũngano ũmwe wekirũo taũni-inĩ itũ ariũ a Ithe witũ meekĩrĩte ibandĩko ciandĩkĩtwo “Ndini nĩ Mũtego na Kũndũ gwa Ũtunyani.” Maambĩrĩirie gwitũ mũciĩ magĩtuĩkanĩria taũni-inĩ itĩna rĩa kĩndũ kilomita ĩmwe na nuthu, thutha ũcio magĩcoka gwitũ. Ũndũ ũrĩa mwega nĩ atĩ, gũtirĩ mũndũ wamokĩrĩire marĩ mũrũrũngano-inĩ ũcio, no nĩ maacemanirie na andũ aingĩ maakenagio nĩ ũhoro.

Famĩlĩ itũ kaingĩ nĩ yathiaga igomano Texas yumĩte Kansas. Baba aarutaga wĩra kambuni-inĩ ya reli ya Missouri-Kansas-Texas, kwoguo twakuuagwo nĩ mũgithi tũtekũrĩha ũndũ ũrĩa watũhotithagia gũceerera andũ aitũ a famĩlĩ na gũthiĩ igomano hamwe. Mũrũ wa nyina na maitũ Fred Wismar na mũtumia wake Eulalie, maaikaraga Temple, Texas. Mama ũcio witũ Fred eerutire ũhoro wa ma arĩ mwĩthĩ kĩambĩrĩria-inĩ kĩa mĩaka ya 1900, akĩbatithio na akĩhunjĩria aarĩ a nyina arĩa nĩ hamwe na mami ũhoro wa ma. Nĩ ooĩkaine wega nĩ aarĩ na ariũ a Ithe witũ kũndũ guothe thĩinĩ wa Texas, kũrĩa aatungataga hĩndĩ ĩmwe arĩ mũrori wa mũthiũrũrũko. Aarĩ mũndũ mũtugi na mũkeni, na mũndũ nĩ aakenaga gũkorũo hamwe nake. Nĩ eendete mũno ũhoro wa ma, na kĩonereria gĩake kĩega nĩ kĩahutirie ũtũũro wakwa ndĩ mũnyinyi.

Mwaka wa 1941, famĩlĩ itũ nĩ yathiire na mũgithi kĩgomano kĩnene taũni-inĩ ya St. Louis, Missouri. Andũ othe ethĩ makĩrũo maikare thĩ hamwe hakuhĩ na rĩarĩrio nĩguo mathikĩrĩrie mĩario ya Mũrũ wa Ithe witũ Rutherford yarĩ na kĩongo, “Ciana cia Mũthamaki.” Thutha wa mĩario yake, Mũrũ wa Ithe Witũ Rutherford hamwe na arĩa maamũteithagĩrĩria nĩ maaheire o mũndũ wothe mwĩthĩ kĩheo tũteerĩgĩrĩire kĩa ibuku rĩetagwo Children. Andũ ethĩ makĩria ma 15,000 nĩ maagunĩkire nĩ kĩrathimo kĩu gĩa kĩĩroho.

Kũrĩ Ĩpuro 1943, nĩ gwekirũo kĩgomano kĩa bata o na gũtuĩka kĩarĩ kĩnini kĩarĩ na kĩongo, “Rĩĩtana rĩa Kwarahũka” taũni-inĩ ya Coffeyville, Kansas. Nĩ kwaambĩrĩirio Cukuru ya Ũtungata wa Gĩtheokrasi, ĩrĩa ĩngĩaambĩrĩirio gwĩkwo thĩinĩ wa ciũngano ciothe, na gũkĩrutwo kabuku kaarĩ na mathomo 52 ga kũhũthagĩrũo cukuru-inĩ ĩyo. Thutha-inĩ mwaka ũcio, ngĩruta mĩario yakwa ya mbere ndĩ mũrutwo wa cukuru ĩyo. Kĩgomano kĩu ningĩ kĩarĩ kĩa mwanya harĩ niĩ tondũ nĩrĩo ndaabatithirio tũrĩ hamwe  na andũ angĩ maigana ũna karia-inĩ kaarĩ mũgũnda-inĩ warĩ hakuhĩ na hau.

Ndarĩkirie sekondarĩ mwaka wa 1951 na nĩ ndabataraga gũtua itua rĩgiĩ ũtũũro wakwa wa thutha-inĩ. Ũndũ ũrĩa nderiragĩria mũno nĩ gũtungata Betheli, kũrĩa Jerry aakoretwo agĩtungata hau kabere, kwoguo ngĩtũma fomu yakwa wabici-inĩ ya Brooklyn. Itua rĩu rĩacokire kũndeithia mũno kĩĩroho. Thutha wa ihinda inini, nĩ ndetirũo Betheli na ngĩambĩrĩria gũtungata kuo Machi 10, 1952.

Ndeeriragĩria kũruta wĩra kĩganda-inĩ gĩa gũcaba mabuku nĩguo ngateithĩrĩria harĩ gũthondeka ngathĩti na mabuku mangĩ. O na kũrĩ ũguo ndaheirũo wĩra wa gũtwaraga irio metha-inĩ na thutha ũcio wa riiko, wĩra ũrĩa wandeithirie kwĩruta maũndũ maingĩ. Kwoguo ndiigana kũgĩa na mweke wa kũruta wĩra kĩganda-inĩ gĩa gũcaba mabuku. Ĩndĩ tondũ maita mamwe mathaa ma mũthenya ndiarutaga wĩra riiko, nĩ ndaakoragwo na mahinda mahooreru ma kwĩruta ngĩhũthĩra mabuku maingĩ marĩa maakoragwo nyũmba-inĩ ya mabuku ya Betheli. Ũndũ ũcio nĩ wandeithirie gũkũra kĩĩroho na gwĩkĩra wĩtĩkio wakwa hinya. Ningĩ nĩ wekĩrire itua rĩakwa hinya rĩa gũtungatĩra Jehova Betheli ihinda rĩrĩa rĩothe ingĩhota. Jerry nĩ aakoretwo ooimĩte Betheli mwaka wa 1949 na akahikia Patricia, ĩndĩ maaikaraga hakuhĩ na Betheli kũu Brooklyn. Nĩ maandeithagia mũno na makanjĩkĩra ngoro mĩaka-inĩ yakwa ya mbere ya ũtungata wa Betheli.

Kahinda kanini thutha wa gũthiĩ Betheli, nĩ kwambĩrĩirio gwethwo andũ makĩria kuuma harĩ arĩa maarutaga wĩra Betheli, nĩguo mongererũo harĩ ariũ a Ithe witũ arĩa maatũmagwo makarute mĩario. Ariũ a Ithe witũ acio o mwaka nĩ maaheagwo wĩra wa gũceerera ciũngano nginya iria ciarĩ ũraihu wa kilomita 320 kuuma Brooklyn nĩguo marute mĩario ya andũ othe na mahunjie hamwe na kĩũngano. Ndaarĩ ũmwe wa arĩa maaheirũo mweke ũcio. O ndĩ na kaguoya ngĩambĩrĩria kũruta mĩario ya andũ othe, ĩrĩa hĩndĩ ĩyo yakoragwo ĩrĩ ya ithaa rĩmwe. Kaingĩ ndakuuagwo nĩ mũgithi ngĩthiĩ ciũngano-inĩ. Nĩ ndirikanaga mũthenya ũmwe wa Kiumia thutha wa mĩaraho hĩndĩ ya heho mwaka wa 1954. Ndaingĩrire mũgithi wathiaga New York na ndaatanyaga nĩ ngũkinya Betheli hwaĩ-inĩ nduma ĩtanaingĩra. Ĩndĩ gũkĩgĩa kĩhuhũkanio kĩarĩ na rũhuho rũnene na mbarabu. Injini cia mũgithi igĩthũka. Thutha-inĩ mũgithi ũgĩkinya ceceni ya New York City Njumatatũ kĩndũ thaa ikũmi na ĩmwe cia rũcinĩ. Kuuma hau ngĩhaica mũgithi wa gũthiĩ Brooklyn na ndakinya ngĩthiĩ nyingĩrĩte wĩra-inĩ riiko ndĩ mũcerere na nogete mũno thutha wa kũraara ũtukũ mũgima mũgithi-inĩ ũcio warĩ mũthũku. No moritũ ta macio matingĩringithanio na gĩkeno kĩrĩa kĩoimanaga na gũtungatĩra ariũ a Ithe witũ, na kũgĩa na arata aingĩ erũ ũtungata-inĩ ũcio mĩthia-inĩ ya kiumia.

Mĩaka-inĩ yakwa ya mbere ya ũtungata wa Betheli, nĩ ndaheirũo mweke wa gũkoragwo na itemi wĩruti-inĩ wa Bibilia ũrĩa wamemerekagio nĩ ceceni ya redio ya WBBR o kiumia. Hĩndĩ ĩyo ceceni ĩyo yarĩ ngoroba-inĩ ya kerĩ nyũmba-inĩ ya 124 Columbia Heights. Mũrũ wa Ithe witũ Alexander H. Macmillan, ũrĩa watungatĩte Betheli ihinda rĩa mĩaka mĩingĩ, nĩ aakoragwo na itemi kaingĩ programu-inĩ icio cia redio. Twamenyerete kũmwĩta Mũrũ wa Ithe Witũ Mac, na nĩ aaigĩte kĩonereria kĩega harĩ andũ ethĩ a famĩlĩ ya Betheli gĩa gũkirĩrĩria ũtungata-inĩ wa Jehova.

Mwaka-inĩ wa 1958 nĩ ndaheirũo mweke wa gũtungata Cukuru-inĩ ya Gileadi. Wĩra wakwa warĩ gũteithĩrĩria arutwo a Gileadi mone visa na kũbanga thabarĩ cia aarĩ na ariũ a Ithe witũ acio marĩ kĩyo. Mĩaka-inĩ ĩyo, thabarĩ ya ndege yarĩ na goro mũno, nĩ ũndũ ũcio arutwo anini mũno no o maathiaga na ndege. Aingĩ arĩa maatũmagwo Afrika na Asia maahũthagĩra meri cia mĩrigo. Thutha-inĩ rĩrĩa thogora wa ndege wagũagũire, amishonarĩ aingĩ makĩambĩrĩria gũthiĩ na ndege mabũrũri-inĩ marĩa matũmwo.

Mwaka wa 1960, nĩ ndaheirũo wĩra ũngĩ wa kũbanga thabarĩ cia ndege kuuma Amerika (US) gũthiĩ Rũraya nĩ ũndũ wa igomano cia kĩĩmabũrũri cia mwaka wa 1961. Nĩ ndaathiire kĩgomano-inĩ  kĩmwe gĩa icio na ndege kuuma New York nginya Hamburg, Njĩrĩmani. Thutha wa kĩgomano, tũrĩ na ariũ a Ithe witũ atatũ a Betheli nĩ twakomborire ngaari na tũgĩthiĩ nayo kuuma Njĩrĩmani nginya Italy, tũgĩceerera wabici ya rũhonge ĩrĩa ĩrĩ Roma. Kuuma kũu, thabarĩ itũ ĩgĩthiĩ na mbere nginya Faranja, tũgĩtuĩkanĩria Irĩma-inĩ cia Pyrenees tũgĩkinya Spain, kũrĩa wĩra witũ wa kũhunjia wagirĩtio. Nĩ twahotire gũkinyĩria ariũ a Ithe witũ thĩinĩ wa Barcelona mabuku mamwe, marĩa tuoohete ta arĩ iheo twamatwarĩire. Nĩ twakenire mũno kũmona! Tũgĩcoka tũgĩthiĩ na mbere na thabarĩ itũ na ngaari nginya Amsterdam, na tũkĩhaica ndege ya gũcoka New York.

Kĩndũ mwaka ũmwe thutha ũcio, nĩ ndeehokeirũo wĩra wa kũbangĩra aarĩ na ariũ a Ithe witũ thabarĩ cia gũthiĩ igomano cia kĩĩmabũrũri iria ciekĩkaga thĩ yothe. Kĩgomano kĩu kĩa mwaka wa 1963 kĩarĩ na kĩongo, “Ũhoro Ũrĩa Mwega wa Tene na Tene.” Mĩbango nĩ yekirũo nĩguo andũ 583 mathiĩ igomano-inĩ kũndũ gũtiganĩte thĩinĩ wa thĩ, Rũraya, Asia, na Pacific ya Mũhuro, macoke marĩkĩrĩrie iceera rĩu Honolulu, Hawaii, na Pasadena, California. Ningĩ nĩ mangĩagereire Lebanon na Jordan nĩguo merorere na merute maũndũ megiĩ mabũrũri macio magwetetwo thĩinĩ wa Bibilia. Makĩria ma kũbanga ndege iria mangĩathiire nacio na mĩkawa ĩrĩa mangĩaikarire, rũhonge rwitũ thĩinĩ wa Betheli nĩ rwametheire visa cia kũmetĩkĩria gũikara mabũrũri mothe marĩa mangĩagereire.

Nĩ harĩ gĩtũmi kĩngĩ gĩatũmire mwaka wa 1963 ũkorũo ũrĩ wa bata mũno harĩ niĩ. Kũrĩ Juni 29, nĩ ndaahikirie Lila Rogers wa kuuma Missouri, ũrĩa watuĩkĩte wa famĩlĩ ya Betheli mĩaka ĩtatũ mbere ĩyo. Kiumia kĩmwe thutha wa kũhikania, nĩ twambĩrĩirie gũthiĩ na Lila igomano kũndũ gũtiganĩte thĩinĩ wa thĩ na tũgĩceera Ngiriki, Misiri, na Lebanoni. Nĩ twathiire thabarĩ nguhĩ na ndege kuuma Beirut nginya kĩhaaro kĩnini kĩa ndege thĩinĩ wa Jorodani. Na tondũ wĩra wa kũhunjia kũu nĩ wagirĩtio na nĩ twerĩtwo atĩ Aira a Jehova matiaheagwo visa cia kũmetĩkĩria kũingĩra bũrũri ũcio, nĩ twarigagwo ũrĩa gũgũthiĩ twakinya kuo. Tũtietĩkagia rĩrĩa twakinyire tũkĩona andũ aingĩ marũgamĩte nyũmba-inĩ ĩmwe kĩhaaro-inĩ kĩa ndege marĩ na kĩbandĩko kĩandĩkĩtwo “Nĩ Twamũnyita Ũgeni Aira a Jehova”! Nĩ twakenire mũno kwĩyonera na maitho mabũrũri macio magwetetwo Bibilia-inĩ! Nĩ twaceerire kũrĩa athuri ehokeku a mahinda ma Bibilia maatũũraga, kũrĩa Jesu na atũmwo maahunjagia, na kũrĩa Ũkristiano wambĩrĩirie gũtherema ũgĩkinya mĩena ĩngĩ ya thĩ.—Atũm. 13:47.

Kwa ihinda rĩa mĩaka 55, Lila akoretwo akĩnyita mbaru mawĩra-inĩ marĩa mothe twanaheo arĩ na wĩhokeku. Nĩ twahotire gũceera Spain na Portugal maita maigana ũna rĩrĩa wĩra wa kũhunjia wagirĩtio mabũrũri-inĩ macio. Nĩ twekĩraga ariũ a Ithe witũ ngoro na tũkamatwarĩra mabuku na indo ingĩ iria maabataraga. Ningĩ nĩ twahotire gũceerera ariũ a Ithe witũ amwe arĩa moohetwo thĩinĩ wa njera ĩmwe thĩinĩ wa Cádiz, Spain. Nĩ ndaakenire mũno thutha wa kũmarutĩra mĩario ya kũmekĩra ngoro.

Kuuma mwaka wa 1963, nĩ ngeneire mweke wa gũteithĩrĩria kũbanga ũrĩa andũ megũthiĩ igomano cia kĩĩmabũrũri thĩinĩ wa Afrika, Australia, Amerika  ya Gatagatĩ na ya Mũhuro, Rũraya, Asia, Hawaii, New Zealand, na Puerto Rico. Tũrĩ na Lila nĩ tũthiĩte igomano nyingĩ itaakariganĩra, kĩmwe gĩa icio nĩ kĩrĩa gĩekĩirũo Warsaw, Poland, mwaka wa 1989. Ariũ a Ithe witũ aingĩ bũrũri-inĩ wa Russia nĩ maahotire gũthiĩ kĩgomano kĩu kĩnene, riita rĩao rĩa mbere! Aarĩ na ariũ a Ithe witũ amwe arĩa twacemanirie nao maatũũrĩte njera mĩaka mĩingĩ nĩ ũndũ wa wĩtĩkio wao.

Nĩ ngeneire mũno mweke wa gũceerera wabici cia honge kũndũ gũtiganĩte thĩinĩ wa thĩ gwĩkĩra hinya famĩlĩ cia Betheli na amishonarĩ. Iceera ritũ rĩa mũico ta rĩu rĩarĩ bũrũri wa Korea ya Mũhuro, na nĩ twahotire gũcemania na ariũ a Ithe witũ 50 moohetwo njera taũni-inĩ ya Suwon. Ariũ a Ithe witũ acio othe maarĩ na mwerekera mwega na nĩ meeriragĩria mũno gũcokerera wĩra wa kũhunjia. Nĩ twekĩrirũo ngoro mũno thutha wa gũcemania nao!—Rom. 1:11, 12.

Nĩ ndĩyoneire ũrĩa Jehova akoretwo akĩrathima andũ ake ihinda rĩa mĩaka mĩingĩ makongerereka, kuuma rĩrĩa maarĩ ahunjia ta 100,000 rĩrĩa ndabatithirio mwaka wa 1943 nginya magakinya makĩria ma ahunjia 8,000,000 maratungatĩra Jehova mahinda-inĩ maya thĩinĩ wa mabũrũri 240. Andũ arĩa matũmagwo kuuma Cukuru ya Gileadi nĩ makoretwo na itemi inene harĩ wongerereku ũcio. Gĩkoretwo kĩrĩ gĩkeno kĩnene kũrutithania wĩra ihinda rĩa mĩaka mĩingĩ na amishonarĩ acio ngĩmateithĩrĩria mahote gũthiĩ mabũrũri marĩa marĩtungataga!

Nĩ ngenaga atĩ ndĩ mwĩthĩ nĩ ndatuire itua rĩa kũingĩra ũtungata-inĩ wa Betheli. Jehova nĩ andathimĩte na njĩra nene ikĩro-inĩ ciakwa ciothe. Tũrĩ na Lila, nĩ tũkeneire ũtungata wa Betheli, na ihinda rĩa mĩaka mĩingĩ nĩ twakeneire ũtungata hamwe na ciũngano thĩinĩ wa Brooklyn, kũrĩa twagĩire na arata aingĩ a gũtũũra.

No ndĩrathiĩ na mbere gũtungata Betheli na Lila nĩ andeithagĩrĩria o mũthenya. O na gũtuĩka ndĩ na ũkũrũ wa makĩria ma mĩaka 84, no ndutaga wĩra wa gũteithĩrĩria gũtũma na kwamũkĩra marũa wabici-inĩ ya rũhonge.

Nĩ gĩkeno kĩnene gũkorũo thĩinĩ wa ithondeka rĩa magegania rĩa Jehova na kuona ngũrani nene ĩrĩa ĩkoragwo ho gatagatĩ ka arĩa matungatagĩra Jehova na arĩa matamũtungatagĩra. No tũhote gũtaũkĩrũo wega nĩ ciugo ici cia Malaki 3:18: “Nĩmũgacoka gũkũũrana mũndũ ũrĩa mũthingu na ũrĩa mwaganu, na mũkũũrane ũrĩa ũtungatagĩra Ngai na ũrĩa ũtamũtungatagĩra.” O mũthenya nĩ tũreyonera ũrĩa mũtabarĩre ũyũ wa Shaitani ũrathiĩ ũthũkĩte, na ũkaiyũrũo nĩ andũ matarĩ na kĩĩrĩgĩrĩro na gĩkeno. No andũ arĩa mendete na matungatagĩra Jehova makoragwo na gĩkeno ũtũũro-inĩ, o na mahinda-inĩ maya maritũ, na makoragwo na kĩĩrĩgĩrĩro kĩega kĩa mahinda mokĩte. Na githĩ tũtirĩ na mweke mwega mũno wa gũtheremia ũhoro ũrĩa mwega wa Ũthamaki! (Mat. 24:14) Nĩ twĩriragĩria mũthenya ũmwe ũrĩa ũgũka ica ikuhĩ, rĩrĩa Ũthamaki wa Ngai ũkeeheria thĩ ĩno njũru na ũrehe thĩ njerũ na irathimo ciothe iria ciĩranĩirũo, hamwe na ũgima mwega wa mwĩrĩ na muoyo wa tene na tene. Hĩndĩ ĩyo, ndungata njĩhokeku cia Jehova gũkũ thĩ nĩ igaakenera gũtũũra tene na tene.