RUTWO NĨ KIUGO KĨA NGAI

Ngai Etĩkĩrĩtie Mĩnyamaro na Maũndũ Moru Nĩkĩ?

Gĩcunjĩ gĩkĩ kĩrĩ na ciũria hihi waneyũria na nĩ kĩronania harĩa ũngĩona macokio ma ciũria icio thĩinĩ wa Bibilia yaku. Aira a Jehova no makenere kwarĩrĩria macokio macio hamwe nawe.

1. Maũndũ moru maambĩrĩirie atĩa?

Maũndũ moru thĩinĩ wa thĩ maambĩrĩirie rĩrĩa Shaitani aaririe maheeni ma mbere. Shaitani ndoombirũo arĩ mũru. Aarĩ mũraika mũkinyanĩru, no “ndaigana kwĩrũgamania na ũhoro-ũrĩa-wa-ma.” (Johana 8:44) Aakũririe merirĩria ma kũheo ũthathaiya ũrĩa wagĩrĩire o Ngai wiki. Shaitani aaheenirie mũtumia wa mbere, Hawa, na akĩmũiguithia amwathĩkĩre handũ ha gwathĩkĩra Ngai. Adamu nĩ aanyitanĩire na Hawa kũremera Ngai. Itua rĩa Adamu rĩgĩtũma kũgĩe mĩnyamaro na gĩkuũ.—Thoma Kĩambĩrĩria 3:1-6, 17-19.

Rĩrĩa Shaitani onirie Hawa atĩ nĩ wega kũremera Ngai-rĩ, aambĩrĩirie ũremi kwerekera ũnene wa Ngai. Andũ aingĩ nĩ manyitanĩire na Shaitani kũrega wathani wa Ngai. Kwoguo Shaitani agĩtuĩka “mũnene wa gũkũ thĩ.”—Thoma Johana 14:30; Kũguũrĩrio 12:9.

2. Hihi ũũmbi wa Ngai waarĩ na wathe?

Araika na andũ arĩa Ngai ombire nĩ maarĩ na ũhoti wa gwathĩkĩra watho wa Ngai na njĩra nginyanĩru. (Gũcokerithia Maathani 32:5) Ngai aatũmbire tũrĩ na wĩyathi wa gwĩthuurĩra gwĩka wega kana gwĩka ũũru. Wĩyathi ũcio nĩ ũtũhotithagia kuonania wendo witũ harĩ Ngai.—Thoma Jakubu 1:13-15; 1 Johana 5:3.

3. Ngai etĩkĩrĩtie mĩnyamaro nĩkĩ?

Kwa ihinda iraya, Jehova nĩ akirĩrĩirie ũremi kwerekera ũnene wake. Nĩkĩ? Nĩguo andũ mone atĩ kũgeria kwĩyatha gũtingĩmaguna. (Jeremia 10:23)Thutha wa mĩaka 6,000 ĩrĩa andũ makoretwo kuo, thitango ĩrĩa yoimĩririo nĩ yonekete atĩ ndĩarĩ ya ma. Anene a gũkũ thĩ nĩ maremetwo nĩ kũniina mbaara, wĩki-naĩ, wagi wa kĩhooto, o hamwe na mĩrimũ.—Thoma Kohelethu 7:29; 8:9; Aroma 9:17.

Ngũrani na ũguo, arĩa metĩkagĩra Ngai atuĩke Mwathani wao nĩ magunĩkaga. (Isaia 48:17, 18) Ica ikuhĩ, Jehova nĩ arĩniina thirikari ciothe cia andũ. No arĩa tu mathuuraga gũthamakĩrũo nĩ Ngai magatũũra thĩinĩ wa thĩ.—Isaia 2:3, 4; 11:9; thoma Danieli 2:44.

4. Ũkirĩrĩria wa Ngai ũtũheete mweke ũrĩkũ?

Shaitani eendaga kuonania atĩ gũtirĩ mũndũ o na ũrĩkũ ũngĩathĩkĩra Jehova. Ũkirĩrĩria wa Ngai nĩ ũtũheaga ithuothe mweke wa kuonania kana tũngĩenda gwathwo nĩ Ngai kana gwathwo nĩ andũ. Tuonanagia itua riitũ kũgerera mũtũũrĩre witũ.—Thoma Ayubu 1:8-11; Thimo 27:11.

5. Tũthuuraga Ngai atuĩke mwathani witũ atĩa?

Tũthuuraga Ngai atuĩke Mwathani witũ rĩrĩa twetĩkĩra na twarũmĩrĩra ũthathaiya wa ma kũringana na Kiugo gĩake, Bibilia. (Johana 4:23) Ningĩ nĩ twĩthemaga kwĩingĩria maũndũ-inĩ ma ũteti na mbaara, ta ũrĩa Jesu eekire.—Thoma Johana 17:14.

Shaitani ahũthagĩra hinya wake kũgathĩrĩria mĩtugo ya waganu. Rĩrĩa twaregana na mĩtugo ta ĩyo, arata amwe na andũ a mbarĩ ciitũ mahota gũtũnyũrũria kana matũkararie. (1 Petero 4:3, 4) Kwoguo no mũhaka tũtue itua. Hihi nĩ tũrĩnyitanagĩra na andũ arĩa mendete Ngai? Hihi nĩ tũrĩathĩkagĩra watho wake wa ũũgĩ na wendani? Tweka ũguo-rĩ, nĩ tũrĩonanagia atĩ Shaitani aaririe maheeni rĩrĩa oigire atĩ gũtirĩ mũndũ ũngĩathĩkĩra uuge wa Ngai.—Thoma 1 Akorintho 6:9, 10; 15:33.

 [Mbica karatathi ka 13]

Nĩgetha wone ũhoro makĩria, rora gĩcunjĩ gĩa 11 kĩa ibuku rĩrĩ, rĩrĩa rĩcabĩtwo nĩ Aira a Jehova.

BIBILIA ĨRUTANAGA ATĨA Kũna?

[Mbica karatathi ka 12]

Adamu aatuire itua rĩũru

[Mbica karatathi ka 13]

Matua maitũ nĩ monanagia kana nĩ twendaga Ngai atuĩke Mwathani witũ