Ũtaaro wa Ũũgĩ Harĩ Arĩa Mahikanĩtie na Arĩa Matahikanĩtie

“Naguo ũhoro ũcio ndawaria . . . nĩ getha ndĩmuonie maũndũ marĩa maagĩrĩire, na nĩ getha mũikarage mwĩheanĩte kwĩ Mwathani mũtekũgucĩrĩrio nĩ maũndũ mangĩ.”—1 KOR. 7:35.

1, 2. Mũndũ agĩrĩirũo gũcaria ũtaaro wa Bibilia wĩgiĩ arĩa mahikanĩtie na arĩa matahikanĩtie nĩkĩ?

KAINGĨ mĩikaranĩrie ya athuri na atumia ao, o na ya anake na airĩtu nĩ ĩrehaga gĩkeno kana mĩtangĩko na kĩeha. Kĩu nĩ gĩtũmi kĩiganu gĩa gũcaria ũtongoria wa Ngai, o na gũtuĩka nĩ harĩ na itũmi ingĩ cia gũtũma tũcarie ũtongoria ũcio. Mũkristiano ũiganĩire o na atarĩ thĩinĩ wa kĩhiko ahota kuona ta andũ a famĩlĩ na arata maramũtindĩkĩrĩria ahike kana ahikanie. Nake ũngĩ no ende kũingĩra kĩhiko-inĩ no akaga mũndũ maganĩrĩirũo nake. Angĩ nĩ mabataraga ũtaaro wa ũrĩa mangĩĩharĩria nĩ ũndũ wa maũndũ marĩa mũndũ erĩgagĩrĩrũo eke ahika kana ahikania. Akristiano othe arĩa marĩ thĩinĩ wa kĩhiko na arĩa matarĩ thĩinĩ wakĩo nĩ macemanagia na magerio megiĩ mĩtugo ya ngomanio.

2 Makĩria ma gũkorũo maũndũ macio no matũrehere gĩkeno, no mahutie ũkuruhanu witũ na Jehova Ngai. Thĩinĩ wa mũrango wa 7 wa marũa make ma mbere kũrĩ Akorintho, Paulo nĩ aaheanire ũtaaro wĩgiĩ arĩa mahikanĩtie na arĩa matahikanĩtie. Muoroto wake warĩ kũhatĩrĩria athomi ake ‘maũndũ-inĩ marĩa maagĩrĩire, na nĩ getha maikarage meheanĩte kwĩ Mwathani matekũgucĩrĩrio nĩ maũndũ mangĩ.’ (1 Kor. 7:35) Ũgĩciria ũhoro wa ũtaaro wa Paulo wĩgiĩ maũndũ macio ma bata, geria kuona gũkorũo ũrĩ thĩinĩ wa kĩhiko kana ũtarĩ thĩinĩ wakĩo ũrĩ mweke wa gũtungatĩra Jehova biũ.

Itua Iritũ rĩa Mũndũ Kĩũmbe

3, 4. (a) Moimĩrĩro mangĩkorũo marĩ marĩkũ andũ mangĩtindĩkĩrĩria mũrata kana mũndũ wa famĩlĩ aingĩre kĩhiko-inĩ? (b) Ũtaaro wa Paulo ũngĩteithia mũndũ atĩa agĩe na mawoni marĩa magĩrĩire megiĩ kĩhiko?

3 O ta rũrĩrĩ rwa Ayahudi rwa karine ya mbere-rĩ, kũndũ kũingĩ thĩinĩ wa thĩ mahinda-inĩ maya andũ nĩ mekĩrĩire kĩhiko mũno. Kũrĩ handũ hangĩkinya mwanake kana mũirĩtu angĩkorũo ataingĩrĩte thĩinĩ wa kĩhiko, arata na andũ a famĩlĩ makona ta magĩrĩire kũmũtaara. Marĩ ndereeti-inĩ no mamwĩre ekĩre kĩyo gĩa gũcaria mũndũ mangĩhikania nake. O na no mamũgwetere mũndũ mũna mareciria nĩ amwagĩrĩire. Kwahoteka mahũthĩre njĩra cia wara gũtigĩrĩra atĩ andũ acio erĩ nĩ macemania. Ciĩko ta icio kũrĩ hĩndĩ cirehaga gĩconoko, cigathũkia ũrata, kana cigatuuria mũndũ ngoro.

4 Gũtirĩ hĩndĩ Paulo aatindĩkagĩrĩria andũ mahikanie kana maage kũhikania. (1 Kor. 7:7) Nĩ aakoragwo aiganĩire agĩtungatĩra Jehova atarĩ na mũtumia, no nĩ aamenyaga atĩ arĩa angĩ maarĩ na kĩhooto gĩa kũhikania. Mahinda-inĩ maya o namo o Mũkristiano arĩ na kĩhooto gĩa gwĩthuurĩra kana nĩ ekũhika kana nĩ ekũhikania. Arĩa angĩ matiagĩrĩirũo nĩ kũmwĩra ũrĩa egwĩka.

Ũrĩa Mũndũ Angĩgaacĩra O na Atarĩ Kĩhiko-inĩ

5, 6. Paulo aagathĩrĩirie mũndũ gũkorũo atarĩ kĩhiko-inĩ nĩkĩ?

5 Paulo akĩarĩria Akorintho nĩ onanirie bata wa  mũndũ gũkorũo atarĩ thĩinĩ wa kĩhiko. (Thoma 1 Akorintho 7:8.) O na gũtuĩka ndaahikanĩtie-rĩ, Paulo ndeyonaga arĩ wa bata kũrĩ arĩa maahikanĩtie, ta ũrĩa atongoria arĩa matahikanagia a ndini cia Gĩkristiano meyonaga. Handũ ha ũguo, mũtũmwo ũcio onanirie atĩ arĩa matahikanĩtie marĩ na mweke wa mwanya wa gũtungatĩra Ngai gũkĩra arĩa marĩ kĩhiko-inĩ. Hihi mweke ũcio nĩ ũrĩkũ?

6 Kaingĩ Mũkristiano ũtarĩ thĩinĩ wa kĩhiko no ahote kũruta mawĩra mamwe ũtungata-inĩ wa Jehova matangĩhotwo nĩ mũndũ ũrĩ thĩinĩ wa kĩhiko. Paulo nĩ aaheirũo ũtungata wa mwanya wa gũtuĩka ‘mũtũmwo kũrĩ andũ a ndũrĩrĩ.’ (Rom. 11:13) Thoma Atũmwo mũrango wa 13 nginya wa 20, wone ũrĩa Paulo hamwe na amishonarĩ angĩ maambĩrĩirie kũhunjia icigo citaahunjĩtio na makĩambĩrĩria ciũngano kũndũ na kũndũ. Ũtungata-inĩ wake, Paulo nĩ omĩrĩirie maũndũ maritũ gũkĩra andũ aingĩ a mahinda-inĩ maya. (2 Kor. 11:23-27, 32, 33) No nĩ aahotaga kũũmĩrĩria moritũ macio nĩ ũndũ wa gĩkeno kĩrĩa aakoragwo nakĩo nĩ ũndũ wa gũteithia andũ aingĩ matuĩke arutwo. (1 Thes. 1:2-7, 9; 2:19) Hihi korũo nĩ aahikanĩtie kana agakorũo na famĩlĩ-rĩ, nĩ angĩahotire kũhingia maũndũ macio mothe? No gũkorũo ndangĩahotire.

7. Heana ngerekano ya ũrĩa Aira a Jehova mataarĩ ahiku maahũthĩrire mweke ũcio gũtwarithia na mbere maũndũ ma Ũthamaki.

7 Akristiano aingĩ arĩa matahikanĩtie mahũthagĩra mweke ũcio kũhingia maũndũ megiĩ Ũthamaki. Sara na Limbania, mapainia matarĩ ahiku bũrũri-inĩ wa Bolivia, nĩ maathamĩire gĩcagi kĩmwe gĩtaahunjĩtio mĩaka mĩingĩ. Hihi gũkorũo gũtarĩ na thitima nĩ kũngĩagiririe mathiĩ na mbere na ũtungata wao? Moigire ũũ: “Tondũ gũtirĩ tũmeme kana TV, andũ makoragwo na mahinda maingĩ ma gũthoma.” Andũ amwe gĩcagi-inĩ kĩu nĩ moonirie mapainia acio mabuku ma tene ma Aira a Jehova marĩa maakoretwo magĩthoma o na gũtuĩka nĩ maatigĩte gũcabwo tene. Tondũ maathikagĩrĩrio hakuhĩ nyũmba ciothe-rĩ, ndwarĩ ũndũ mũhũthũ harĩ aarĩ acio a Ithe witũ kũrĩkia kũhunjia gĩcagi kĩu gĩothe. Mũtumia ũmwe mũkũrũ aamerire ũũ: “No mũhaka mũico ũkorũo ũrĩ hakuhĩ angĩkorũo macũngĩrĩro-inĩ Aira a Jehova nĩ maakinya gũkũ.” Thutha wa ihinda inyinyi andũ amwe a gĩcagi kĩu makĩambĩrĩria gũthiĩ mĩcemanio ya kĩũngano.

8, 9. (a) Paulo eendaga kuuga atĩa rĩrĩa oigaga atĩ nĩ wega mũndũ gũkorũo atarĩ kĩhiko-inĩ? (b) Akristiano arĩa matarĩ thĩinĩ wa kĩhiko marĩ na mĩeke ĩrĩkũ?

8 Hatarĩ nganja, Akristiano arĩa mahikanĩtie  o nao nĩ makoragwo na moimĩrĩro mega o na rĩrĩa marahunjia ũhoro ũrĩa mwega kũndũ kũrĩ na moritũ. Ĩndĩ ũtungata ũmwe ũrĩa ũngĩrutwo nĩ mapainia arĩa matarĩ kĩhiko-inĩ no ũkorũo ũrĩ mũritũ harĩ arĩa mahikanĩtie kana arĩa marĩ na ciana. Paulo eeciragia ũrĩa ciũngano cia mahinda macio ciarĩ na wĩra mũnene wa kũhunjia ũhoro mwega. Eendaga othe magĩe na gĩkeno o ta kĩrĩa aarĩ nakĩo. Nĩkĩo oigire atĩ nĩ wega mũndũ gũtungatĩra Jehova atarĩ thĩinĩ wa kĩhiko.

9 Painia ũmwe ũtarĩ mũhiku kuuma Amerika (US) aandĩkire ũũ: “Andũ amwe meciragia atĩ andũ arĩa matarĩ thĩinĩ wa kĩhiko matingĩkorũo na gĩkeno. Ĩndĩ nĩ nyonete atĩ gĩkeno kĩa ma kiumanaga na mũndũ gũkorũo arĩ na ũiguano na Jehova. O na gũtuĩka gũkorũo mũndũ atarĩ thĩinĩ wa kĩhiko, nĩ kwĩima-rĩ, kĩu nĩ kĩheo kĩega mũno mũndũ angĩkĩhũthĩra wega.” Akĩaria ũhoro wa kũgĩa na gĩkeno-rĩ, aandĩkire ũũ: “Gũkorũo mũndũ atarĩ thĩinĩ wa kĩhiko ti kuuga atĩ ndangĩkorũo na gĩkeno, no gũtũme akorũo na gĩkeno. Nĩ njũĩ atĩ Jehova eendete andũ othe, arĩa marĩ thĩinĩ wa kĩhiko, na arĩa matarĩ thĩinĩ wakĩo.” Ihinda-inĩ rĩrĩ aratungatĩra arĩ na gĩkeno thĩinĩ wa bũrũri ũkoragwo ũbataire mũno ahunjia a Ũthamaki. Angĩkorũo ndũrĩ thĩinĩ wa kĩhiko-rĩ, hihi no ũhũthĩre mweke ũcio ũrĩ naguo kwandandũra itemi rĩaku rĩa kũruta andũ ũhoro wa ma? Ũngĩka ũguo, o nawe no wone atĩ gũkorũo mũndũ atarĩ kĩhiko-inĩ nĩ kĩheo kĩa mwanya mũno kuuma kũrĩ Jehova.

Arĩa Mendaga Kũingĩra Thĩinĩ wa Kĩhiko

10, 11. Jehova omagĩrĩria atĩa arĩa maratanya kũingĩra thĩinĩ wa kĩhiko no mationete mũndũ ũmagĩrĩire?

10 Thutha wa gũikara kwa ihinda matarĩ kĩhiko-inĩ, ndungata njĩhokeku cia Jehova nĩ ciamũraga gũcaria mũndũ wa kũhikania nake. Nĩ ũndũ wa kũmenya nĩ marabatara gũtongorio, nĩ mahoyaga Jehova amateithie kuona mũndũ ũrĩa ũmagĩrĩire.—Thoma 1 Akorintho 7:36.

11 Angĩkorũo ũtanyaga kũhikania na mũndũ ũrĩ na muoroto wa gũtungatĩra Jehova na ngoro yothe tawe-rĩ, menyithia Jehova ũndũ ũcio na njĩra ya mahoya. (Afil. 4:6, 7) O na angĩkorũo ũkũbatara gweterera ihinda rĩigana atĩa-rĩ, ndũgakue ngoro. Wĩhoke Ngai witũ wĩ wendo agũteithie, na nĩ arĩkũũmagĩrĩria kũringana na mabataro maku.—Ahib. 13:6.

12. Nĩkĩ Mũkristiano nĩ agĩrĩirũo nĩ gwĩcũrania mbere ya gwĩtĩkĩra angĩũrio nĩ mũndũ ũrenda mahikanie?

12 Mũkristiano wendaga kũhika no orio nĩ mũndũ ũtarathiĩ na mbere wega kĩĩroho o na kana mũndũ ũtarĩ Mũkristiano. Ũngĩcemania na ũndũ ta ũcio ririkana atĩ, ũngĩthuura mũndũ ũtakwagĩrĩire wa kũhikania nake no ũkorũo na ruo rũnene gũkĩra ihooru rĩrĩa mũndũ akoragwo narĩo nĩ ũndũ wa gũkorũo atarĩ thĩinĩ wa kĩhiko. Mwarĩkia kũhikithanio, mũgũtũũrania nake ũtũũro-inĩ waku wothe arĩ mwega kana arĩ mũru. (1 Kor. 7:27) Ndũkareke gũkua ngoro gũtũme ũtue itua rĩũru rĩgiĩ kĩhiko rĩrĩa rĩngĩtũma ũgaacoka kwĩrira.—Thoma 1 Akorintho 7:39.

Wĩhaarĩrie nĩ Ũndũ wa Maũndũ Marĩa Makoragwo Thĩinĩ wa Kĩhiko

13-15. Nĩ maũndũ marĩkũ mangĩrehe mĩtangĩko thĩinĩ wa kĩhiko maagĩrĩirũo nĩ kwarĩrĩrio nĩ andũ marenda kũhikania?

13 O na gũtuĩka Paulo nĩ onanirie wega wa gũtungatĩra Jehova mũndũ atarĩ thĩinĩ wa kĩhiko-rĩ, ndoonanirie atĩ arĩa marĩ thĩinĩ wa kĩhiko nĩ mahĩtĩtie. Handũ ha ũguo, ũtaaro wake ũtongoretio nĩ roho nĩ ũteithagia andũ mahiũranie na maũndũ marĩa makoragwo thĩinĩ wa kĩhiko na gũtũũria kĩhiko kĩao.

14 Amwe arĩa mahikanĩtie nĩ marabatara gwĩka ũgarũrũku wĩgiĩ matanya mao megiĩ mahinda mokĩte. Matuma ndũgũ, andũ erĩ no mone wendo wao ta wĩ wa mwanya mũno, na ta megũtũũra na gĩkeno. Makaingĩra kĩhiko-inĩ magĩciragia atĩ gũtirĩ kĩndũ kĩngĩthũkia gĩkeno kĩao. No ũcio ti mwĩcirĩrie wa ma. Wendo ũrĩa andũ makoragũo naguo kĩhiko-inĩ nĩ ũrehaga gĩkeno, ĩndĩ ũrĩ wiki ndũngĩteithia mũthuri na mũtumia matoorie mathĩna marĩa makoragwo thĩinĩ wa kĩhiko o gĩothe.—Thoma 1 Akorintho 7:28. *

15 Andũ aingĩ mahikania o ũguo, nĩ magegaga,  kana o na magakua ngoro, rĩrĩa maaga kũiguithanĩria ũndũ mũna wa bata na mũndũ ũrĩa mahikanĩtie. No maage kũiguithanĩria maũndũ-inĩ megiĩ mĩhũthĩrĩre ya mbeca, gwĩkenia, kũrĩa megũtũũra, na nĩ maita maigana marĩceeragĩra famĩlĩ ciao. Na o mũndũ nĩ arĩ ngumo cingĩaga gũkenia ũrĩa ũngĩ. Marĩ ndũgũ, nĩ ũndũ mũhũthũ kũhũthia maũndũ ta macio, ĩndĩ no macoke marehe mĩtangĩko mĩnene thĩinĩ wa kĩhiko. Nĩ wega andũ marenda kũhikania mambe marĩrĩrie maũndũ macio mbere ya kũhikania.

16. Mũthuri na mũtumia magĩrĩirũo gũkorũo na ũrũmwe nĩkĩ harĩ kũhiũrania na moritũ marĩa moimanaga na kĩhiko?

16 Nĩguo mũthuri na mũtumia magaacĩre na makorũo na gĩkeno no mũhaka makorũo na ũrũmwe makĩhiũrania na mathĩna mao. Nĩ magĩrĩirũo nĩ kũiguithanĩria ũrĩa marĩrũithagia ciana ciao na ũrĩa marĩteithagia aciari ao, o ũrĩa marathiĩ magĩkũraga. Mĩtangĩko ĩrĩa yumanaga na mathĩna ma famĩlĩ ndĩagĩrĩirũo nĩ gũtũma maamũkane. Mangĩhũthĩra ũtaaro wa Bibilia, nĩ marĩhotaga kũniina mathĩna maingĩ, na makahota gũkirĩrĩria marĩa matangĩthira na magaikara marĩ na gĩkeno.—1 Kor. 7:10, 11.

17. Nĩ ‘maũndũ marĩkũ ma thĩ’ mũthuri na mũtumia magĩrĩirũo nĩ kwĩrĩgĩrĩra kũhang’ĩra?

17 Paulo nĩ aagwetete ũndũ ũngĩ wĩgiĩ kĩhiko thĩinĩ wa 1 Akorintho 7:32-34. (Thoma.) Andũ arĩa mahikanĩtie makoragwo ‘makĩhang’ĩra maũndũ ma thĩ,’ marĩa ma o mũhaka ta irio, nguo, ũikaro, na maũndũ mangĩ matarĩ ma kĩĩroho. Mekaga ũguo nĩkĩ? Atanahikania, mũrũ wa Ithe witũ no akorũo nĩ arerutagĩra mũno ũtungata-inĩ. No thutha wa kũhikania, akona atĩ no mũhaka ahũthĩre mamwe ma mahinda na hinya wake kũrũmbũiya mũtumia wake nĩguo amũkenie. Ũguo noguo kũrĩ harĩ mũtumia kwerekera mũthuri wake. Nĩ ũndũ wa ũũgĩ wake-rĩ, Jehova nĩ amenyaga atĩ ũcio nĩ ũndũ ũbataranagia. Nĩ oĩ atĩ nĩguo kĩhiko kĩgaacĩre no mũhaka mũthuri na mũtumia mahũthĩre mamwe ma mahinda na hinya ũrĩa maraahũthagĩra ũtungata-inĩ Wake matanahikania.

18. Nĩ mogarũrũku marĩkũ andũ amwe mangĩbatara gwĩka thutha wa kũhikania?

 18 No nĩ ũndũ ũrĩkũ ũngĩ tũreruta? Tondũ andũ mahikania nĩ mahũthagĩra hinya na mahinda mamwe marĩa marahũthagĩra ũtungata-inĩ wa Ngai kwagĩria kĩhiko kĩao-rĩ, ũguo noguo magĩrĩirũo kũhũthĩra hinya na mahinda mao marĩa marahũthagĩra gwĩkenia matanaingĩra kĩhiko-inĩ. Mũtumia angĩigua atĩa mũthuri wake angĩthiĩ na mbere gwĩkenia mathako-inĩ na arata ake? Ĩ nake mũthuri angĩigua atĩa angĩkorũo mũtumia wake nĩ arahũthĩra mahinda maingĩ maũndũ-inĩ marĩa endete hamwe na arata? Ũndũ ũcio no ũtũme mũndũ ũcio ũngĩ aigue ihooru, aage gĩkeno, na eigue atendetwo. Ũndũ ta ũcio no wĩthemwo angĩkorũo mũthuri na mũtumia nĩ megwĩka o ũrĩa wothe mangĩhota gwĩkĩra kĩhiko kĩao hinya.—Ef. 5:31.

Jehova Endaga Tũkorũo na Mĩthiĩre Mĩtheru

19, 20. (a) Nĩkĩ gũkorũo thĩinĩ wa kĩhiko ti kuuga atĩ mũndũ ndangĩgũa magerio-inĩ ma ũtharia? (b) Andũ mahikanĩtie mangĩraihanĩrĩria ihinda iraya mangĩkorũo ũgwati-inĩ ũrĩkũ?

19 Andũ a Jehova mekaga o ũrĩa wothe mangĩhota gũikaraga marĩ na mĩthiĩre mĩtheru. Amwe nĩ mahikanagia nĩguo metheme mathĩna ũndũ-inĩ ũcio. O na kũrĩ ũguo-rĩ, ti kuuga atĩ kĩhiko no kĩgitĩre mũndũ magerio-inĩ mothe megiĩ ngomanio. Mahinda-inĩ ma Bibilia, itũũra rĩirigĩre riagitagĩra o arĩa maakindagĩria thĩinĩ warĩo. Mũndũ angĩoimire nja ya itũũra nĩ angĩatunyirũo indo kana oragũo nĩ mĩitũ kana ikundi cia njangiri. No taguo andũ arĩa mahikanĩtie magitagĩrũo kuumana na ũtharia mangĩkomania tu na mũndũ ũrĩa mahikanĩtie nake o ta ũrĩa watho wa Jehova uugĩte.

20 Paulo nĩ aarĩrĩirie ũndũ ũcio thĩinĩ wa 1 Akorintho 7:2-5. Mũtumia agĩrĩirũo nĩ gũkomania na mũthuri wake tu; nake mũthuri agĩrĩirũo nĩ gũkomania na mũtumia wake tu. O mũndũ nĩ agĩrĩirũo kũhingĩria ũrĩa ũngĩ “bata wake,” tondũ mũndũ ũrĩ thĩinĩ wa kĩhiko arĩ na kĩhooto gĩa gũkomania na mũndũ ũrĩa mahikanĩtie nake. O na kũrĩ ũguo athuri na atumia amwe maikaraga ihinda iraihu matarĩ hamwe—magathiĩ rũũtha o mũndũ arĩ wiki kana magaikaraga maraihanĩrĩirie nĩ ũndũ wa wĩra, kwoguo o mũndũ akaga kũhingĩria ũrĩa ũngĩ “bata” ũcio. Ta wĩcirie ũgwati ũrĩa ũngĩoneka mũndũ angĩtoorio nĩ magerio ma Shaitani na atharie nĩ ũndũ wa ‘kũremwo nĩ kwĩgirĩrĩria.’ Jehova nĩ arathimaga athuri arĩa macaragĩria famĩlĩ ciao mabataro ma cio matekũingĩria kĩhiko kĩao ũgwati-inĩ.—Thab. 37:25.

Ũrĩa Ũngĩgunĩka nĩ Gwathĩkĩra Ũtaaro wa Bibilia

21. (a) Nĩkĩ matua megiĩ kũingĩra thĩinĩ wa kĩhiko kana kwaga kũingĩra ti mahũthũ? (b) Ũtaaro wa 1 Akorintho mũrango wa 7 ũngĩtũteithia atĩa?

21 Itua rĩgiĩ kũingĩra thĩinĩ wa kĩhiko kana kwaga kũingĩra thĩinĩ wakĩo nĩ rĩmwe rĩa matua marĩa maritũ mũno mũndũ angĩtua. Kwaga gũkinyanĩra nĩkuo kũrehaga mathĩna marĩa maingĩ mĩikaranĩrie-inĩ ya andũ othe. Kwoguo o na arĩa mendetwo na makarathimwo nĩ Jehova matingĩĩthema mathĩna biũ, marĩ thĩinĩ wa kĩhiko kana matarĩ thĩinĩ wa kĩo. Ũngĩhũthĩra ũtaaro wa ũũgĩ ũrĩa ũrĩ thĩinĩ wa 1 Akorintho mũrango wa 7, no ũnyihanyihie mathĩna macio. Maitho-inĩ ma Jehova ‘nĩ ũrĩkaga wega,’ o na ũngĩkorũo wĩ thĩinĩ wa kĩhiko kana ũtarĩ thĩinĩ wakĩo. (Thoma 1 Akorintho 7:38.) Muoroto witũ mũnene nĩ gwĩtĩkĩrĩka nĩ Ngai. Gwĩtĩkĩrĩka nĩwe, gũgũgũteithia gũthiĩ na mbere nginya ũgaakinya muoyo-inĩ thĩinĩ wa thĩ njerũ. Hĩndĩ ĩyo, mathĩna marĩa monekaga mũno ũmũthĩ mĩikaranĩrie-inĩ ya athuri na atumia matigakorũo kuo.

[Kohoro ka Magũrũ-inĩ]

Ũngĩcokia Atĩa?

• Nĩkĩ gũtirĩ mũndũ wagĩrĩirũo nĩ gũtindĩkĩrĩria ũrĩa ũngĩ ahike kana ahikanie?

• Ũngĩhũthĩra mahinda maku wega atĩa ũrĩ ndungata ya Jehova ĩtarĩ thĩinĩ wa kĩhiko?

• Andũ erĩ marenda kũhikania mangĩĩhaarĩria atĩa nĩ ũndũ wa maũndũ marĩa makoragwo thĩinĩ wa kĩhiko?

• Nĩkĩ kĩhiko to mũhaka kĩgitĩre mũndũ ndagatharie?

[Ciũria cia Wĩruti]

Akristiano arĩa matarĩ thĩinĩ wa kĩhiko nĩ makenaga makĩhũthĩra mahinda mao kuongerera ũtungata wao

Hihi nĩ mogarũrũku marĩkũ amwe mangĩbatara gwĩka maingĩra kĩhiko-inĩ?