Ũrĩa Tũngĩĩthema Icanjama cia Ndũire

Nĩ ũndũ wa wanangi na wongerereku wa icanjama cia ndũire-rĩ, mũndũ angĩka atĩa ahiũranie nacio? Reke twarĩrĩrie makinya maigana ũna marĩa mũndũ angĩoya.

Wĩtheme kũrĩa gũkoragwo na ũgwati. Bibilia yugaga ũũ: “Mũndũ mũbarĩrĩri onaga gũkĩgĩa ũũru, akehitha, no arĩa matarĩ ogĩ mathiagĩrĩra o na mbere, magakĩya kũhera.” (Thimo 22:3) Ũcio nĩ ũtaaro wa ũũgĩ ũngĩhũthĩka harĩ icanjama. Kũngĩkorũo kũheanĩtwo mũkaana wĩgiĩ kĩrĩma kĩerekeire gũtuthũka, mũiyũro wa maĩ, kana kĩhuhũkanio, nĩ ũndũ wa ũũgĩ arĩa mangĩkorũo kũndũ ta kũu mathamĩre kũndũ kũrĩ na ũgitĩri. Muoyo nĩ wa goro mũno gũkĩra nyũmba kana indo ingĩ cia kĩĩmwĩrĩ.

Harĩ andũ amwe, nĩ ũndũ mũhũthũ gwĩthema gũikara kũndũ kũrĩ na ũhotekeku wa kũgĩa na icanjama. Riboti ĩmwe ya Kĩama kĩa Ũrũmwe wa Mabũrũri yoigire ũũ: “Kũndũ kũrĩa kũrĩ ũhotekeku wa kũgĩa na icanjama nĩkuo gũkoragwo na andũ aingĩ mũno. Gacunjĩ kanini mũno ga Thĩ gakoragwo ũgwati-inĩ mũnene wa gũkorũo na icanjama nene mahinda mokĩte.” Kwa ngerekano, ũndũ ũcio no woneke kũrĩa kwaraganu gũkuhĩ na iria kana kũndũ gũkuhanĩrĩirie na kũrĩa thĩ ĩngĩhorokera. Korũo wahota gwĩthema gũtũũra kũndũ ta kũu gũkoragwo na ũgwati mũnene, kana ũthamĩre kũndũ kũrĩ na ũgitĩri-rĩ, ũngĩkorũo ũnyihĩtie mũno ũhotekeku wa kũnyamario nĩ icanjama.

Ikaraga wĩthagathagĩte. O na thutha wa kuoya makinya mothe ma gwĩthema, no wĩkore ũhobanĩirio nĩ gĩcanjama gĩterĩgĩrĩirũo. Nĩ ũndũ mũhũthũ kũhiũrania na ũndũ ta ũcio angĩkorũo nĩ ũrethagathagĩte mbere. Ningĩ ũndũ ũcio nĩ ũringaine na ũtaaro wa Thimo 22:3, ĩrĩa yonanĩtio hau mbere. Hihi nĩ ũkoragwo na mũhuko wĩkĩrĩte indo iria ingĩgũteithia hĩndĩ ya ũgwati? Ibuku rĩa 1-2-3 of Disaster Education riugaga atĩ indo iria ingĩkorũo mũhuko-inĩ ũcio nĩ ta: Indo cia ũrigitani wa mbere, maĩ ma kũnyua, irio itangĩthũka narua, na indo ingĩ cia bata ta ibandĩ. Ningĩ no ũkorũo ũrĩ ũndũ wa ũũgĩ kwarĩrĩria na famĩlĩ yaku icanjama itiganĩte iria ingĩhaanĩka na maũndũ marĩa mangĩkwo harĩ o gĩcanjama.

Tũũria ũkuruhanu wa hakuhĩ na Ngai. Ũndũ ũcio no ũgũteithie hĩndĩ o yothe. Bibilia yugaga atĩ Ngai nĩ “Ithe witũ mwene tha, na Ngai mwene ũhoro wothe wa kũũmanĩrĩria, o we ũtũũmagĩrĩria mathĩna-inĩ maitũ mothe.” Mũhari ũngĩ naguo ugaga atĩ nĩwe “ũrĩa ũũmagĩrĩria arĩa mainamĩte ngoro.”—2 Akorintho 1:3, 4; 7:6.

Ma nĩ atĩ, Ngai nĩ oĩ wega maũndũ marĩa arĩa mamwĩtĩkĩtie mahiũranagia namo. Nĩ Ngai wĩ wendo na nĩ omagĩrĩria andũ na njĩra itiganĩte. (1 Johana 4:8) Kũhoya tũheo roho mũtheru wa Ngai, ti getha tũringĩrũo ciama, no gũtũteithie ũndũ-inĩ o wothe. Roho mũtheru no ũririkanie  andũ maũndũ thĩinĩ wa Bibilia marĩa mangĩmomĩrĩria na mamahoorerie rĩrĩa marĩ na moritũ. Ma nĩ atĩ ndungata njĩhokeku cia Ngai no ciigue ta Daudi, mũthamaki wa tene wa Isiraeli, ũrĩa woigire ũũ: “O na ingĩtuĩka ndĩrahungurĩra mũkuru wa nduma ta ya gĩkuũ, ndirĩ ũgwati ingĩĩtigĩra, nĩ gũkorũo twĩ hamwe nawe; thiarĩ waku na mũthĩgi, nĩcio igũtũma ‘makũke.”—Thaburi 23:4.

Akristiano nĩ mateithanagia o ene. Hĩndĩ ya karine ya mbere, Agabo mũnabii warĩ Mũkristiano oigire atĩ ‘gwakiriĩ kũgĩa ng’aragu nene kũndũ guothe kũrĩa gwatũũragwo nĩ andũ. Nayo ĩkĩgĩa matukũ ma Kilaudio.’ Ng’aragu ĩyo nĩ yahutĩtie mũno arutwo aingĩ a Jesu thĩinĩ wa Judea. Akristiano a kũndũ kũngĩ meekire atĩa maigua ũhoro ũcio? Bibilia yugaga ũũ: “Nao arutwo magĩtua atĩ matwarithĩrie ariũ a Ithe witũ arĩa maatũire Judea kĩndũ gĩa kũmateithia, o ta ũrĩa mũndũ o mũndũ angĩkorũo aingĩhĩtie indo.” (Atũmwo 11:28, 29) Maaiyũkirie ũndũ ũcio na wendo na njĩra ya kũmahe ũteithio ũrĩa maabataraga.

Mahinda-inĩ maya, rĩrĩa icanjama nene cia ndũire cioimĩra, ndungata cia Ngai nĩ iteithanagia na njĩra ta icio. Aira a Jehova nĩ moĩkaine wega nĩ ũndũ wa gũteithia arĩa a thiritũ yao. Kwa ngerekano-rĩ, hĩndĩ ĩrĩa kwagĩire na gĩthingithia kĩnene bũrũri-inĩ wa Chile Februarĩ 27, 2010, Aira a Jehova maiyũkirie ũndũ ũcio o na ihenya makĩruta ũteithio ũrĩa wabataranagia. Mwarĩ wa Ithe witũ Karla, ũrĩa nyũmba yake yathereririo nĩ tsunami, oigire ũũ: “Warĩ ũndũ wa gũtũũmĩrĩria na gũtwĩkĩra ngoro kuona atĩ mũthenya ũyũ ũngĩ [Aira a Jehova] a kũndũ kũngĩ nĩ mookire gũtũteithia. Hatarĩ nganja, Jehova nĩ aatũũmĩrĩirie kũgerera ciĩko njega cia erutĩri acio. Ndaiguire nyendetwo na ngitĩrĩtwo.” O na gũtuĩka gukawe ti Mũira wa Jehova, nĩ eeyoneire ũteithio ũcio ũkĩheanwo. Oigire ũũ: “Ũyũ nĩ ũndũ ngũrani biũ na ũrĩa ndaneyonera kanitha-inĩ kũrĩa thiaga mĩaka ĩyo yothe.” Maũndũ marĩa eeyoneire nĩ maatũmire orie Aira a Jehova mamũrute Bibilia.

Kũnyitanĩra na arĩa mendete Ngai nĩ ũteithio mũnene mũno hĩndĩ ya moritũ. O na kũrĩ ũguo-rĩ, hihi nĩ kũrĩ hĩndĩ gũgaakorũo gũtarĩ na icanjama thĩinĩ wa thĩ? Reke tuone ũrĩa Bibilia yugaga ũndũ-inĩ ũcio.

[Mbica karatathi ka 6]

Hihi nĩ ũkoragwo na mũhuko wĩkĩrĩte indo iria ingĩgũteithia hĩndĩ ya ũgwati?

[Mbica karatathi ka 7]

Kũhoya tũheo roho mũtheru wa Ngai, ti getha tũringĩrũo ciama, no gũtũteithie ũndũ-inĩ o wothe

[Mbica karatathi ka 7]

Akristiano nĩ mateithanagia o ene hĩndĩ ya icanjama

[Mbica karatathi ka 7]

“Ndaiguire nyendetwo na ngitĩrĩtwo”