Kũrutĩra Jehova Magongona na Ngoro Yothe
Kũrutĩra Jehova Magongona na Ngoro Yothe
“Ũndũ o wothe mũgwĩka-rĩ, wĩkagei na ngoro o ta arĩ wĩra wa [Jehova] mũraruta.”—KOL. 3:23.
TA RORA WONE KANA NO ŨHOTE GŨCOKIA:
Tũngĩonania gĩtĩo giitũ harĩ Jehova atĩa rĩrĩa tũrĩ maũndũ-inĩ maitũ ma o mũthenya?
Nĩ magongona marĩkũ tũrutaga rĩrĩa tũrathathaiya Ngai?
Tũngĩrutĩra Jehova indo citũ cia kĩĩmwĩrĩ atĩa?
1-3. (a) Hihi gĩkuũ kĩa Jesu mũtĩ-inĩ wa magerio kĩonanagia atĩ Jehova ndendaga tũmũrutĩre igongona o na rĩrĩkũ? Taarĩria. (b) Nĩ kĩũria kĩrĩkũ kĩreyumĩria gĩkoniĩ magongona ũmũthĩ?
HĨNDĨ ya karine ya mbere M.M., Jehova nĩ aguũrĩirie andũ ake atĩ igongona rĩa ũkũũri rĩa Jesu nĩ rĩeheretie Watho wa Musa. (Kol. 2:13, 14) Magongona mothe marĩa Ayahudi maakoretwo makĩruta kwa ihinda rĩa mĩaka mĩingĩ matiabataranagia rĩngĩ. Watho nĩ wahingĩtie wĩra waguo ũrĩ “mũtũtwari wa gũtũkinyia gwĩ Kristo.”—Gal. 3:24.
2 No ũguo ti kuuga atĩ Akristiano matirutaga magongona. Ngũrani na ũguo-rĩ, mũtũmwo Petero nĩ aatarĩirie bata wa ‘kũrutaga magongona ma kĩĩroho marĩa mangĩĩtĩkĩrĩka nĩ Ngai nĩ ũndũ wa Jesu Kristo.’ (1 Pet. 2:5) Makĩria ma ũguo, mũtũmwo Paulo nĩ onanĩtie wega atĩ mũtũũrĩre wothe wa Mũkristiano wĩyamũrĩire Ngai no ũtuĩke “igongona.”—Rom. 12:1.
3 Kwoguo, Mũkristiano arutagĩra Jehova magongona na njĩra ya kũruta indo itiganĩte kana kwĩima maũndũ matiganĩte nĩ ũndũ wake. Kũringana na maũndũ marĩa Jehova eerĩgagĩrĩra Aisiraeli meke-rĩ, tũngĩkorũo na ma atĩa atĩ nĩ etĩkagĩra magongona maitũ mothe mahinda-inĩ maya?
ŨTŨŨRO-INĨ WITŨ WA O MŨTHENYA
4. Nĩ ũndũ ũrĩkũ twagĩrĩirũo kũririkana wĩgiĩ mĩhang’o ya o mũthenya?
4 Tũrĩ maũndũ-inĩ maitũ ma o mũthenya, ti ũndũ mũhũthũ kuona ũrĩa maũndũ macio maitũ makonainie na kũrutĩra Jehova magongona. Mawĩra marĩa tũrutaga mũciĩ, cukuru, kũrĩa twandĩkĩtwo, kũgũra indo na maũndũ mangĩ ta macio no moneke ta matarĩ handũ makonainie na maũndũ ma kĩĩroho. O na kũrĩ ũguo, angĩkorũo nĩ wĩyamũrĩire Jehova kana nĩ ũrerĩgĩrĩra gwĩka ũguo ica ikuhĩ, njĩra yaku ya gwĩka maũndũ maku ma o mũthenya nĩ ya bata mũno. Tũkoragwo tũrĩ Akristiano mathaa 24. Twagĩrĩirũo nĩ kũhũthĩra ũtaaro wa Bibilia maũndũ-inĩ mothe ma ũtũũro witũ. Nĩkĩo Paulo aatwĩkĩrire ngoro ũũ: “Ũndũ o wothe mũgwĩka-rĩ, wĩkagei na ngoro o ta arĩ wĩra wa Mwathani mũraruta, na ti wa andũ.”—Thoma Akolosai 3:18-24.
5, 6. Nĩ maũndũ marĩkũ mangĩtũteithia gwĩciria ũhoro wa ciĩko na mwĩhumbĩre witũ wa o mũthenya?
5 Mĩhang’o ya Mũkristiano ya o mũthenya ti gĩcunjĩ kĩa ũtungata wake mũtheru. Ĩndĩ, kuona atĩ Paulo aratwĩkĩra ngoro tũrutage wĩra na “ngoro [yothe] o ta arĩ wĩra wa [Jehova],” nĩ gũtũmaga twĩcirie ũhoro wa mũtũũrĩre witũ wothe. Gũkĩrĩ ũguo-rĩ, tũngĩhũthĩra ũtaaro ũcio atĩa ithuĩ ene? Hihi nĩ twĩhumbaga wega na tũgakorũo na ciĩko njega mahinda mothe? Kana rĩrĩa tũrĩ maũndũ-inĩ maitũ ma o mũthenya-rĩ, hihi no tũigue guoya kũmenyithia andũ atĩ tũrĩ Aira a Jehova, tondũ wa gũkorũo twĩhumbĩte ũũru kana tũrĩ na ciĩko itagĩrĩire? Kũroaga gũtuĩka ũguo! Andũ a Jehova matingĩenda gwĩka ũndũ o na ũrĩkũ ũrĩa ũngĩnyararithia rĩĩtwa rĩa Ngai.—Isa. 43:10; 2 Kor. 6:3, 4, 9.
6 Rekei twarĩrĩrie ũrĩa wendi wa gwĩka maũndũ na “ngoro [yothe] o ta arĩ wĩra wa [Jehova]” kũhutagia maũndũ matiganĩte ũtũũro-inĩ. Tũgĩka ũguo-rĩ, ririkana atĩ, magongona mothe marĩa Aisiraeli maarutagĩra Jehova maagĩrĩirũo gũkorũo marĩ marĩa mega biũ.—Tham. 23:19.
ŨRĨA MŨTŨŨRĨRE WAKU ŨHUTAGIO
7. Nĩ maũndũ marĩkũ makonainie na wĩyamũrĩri wa Gĩkristiano?
7 Rĩrĩa weyamũrĩire Jehova, watuire itua rĩu na kwĩyendera, githĩ tiguo? Na njĩra ĩyo ũkiuga atĩ, ũrĩigaga Jehova mbere maũndũ-inĩ maku mothe ũtũũro-inĩ. (Thoma Ahibirania 10:7.) Rĩu rĩarĩ itua rĩega. Hatarĩ nganja nĩ wĩyoneire atĩ hĩndĩ ĩrĩa wathingata wendi wa Jehova ũndũ-inĩ mũna na ũkerutanĩria gwĩka kũringana naguo moimĩrĩro makoragwo marĩ mega mũno. (Isa. 48:17, 18) Andũ a Ngai makoragwo marĩ atheru na marĩ na gĩkeno tondũ monanagia ngumo cia Mũrutani wao.—Alaw. 11:44; 1 Tim. 1:11.
8. Nĩkĩ nĩ ũndũ wa bata harĩ ithuĩ atĩ Jehova nĩ onaga magongona ma hĩndĩ ya tene marĩ maamũre?
8 Magongona marĩa Aisiraeli maarutagĩra Jehova moonagwo marĩ maamũre. (Alaw. 6:25; 7:1) Kiugo gĩa Kĩhibirania kĩrĩa gĩtaũrĩtwo ‘amũra’ kĩrehaga rĩciria rĩa kweheranĩrio, kana gũthererio Ngai. Nĩguo magongona maitũ metĩkĩrĩke nĩ Jehova, no mũhaka makorũo mamũranĩtio na matathahĩtio nĩ maũndũ ma gũkũ thĩ. Tũtiagĩrĩirũo kwenda kĩndũ o na kĩrĩkũ kĩa iria Jehova athũire. (Thoma 1 Johana 2:15-17.) Hatarĩ nganja, ũguo nĩ kuuga atĩ no mũhaka twĩtheme thiritũ o yothe kana maũndũ marĩa mangĩtũma Ngai atuone tũtarĩ atheru. (Isa. 2:4; Kũg. 18:4) Ningĩ nĩ kuuga atĩ tũtingĩtĩkĩra maitho maitũ merorere kĩndũ kĩrĩ thahu kana kĩa waganu o na kana tũtaranie ũhoro wa maũndũ ta macio.—Kol. 3:5, 6.
9. Mĩthiĩre ya Mũkristiano kwerekera andũ arĩa angĩ nĩ ya bata atĩa, na nĩkĩ?
9 Paulo eerire Akristiano a hĩndĩ yake ũũ: ‘Mũtikanariganĩrũo nĩ gwĩkana wega o na gũtanahanĩra, nĩ ũndũ magongona ta macio nĩmo makenagia Ngai.’ (Ahib. 13:16) Kwoguo gũkorũo tũrĩ ega na gwĩkaga andũ maũndũ mega, Jehova onaga rĩrĩ igongona rĩtĩkĩrĩku harĩ we. Kũrũmbũyania na njĩra ya wendo nĩ rũũri rwa gũkũũrana Akristiano a ma.—Joh. 13:34, 35; Kol. 1:10.
MAGONGONA THĨINĨ WA ŨTHATHAIYA
10, 11. Jehova onaga atĩa ũtungata na ũthathaiya witũ wa Gĩkristiano, na ũndũ ũcio wagĩrĩirũo gũtũhutia atĩa?
10 Njĩra ĩmwe ĩyumĩrĩtie biũ ĩrĩa ithuĩ Akristiano tũhũthĩire gwĩka andũ maũndũ mega nĩ kũgerera ‘kũrũmia ũhoro ũrĩa tũtũire tuumbũraga atĩ nĩ tũwĩrĩgĩrĩire.’ Hihi nĩ ũhũthagĩra mweke o wothe ũrĩa ũngĩoneka kũhunjia? Mũtũmwo Paulo oigire atĩ wĩra ũcio wa bata wa Gĩkristiano nĩ ‘kũgooca, ta arĩ igongona tũramũrutĩra; naguo nĩ ta kuuga arutagĩrũo maciaro moimĩte tũnua-inĩ twa arĩa moimbũraga rĩĩtwa rĩa Ngai.’ (Ahib. 10:23; 13:15; Hos. 14:2) Nĩ harĩ maũndũ maingĩ tũngĩgweta megiĩ mũigana, na ũrĩa tũhũthagĩra mahinda wĩra-inĩ wa kũhunjia ũhoro ũrĩa mwega wa Ũthamaki. Thĩinĩ wa Mũcemanio wa Ũtungata nĩ gũkoragwo na icunjĩ nyingĩ iria ikoragwo irongoreirio kwarahũra meciria maitũ ũndũ-inĩ ũcio. Ĩndĩ tũkĩgweta na njĩra nguhĩ, tondũ wĩra witũ wa kũhunjia nĩ ‘kũgooca, ta arĩ igongona tũraruta’ rĩrĩa arĩ gĩcunjĩ kĩa ũthathaiya witũ-rĩ, igongona rĩu rĩagĩrĩirũo gũkorũo rĩrĩ rĩrĩa rĩega makĩria. O na gũtuĩka maũndũ maitũ matihanaine-rĩ, kaingĩ mũigana wa mahinda marĩa tũhũthagĩra wĩra-inĩ wa kũhunjia ũhoro mwega nĩ wonanagia ũrĩa tuoyaga maũndũ ma kĩĩroho.
11 Akristiano nĩ mahũthagĩra mahinda gũthathaiya marĩ gĩkundi kana marĩ mũndũ kĩũmbe. Ũguo nĩguo Jehova endaga twĩke. Ma nĩ atĩ mahinda-inĩ maya tũtirũmagĩrĩra Thabatũ na tũtithiaga Jerusalemu ikũngũĩro cia ũthathaiya. O na kũrĩ ũguo, ikũngũĩro icio cia tene harĩ kĩrĩa irũgamĩrĩire ũtũũro-inĩ wa Mũkristiano. O na ũmũthĩ Ngai nĩ erĩgagĩrĩra tũkamba gũtiga mĩhang’o ya kĩĩmwĩrĩ nĩguo tũkagĩaga na mweke wa gũthoma Kiugo gĩake, kũhoya, na gũthiĩ mĩcemanio-inĩ ya Gĩkristiano. Nao arĩa matongoragia famĩlĩ cia Gĩkristiano nĩ magĩrĩirũo nĩ gũtigĩrĩra atĩ nĩ matongoria ũthathaiya wa famĩlĩ. (1 Thes. 5:17; Ahib. 10:24, 25) Ũhoro-inĩ wĩgiĩ maũndũ ma kĩĩroho nĩ wega twĩyũrie, ‘Hihi no njagagĩrie ũthathaiya wakwa?’
12. (a) Ũbumba ũrĩa warutagwo ũthathaiya-inĩ wa tene ũngĩgerekanio na kĩĩ ũmũthĩ? (b) Kũgerekanio kũu kwagĩrĩirũo nĩ kũhutia mahoya maitũ atĩa?
12 Mũthamaki Daudi aainĩire Jehova ũũ: “Reke ihoya rĩakwa rĩambate mbere yaku ta mũtararĩko wa ũbumba.” (Thab. 141:2) Ta wĩcirie hanini ũhoro wa mahoya maku—maita marĩa ũhoyaga na ũrĩa mahoya macio makoragwo matariĩ. Ibuku rĩa Kũguũrĩrio rĩgerekanagia “mahoya ma andũ arĩa aamũre,” na ũbumba na tondũ mahoya marĩa metĩkĩrĩkaga mambataga kũrĩ Jehova ta mũtararĩko mwega. (Kũg. 5:8) Hĩndĩ ya Isiraeli ya tene, ũbumba ũrĩa warutagĩrũo Jehova kĩgongona-inĩ waagĩrĩirũo nĩ kũhaarĩrio ũbarĩrĩirũo wega. Jehova aawĩtĩkĩraga tu ũngĩakorirũo ũrutĩtwo kũringana na ũtongoria ũrĩa aaheanĩte. (Tham. 30:34-37; Alaw. 10:1, 2) O ũndũ ũmwe na ũguo, tũngĩhoya kuuma ngoro no tũkorũo na ma atĩ Jehova nĩ aretĩkĩra mahoya maitũ.
KŨHEANA NA KWAMŨKĨRA
13, 14. (a) Epafarodito marĩ hamwe na kĩũngano kĩa Afilipi maatungatĩire Paulo atĩa, na mũtũmwo ũcio aaiguire atĩa? (b) Tũngĩĩgerekania atĩa na Epafarodito na Afilipi?
13 Mĩhothi ĩrĩa tũrutaga ya kũnyita mbaru wĩra wa thĩ yothe no ĩgerekanio na igongona, o na ĩngĩkorũo ĩrĩ mĩingĩ kana ĩrĩ mĩnyinyi. (Mar. 12:41-44) Hĩndĩ ya karine ya mbere M.M., kĩũngano kĩa Filipi nĩ gĩatũmire Epafarodito athiĩ Roma akarũmbũiye mabataro ma kĩĩmwĩrĩ ma Paulo. Hatarĩ nganja Epafarodito aathire akuuĩte iheo cia mbeca kuuma kũrĩ kĩũngano kĩa Filipi. Rĩu ti rĩo rĩarĩ rita rĩa mbere rĩa Afilipi gũtanahĩra Paulo. Moonagia Paulo ũtugi marĩ na muoroto wa kũmwehereria mĩtangĩko ya mabataro ma kĩĩmwĩrĩ nĩguo ahote kũhũthĩra mahinda maingĩ ũtungata-inĩ. Paulo aaiguire atĩa nĩ ũndũ wa kĩheo kĩu? Aagĩtire ‘mũtararĩko wa kĩndũ kĩnungĩte wega, na igongona rĩngĩĩtĩkĩrĩka nĩ Ngai rĩa kũmũkenia.’ (Thoma Afilipi 4:15-19.) Hatarĩ nganja Paulo nĩ aakenirio mũno nĩ ũtugi wa Afilipi na o nake Jehova nĩ aakenire.
14 Noguo o na mahinda-inĩ maya, Jehova nĩ akenagio mũno nĩ mĩhothi iitũ harĩ wĩra wa thĩ yothe wa kũhunjia. Makĩria ma ũguo, eranagĩra atĩ twathiĩ na mbere kũiga maũndũ ma Ũthamaki mbere ũtũũro-inĩ witũ nĩ arĩrũmbũyagia mabataro maitũ mothe, ma kĩĩroho o na ma kĩĩmwĩrĩ.—Mat. 6:33; Luk. 6:38.
ONANAGIA NGATHO CIAKU
15. Mamwe ma maũndũ marĩa matũmaga ũcokerie Jehova ngatho nĩ marĩkũ?
15 No tũhũthĩre kahinda karaihu kũgweta itũmi nyingĩ iria tũrĩ nacio cia gũcokeria Jehova ngatho. Na githĩ ti ũhoro wa ma atĩ twagĩrĩirũo kũmũcokeria ngatho o mũthenya nĩ ũndũ wa kĩheo kĩa muoyo? Atũheaga kĩrĩa gĩothe tũbataraga nĩguo tũtũũre—irio, nguo, nyũmba, o hamwe na rĩera rĩrĩa tũhuhagia. Makĩria ma ũguo, wĩtĩkio witũ ũrĩa uumanĩte na ũhoro wa ma nĩ ũtũheaga mwĩhoko. Nĩ kwagĩrĩire tũthathayagie Jehova tũkĩmũrutagĩra magongona ma kũmũgooca, nĩ ũndũ wa kũmenya we nĩwe ũ na maũndũ marĩa atwĩkĩire.—Thoma Kũguũrĩrio 4:11.
16. Twagĩrĩirũo kũiyũkia atĩa igongona rĩa ũkũũri rĩa Kristo?
16 O ta ũrĩa gĩcunjĩ kĩrĩa kĩhĩtũku kĩgwetete, kĩheo kĩrĩa kĩa bata makĩria Ngai aheete andũ nĩ igongona rĩa ũkũũri rĩa Kristo. Ĩyo nĩ njĩra nene mũno ĩrĩa Ngai onanĩtie wendo wake harĩ ithuĩ. (1 Joh. 4:10) Twagĩrĩirũo kũiyũkia ũndũ ũcio atĩa? Paulo oigire ũũ: “Wendani ũrĩa Kristo atwendete naguo nĩguo ũtũhatagĩrĩria, nĩ ũndũ tuonaga atĩrĩ, atĩ mũndũ ũmwe nĩaakuire ithenya rĩa andũ othe, . . . nĩ getha arĩa matũũraga muoyo matigacoke gũtũũra nĩ ũndũ wa bata wao ene, no matũũre nĩ ũndũ wa bata wa ũcio wakuire ithenya rĩao, agĩcoka akĩriũka.” (2 Kor. 5:14, 15) Na njĩra ĩyo Paulo onanirie atĩ tũngĩonania ngatho citũ harĩ tha cia Ngai iria itatwagĩrĩire, tũrĩhũthagĩra ũtũũro witũ Kũmũtĩa na gũtĩa Mũriũ Wake. Wendo na ngatho citũ harĩ Ngai na harĩ Kristo cionanagio na njĩra ya wathĩki na wendi witũ wa kũhunjia na gũtua andũ arutwo.—1 Tim. 2:3, 4; 1 Joh. 5:3.
17, 18. Andũ amwe mongereire igongona rĩao rĩa kũgooca Jehova na njĩra irĩkũ? Heana ngerekano.
17 Hihi no ũhote kwagagĩria igongona rĩa kũhunjia rĩrĩa ũrutagĩra Ngai? Thutha wa andũ aingĩ gwĩcũrania maũndũ maingĩ marĩa Jehova amekĩire, nĩ monete bata wa kũbanga mahinda na maũndũ mao nĩguo mongerere ũtungata wao wĩra-inĩ wa kũhunjia ũhoro wa Ũthamaki kana maũndũ-inĩ mangĩ ma kĩĩroho. Amwe nĩ mahotaga kuoya ũpainia wa gũteithĩrĩria rita rĩmwe kana maingĩ o mwaka, nao angĩ nĩ mahotete gũtuĩka mapainia a hĩndĩ ciothe. Angĩ nao nĩ merutagĩra wĩra-inĩ wa mĩako ya nyũmba iria ihũthagĩrũo nĩ ũndũ wa maũndũ ma Ũthamaki. Na githĩ icio ti njĩra njega mũno cia kuonania ngatho? Maũndũ macio ma ũtungata mũtheru mangĩkwo na muoroto ũrĩa wagĩrĩire wa kuonania ngatho harĩ Ngai, nĩ metĩkĩrĩkaga nĩwe.
18 Akristiano aingĩ maiguaga marĩ na thirĩ wa gũcokeria Jehova ngatho na ũndũ ũcio nĩ ũmarurumũraga. Ũmwe wa Akristiano ta acio nĩ mwarĩ wa Ithe witũ Morena. Aacarĩtie macokio ma ciũria ciake ciĩgiĩ maũndũ ma kĩĩroho thĩinĩ wa ndini ya Gatoreki ĩrĩa aarereirũo, na ningĩ harĩ ũũgĩ wa athomi a Asia. No ndaigana kuona macokio mega. Nyota wake wa maũndũ ma kĩĩroho wathirire o hĩndĩ ĩrĩa aambĩrĩirie kwĩruta Bibilia na Aira a Jehova. Morena nĩ aaiguire arĩ na ngatho nyingĩ nĩ ũndũ wa macokio ma Kĩĩmaandĩko ma ciũria ciake, na ningĩ kũiganĩra kũrĩa aagĩire nakuo nĩ ũndũ wa macokio macio, nginya agĩtua itua rĩa gũcokeria Jehova ngatho na njĩra ya kũhũthĩra hinya wake wothe ũtungata-inĩ wake. Aambĩrĩirie ũpainia wa gũteithĩrĩria o abatithio na agĩcoka agĩtuĩka painia wa hĩndĩ ciothe na ihenya rĩrĩa maũndũ make maamwĩtĩkĩririe. Rĩu nĩ mĩaka 30 mĩhĩtũku na Morena arĩ o ũtungata-inĩ wa hĩndĩ ciothe.
19. Ũngĩhota atĩa kũongerera magongona maku harĩ Jehova?
19 Ma nĩ atĩ, nĩ kũrĩ ndungata nyingĩ njĩhokeku cia Jehova no maũndũ ma cio matingĩciĩtĩkĩria gũtungatĩra irĩ mapainia. O ũrĩa wothe tũngĩhota gwĩka ũtungata-inĩ wa Jehova, ithuothe no tũhote kũmũrutĩra magongona metĩkĩrĩku ma kĩĩroho. Harĩ ciĩko citũ, nĩ tũkũbatara kũrũmĩrĩra biũ ũtaaro wa ũthingu, tũkĩririkanaga atĩ hingo ciothe tũrũgamagĩrĩra Jehova. Ha ũhoro wa wĩtĩkio, twagĩrĩirũo kũiga mwĩhoko witũ wothe harĩ kũhinga kwa mĩoroto ya Ngai. Ha ũhoro wa mawĩko mega, twagĩrĩirũo gũteithĩrĩria kũhunjia ũhoro ũrĩa mwega. Kuumana na ũiyũru wa ngoro citũ na ngatho citũ harĩ maũndũ mothe marĩa Jehova atwĩkĩire, rekei tũthiĩ na mbere kũmũrutĩra magongona na ngoro yothe.
[Ciũria cia wĩruti]
TA RORA WONE KANA NO ŨHOTE GŨCOKIA:
Tũngĩonania gĩtĩo giitũ harĩ Jehova atĩa rĩrĩa tũrĩ maũndũ-inĩ maitũ ma o mũthenya?
Nĩ magongona marĩkũ tũrutaga rĩrĩa tũrathathaiya Ngai?
Tũngĩrutĩra Jehova indo citũ cia kĩĩmwĩrĩ atĩa?
[Mbica karatathi ka 27]
Hihi wega wa Jehova nĩ ũgũtindĩkaga wagagĩrie igongona rĩaku rĩa kũmũgooca?
[Mbica karatathi ka 25]
Hihi nĩ ũhũthagĩra mweke o wothe ũrĩa ũngĩoneka kũhunjia?
