Thiritũ ya Athĩnjĩri Ngai ya Nyũmba ya Mũthamaki Ĩgunaga Andũ Othe
Thiritũ ya Athĩnjĩri Ngai ya Nyũmba ya Mũthamaki Ĩgunaga Andũ Othe
“No inyuĩ mũrĩ rũruka rũthurĩtwo, na thiritũ ya athĩnjĩri-Ngai ya nyũmba ya mũthamaki, ningĩ mũrĩ rũrĩrĩ rũtheru, o andũ matuĩkĩte a Ngai kĩũmbe.”—1 PET. 2:9.
NO ŨHOTE GŨTAARĨRIA?
Thiritũ ya athĩnjĩri Ngai ya nyũmba ya mũthamaki yeranĩirũo rĩ rita rĩa mbere?
Kĩrĩkanĩro kĩrĩa kĩerũ kĩrutaga thiritũ ya athĩnjĩri Ngai ya nyũmba ya mũthamaki na njĩra ĩrĩkũ?
Thiritũ ya athĩnjĩri Ngai ya nyũmba ya mũthamaki ĩkaarehera andũ irathimo irĩkũ?
1. Nĩ kĩĩ gĩtũmaga “irio cia [hwaĩ-inĩ] cia Mwathani” ciĩtwo Kĩririkano, na muoroto wakĩo nĩ ũrĩkũ?
HWAĨ-INĨ wa Nisani 14 mwaka wa 33 M.M., Jesu Kristo na atũmwo ake 12, nĩ maakũngũĩire Bathaka ya Kĩyahudi riita rĩa mũico. Thutha wa kũreka mũkunyanĩri wake Judasi Mũisikariota athiĩ, Jesu nĩ aambĩrĩirie gĩkũngũĩro kĩngĩ, kĩrĩa gĩacokire gwĩtwo “irio cia [hwaĩ-inĩ] cia Mwathani.” (1 Kor. 11:20) Maita merĩ Jesu oigire ũũ: “Ĩkagai ũũ nĩgetha mũndirikanage.” Ningĩ gĩkũngũĩro kĩu nĩ gĩtagwo Kĩririkano, kĩririkano gĩa gĩkuũ gĩa Kristo. (1 Kor. 11:24, 25) Nĩ ũndũ wa gwathĩkĩra watho ũcio, Aira a Jehova thĩinĩ wa thĩ yothe nĩ makũngũyagĩra Kĩririkano kĩu o mwaka. Kũringana na karenda ya Bibilia, mwaka wa 2012 Nisani 14 ĩkaambĩrĩria riũa rĩathũa, Aramithi Ĩpuro 5.
2. Jesu oigire atĩa igũrũ rĩgiĩ mũgate na ndibei iria aahũthĩrire?
2 Mũrutwo Luka nĩ atwĩraga na njĩra hũthũ maũndũ marĩa Jesu oigire na agĩka hĩndĩ ĩyo, ataarĩirie ũũ: ‘Akĩoya mũgate, na arĩkia gũcokeria Ngai ngatho, akĩwenyũranga, akĩmane, akiuga atĩrĩ, ũyũ nĩguo mwĩrĩ wakwa ũkũneanwo nĩ ũndũ wanyu: ĩkagai ũũ nĩ getha mũndirikanage. Ningĩ no taguo, maarĩkia kũrĩa, akĩmane gĩkombe kĩu akiuga atĩrĩ, gĩkombe gĩkĩ nĩkĩo gĩa kĩrĩkanĩro kĩrĩa kĩerũ thĩinĩ wa thakame yakwa, o ĩrĩa ĩgũitwo nĩ ũndũ wanyu.’ (Luk. 22:19, 20) Atũmwo mangĩataũkĩirũo atĩa nĩ ciugo icio?
3. Atũmwo mangĩataũkĩirũo atĩa kĩrĩa kĩarũgamagĩrĩrũo nĩ mũgate na ndibei?
3 Tondũ maarĩ Ayahudi, atũmwo nĩ maamenyete wega ũhoro wa magongona ma nyamũ marĩa athĩnjĩri Ngai maarutagĩra Ngai hekarũ-inĩ Jerusalemu. Magongona ta macio maarutagwo nĩguo mũndũ etĩkĩrĩke nĩ Jehova, na maingĩ mamo maarĩ ma kũhoroheria mehia. (Alaw. 1:4; 22:17-29) Kwoguo atũmwo nĩ mangĩataũkĩirũo atĩ Jesu akiuga atĩ mwĩrĩ wake nĩ ‘ũkũneanwo’ na thakame yake ‘ĩitwo nĩ ũndũ wao,’ aragia ũhoro wa kũruta muoyo wake mũkinyanĩru ũtuĩke igongona. Rĩngĩakorirũo rĩrĩ igongona rĩa goro mũno gũkĩra magongona ma nyamũ.
4. Jesu onanirie atĩa rĩrĩa oigire: “Gĩkombe gĩkĩ nĩkĩo gĩa kĩrĩkanĩro kĩrĩa kĩerũ thĩinĩ wa thakame yakwa”?
4 Ĩ nacio ciugo ici cia Jesu, ‘gĩkombe gĩkĩ nĩkĩo gĩa kĩrĩkanĩro kĩrĩa kĩerũ thĩinĩ wa thakame yakwa’? Atũmwo nĩ maamenyete ũrathi wĩgiĩ kĩrĩkanĩro kĩrĩa kĩerũ ũrĩa wandĩkĩtwo thĩinĩ wa Jeremia 31:31-33. (Thoma.) Ciugo icio cia Jesu cioonanagia atĩ nĩ kwambĩrĩria aambagĩrĩria kĩrĩkanĩro kĩu kĩerũ, kĩrĩa kĩngĩacokire ithenya rĩa kĩrĩkanĩro kĩa Watho kĩrĩa Jehova aarĩkanĩire na Aisiraeli kũgerera Musa. Hihi irĩkanĩro icio cierĩ nĩ ciarĩ na ũkuruhanu?
5. Kĩrĩkanĩro kĩa Watho kĩahete Aisiraeli kĩĩrĩgĩrĩro kĩrĩkũ?
5 Ma nĩ atĩ, mĩoroto yacio yarĩ na ũkuruhanu mũnene mũno. Jehova akĩambĩrĩria kĩrĩkanĩro kĩa Watho eerire rũrĩrĩ rũu ũũ: ‘Mũngĩathĩka mũigue mũgambo wakwa na ma o ma, na mũmenyagĩrĩre kĩrĩkanĩro giitũ na inyuĩ, ti-itherũ nĩmũgũtuĩka ta mũrĩ kĩndũ gĩakwa kĩĩ bata mũno kĩamũrĩtwo gũkĩra andũ a ndũrĩrĩ iria ingĩ ciothe; nĩ ũndũ thĩ yothe nĩ yakwa; na nĩ ngũmutua rũciaro [ũthamaki] rwa athĩnjĩri-Ngai, ndĩmũtue rũrĩrĩ rũamũre.’ (Tham. 19:5, 6) Aisiraeli mangĩataũkĩirũo nĩ ciugo icio atĩa?
KĨĨRANĨRO KĨA ŨTHĨNJĨRI NGAI WA NYŨMBA YA MŨTHAMAKI
6. Kĩrĩkanĩro kĩa Watho kĩarĩ ikinya rĩa kũhingia kĩĩranĩro kĩrĩkũ?
6 Aisiraeli nĩ maataũkĩirũo nĩ kiugo “kĩrĩkanĩro,” tondũ Jehova nĩ aarĩkanĩrĩte na maithe mao Nuhu na Iburahimu irĩkanĩro ta icio. (Kĩam. 6:18; 9:8-17; 15:18; 17:1-9) Thĩinĩ wa kĩrĩkanĩro gĩake na Iburahimu, Jehova eeranĩire ũũ: ‘Ndũrĩrĩ ciothe cia thĩ ikaarathimwo nĩ ũndũ wa mbeũ ĩyo yaku.’ (Kĩam. 22:18) Kĩrĩkanĩro kĩa Watho kĩarĩ ikinya makĩria rĩa kũhingia kĩĩranĩro kĩu. Nĩ ũndũ wa kĩrĩkanĩro kĩu, Isiraeli nĩ mangĩatuĩkire “kĩndũ [kĩa Jehova] kĩĩ bata mũno kĩamũrĩtwo gũkĩra andũ a ndũrĩrĩ iria ingĩ ciothe.” Muoroto ũrĩ ũrĩkũ? ‘Matuĩke [ũthamaki] wa athĩnjĩri-Ngai’ a Jehova.
7. Ciugo ‘ũthamaki wa athĩnjĩri Ngai’ nĩ kuuga atĩa?
7 Aisiraeli nĩ maamenyete ũhoro wa athamaki na athĩnjĩri Ngai, ĩndĩ Melikisedeki nowe mũthuri wa tene ũrĩa watuĩkĩte mũthamaki na mũthĩnjĩri Ngai ihinda-inĩ rĩmwe etĩkĩrĩtio nĩ Jehova. (Kĩam. 14:18) Rĩu kuuma hĩndĩ ĩyo Jehova akĩhe rũrĩrĩ rũu mweke wa kũruta ‘ũthamaki wa athĩnjĩri-Ngai.’ O ta ũrĩa Maandĩko maacokire kuonania-rĩ, maarĩ na mweke wa kũruta thiritũ ya athĩnjĩri Ngai ya nyũmba ya mũthamaki, arĩa mangĩatuĩkire athamaki na athĩnjĩri Ngai.—1 Pet. 2:9.
8. Athĩnjĩri Ngai arĩa mamũrĩtwo marutaga ũtungata ũrĩkũ?
8 Hatarĩ nganja, wĩra wa mũthamaki nĩ gwathana. Ĩ naguo wĩra wa mũthĩnjĩri Ngai nĩ ũrĩkũ? Ahibirania 5:1 yugaga: “Mũthĩnjĩri-Ngai-mũnene o wothe aathurũo kũrĩ andũ, nĩatuagwo wa kũrũgamagĩrĩra andũ maũndũ-inĩ marĩa makoniĩ Ngai, nĩ getha arutage maruta o na magongona nĩ ũndũ wa mehia.” Kwoguo mũthĩnjĩri Ngai wamũrĩtwo nĩ Jehova arũgamagĩrĩra andũ ehia mbere ya Ngai na njĩra ya kũruta magongona, akamathaithanĩra harĩ We. Ningĩ mũthĩnjĩri Ngai nĩ arũgamagĩrĩra Jehova harĩ andũ, akamarutaga watho wa Ngai. (Alaw. 10:8-11; Mal. 2:7) Na njĩra icio mũthĩnjĩri Ngai wamũrĩtwo arutaga wĩra wa kũnyitithania andũ na Ngai.
9. (a) Aisiraeli meerĩtwo no mũhaka meke atĩa nĩguo mahingĩrio kĩĩranĩro gĩa kũruta ‘ũthamaki wa athĩnjĩri Ngai’? (b) Jehova aaigĩte athĩnjĩri Ngai thĩinĩ wa Isiraeli nĩkĩ? (c) Nĩ kĩĩ kĩagiririe Aisiraeli marute ‘ũthamaki wa athĩnjĩri Ngai’ rungu rwa kĩrĩkanĩro kĩa Watho?
9 Nĩ ũndũ ũcio kĩrĩkanĩro kĩa Watho kĩahete Isiraeli mweke wa kũruta athĩnjĩri Ngai a nyũmba ya mũthamaki arĩa mangĩagunire “ndũrĩrĩ iria ingĩ ciothe.” O na kũrĩ ũguo, nĩguo mahingĩrio kĩrĩgĩrĩro kĩu kĩa magegania, merĩtwo no mũhaka ‘maangĩaiguire biũ mũgambo wake na, mamenyagĩrĩre kĩrĩkanĩro gĩake.’ Hihi Aisiraeli nĩ ‘mangĩaiguire biũ mũgambo wake’? Ĩĩ. Hihi nĩ mangĩahotire gwĩka ũguo na njĩra nginyanĩru? Aca. (Rom. 3:19, 20) Nĩ ũndũ wa gĩtũmi kĩu, kwa ihinda rĩu Jehova nĩ aamũrire rũciaro rwa athĩnjĩri Ngai thĩinĩ wa Isiraeli rũrĩa rwamũranĩtio na ũthamaki o wothe, rũrutage magongona ma nyamũ nĩ ũndũ wa mehia marĩa Aisiraeli matangĩahotire gwĩthema. (Alaw. 4:1–6:7) Mehia macio nĩ hamwe na ma athĩnjĩri Ngai acio o ene. (Ahib. 5:1-3; 8:3) Jehova nĩ eetĩkagĩra magongona ta macio, no matingĩahotire kweheria biũ mehia ma arĩa maamarutaga. Ũthĩnjĩri Ngai rungu rwa kĩrĩkanĩro kĩa Watho ndũngĩahotire kũnyitithania biũ Ngai na Aisiraeli, o na arĩa maarĩ na ngoro njega. Mũtũmwo Paulo oigire ũũ: “Gũtingĩhoteka mehia meherio biũ nĩ thakame ya ndegwa na ya mbũri.” (Ahib. 10:1-4) Nĩ ũndũ wa kwagarara Watho ũcio, Aisiraeli nĩ maanyitirũo nĩ kĩrumi. (Gal. 3:10) Nĩ ũndũ ũcio, matingĩahotire gũtungatĩra kĩrĩndĩ gĩa thĩ marĩ rũciaro rwa athĩnjĩri Ngai.
10. Kĩrĩkanĩro kĩa Watho kĩarĩ na muoroto ũrĩkũ?
10 Hihi kĩĩranĩro kĩa Jehova gĩa gũtua Aisiraeli ‘ũthamaki wa athĩnjĩri Ngai’ kĩarĩ gĩa tũhũ? Aca. Korũo nĩ maageririe biũ gwathĩka, nĩ mangĩahingĩirio kĩĩranĩro kĩu—no ti rungu rwa Watho. Nĩkĩ? (Thoma Agalatia 3:19-25.) Harĩ arĩa meerutanagĩria kũũrũmĩrĩra marĩ na wĩhokeku, Watho warĩ na ũhoti wa kũgitĩra ũthathaiya mũtheru. Wateithirie Ayahudi kũmenya atĩ maarĩ ehia na atĩ nĩ maabataraga igongona rĩkĩrĩte rĩrĩa rĩarutagwo nĩ mũthĩnjĩri Ngai wao ũrĩa mũnene. Watho warĩ mũmatwari wa kũmakinyia kũrĩ Kristo, kana Mesia, marĩtwa marĩa moigĩte “Ũrĩa Mũitĩrĩrie Maguta.” Ĩndĩ, thutha wa Mesia gũũka nĩ angĩaambĩrĩirie kĩrĩkanĩro kĩerũ kĩrĩa kĩarathĩtwo nĩ Jeremia. Arĩa meetĩkĩrire Kristo nĩ maanyitirũo ũgeni thĩinĩ wa kĩrĩkanĩro kĩu kĩerũ na nĩo mangĩatuĩkire kũna ‘ũthamaki wa athĩnjĩri Ngai.’ Rekei tuone nĩ na njĩra ĩrĩkũ.
KĨRĨKANĨRO KĨERŨ KĨAREHIRE THIRITŨ YA ATHĨNJĨRI NGAI A NYŨMBA YA MŨTHAMAKI
11. Jesu aatuĩkire atĩa mũthingi wa thiritũ ya athĩnjĩri Ngai ya nyũmba ya mũthamaki?
11 Mwaka wa 29 M.M., Mesia nĩ okire arĩ we Jesu wa Nazarethi. Arĩ na kĩndũ mĩaka 30, nĩ eeyamũrĩire gwĩka ũrĩa Ngai eendaga, na akĩonania wĩyamũrĩri ũcio na njĩra ya kũbatithio. Jehova nĩ aamwĩtĩkĩrire na akĩmwĩta “Mũrũ wakwa nyendete mũno,” na akĩmũitĩrĩria maguta, kũgerera roho mũtheru. (Mat. 3:13-17; Atũm. 10:38) Aitĩrĩrio maguta, aatuirũo Mũthĩnjĩri Ngai Mũnene na Mũthamaki wa mahinda marĩa mokĩte, wa arĩa othe mamwĩtĩkĩtie thĩinĩ wa thĩ yothe. (Ahib. 1:8, 9; 5:5, 6) Nĩwe kũna ũngĩatuĩkire mũthingi wa thiritũ ya athĩnjĩri Ngai ya nyũmba ya mũthamaki.
12. Igongona rĩa Jesu rĩahotithirie ũndũ ũrĩkũ?
12 Arĩ Mũthĩnjĩri Ngai Mũnene-rĩ, nĩ igongona rĩrĩkũ Jesu angĩarutire rĩa kũhumbĩra biũ mehia ma kĩĩmerera ma arĩa metĩkĩtie? O ta ũrĩa oigire hĩndĩ ĩrĩa arugũragia Kĩririkano gĩa gĩkuũ gĩake, muoyo wake mũkinyanĩru arĩ mũndũ nĩguo ũngĩatuĩkire igongona rĩu. (Thoma Ahibirania 9:11, 12.) Kuuma kũbatithio gwake mwaka wa 29 M.M., Jesu arĩ Mũthĩnjĩri Ngai Mũnene nĩ aambĩrĩirie kũgerio na kũmenyerio o nginya hĩndĩ ya gĩkuũ gĩake. (Ahib. 4:15; 5:7-10) Thutha wa kũriũkio, nĩ aambatire igũrũ agĩtwarĩra Jehova thogora wa igongona rĩake. (Ahib. 9:24) Thutha ũcio, Jesu nĩ angĩahotire gũthaitha Jehova handũ-inĩ ha arĩa monanagia wĩtĩkio harĩ igongona rĩake na amateithĩrĩrie matungatĩre Ngai magĩtanyaga muoyo wa tene na tene. (Ahib. 7:25) Ningĩ igongona rĩake nĩ rĩoonanirie atĩ kĩrĩkanĩro kĩrĩa kĩerũ nĩ kĩa ma.—Ahib. 8:6; 9:15.
13. Arĩa meetirũo matuĩke a kĩrĩkanĩro kĩrĩa kĩerũ maarĩ na kĩrĩgĩrĩro kĩrĩkũ?
13 Arĩa meetirũo matuĩke a kĩrĩkanĩro kĩrĩa kĩerũ no mũhaka o nao mangĩaitĩrĩirio maguta kũgerera roho mũtheru. (2 Kor. 1:21) Ayahudi ehokeku na thutha ũcio andũ a Ndũrĩrĩ maarĩ a itari rĩu. (Ef. 3:5, 6) Arĩa a kĩrĩkanĩro kĩu kĩerũ maarĩ na kĩrĩgĩrĩro kĩrĩkũ? Nĩ mangĩoheirũo mehia mao biũ. Jehova eeranĩire ũũ: ‘Nĩ ngamohera waganu wao, namo mehia mao ndigacoka kũmaririkana o rĩ, o rĩ.’ (Jer. 31:34) Nĩ ũndũ wa kuoherũo mehia mao kũringana na watho, nĩ mangĩahotire gũtuĩka ‘ũthamaki wa athĩnjĩri Ngai.’ Akĩaria na Akristiano aitĩrĩrie maguta, Petero aandĩkire ũũ: ‘Inyuĩ mũrĩ rũruka rũthurĩtwo, na thiritũ ya athĩnjĩri-Ngai ya nyũmba ya mũthamaki, ningĩ mũrĩ rũrĩrĩ rũtheru, andũ matuĩkĩte a Ngai kĩũmbe; nĩ getha mũhunjanagĩrie mawega make, we wamwĩtire muume nduma-inĩ mũtonye ũtheri-inĩ wake ũrĩa wa magegania.’ (1 Pet. 2:9) Hau Petero aacokerire ciugo iria Jehova eerĩte Aisiraeli hĩndĩ ĩrĩa aamaheaga Watho, agĩcoka agĩcihũthĩra harĩ Akristiano thĩinĩ wa kĩrĩkanĩro kĩrĩa kĩerũ.—Tham. 19:5, 6.
THIRITŨ YA ATHĨNJĨRI NGAI YA NYŨMBA YA MŨTHAMAKI ĨREHAGĨRA ANDŨ OTHE IRATHIMO
14. Arĩa a thiritũ ya athĩnjĩri Ngai a nyũmba ya mũthamaki mangĩgatungatĩra kũ?
14 Acio a kĩrĩkanĩro kĩrĩa kĩerũ mangĩgatungatĩra marĩ kũ? Marĩ gĩkundi gũkũ thĩ mangĩatungatire marĩ thiritũ ya athĩnjĩri Ngai, marũgamĩrĩire Jehova kũrĩ andũ na njĩra ya ‘kũhunjia mawega make’ na kũheana irio cia kĩĩroho. (Mat. 24:45; 1 Pet. 2:4, 5) Thutha wa gũkua na kũriũka, nĩ mangĩgatungatĩra marĩ na Kristo igũrũ marĩ athamaki na athĩnjĩri Ngai, marutanagĩrie mawĩra macio merĩ. (Luk. 22:29; 1 Pet. 1:3-5; Kũg. 1:6) Gwĩkĩra ũndũ ũcio mũkonde mũtũmwo Johana nĩ onirio thĩinĩ wa kĩoneki ciũmbe nyingĩ cia kĩĩroho igũrũ irĩ hakuhĩ na gĩtĩ kĩa ũthamaki kĩa Jehova. Cikĩina “rũĩmbo rũerũ” cirwerekeirie kũrĩ “Gatũrũme” cioigire ũũ: “Ũkĩgũrĩra Ngai andũ na thakame yaku a mĩhĩrĩga yothe na mĩario yothe na nduka ciothe na ndũrĩrĩ ciothe, ũkĩmatua kĩrĩndĩ gĩa gũthamakagĩrũo nĩ Ngai witũ na ũkĩmatua amũthĩnjagĩri; nao nĩo a gũthamakaga thĩ.” (Kũg. 5:8-10) Thutha ũcio thĩinĩ wa kĩoneki kĩngĩ, Johana akĩaria ũhoro wa athamaki acio oigire ũũ: ‘Magaatuĩka athĩnjĩri Ngai o na Kristo, na mathamakage hamwe nake mĩaka ngiri ĩmwe.’ (Kũg. 20:6) Marĩ hamwe na Kristo, nĩo mathondekete thiritũ ya athĩnjĩri Ngai ya nyũmba ya mũthamaki nĩguo andũ othe magunĩke.
15, 16. Thiritũ ya athĩnjĩri Ngai ya nyũmba ya mũthamaki ĩkaarehera andũ irathimo irĩkũ?
15 Arĩa 144,000 makaarehera arĩa magaakorũo gũkũ thĩ irathimo irĩkũ? Kũguũrĩrio mũrango wa 21 ũmonanagia matariĩ ta itũũra rĩa igũrũ, Jerusalemu Njerũ, ĩrĩa ĩtagwo “mũtumia wa Gatũrũme.” (Kũg. 21:9) Mũhari wa 2 nginya wa 4 yugaga ũũ: “Na ngĩona itũũra rĩrĩa itheru, Jerusalemu ĩrĩa njerũ, rĩgĩikũrũka rĩkiuma Igũrũ kwĩ Ngai, rĩthagathagĩtwo ta mũhiki agemeirio mũthuriwe. Na ngĩigua mũgambo mũnene woima gĩtĩ-inĩ kĩrĩa gĩa ũthamaki woiga, Atĩrĩrĩ, gĩikaro kĩa Ngai kĩĩ hamwe na andũ, nake nĩ egũikarania nao, nao matuĩke andũ ake, nake Ngai we mwene agĩage o hamwe nao, [e Ngai wao]; nake nĩekũmagiria maithori mothe mathire maitho mao; nakĩo gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo; maũndũ marĩa ma mbere nĩ mathengu magathira.” Kaĩ icio nĩ irathimo cia magegania-ĩ! Thutha wa gĩkuũ kweherio gũtigacoka gũkorũo na maithori, gũcakaya, kũrĩra o na ruo. Ũguo nĩ kuuga atĩ andũ arĩa ehokeku nĩ magaacokerio ũkinyanĩru, na maiguithanio biũ na Ngai.
16 Rĩgĩthiĩ na mbere kwarĩrĩria irathimo iria ikaarehwo nĩ thiritũ ĩyo ya athĩnjĩri Ngai ya nyũmba ya mũthamaki, rĩandĩko rĩa Kũguũrĩrio 22:1, 2 riugaga ũũ: “Agĩcoka akĩnyonia rũũĩ rũa maĩ ma muoyo, rũrahenia o ta gĩcicio, ruumĩte thĩinĩ wa gĩtĩ-gĩa-ũthamaki kĩrĩa kĩa Ngai na Gatũrũme, na rũikũrũkĩire kĩng’aratua gĩa itũũra rĩu [Jerusalemu Njerũ] gatagatĩ. Na mũrĩmo ũyũ wa rũũĩ rũu, o na mũrĩmo ũrĩa, kwarĩ mũtĩ ũrĩa wa muoyo, ũgĩaga maciaro mĩthemba ikũmi na ĩĩrĩ, ũgĩciaraga maciaro maguo o mweri, o mweri; namo mathangũ ma mũtĩ ũcio maarĩ ma kũhonia ndũrĩrĩ.” Kũgerera maũndũ macio ma mũhaano Ngai aharĩrĩirie “ndũrĩrĩ,” kana ikundi cia andũ nĩguo ikaahonio biũ kwaga gũkinyanĩra kũrĩa ciagaire kuuma kũrĩ Adamu. Ma nĩ atĩ ‘maũndũ marĩa ma mbere nĩ magaakorũo mathengete magathira.’
THIRITŨ YA ATHĨNJĨRI NGAI YA NYŨMBA YA MŨTHAMAKI KŨHINGIA WĨRA WAYO
17. Mũthia-inĩ thiritũ ya athĩnjĩri Ngai ya nyũmba ya mũthamaki ĩgaakorũo ĩhingĩtie ũndũ ũrĩkũ?
17 Mĩaka 1,000 ya ũtungata ũrĩ na ũguni ĩkiuga ĩthire-rĩ, thiritũ ya athĩnjĩri Ngai ya nyũmba ya mũthamaki nĩ ĩgaakorũo ĩcokeirie andũ ũkinyanĩru gũkũ thĩ. Hĩndĩ ĩyo nĩrĩo Kristo arĩ Mũthĩnjĩri Ngai ũrĩa Mũnene, o na Mũthamaki agaacokeria Jehova famĩlĩ nginyanĩru biũ ya andũ. (Thoma 1 Akorintho 15:22-26.) Thiritũ ya athĩnjĩri Ngai ya nyũmba ya mũthamaki nĩ ĩgaakorũo ĩhingĩtie biũ muoroto wayo.
18. Thiritũ ya athĩnjĩri Ngai ya nyũmba ya mũthamaki yahingia wĩra wayo-rĩ, Jehova akaahũthagĩra arĩa a itari rĩa Kristo atĩa?
18 Thutha ũcio-rĩ, hihi Jehova akaahũthĩra atĩa acio a thiritũ ya Kristo maheetwo wĩra mwega ũguo? Kũringana na Kũguũrĩrio 22:5, ‘magaatũũra mathamakaga tene na tene.’ Magaathamakagĩra ũ? Bibilia ndiugĩte. Ĩndĩ tondũ wa gũkorũo marĩ na muoyo ũtangĩthira na ũmenyeru wa gũteithia andũ matarĩ akinyanĩru nĩ magaatũũra mahũthagĩrũo nĩ Ngai thĩinĩ wa mĩoroto yake tene na tene.
19. Nĩ maũndũ marĩkũ arĩa magaakorũo thĩinĩ wa Kĩririkano makaaririkanio?
19 Twagomana gũkũngũĩra Kĩririkano gĩa gĩkuũ kĩa Jesu Aramithi, Ĩpuro 5, 2012, nĩ tũkaaririkanio morutani macio ma Bibilia. Gakundi kanini ka Akristiano arĩa aitĩrĩrie maguta matigarĩte gũkũ thĩ nĩ makaarĩa mũgate ũtarĩ mwĩkĩre ndawa ya kũimbia na manyue ndibei ndune, makĩonania atĩ o nĩ a itarĩ rĩa kĩrĩkanĩro kĩrĩa kĩerũ. Mĩhaano ĩyo ĩrĩa ĩrũgamagĩrĩra igongona rĩa Kristo nĩ ĩkaamaririkania mĩeke yao ya mwanya na mawĩra marĩa mehokeirũo nĩ Ngai thĩinĩ wa muoroto wake wa tene na tene. Rekei ithuothe tũgaacemania tũrĩ na ngatho nyingĩ harĩ Jehova Ngai, ũrĩa wahaarĩrĩirie thiritũ ya athĩnjĩri Ngai ya nyũmba ya mũthamaki nĩguo andũ othe magunĩke.
[Ciũria cia wĩruti]
[Mbica karatathi ka 28]
[Mbica karatathi ka 31]
Thiritũ ya athĩnjĩri Ngai ya nyũmba ya mũthamaki ĩkaarehera andũ irathimo cia tene na tene
