No Kũgĩe na Gĩkeno Famĩlĩ-inĩ Ĩgayũkanĩte Kĩĩndini

‘Ũĩ atĩa kana wahota kũhonokia mũthuri kana mũtumia waku?’—1 KOR. 7:16.

CARIA MACOKIO MA CIŨRIA ICI:

Akristiano mangĩka atĩa gũthingata thayũ thĩinĩ wa famĩlĩ ĩgayũkanĩte kĩĩndini?

Mũkristiano angĩteithia atĩa andũ thĩinĩ wa famĩlĩ metĩkĩre ũthathaiya wa ma?

Arĩa angĩ mangĩka atĩa nĩguo mateithie Akristiano arĩa marĩ thĩinĩ wa famĩlĩ igayũkanĩte kĩĩndini?

1. Gwĩtĩkĩra ndũmĩrĩri ya Ũthamaki kũngĩkorũo na moimĩrĩro marĩkũ thĩinĩ wa famĩlĩ?

 HĨNDĨ ĩmwe Jesu agĩtũma atũmwo ake, aamerire ũũ: ‘Na mũgĩthiĩ-rĩ, heanagai ũhoro, mũkiugaga atĩrĩ, Ũthamaki wa igũrũ nĩ ũkuhĩrĩirie.’ (Mat. 10:1, 7) Ũhoro ũcio mwega nĩ ũngĩkaarehe thayũ na gĩkeno kũrĩ arĩa mangĩkaũiyũkia marĩ na ngatho ciumĩte ngoro-inĩ. O na kũrĩ ũguo-rĩ, Jesu nĩ eerire atũmwo ake atĩ andũ aingĩ nĩ mangĩgaakararia kũhunjio kwa ũhoro mwega wa Ũthamaki. (Mat. 10:16-23) Ũkararia ũrĩa ũrehaga ruo makĩria nĩ ũrĩa uumanaga na andũ a famĩlĩ arĩa maregete ndũmĩrĩri ya Ũthamaki.—Thoma Mathayo 10:34-36.

2. Hihi Akristiano arĩa makoragwo thĩinĩ wa famĩlĩ igayũkanĩte kĩĩndini no makorũo na gĩkeno?

² Hihi ũguo nĩ kuuga atĩ arũmĩrĩri a Kristo arĩa makoragwo thĩinĩ wa famĩlĩ igayũkanĩte kĩĩndini matingĩkorũo na gĩkeno? Aca! O na gũtuĩka rĩmwe na rĩmwe ũkararia thĩinĩ wa famĩlĩ no ũkorũo ũrĩ mũũru mũno-rĩ, ti hingo ciothe gũkoragwo ũguo. Ningĩ ũkararia thĩinĩ wa famĩlĩ to mũhaka ũtũũre. Maita maingĩ kũringanaga na ũrĩa Akristiano arĩa marakarario kana makamenwo maiyũkagia ũndũ ũcio. Makĩria ma ũguo, Jehova nĩ arathimaga arĩa makoragwo marĩ ehokeku harĩ we, agatũma makorũo na gĩkeno o na marĩ rungu rwa magerio. Akristiano no magĩe na gĩkeno makĩria (1) mangĩĩrutanĩria gũthingata thayũ thĩinĩ wa famĩlĩ na (2) mangĩgeria biũ gũteithia andũ a famĩlĩ arĩa matarĩ Akristiano metĩkĩre ũthathaiya wa ma.

THINGATAGA THAYŨ THĨINĨ WA FAMĨLĨ

3. Mũkristiano ũrĩ thĩinĩ wa famĩlĩ ĩgayũkanĩte kĩĩndini agĩrĩirũo gũthingata thayũ nĩkĩ?

³ Nĩguo mbegũ cia ũthingu igĩe na maciaro thĩinĩ wa famĩlĩ, thayũ nĩ wa bata mũno. (Thoma Jakubu 3:18.) O na angĩkorũo Mũkristiano oimĩte thĩinĩ wa famĩlĩ ĩgayũkanĩte  kĩĩndini, no mũhaka ekĩre kĩyo gũthingata thayũ thĩinĩ wa mũciĩ. Ũndũ ũcio ũngĩhoteka atĩa?

4. Akristiano mangĩgitĩra atĩa thayũ wao wa ngoro?

⁴ No mũhaka Akristiano magitĩre thayũ wao wa ngoro. Ũndũ ũcio ũbataraga mahoya moimĩte ngoro-inĩ, marĩa mangĩtũrehera “thayũ wa Ngai” ũrĩa ũtangĩringithanio na kĩndũ kĩngĩ. (Afil. 4:6, 7) Gĩkeno na thayũ ciumanaga na kũgĩa na ũmenyo wĩgiĩ Jehova na kũhũthĩra ũtaaro wa Maandĩko ũtũũro-inĩ. (Isa. 54:13) Ningĩ gũcokia ciũria hĩndĩ ya mĩcemanio ya kĩũngano na kũgĩa na kĩyo wĩra-inĩ wa kũhunjia nĩ kwa bata angĩkorũo nĩ tũgũkorũo na thayũ na gĩkeno. Akristiano arĩa maikaraga thĩinĩ wa famĩlĩ igayũkanĩte kĩĩndini no mahote kũnyita mbaru maũndũ ma Gĩkristiano. Kwa ngerekano-rĩ, ta wĩcirie ũhoro wa Enza, a ũrĩa mũthuri wake ahũthagĩra ũhinya kũmũkararia. Enza athiaga kũhunjia thutha wa kũrĩkia mawĩra make ma mũciĩ. Oigire ũũ: “Jehova nĩ andathimaga mũno ngagĩa na moimĩrĩro mega hingo ciothe rĩrĩa ndathiĩ kũhunjia.” Hatarĩ nganja irathimo ta icio irehaga thayũ, gĩkeno, na kũiganĩra.

5. Akristiano arĩa moimĩte famĩlĩ-inĩ igayũkanĩte kĩĩndini kaingĩ mahiũranagia na ũndũ ũrĩkũ, na mangĩruta ũtaaro kũ?

⁵ Nĩ tũrabatara kwĩrutanĩria mũno gũthingata thayũ na andũ a famĩlĩ arĩa matarĩ Aira a Jehova. Ũcio ti ũndũ mũhũthũ tondũ rĩmwe na rĩmwe maũndũ marĩa mangĩenda twĩke no makorũo marĩ mũgarũ na motaaro ma Bibilia. Nĩ ũndũ wa kũrũmia na kinyi maũndũ marĩa magĩrĩire, andũ a famĩlĩ arĩa matarĩ Akristiano no marakare, ĩndĩ mũrũgamo ta ũcio, nĩ ũrehaga thayũ macũngĩrĩro-inĩ. Ma nĩ atĩ, kũnyitĩrĩra mũno maũndũ matareganĩte na motaaro ma Bibilia no kũrehe mburugano ĩtarĩ ya o mũhaka. (Thoma Thimo 16:7.) Rĩrĩa mũndũ arahiũrania na ũndũ mũritũ, harĩ bata gũcaria ũtaaro wa Maandĩko kuuma mabuku-inĩ ma ngombo ĩrĩa ĩĩhokekete na njũgĩ, na kuuma kũrĩ athuri a kĩũngano.—Thim. 11:14.

6, 7. (a) Nĩ kĩĩ gĩtũmaga amwe makararie andũ a famĩlĩ ciao arĩa mambĩrĩria kwĩruta Bibilia na Aira a Jehova? (b) Mũrutwo wa Bibilia kana Mũkristiano agĩrĩirũo kũiyũkia atĩa ũkararia wa andũ a famĩlĩ?

⁶ Nĩguo gũkorũo na thayũ thĩinĩ wa famĩlĩ, tũkũbatara kwĩhoka Jehova na kũrũmbũiya andũ a famĩlĩ arĩa matarĩ Akristiano. (Thim. 16:20) O na arĩa marambĩrĩirie kwĩruta Bibilia ica ikuhĩ no monanie ũtaũku ũndũ-inĩ ũcio. Athuri kana atumia amwe matarĩ Akristiano no maage kũgiria ũrĩa mahikanĩtie nake erute Bibilia. O na no mone ũndũ ũcio ũrĩ mwega harĩ famĩlĩ. O na kũrĩ ũguo, angĩ no makorũo na ũũru mũingĩ. Esther, ũrĩa ũmũthĩ nĩ mwarĩ wa Ithe witũ, oigaga atĩ nĩ aarakarire mũno rĩrĩa mũthuri wake aambĩrĩirie kwĩruta Bibilia na Aira a Jehova. Oigaga: “Ndaateaga kana ngacina mabuku make.” Howard, ũrĩa kĩambĩrĩria-inĩ wagiragia mũtumia wake erute Bibilia, oigaga ũũ: “Athuri aingĩ monaga ta atumia ao arĩ kũheenio maraheenio nĩ ndini ya nyamũkano. Nĩ ũndũ wa mũthuri kuona ta mũtumia wake arĩ ũgwati-inĩ, no arigwo ũrĩa angĩka na kwoguo akorũo na ũũru mũingĩ mũno.”

⁷ Mũrutwo wa Bibilia ũrĩa ũrakarario nĩ mũthuri kana mũtumia wake agĩrĩirũo nĩ gũteithio amenye atĩ ndarabatara gũtiga kwĩruta Bibilia. Maita maingĩ no aniine mathĩna na njĩra ya gũkorũo arĩ mũhooreri na arĩ na gĩtĩo harĩ mũthuri kana mũtumia wake ũtarĩ Mũkristiano. (1 Pet. 3:15) Howard oigire, “Nĩ ngenaga mũno tondũ mũtumia wakwa nĩ onanirie ũhooreri na ndaigana kũndakarĩra.” Mũtumia wake oigaga ũũ: “Howard aanjĩraga no mũhaka ndige kwĩruta Bibilia. Oigaga atĩ nĩ kũheenio ndaahenagio. Handũ ha kũmũkararia, ndaamwĩraga no akorũo akĩaria ũrĩa kũrĩ, ĩndĩ nĩ ndaamwĩraga atĩ ndirona maheeni macio. Kwoguo ngĩmwĩkĩra ngoro athome ibuku rĩrĩa nderutaga narĩo. Akĩrĩthoma, ĩndĩ ndaigana kũregana na maũndũ marĩa aathomire. Maũndũ macio makĩmũhutia mũno.” Nĩ wega kũririkana  atĩ mũthuri kana mũtumia ũtarĩ Mũkristiano no eigue arĩ mũtiganĩrie na atarĩ na ũgitĩri rĩrĩa mwendwa wake athiĩte maũndũ-inĩ ma kĩĩroho, ĩndĩ gũtigĩrĩra atĩ nĩ aramenya nĩ ũmwendete no kweherie ihooru rĩu.

MATEITHIE METĨKĨRE ŨTHATHAIYA WA MA

8. Mũtũmwo Paulo aaheire arĩa mahikanĩtie na andũ matarĩ Akristiano ũtaaro ũrĩkũ?

⁸ Mũtũmwo Paulo eerire Akristiano matikanatige mũndũ ũrĩa mahikanĩtie nake atĩ tondũ ti Mũkristiano. b (Thoma 1 Akorintho 7:12-16.) Kũririkana atĩ no kũhoteke mũndũ ũrĩa mahikanĩtie nake atuĩke Mũkristiano, no gũteithie mũthuri kana mũtumia Mũkristiano atũũrie gĩkeno o na angĩkorũo arĩ thĩinĩ wa famĩlĩ ĩgayũkanĩte kĩĩndini. O na kũrĩ ũguo, ũũgĩ nĩ ũrabatarania harĩ kũhunjĩria mũthuri kana mũtumia ũtarĩ Mũkristiano, ta ũrĩa maũndũ maya monetwo maronania.

9. Mũkristiano arabatara gwĩthema ũndũ ũrĩkũ akĩhunjĩria andũ a famĩlĩ arĩa matarĩ Akristiano?

⁹ Akĩririkana ũrĩa aaiyũkirie ma cia Bibilia, Jason oigaga ũũ: “Ndaiguaga ngĩenda kwĩra mũndũ o wothe!” Rĩrĩa mũrutwo wa Bibilia ataũkĩrũo atĩ maũndũ marĩa areruta kuuma Maandĩko-inĩ nĩguo ũhoro wa ma, ahota gũkena mũno nginya aragie ũhoro ũcio hakuhĩ hĩndĩ ciothe. No erĩgĩrĩre andũ a famĩlĩ arĩa matarĩ Akristiano metĩkĩre ndũmĩrĩri ya Ũthamaki o na ihenya, ĩndĩ no mamũkararie mũno. Hihi mũtumia wa Jason aaiguire atĩa ona ũrĩa mũthuriwe aacanjamũkĩire ũhoro ũcio? Akĩririkana oigaga ũũ: “Ndaiguire nditũhĩirũo mũno nĩ ũhoro ũcio.” Mũtumia ũmwe ũrĩa wetĩkĩrire ma mĩaka 18 thutha wa mũthuriwe, oigaga ũũ: “Mbere ndaya, niĩ ndaabataraga kwĩruta kahora kahora.” Angĩkorũo ũrĩ na mũrutwo wa Bibilia ũrĩ na mũthuri kana mũtumia ũtaronania wendi wa kũnyitanĩra ũthathaiya-inĩ ũrĩa wa ma-rĩ, nĩ wega kũgĩaga na mahinda ma kũmũteithia ũrĩa arĩĩkaga maũndũ na njĩra ya ũtaũku. Musa oigire ũũ: “Ũrutani ũrĩa ngũrutana ũrĩtaataga o ta mbura, Nacio ciugo iria nguuga igũtuĩka o ta ireera rĩiyũrĩte thĩ, O na ituĩke o ta rũciciũ rũkĩihũgia nyeki.” (Gũcok. 32:2) Ciugo nyinyi ibarĩrĩirũo wega ciĩgiĩ ma ya Bibilia kaingĩ ikoragwo na moimĩrĩro mega o na gũkĩra ciugo nyingĩ itariĩ ta mbura.

10-12. (a) Nĩ ũtaaro ũrĩkũ mũtũmwo Petero aaheire Akristiano arĩa athuri kana atumia ao matarĩ etĩkia? (b) Mũrutwo ũmwe wa Bibilia eerutire atĩa kũhũthĩra ũtaaro ũrĩa ũrĩ thĩinĩ wa 1 Petero 3:1, 2?

¹⁰ Mũtũmwo Petero atongoretio nĩ roho aaheire atumia Akristiano arĩa athuri ao mataarĩ etĩkia ũtaaro ũyũ wa ũũgĩ: “Athĩkagai nĩ athuri anyu, nĩguo atĩ angĩkorũo nĩharĩ amwe mataiguaga Ũhoro, mahote kũgarũrũo ngoro, Ũhoro ũtarĩ ho, nĩ mĩikarĩre ya atumia ao, nĩ ũndũ wa kuonaga ũrĩa mũikaraga na mĩikarĩre ya ũthingu, na mwĩ na gĩtĩo.” (1 Pet. 3:1, 2) Mũtumia no ateithie mũthuri  wake etĩkĩre ũhoro wa ma angĩkorũo arĩ mwĩnyihia na arĩ na gĩtĩo kĩnene, o na angĩkorũo mũthuriwe nĩ amwĩkaga maũndũ moru. Ũndũ ũmwe na ũcio, mũthuri Mũkristiano, agĩrĩirũo nĩ gũkorũo na mĩthiĩre ya wĩtigĩri Ngai na akorũo na wendo harĩ andũ a nyũmba yake, o na angĩkorũo mũtumia wake nĩ mũkararia.—1 Pet. 3:7-9.

¹¹ Cionereria nyingĩ mahinda-inĩ maya nĩ cionanagia bata wa kũrũmĩrĩra ũtaaro wa Petero. Ta wĩcirie ũhoro wa Selma. Rĩrĩa aambĩrĩirie kũrutwo Bibilia nĩ Aira a Jehova, mũthuri wake Steve, ndaakenire. Steve oigaga ũũ: “Ndaiguaga ndakarĩte mũno, ngaigua ũiru, ngaigua itarĩ na ũgitĩri, na ndiendaga akorũo handũ itarĩ.” Selma oigaga: “O na itaneruta ma ya Bibilia, ndwarĩ ũndũ mũhũthũ gũikarania na Steve. Nĩ aarakaraga mũno. Rĩrĩa ndaambĩrĩirie kwĩruta Bibilia, agĩtororokia.” Nĩ kĩĩ gĩateithirie?

¹² Selma nĩ aririkanaga ũndũ aarutirũo nĩ Mũira wa Jehova ũrĩa wamũrutire Bibilia. Oigaga ũũ: “Kũrĩ mũthenya ũmwe ndaiguire itekwenda kwĩruta Bibilia. Ũtukũ ũrĩa warĩ mbere ya mũthenya ũcio, Steve nĩ aangũthĩte ngĩgeria kũmũtaarĩria ũndũ mũna, kwoguo nĩ ndaiguaga ũũru mũno na ngaigua ndĩna ihooru. Thutha wa kwĩra mwarĩ wa Ithe witũ ũcio ũrĩa gwekĩkĩte na ũrĩa ndaiguaga, akĩnjĩra thome 1 Akorintho 13:4-7. Rĩrĩa ndaathomaga rĩandĩko rĩu, ngiuga, ‘Gũtirĩ hingo Steve anjĩkagĩra o na ũmwe wa maũndũ maya ma wendo.’ No mwarĩ wa Ithe witũ ũcio agĩtũma ngĩe na mawoni ngũrani na marĩa ndaarĩ namo, rĩrĩa aanjũririe, ‘Harĩ maũndũ macio ma wendo-rĩ, nĩ maigana wee wĩkagĩra mũthuri waku?’ Ngĩcokia ũũ: ‘Hatirĩ o na ũmwe, tondũ nĩ mũndũ mũritũ mũno gũikarania nake.’ Na njĩra ya ũhooreri mwarĩ wa Ithe witũ ũcio akĩnjũria, ‘Selma, gatagatĩ-inĩ kanyu nũũ ũrerirĩria gũtuĩka Mũkristiano? Nĩwe-ĩ, kana nĩ Steve?’ Thutha wa kũmenya atĩ nĩ ndaabataraga kũgarũrĩra mwĩcirĩrie wakwa, ngĩhoya Jehova andeithie kwenda Steve makĩria. Maũndũ makĩambĩrĩria gũcenjia o kahora.” Thutha wa mĩaka 17, Steve nĩ eetĩkĩrire kwĩruta ma ya Bibilia.

ŨRĨA ANDŨ ANGĨ MANGĨTEITHĨRĨRIA

13, 14. Andũ thĩinĩ wa kĩũngano mangĩteithĩrĩria atĩa arĩa makoragwo thĩinĩ wa famĩlĩ igayũkanĩte kĩĩndini?

¹³ O ta ũrĩa matata ma mbura maihũgagia thĩ magateithia mĩmera gũkũra-rĩ, andũ aingĩ thĩinĩ wa kĩũngano nĩ matũmaga arĩa marĩ thĩinĩ wa famĩlĩ iria igayũkanĩte kĩĩndini makorũo na gĩkeno. Elvina, kuuma Brazil oigaga ũũ: “Wendo wa aarĩ na ariũ a Ithe witũ nĩguo wandeithirie kũrũmia ũhoro wa ma.”

¹⁴ Andũ thĩinĩ wa kĩũngano no mahutie ngoro ya mũndũ ũtarĩ Mũkristiano ũrĩ thĩinĩ wa famĩlĩ ĩgayũkanĩte kĩĩndini na njĩra ya kũmuonia ũrata na ciĩko cia ũtugi. Mũthuri ũmwe thĩinĩ wa bũrũri wa Nigeria ũrĩa wetĩkĩrire ũhoro wa ma mĩaka 13 thutha wa mũtumia wake oigire: “Mũthenya ũmwe tũrĩ rũgendo-inĩ na Mũira wa Jehova, ngari  yake nĩ yathũkire. Agĩcaria Aira a Jehova a itũũra rĩrĩa rĩarĩ hakuhĩ, na magĩtũhe kĩraaro. Magĩtũrũmbũiya ta twamenyanĩte nao kuuma o ũnyinyi-inĩ witũ. Ngĩĩyonera wendo wa Gĩkristiano ũrĩa mũtumia wakwa aatũũraga aaragia ũhoro waguo.” Bũrũri-inĩ wa Ngeretha, mũtumia ũmwe watuĩkire Mũira wa Jehova mĩaka 18 thutha wa mũthuri wake aririkanaga ũũ: “Aira a Jehova maatũnyitaga ũgeni kwao tũrĩ na mũthuri wakwa nĩguo tũrĩanĩre nao. Hĩndĩ ciothe ndeiguaga ndĩ mũciĩ.” c Nake mũthuri ũmwe bũrũri-inĩ o ũcio ũrĩa wacokire agĩtuĩka Mũira wa Jehova oigaga ũũ: “Aarĩ na ariũ a Ithe witũ nĩ maatũceragĩra, kana magatũnyita ũgeni mĩciĩ-inĩ yao, maakoragwo na mwerekera wa kũrũmbũiya andũ. Makĩria ũndũ ũcio wonekire wega rĩrĩa ndakomire thibitarĩ na aingĩ magĩũka kũndora.” Hihi no ũcarie njĩra cia kuonania ũrata ta ũcio harĩ andũ arĩa matarĩ Akristiano thĩinĩ wa famĩlĩ iria igayũkanĩte kĩĩndini?

15, 16. Nĩ kĩĩ kĩngĩteithia Mũkristiano atũũrie gĩkeno arĩa angĩ thĩinĩ wa famĩlĩ mangĩrega ma ya Bibilia?

¹⁵ Ma nĩ atĩ, ti andũ othe matarĩ Akristiano—athuri, atumia, ciana, aciari, kana andũ angĩ a famĩlĩ—mangĩtĩkĩra ũthathaiya wa ma, o na thutha wa Mũkristiano kũmahunjĩria na ũũgĩ na gũkorũo arĩ mwĩhokeku mĩaka mĩingĩ. Amwe matũũraga o ũrĩa maarĩ kana magatuĩka akararia mũno. (Mat. 10:35-37) O na kũrĩ ũguo, Akristiano mangĩonania ngumo cia Gĩkristiano, ũndũ ũcio no ũrehe moimĩrĩro mega. Mũthuri ũmwe ũrĩa wacokire agĩtuĩka Mũkristiano oigire ũũ: “Rĩrĩa mũthuri kana mũtumia Mũkristiano aronania ngumo icio njega, ndũngĩmenya ũrĩa ũndũ ũcio ũrahutia ngoro na meciria ma ũrĩa ũtarĩ Mũkristiano. Kwoguo ndũkanakue ngoro nĩ ũndũ wa mũthuri kana mũtumia waku ũtarĩ Mũkristiano.”

¹⁶ O na mũndũ wa famĩlĩ angĩrega gwĩtĩkĩra ũhoro wa ma, no kũhoteke ũrĩa Mũkristiano akorũo na gĩkeno. O na gũtuĩka mũthuri wake ndarĩ etĩkĩra ndũmĩrĩri ya Ũthamaki o na thutha wa kũgeria kũmũhunjĩria na kĩyo ihinda rĩa mĩaka 21, mwarĩ wa Ithe witũ ũmwe oigaga ũũ: “Nĩ hotete gũtũũria gĩkeno na njĩra ya kwĩrutanĩria gũkenia Jehova, gũtũũra ndĩ mwĩhokeku harĩ we, na gũkũria ũkuruhanu wa hakuhĩ nake. Gũkorũo na maũndũ maingĩ ma gwĩka ma kĩĩroho—wĩruti wakwa kĩũmbe, gũthiĩ mĩcemanio-inĩ, ũtungata-inĩ, na gũteithia andũ kĩũngano-inĩ—nĩ kũndeithĩtie gũkuhĩrĩria Jehova makĩria na gũkagitĩra ngoro yakwa.”—Thim. 4:23.

NDŨGAKUE NGORO!

17, 18. Kũngĩhoteka atĩa Mũkristiano atũũrie kĩĩrĩgĩrĩro o na arĩ thĩinĩ wa famĩlĩ ĩgayũkanĩte kĩĩndini?

¹⁷ Angĩkorũo wĩ Mũkristiano mwĩhokeku thĩinĩ wa famĩlĩ ĩgayũkanĩte kĩĩndini, ndũgakue ngoro. Ririkana atĩ “Jehova ndangĩtiga andũ ake, nĩ ũndũ wa ũrĩa rĩĩtwa rĩake rĩnenehete.” (1 Sam. 12:22) Arĩkoragwo hamwe nawe watũũra wĩ mwĩhokeku harĩ we. (Thoma 2 Maũndũ ma Matukũ ma Tene 15:2.) Kwoguo ‘tũũra wĩkenagĩra nĩ ũndũ wa Jehova.’ Ningĩ, “ũhoro wa njĩra yaku, rekagĩrĩria Jehova; mwĩhokage o we.” (Thab. 37:4, 5) ‘Rũmanagĩrĩria kũhoya na kĩyo,’ na ũkoragwo na wĩtĩkio atĩ Ithe witũ wa igũrũ ũrĩa ũtwendete nĩ arĩgũteithagia gũkirĩrĩria moritũ ma mĩthemba yothe.—Rom. 12:12.

¹⁸ Thaitha Jehova akũhe roho wake mũtheru ũgũteithie gũthingata thayũ thĩinĩ wa famĩlĩ. (Ahib. 12:14) Ĩĩni, no kũhoteke gũkorũo na thayũ ũrĩa macũngĩrĩro-inĩ ũngĩhutia ngoro cia arĩa matarĩ Akristiano thĩinĩ wa famĩlĩ. Nĩ ũrĩkoragwo na gĩkeno na thayũ wa ngoro na wa meciria ‘weka maũndũ mothe ũkĩendaga kũgoocithia Ngai.’ (1 Kor. 10:31) Nĩ ũndũ wa gũgwĩkĩra ngoro mũno rĩrĩa ũrerutanĩria gwĩka maũndũ macio kũmenya atĩ, nĩ ũranyitwo mbaru nĩ aarĩ na ariũ a Ithe witũ thĩinĩ wa kĩũngano gĩa Gĩkristiano marĩ na wendo.

[Ũhoro wa magũrũ-inĩ]

[Ciũria cia wĩruti]

[Mbica karatathi ka 30]

Thuuraga ihinda rĩrĩa rĩagĩrĩire rĩa gũtaarĩria wĩtĩkio waku

[Mbica karatathi ka 31]

Rũmbũyagiai athuri na atumia arĩa matarĩ Akristiano