Wĩrute Kuumana Na Kiugo Kĩa Ngai

Ngai Akoragwo na Ithondeka Nĩkĩ?

Gĩcunjĩ gĩkĩ kĩrĩ na ciũria hihi waneyũria na nĩ kĩronania harĩa ũngĩona macokio ma ciũria icio thĩinĩ wa Bibilia yaku. Aira a Jehova no makenere kwarĩrĩria macokio macio hamwe nawe.

1. Ngai aatuĩte Aisiraeli ithondeka nĩkĩ?

Ngai aatuire njiarũa cia mũthuri wa tene Iburahimu rũrĩrĩ agĩcoka akĩmahe mawatho. Eetire rũrĩrĩ rũu Isiraeli na akĩrwĩhokera kũgitĩra ũthathaiya wa ma hamwe na Kiugo gĩake. (Thaburi 147:19, 20) Nĩ ũndũ ũcio, andũ a ndũrĩrĩ ciothe nĩ magunĩkĩte.—Thoma Kĩambĩrĩria 22:18.

Ngai aathurire Aisiraeli nĩguo matuĩke aira ake. Rĩrĩa mamwathĩkagĩra nĩ maagunĩkaga nĩ mawatho make. (Gũcokerithia Maathani 4:6) Na njĩra ya gũthoma ũhoro wa Aisiraeli, no tũhote kũmenya makĩria ũhoro wa Ngai ũrĩa wa ma.—Thoma Isaia 43:10, 12.

2. Akristiano a ma matuĩtwo ithondeka nĩkĩ?

Thutha wa ihinda, Aisiraeli nĩ maaregirũo nĩ Jehova, na ithenya-inĩ rĩa rũrĩrĩ rũu akĩambĩrĩria kĩũngano gĩa Gĩkristiano. (Mathayo 21:43; 23:37, 38) Mbere ĩyo, Aisiraeli maarĩ aira a Ngai. Mahinda-inĩ maya Akristiano a ma matungatagĩra marĩ aira a Jehova.—Thoma Atũmwo 15:14, 17.

Jesu aatuire arũmĩrĩri ake ithondeka nĩguo marutage ũira wĩgiĩ Jehova na matuage andũ arutwo ndũrĩrĩ-inĩ ciothe. (Mathayo 10:7, 11; 24:14; 28:19, 20) Wĩra ũcio ũkirie gũkinya gĩturi kĩaguo. Jehova nĩ atũmĩte andũ milioni nyingĩ a kuuma ndũrĩrĩ-inĩ ciothe magĩe na ũrũmwe ũthathaiya-inĩ wa ma, ũndũ atarĩ eka hĩndĩ ĩngĩ o yothe. (Kũguũrĩrio 7:9, 10) Ningĩ Akristiano a ma nĩ matuĩtwo ithondeka nĩguo magateithania na magekanĩra ngoro. Makoragwo na tabarĩra ĩhaanaine ya morutani ma Bibilia thĩinĩ wa thĩ yothe mĩcemanio-inĩ yao.—Thoma Ahibirania 10:24, 25.

 3. Aira a Jehova maambĩrĩirie atĩa mahinda-inĩ maya?

Ithondeka rĩa Aira a Jehova rĩa mahinda maya rĩambĩrĩirie mĩaka ya 1870. Gakundi kanini ka arutwo a Bibilia nĩ kaambĩrĩirie gũtaũkĩrũo nĩ ma ciahithanĩtio ihinda iraya cia Bibilia. Nĩ moonire atĩ Jesu aatuĩte kĩũngano gĩa Gĩkristiano ithondeka nĩguo kĩrute wĩra wa kũhunjia. Kwoguo maakĩambĩrĩria wĩra wa kũhunjia ũhoro wa Ũthamaki thĩinĩ wa thĩ yothe. Kũrĩ mwaka wa 1931 nĩ maambĩrĩirie gwĩtwo Aira a Jehova.—Thoma Atũmwo 1:8; 2:1, 4; 5:42.

4. Aira a Jehova matuĩtwo atĩa ithondeka mahinda-inĩ maya?

Hĩndĩ ya karine ya mbere ciũngano cia Gĩkristiano mabũrũri-inĩ maingĩ ciagunĩkaga nĩ ũtongoria wa kĩama kĩrĩa gĩatongoragia kĩrĩ Jerusalemu kĩrĩa gĩetĩkĩrĩte Jesu arĩ we Mũtwe wa kĩũngano. (Atũmwo 16:4, 5) O ũndũ ũmwe, Aira a Jehova ũmũthĩ metĩkagĩra Jesu arĩ we Mũtongoria wao. (Mathayo 23:9, 10) Ningĩ nĩ magunĩkaga nĩ ũtongoria wa Kĩama Kĩrĩa Gĩtongoragia kĩa athuri marĩ na ũmenyeru arĩa mekagĩra ngoro ciũngano makĩria ma 100, 000 na magacitongoria Kĩĩmandĩko. Thĩinĩ wa ciũngano icio ciothe, arũme arĩa magĩrĩire matungatagĩra marĩ athuri a kĩũngano, kana arori. Athuri acio maroraga rũũru rwa Ngai marĩ na wendo.—Thoma 1 Petero 5:2, 3.

Aira a Jehova matuĩtwo ithondeka nĩguo mahunjagie ũhoro ũrĩa mwega na matuage andũ arutwo. Nĩguo mateithie andũ kũndũ guothe, mataũraga, magacaba, na magatheremia indo irĩ na ũhoro wa Bibilia na thiomi makĩria ma 500. O ta ũrĩa atũmwo meekaga, Aira a Jehova mahunjagia nyũmba kwa nyũmba. (Atũmwo 20:20) Marĩ mũndũ ũmwe ũmwe, merutagĩra gũteithia andũ arĩa mendete ma mamenye Bibilia. Tondũ Aira a Jehova mekĩrĩire gũkenia Ngai na gũteithia arĩa angĩ-rĩ, makoragwo marĩ ithondeka rĩa andũ akenu.—Thoma Thaburi 33:12; Atũmwo 20:35.

Nĩgetha wone ũhoro makĩria, rora gĩcunjĩ gĩa 19 kĩa ibuku rĩrĩ, rĩrĩa rĩcabĩtwo nĩ Aira a Jehova. Bibilia Ĩrutanaga Atĩa Kũna?