Teithiai Andũ ‘Magurumũke Kuuma Toro’
Teithiai Andũ ‘Magurumũke Kuuma Toro’
“Na mũnyite ũhoro ũcio nĩ kũmenya ũrĩa hĩndĩ ĩno tũrĩ ĩtariĩ, atĩ rĩu thaa nĩ nginyu mũgurumũke toro.”—ROM. 13:11.
NO ŨTAARĨRIE?
Nĩkĩ nĩ harĩ bata Akristiano gũikaraga meiguĩte kĩĩroho?
Akristiano arĩa maikaraga meiguĩte maagĩrĩirũo gũthikĩrĩria na gũkorũo na ũtaũku nĩkĩ?
Kuonania ũhooreri gũtũteithagia atĩa ũtungata-inĩ witũ?
1, 2. Andũ aingĩ marabatara gũikara meiguĩte na njĩra ĩrĩkũ?
ANDŨ ngiri nyingĩ nĩ makuaga o mwaka nĩ ũndũ wa gũcũnga magĩtwarithia ngari. Angĩ nao nĩ mabuutagwo wĩra nĩ ũndũ wa kwaga gũũkĩra mahinda marĩa magĩrĩire nĩguo mathiĩ wĩra kana nĩ ũndũ wa gũkoma marĩ wĩra-inĩ. Ĩndĩ moimĩrĩro ma toro wa kĩĩroho no makorũo marĩ moru mũno. Ũndũ-inĩ ũcio wa bata, Bibilia yugaga ũũ: ‘Gũkena-rĩ, nĩ ũrĩa ũikaraga eiguĩte.’—Kũg. 16:14-16.
2 O ũrĩa mũthenya ũrĩa mũnene wa Jehova ũrakuhĩrĩria-rĩ, noguo andũ aingĩ makoretwo toro kĩĩroho. O na atongoria amwe a ndini iria ciĩĩtaga cia Gĩkristiano nĩ moigaga atĩ arũmĩrĩri ao marĩ toro kĩĩroho. Toro wa kĩĩroho nĩ ũrĩkũ? Nĩkĩ nĩ ũndũ wa bata Akristiano a ma gũikaraga meiguĩte? Tũngĩteithia andũ atĩa magurumũke kuuma toro ta ũcio?
TORO WA KĨĨROHO NĨ ŨRĨKŨ?
3. Mũndũ ũrĩ toro kĩĩroho atariĩ atĩa?
3 Kaingĩ mũndũ arĩ toro ndakoragwo akĩĩigua. Ngũrani na ũguo, arĩa makomaga kĩĩroho no makorũo marĩ na mĩhang’o mĩingĩ mũno—ĩndĩ ti maũndũ-inĩ ma kĩĩroho. No makorũo na mĩhang’o mĩingĩ ĩgiĩ maũndũ ma o mũthenya ma ũtũũro kana magĩcaria ikeno, igweta, kana ũtonga. Nĩ ũndũ wa mĩhang’o ĩyo yothe, matitindanagĩra mũno na mabataro mao ma kĩĩroho. Ĩndĩ, andũ arĩa maikaraga meiguĩte kĩĩroho nĩ mamenyaga atĩ tũratũũra “matukũ marĩa ma kũrigĩrĩria,” kwoguo merutanagĩria gwĩka wendi wa Ngai o ũrĩa wothe mangĩhota.—2 Pet. 3:3, 4; Luk. 21:34-36.
4. Ciugo ici: “Nĩtũtigei gũkoma toro ta acio angĩ” cingĩtũteithia atĩa?
4 Thoma 1 Athesalonike 5:4-8. Thĩinĩ wa rĩandĩko rĩu, mũtũmwo Paulo eekĩrire Akristiano ngoro ‘matigakome ta acio angĩ.’ Eendaga kuuga atĩa? No ‘tũkome’ na njĩra ya kũhũthia ithimi cia Jehova cia mĩtugo. Ningĩ no ‘tũkome’ na njĩra ya kũhũthia ũũma wa atĩ ihinda rĩa Jehova rĩa kwananga arĩa matamwĩtigĩrĩte nĩ rĩkuhĩrĩirie. No mũhaka tũtigĩrĩre atĩ andũ ta acio matigũtũthũkia matũme tũrũmĩrĩre njĩra ciao na tũgĩe na mĩerekera ta yao.
5. Andũ arĩa makomete kĩĩroho makoragwo na mĩerekera ĩrĩkũ?
5 Andũ amwe meheenagia atĩ gũtirĩ Ngai ũkaamacirithia. (Thab. 53:1) Angĩ meciragia atĩ Ngai ndatindanagĩra na ithuĩ na kwoguo hatirĩ bata wa gũtindanĩra nake. Nao angĩ meciragia atĩ gũkorũo marĩ arũmĩrĩri a kanitha mũna nĩ kũrĩtũmaga matuĩke arata a Ngai. Andũ acio othe marĩ toro kĩĩroho. Nĩ marabatara kwarahũka. Tũngĩmateithia atĩa?
NO MŨHAKA TŨIKARAGE TWĨIGUĨTE
6. Nĩkĩ no mũhaka Akristiano merutanĩrie gũikaraga meiguĩte kĩĩroho?
6 No mũhaka tũikarage twĩiguĩte nĩguo tũkahotaga kwarahũra arĩa angĩ. Tũngĩhota atĩa gũikaraga twĩiguĩte? Kiugo kĩa Ngai gĩkuruhithanagia toro wa mũhaano na ‘maũndũ marĩa mekagĩrũo nduma-inĩ’—maruga marĩa mainagĩrũo nyĩmbo itagĩrĩire, ũrĩu, ngomanio itagĩrĩire, ũũra thoni, njũgitano, na ũiru. (Thoma Aroma 13:11-14.) Gwĩthema mĩtugo ta ĩyo ti ũndũ mũhũthũ. Gũikaraga twĩiguĩte nĩ kwa bata. Ndereba angĩaga kuona bata wa gũikara eiguĩte rĩrĩa aratwarithia ngari, muoyo wake no ũkorũo ũgwati-inĩ. Na githĩ ndũkĩrĩ ũndũ wa bata mũno Mũkristiano kũmenya atĩ toro wa kĩĩroho no ũrehe ũgwati mũnene!
7. Gũkorũo na mawoni mataagĩrĩire kwerekera andũ kũngĩtũthũkia atĩa?
7 Ũndũ ũmwe ũngĩtũma Mũkristiano akome kĩĩroho nĩ kuona andũ othe thĩinĩ wa itũũra rĩrĩa ahunjagia ta maregete biũ ũhoro ũrĩa mwega. (Thim. 6:10, 11) Ahota kuuga ũũ: ‘Angĩkorũo hatirĩ mũndũ ũgwĩtĩkĩra-rĩ, bata wa kwĩrutanĩria kũhunjĩria andũ kana kũgeria kũmateithia nĩ ũrĩkũ?’ Nĩ ma atĩ, ihinda-inĩ rĩrĩ andũ aingĩ no makorũo toro kĩĩroho, ĩndĩ kũrĩ maũndũ mũtũũrĩre-inĩ wao mangĩtũma mĩerekera yao ĩcenjie. Amwe nĩ marahũkaga na magetĩkĩra ũhoro ũrĩa mwega. Na no tũmateithie angĩkorũo ithuĩ ene nĩ tũgũikara twĩiguĩte, tũkĩgeragia kũhũthĩra njĩra njerũ kũmagucĩrĩria harĩ ũhoro wa Ũthamaki. Nĩguo tũikarage twĩiguĩte nĩ tũkũbatara gũikaraga tũkĩĩririkanagia bata wa ũtungata witũ.
ŨTUNGATA WITŨ NĨ WA BATA NĨKĨ?
8. Ũtungata witũ wa Gĩkristiano nĩ wa bata mũno nĩkĩ?
8 Ririkana atĩ o ũrĩa andũ mangĩkorũo makĩiyũkia ũhoro ũrĩa mwega mahinda-inĩ maya, wĩra witũ wa kũhunjia nĩ ũgoocithagia Jehova, na nĩ wa bata harĩ kũhingio kwa muoroto wake. Ica ikuhĩ, arĩa mataathĩkagĩra ũhoro ũrĩa mwega nĩ mekũniinwo. Andũ magaatuĩrũo kũringana na ũrĩa monaga wĩra witũ wa kũhunjia. (2 Thes. 1:8, 9) Ningĩ nĩ mahĩtia Mũkristiano gwĩciria atĩ hatirĩ bata wa kũhunjia na kĩyo tondũ nĩ “gũkariũkio andũ arĩa athingu o na arĩa matarĩ athingu.” (Atũm. 24:15) Kiugo kĩa Ngai gĩtwĩraga atĩ arĩa magaatuĩrũo marĩ mũhaano wa “mbũri” “makaaninwo tene na tene.” Wĩra witũ wa kũhunjia wonanagia tha cia Ngai, ũgatũma andũ magĩe na mweke wa kũgarũrũka nĩguo makaaheo “muoyo wa tene na tene.” (Mat. 25:32, 41, 46, New World Translation; Rom. 10:13-15) Tũngĩaga kũhunjia-rĩ, andũ mangĩgĩa atĩa na mweke wa kũigua ndũmĩrĩri ĩrĩa ĩngĩmahonokia?
9. Kũhunjia ũhoro ũrĩa mwega gũkũgunĩte atĩa na gũkaguna andũ angĩ?
9 Ningĩ kũhunjia ũhoro ũrĩa mwega nĩ gũtũgunaga. (Thoma 1 Timotheo 4:16.) Hihi nĩ wonete ũrĩa kwaria ũhoro wĩgiĩ Jehova na kĩĩrĩgĩrĩro kĩa Ũthamaki gwĩkagĩra hinya wĩtĩkio na wendo waku harĩ Ngai? Na githĩ kũhunjia gũtigũteithĩtie gũkũria ngumo cia Gĩkristiano? Na githĩ kuonania wĩrutĩri Ngai na njĩra ya kũhunjia gũtitũmaga ũkorũo na gĩkeno makĩria? Aingĩ arĩa makoretwo na mweke wa kũruta arĩa angĩ ma ya Bibilia nĩ makoretwo na gĩkeno gĩa kuona roho wa Ngai ũgĩteithia andũ acio kwagĩria mũtũũrĩre wao.
HŨTHĨRA ŨTAŨKU
10, 11. (a) Jesu na Paulo moonanirie atĩa atĩ maarĩ na ũtaũku? (b) Taarĩria ũrĩa gũkorũo na ũtaũku kũngĩagĩria ũtungata witũ.
10 Andũ no magucĩrĩrio harĩ ũhoro ũrĩa mwega na njĩra itiganĩte. Kwoguo no mũhaka ahunjia makoragwo na ũtaũku. Jesu nĩwe kĩonereria giitũ. Tondũ aarĩ mũkinyanĩru, nĩ aahotire kũmenya mwerekera mũũru wa ngoro-inĩ wa Mũfarisai, kwĩrira biũ kwa mũtumia warĩ mwĩhia, na mwerekera wa kwĩima wa mũtumia wa ndigwa. (Luk. 7:37-50; 21:1-4) Jesu nĩ aarĩ na ũhoti wa kũhang’ĩra mabataro ma kĩĩroho ma mũndũ o mũndũ. O na kũrĩ ũguo-rĩ, to mũhaka ndungata ya Ngai ĩkorũo ĩrĩ nginyanĩru nĩguo ĩkorũo na ũtaũku. Mũtũmwo Paulo nĩ aaigire kĩonereria kĩega ũndũ-inĩ ũcio. Aacenjagia njĩra ciake cia kũhunjia nĩguo agucĩrĩrie andũ ngũrani na marĩ na mĩerekera mwanya mwanya.—Atũm. 17:22, 23, 34; 1 Kor. 9:19-23.
11 Tũngĩĩrutanĩria gũkoragũo tũrĩ na ũtaũku ta Jesu na Paulo, no tũhotage kũmenya njĩra njega cia gũkinyĩra ngoro cia arĩa tũrahunjĩria. Kwa ngerekano, ũkĩhunjĩria andũ, rora maũndũ marĩa mangĩgũteithia kũmenya ũndũire wao, maũndũ marĩa mendete, kana ũhoro wĩgiĩ famĩlĩ. Geria kũrora ũrĩa mareka hĩndĩ ĩyo na ũgwete ũndũ ũcio na njĩra ya gĩtĩo ũkĩambĩrĩria mĩario yaku.
12. Rĩrĩa tũrĩ ũtungata-inĩ twagĩrĩirũo kũmenyerera mĩario iitũ nĩkĩ?
12 Mũndũ ũrĩ na ũtaũku nĩ ageragia gwĩthema maũndũ marĩa mangĩmũhĩnga. Rĩrĩa tũrĩ ũtungata-inĩ, mĩario iitũ na mũhunjia ũrĩa tũrĩ nake no ĩtwake mũno. Ĩndĩ tũrabatara kũririkana atĩ muoroto witũ nĩ kũhunjĩria andũ. (Koh. 3:1, 7) Kwoguo twagĩrĩirũo nĩ kwĩmenyerera nĩguo mĩario iitũ rĩrĩa tũroima nyũmba ĩmwe tũgĩthiĩ ĩrĩa ĩngĩ ndĩgathũkie ũtungata witũ. Kwarĩrĩria maũndũ marĩa tũngĩenda kũhũthĩra tũkĩhunjĩria andũ nĩ njĩra njega ya kũiga meciria maitũ harĩ muoroto witũ. Ningĩ, o na gũtuĩka rĩmwe na rĩmwe thimũ ya guoko no ĩtũteithie ũtungata-inĩ-rĩ, nĩ twagĩrĩirũo gũtigĩrĩra atĩ ndĩgũtũthumbũra hĩndĩ ĩrĩa tũraria na mwene nyũmba.
MONIE NĨ ŨRAMARŨMBŨIYA
13, 14. (a) Tũngĩmenya atĩa ũndũ ũrĩa ũrathumbũra mũndũ? (b) Nĩ maũndũ marĩkũ mangĩarahũra andũ maũndũ-inĩ ma kĩĩroho?
13 Ahunjia arĩa maikaraga meiguĩte na marĩ na ũtaũku nĩ mathikagĩrĩria wega andũ arĩa marahunjĩria. Nĩ ciũria irĩkũ ũngĩũria rĩrĩa ũrĩ ũtungata-inĩ nĩguo ũteithie mũndũ eyarie? Hihi nĩ arathumbũrũo nĩ ũingĩ wa ndini, ũhinya ũrĩa ũrĩ itũũra-inĩ rĩao, kana thirikari kũremwo nĩ kũrehe kĩhonia? Hihi no ũmwarahũre kĩĩroho na njĩra ya kũgweta magegania ma ũũmbi wa indo iria irĩ muoyo kana kũmũteithia one ũrĩa ũtaaro wa Bibilia ũngĩmũguna? Hakuhĩ andũ a iruka ciothe, o na arĩa matetĩkĩtie atĩ nĩ kũrĩ Ngai, nĩ makenagio nĩ mahoya. Aingĩ nĩ marigagwo kana nĩ kũrĩ mũigua wa mahoya. Angĩ nao no mende kũmenya macokio ma ciũria ici: Hihi Ngai aiguaga mahoya mothe? Angĩkorũo tiguo-rĩ, twagĩrĩirũo gwĩka atĩa nĩguo atũiguage?
14 No twĩrute makĩria njĩra cia kwambĩrĩria mĩario na andũ kũgerera kũrora ũrĩa ahunjia arĩa marĩ na ũmenyeru mekaga. No wone ũrĩa methemaga kuoneka ta marahũnga andũ mahũri kana kũingĩrĩra maũndũ mao ma thĩinĩ. Mũgambo wao na ũthiũ wao ũronania atĩa atĩ nĩ marenda kũmenya mawoni ma mwene nyũmba?—Thim. 15:13.
ŨTUGI NA ŨŨGĨ
15. Twagĩrĩirũo kwarĩria andũ na ũhooreri nĩkĩ rĩrĩa tũramahunjĩria?
15 Hihi nĩ wendete gũũkĩrio kuuma toro mũnene? Andũ aingĩ matikenaga mangĩarahũrũo o rĩmwe. Kaingĩ mendaga gũũkĩrio na njĩra ya ũhooreri. Ũguo noguo kũrĩ harĩ kwarahũra andũ kĩĩroho. Kwa ngerekano, ũngĩthiĩ kũhunjĩria mũndũ akũrakarĩre, wagĩrĩirũo kũiyũkia ũndũ ũcio atĩa? Mwarĩrie na ũhooreri na ũmuonie atĩ nĩ ũratĩĩa mawoni make, ũmũcokerie ngatho nĩ ũndũ wa kwĩyaria, ũcoke ũmũtige na thayũ. (Thim. 15:1; 17:14; 2 Tim. 2:24) Ũhooreri waku no ũtũme mũndũ ũcio akaiyũkia wega ũhoro ũrĩa mwega angĩgaceererũo nĩ Mũira wa Jehova hĩndĩ ĩngĩ.
16, 17. Tũngĩhũthĩra ũtaũku atĩa ũtungata-inĩ witũ?
16 Rĩmwe na rĩmwe, no ũhote gũteithia mũndũ ũrĩ na mawoni moru athikĩrĩrie. Angĩ no macokie ũũ: “Aca, niĩ ndĩ na kanitha wakwa” kana, “Ndikwenda ũhoro ũcio.” Moigaga ũguo tondũ monaga ĩyo nĩyo njĩra ĩrĩa hũthũ ya gũtinia mĩario. Ĩndĩ, na njĩra ya ũũgĩ na ũtugi ũrĩ na ũkirĩrĩria no ũũrie mwene nyũmba kĩũria kĩngĩmwarahũra maũndũ-inĩ ma kĩĩroho.—Thoma Akolosai 4:6.
17 Rĩmwe na rĩmwe tũngĩkora andũ maroiga atĩ marĩ na mĩhang’o mĩingĩ ũũ atĩ matingĩhota gũtũthikĩrĩria, nĩ wega kũmatiga na thayũ. O na kũrĩ ũguo, kũrĩ hĩndĩ ũngĩona atĩ no ũgwete na njĩra nguhĩ ũndũ ũngĩmaguna. Akristiano amwe nĩ mahotaga kũhũthĩra kahinda kanyihĩire ndagĩka ĩmwe kũguũria Bibilia, gũthoma rĩandĩko rĩngĩgucĩrĩria mwene nyũmba, magacoka makamũtigĩra kĩũria. Rĩmwe na rĩmwe, kwaria na njĩra nguhĩ ũguo nĩ kũgucagĩrĩria mwene nyũmba nginya agetĩkĩra mũkorũo na mĩario mĩkuhĩ o na arĩ na mĩhang’o. Na githĩ to ũgerie gwĩka ũguo rĩrĩa ũrĩĩkora ũndũ-inĩ ta ũcio?
18. Tũngĩka atĩa tũgĩe na moimĩrĩro mega makĩria tũkĩhunjia rĩrĩa tũtarĩ ũtungata-inĩ?
18 Rĩrĩa twacemania na andũ tũrĩ mĩhang’o-inĩ itũ ya o mũthenya, kaingĩ no tũhote kũmaguucĩrĩria harĩ ũhoro ũrĩa mwega angĩkorũo nĩ twĩhaaragĩria kũhunjia o na rĩrĩa tũtarĩ ũtungata-inĩ. Aarĩ na ariũ a Ithe witũ aingĩ nĩ makuuaga mabuku mĩhuko-inĩ kana mondo-inĩ ciao. Ningĩ nĩ makoragũo na rĩandĩko rĩna meciria-inĩ rĩa gũthomera andũ hangiumĩra mweke ũcio. No warie na mũrori wa ũtungata kana na mapainia a kĩũngano kĩanyu ũmenye ũrĩa ũngĩĩharĩria gwĩka ũguo.
GŨTEITHIA ANDŨ A FAMĨLĨ TŨRĨ NA ŨHOORERI
19. Nĩkĩ tũtiagĩrĩirũo gũtiga kwĩrutanĩria gũteithia andũ a famĩlĩ ciitũ?
19 Hatarĩ nganja no twende gũteithia andũ a famĩlĩ ciitũ metĩkĩre ũhoro ũrĩa mwega. (Josh. 2:13; Atũm. 10:24, 48; 16:31, 32) Kĩambĩrĩria-inĩ mangĩtũkararia, ũndũ ũcio no ũtũme twage wendi wa kũmahunjĩria rĩngĩ. Twahota kuona ta gũtarĩ ũndũ tũngĩka kana tuuge ũngĩgarũra mwerekera wao. Ĩndĩ, nĩ harĩ maũndũ mangĩkorũo mahanĩkĩte magacenjia mũtũũrĩre na muonere wa andũ a famĩlĩ yanyu. Kana rĩu no ũkorũo wagĩrĩtie ũhoti waku wa kũhunjia ũndũ ũngĩkũhotithia ũgĩe na moimĩrĩro ngũrani.
20. Nĩkĩ ũtaũku nĩ wa bata rĩrĩa tũrahunjĩria andũ a famĩlĩ?
20 Nĩ twagĩrĩirũo gũtĩĩa mawoni ma andũ a famĩlĩ ciitũ. (Rom. 2:4) Na githĩ tũtiagĩrĩirũo kũmaarĩria wega o ũrĩa twaragĩria andũ rĩrĩa tũrĩ ũtungata-inĩ? Maarĩrie na njĩra ya ũhooreri na gĩtĩo. To mũhaka ũtindage ũkĩmahunjĩria, reke meyonere ũrĩa ma ya Bibilia ĩgũteithĩtie kwagĩria mũtũũrĩre waku. (Ef. 4:23, 24) Reke meyonere atĩ ũtũũro waku wagĩrĩte nĩ ũndũ Jehova nĩ ‘akũrutaga maũndũ ma gũkũguna.’ (Isa. 48:17) Reke mone harĩ we kĩonereria kĩa ũrĩa Mũkristiano agĩrĩirũo nĩ gũikara.
21, 22. Taarĩria ũndũ wonetwo ũrĩa ũronania bata wa gũkirĩrĩria harĩ kĩyo gĩa gũteithia andũ a famĩlĩ kĩĩroho.
21 Mwarĩ wa Ithe witũ ũmwe erĩgĩte kwandĩka ũũ: “Ngoretwo ngĩgeria kũhunjĩria aarĩ na ariũ a maitũ 13 kũgerera mĩario na mĩtugo yakwa. Ndirekaga mwaka ũthire itamandĩkĩire marũa o mũndũ. O na kũrĩ ũguo, kwa ihinda rĩa mĩaka 30, no niĩ ngoretwo ndĩ Mũira wa Jehova thĩinĩ wa famĩlĩ iitũ.”
22 Mwarĩ wa Ithe witũ ũcio aathire na mbere kuuga ũũ: “Mũthenya ũmwe, nĩ ndaahũrĩire mwarĩ wa maitũ ũmwe thimũ ũikaraga kũndũ kũraya. Akĩnjĩra atĩ eerire mũhunjia wao amũrute Bibilia, ĩndĩ mũhunjia ũcio ndaigana gwĩka ũguo. Rĩrĩa ndamwĩrire atĩ no nyende kũmũteithia, aanjĩrire ũũ: ‘Hatirĩ na thĩna, ĩndĩ ũmenye atĩ: Gũtirĩ hingo ngatuĩka Mũira wa Jehova.’ Thutha wa kũmũtũmĩra ibuku rĩa Bibilia Ĩrutanaga Atĩa Kũna?, ndaamũhũragĩra thimũ o thutha wa thikũ nyinyi. No ndaarĩthomete o na hanini. Macũngĩrĩro-inĩ, ngĩmũhũrĩra thimũ ngĩmwĩra oe ibuku rĩu, na ndagĩka ta 15 tũgĩthoma na tũkĩarĩrĩria mamwe ma Maandĩko marĩa monanĩtio. Thutha wa kũmũhũrĩra thimũ maita mangĩ maigana ũna, eendaga kwĩruta makĩria ma ndagĩka 15. Agĩcoka akĩambĩrĩria kũhũragĩra thimũ nĩguo tũthome, rĩmwe na rĩmwe rũcinĩ o na itokĩrĩte na rĩmwe maita merĩ mũthenya. Mwaka ũrĩa warũmĩrĩire, akĩbatithio, na mwaka ũrĩa warũmĩrĩire ũcio agĩtuĩka painia.”
23. Nĩkĩ tũtiagĩrĩirũo kũnoga tũkĩgeria gũteithia andũ marahũke kĩĩroho?
23 Gũteithia andũ maarahũke kĩĩroho nĩ ũndũ ũbataraga ũtaũku na kĩyo kĩrĩ na ũkirĩrĩria. Ĩndĩ, andũ arĩa ahooreri no maraiyũkia ũhoro ũrĩa mwega rĩrĩa tũrerutanĩria kũmaarahũra. Andũ makĩria ma 20,000 o mweri nĩ mabatithagio magatuĩka Aira a Jehova. Kwoguo rekei twathĩkĩre ũtaaro ũrĩa Paulo aaheire mũrũ wa Ithe witũ Arikipo wa karine ya mbere: “Wĩmenyagĩrĩre ũhingie wega wĩra wa gũtungatanĩra ũrĩa waheirũo nĩ Mwathani.” (Kol. 4:17) Gĩcunjĩ kĩrĩa kĩrũmĩrĩire nĩ gĩgũtũteithia ithuothe kũmenya kũhunjia na mĩtũkĩ nĩ kuuga atĩa.
[Ciũria cia wĩruti]
[Mbica karatathi ka 13]
ŨRĨA ŨNGĨIKARA WĨIGUĨTE
▪ Korũo na maũndũ maingĩ ma gwĩka harĩ kũhingia wendi wa Ngai
▪ Wĩtheme maũndũ ma nduma
▪ Menya nĩ ũgwati gũkoma kĩĩroho
▪ Gĩa na muonere mwega kwerekera andũ a itũũra rĩrĩa ũhunjagia
▪ Geria njĩra njerũ cia kũhunjĩria andũ
▪ Ririkana bata wa ũtungata waku
