Thiĩ Na Mbere Ũrĩ Na Kĩyo

‘Hunjagia ũhoro wa Ngai, na wĩkagĩre kĩyo.’​—2 TIM. 4:2.

HIHI NO ŨTAARĨRIE?

Akristiano a karine ya mbere maahunjagia na mĩtũkĩ nĩkĩ?

Tũngĩhota atĩa gũthiĩ na mbere tũrĩ na mĩtũkĩ?

Wĩra wa kũhunjia nĩ wa mĩtũkĩ mahinda-inĩ maya gũkĩra hĩndĩ ĩngĩ o yothe nĩkĩ?

1, 2. Nĩ ciũria irĩkũ ciĩyumĩragia ciĩgiĩ watho wa ‘kũhunjia tũrĩ na kĩyo’?

  KAINGĨ arĩa marutaga wĩra wa kũhonokia andũ maũrutaga na mĩtũkĩ. Kwa ngerekano, andũ arĩa marutaga wĩra wa kũhoria mwaki mehĩkaga mũno rĩrĩa meetwo; nĩ mamenyaga mĩoyo ya andũ no ĩkorũo ũgwati-inĩ.

² Tũrĩ Aira a Jehova, tũkoragwo na mwĩhoko atĩ nĩ tũgũteithia andũ mahonokio. Nĩ ũndũ ũcio, nĩ tuoyaga na ũritũ mũno wĩra witũ wa kũhunjia ũhoro ũrĩa mwega wa Ũthamaki. O na kũrĩ ũguo, ti kuuga atĩ tũrutaga wĩra ũcio tũtarĩ na kĩhaarĩro. Nĩ ũndũ ũcio-rĩ, mũtũmwo Paulo eendaga kuuga atĩa rĩrĩa oigire: ‘Hunjagia ũhoro wa Ngai, na wĩkagĩre kĩyo’? (2 Tim. 4:2) Tũngĩhota atĩa kũhunjia tũrĩ na kĩyo? Na wĩra ũcio witũ nĩ wa mĩtũkĩ mũno nĩkĩ?

WĨRA WITŨ WA KŨHUNJIA NĨ WA MĨTŨKĨ NĨKĨ?

3. Nĩ moimĩrĩro marĩkũ mangiumana na andũ kũrega kana gwĩtĩkĩra ndũmĩrĩri ya Ũthamaki?

³ Ũngĩririkana atĩ wĩra witũ wa kũhunjia nĩguo ũgaatũma andũ mahonokio kana maniinwo, no wone atĩ harĩ na bata mũno kũhunjĩria andũ ũhoro ũrĩa mwega tũrĩ na mĩtũkĩ. (Rom. 10:13, 14) Kiugo kĩa Ngai kiugaga ũũ: “Hĩndĩ ĩrĩa ingĩĩra mũndũ mwaganu ũũ: We ti-itherũ nĩ ũgũkua, angĩgarũrũka atige mehia make, eke maũndũ marĩa maagĩrĩire na ma ma, . . . ti-itherũ nĩagatũũra muoyo, na ndakue. Gũtirĩ ũndũ o na ũmwe wa mehia make marĩa ehĩtie ũgacoka kũririkanwo ũhoro-inĩ wake.” (Ezek. 33:14-16) Hatarĩ nganja Bibilia ĩĩraga ahunjia a ndũmĩrĩri ya Ũthamaki ũũ: “Nĩũkwĩhonokia wee mwene, o na andũ arĩa makũiguaga.”—1 Tim. 4:16; Ezek. 3:17-21.

4. Ũregenyũki watũmire wĩra wa kũhunjia ũkorũo ũrĩ wa mĩtũkĩ hĩndĩ ya karine ya mbere nĩkĩ?

⁴ Nĩguo wone bata wa ũtaaro wĩgiĩ kũhunjia na mĩtũkĩ ũrĩa Paulo aaheire Timotheo-rĩ, wĩcirie ũhoro wa mĩhari ĩrĩa ĩthiũrũrũkĩirie rĩandĩko riitũ rĩa mũthingi. Tũthomaga ũũ:  ‘Hunjagia ũhoro wa Ngai, na wĩkagĩre kĩyo hĩndĩ ĩrĩa njagĩrĩru o na ĩrĩa ĩtarĩ njagĩrĩru; ningĩ rũithagĩria andũ ũũru wao, na ũmakaanagie, na ũmahatagĩrĩrie, ũgĩkiragĩrĩria mũno o ũkĩrutanaga. Nĩ gũkorũo hĩndĩ nĩ ĩrĩũka rĩrĩa andũ matagakirĩrĩria kũrutagwo ũrutani ũrĩa wagĩrĩire, no nĩ makeyũnganagĩria arutani a kũrutanaga o maũndũ marĩa makerirĩria kũrutagwo o ene, tondũ wa ũrĩa magakorũo mategete matũ mao maigue maũndũ moru; na nĩ makahũgũraga matũ mao matikaigue ũhoro-ũrĩa-wa-ma.’ (2 Tim. 4:2-4) Jesu nĩ aarathĩte atĩ nĩ kũngĩkagĩa na ũregenyũki. (Mat. 13:24, 25, 38) O ũrĩa ũndũ ũcio wakuhagĩrĩria, noguo Timotheo aabataraga kũhunjia ndũmĩrĩri ya Ngai arĩ na mĩtũkĩ, nĩguo Akristiano matikahĩngĩcwo nĩ ũgucĩrĩria wa morutani ma maheeni. Mĩoyo ya andũ yarĩ ũgwati-inĩ. Ĩ mahinda-inĩ maya?

5, 6. Tũrĩ ũtungata-inĩ witũ tũngĩcemania na andũ marĩ na mawoni marĩkũ matheremete?

⁵ Ũregenyũki kuuma ũthathaiya-inĩ ũrĩa wa ma nĩ ũkũrĩte na ũgatherema. (2 Thes. 2:3, 8) Nĩ morutani marĩkũ ma maheeni magucagĩrĩria andũ mahinda-inĩ maya? Kũndũ kũingĩ, ũrutani wa kũgarũrũka kwa indo irĩ muoyo igatuĩka indo ingĩ nĩ ũtheremetio na kinyi o ta morutani ma ndini. O na gũtuĩka kaingĩ ũrutani ũcio wa kũgarũrũka ũrutanagwo na njĩra ya sayanisi-rĩ, ũtuĩkĩte o ta ndini, ũkahutia mũno ũrĩa andũ monaga Ngai na ũrĩa monaga arĩa angĩ. Ũrutani ũngĩ ũtheremete mũno nĩ wa atĩ Ngai ndatũrũmbũyagia; na kwoguo atĩ tũtirabatara gũtindanĩrĩra nake. Nĩ kĩĩ hihi gĩtũmĩte morutani macio magucĩrĩrie andũ milioni nyingĩ ũguo nginya magakoma kĩĩroho? Merĩ makoragwo na ũndũ o ũmwe, ‘No wĩke ũrĩa ũkwenda tondũ gũtirĩ Ngai ũgagũcirithia.’ Hatarĩ nganja ũrutani ũcio nĩ ũgucĩrĩirie andũ aingĩ.—Thoma Thaburi 10:4.

⁶ No nĩ kũrĩ morutani mangĩ magucagĩrĩria andũ. Andũ amwe arĩa mathiaga makanitha-inĩ nĩ makenagio nĩ arutani arĩa mameeraga‘Gũtimakanagia ũrĩa wĩkaga, Ngai nĩ akwendete.’ Atongoria a ndini nĩ magucagĩrĩria andũ na njĩra ya kũmaiguithia atĩ, ikũngũĩro, Mitha, thigũkũ na mĩhianano nĩ irehaga irathimo. Arũmĩrĩri acio a ndini matimenyaga atĩ ũndũ ũcio ũtũmaga makorũo ũgwati-inĩ. (Thab. 115:4-8) Ĩndĩ, tũngĩmaarahũra kĩĩroho, mataũkĩrũo nĩ ndũmĩrĩri ĩrĩa ya ma ya Bibilia, no magunĩke nĩ Ũthamaki wa Ngai.

KŨHUNJIA NA MĨTŨKĨ NĨ KUUGA ATĨA?

7. Tũngĩonania atĩa atĩ tũrĩ na mĩtũkĩ?

⁷ Rĩmwe na rĩmwe gwĩka ũndũ na mĩtũkĩ kuonanagio wega nĩũrĩa tũigaga meciria maitũ biũ ũndũ-inĩ ũrĩa tũreka. Kwa ngerekano ndagĩtarĩ mwega wa gũthĩnja arũaru no mũhaka aige meciria make mothe wĩra-inĩ wake tondũ nĩ wĩra ũhutĩtie mĩoyo. Ũtungata-inĩ witũ wa Gĩkristiano, no tuonanie atĩ nĩ tũkoragwo na mĩtũkĩ na njĩra ya kũiga meciria maitũ biũ wĩra-inĩ ũcio, ta gwĩciria ũhoro wa maũndũ, ciũria, kana ũhoro ũrĩa ũngĩgucĩrĩria andũ arĩa tũkoraga. Ningĩ gũkorũo na mĩtũkĩ no gũtũteithie gwĩka ũgarũrũku mĩbango-inĩ iitũ nĩguo tũkahota gũcerera andũ ihinda rĩrĩa mangĩtũthikĩrĩria.—Rom. 1:15, 16; 1 Tim. 4:16.

8. Kaingĩ gwĩka maũndũ na mĩtũkĩ nĩ kuuga atĩa?

⁸ Ningĩ gũkorũo na mĩtũkĩ nĩ kũhutĩtie maũndũ marĩa mũndũ onaga marĩ ma bata mũno. (Thoma Kĩambĩrĩria 19:15.) Kwa ngerekano ta hũra mbica, thutha wa gũthimwo ndagĩtarĩ waku agakwĩra atĩtĩrithĩtie ũũ: “Ũrĩ handũ haceke mũno! Ũrĩ o na mweri ũmwe tu wa kuoya ikinya rĩrĩa rĩagĩrĩire nĩ ũndũ wa ndwari yaku.” No kũhoteke ndũngĩcomoka kuuma thibitarĩ ta ũrĩa andũ arĩa mahoragia mwaki mehĩkaga rĩrĩa meetwo makahorie mwaki. Ĩndĩ no wambe ũthikĩrĩrie ũrĩa egũkwĩra wĩke, ũcoke ũinũke, wĩcũranie wega nĩguo ũmenye maũndũ marĩa ũkwambĩrĩra.

9. Nĩ kĩĩ kĩngĩtũma tuge atĩ Paulo nĩ aahunjagia na mĩtũkĩ rĩrĩa aarĩ Efeso?

⁹ No tũtaũkĩrũo wega nĩ ũrĩa Paulo eekaga maũndũ na mĩtũkĩ tũngĩciria ũrĩa eerire athuri a Efeso ũhoro-inĩ wĩgiĩ ũrĩa aahunjagia ũhoro mwega thĩinĩ wa Asia. (Thoma Atũmwo  20:18-21.) No kũhoteke mũthenya wa mbere akinya, aambĩrĩirie gũcerera andũ mũciĩ kwa mũciĩ arĩ na kĩyo akĩmahunjagĩria ũhoro ũrĩa mwega. Ningĩ, kwa ihinda rĩa mĩaka ĩĩrĩ Paulo aarũmagĩrĩra mũtaratara wa ‘kwaragĩria andũ o mũthenya o mũthenya harĩa haathomithagĩrio andũ cukuru-inĩ wa Turano.’ (Atũm. 19:1, 8-10) Hatarĩ nganja gũkorũo na mĩtũkĩ nĩ gwatũmaga Paulo akorũo na kĩyo. Rĩĩtana rĩa ‘gwĩkagĩra kĩyo wĩra-inĩ wa kũhunjia’ rĩtirongoreirio gũtũritũhĩra. O na kũrĩ ũguo, twagĩrĩirũo kũhe wĩra wa kũhunjia mweke wa mbere ũtũũro-inĩ witũ.

10. Tũngĩkorũo na gĩkeno nĩkĩ nĩ kũmenya atĩ Akristiano nĩ maahunjirie na mĩtũkĩ mĩaka ta 100 mĩhĩtũku?

¹⁰ Kĩonereria gĩa gakundi kanini ka Arutwo a Bibilia arĩa mbere ya mwaka wa 1914 meehotorete kũhunjia ũhoro ũrĩa mwega thĩinĩ wa thĩ yothe nĩ kĩonanagia kũhunjia na mĩtũkĩ nĩ kuuga atĩa. O na gũtuĩka matiarĩ aingĩ, nĩ maamenyaga atĩ mahinda nĩ meehĩkĩte kwoguo makĩambĩrĩria wĩra wa kũhunjia ũhoro wa Ũthamaki marĩ na kĩyo. Nĩ maacabithirie mĩario thĩinĩ wa ngathĩti nyingĩ cia mohoro na makĩonia andũ mbica irĩ na marangi matiganĩte na thenema ĩtagwo “Photo-Drama of Creation.” Na njĩra ĩyo, nĩ maakinyĩirie andũ milioni nyingĩ ũhoro ũrĩa mwega. Korũo Jehova ndaamateithĩtie mone bata wa kũhunjia marĩ na mĩtũkĩ-rĩ, nĩ aigana thĩinĩ witũ mangĩkinyĩirũo nĩ ndũmĩrĩri ya Ũthamaki?—Thoma Thaburi 119:60.

WĨMENYERERE NDŨGATIGE KŨHUNJIA NA MĨTŨKĨ

11. Nĩ kĩĩ gĩtũmĩte andũ amwe matige kũhunjia marĩ na mĩtũkĩ?

¹¹ Ihĩngĩca no itũme mũndũ aage kuona ũrĩa wĩra wa kũhunjia ũrĩ wa bata. Mũtabarĩre wa Shaitani ũrongoreirio gũtũma twĩingĩrie mũno maũndũ-inĩ maitũ kĩũmbe hamwe na maũndũ mangĩ. (1 Pet. 5:8; 1 Joh. 2:15-17) Andũ amwe arĩa hĩndĩ ĩmwe maaheaga ũtungata wa Jehova mweke wa mbere nĩ maatigire kũhunjia marĩ na mĩtũkĩ. Kwa ngerekano, Dema ũrĩa warĩ Mũkristiano hĩndĩ ya karine ya mbere nĩ aakoretwo ‘akĩrutithania wĩra’ na Paulo, ĩndĩ nĩ aahĩngĩcirũo nĩ maũndũ ma thĩ ĩno. Handũ ha gũthiĩ na mbere na kũũmĩrĩria Paulo hĩndĩ ya mathĩna, Dema nĩ kũmũtiganĩria aamũtiganĩirie.—Filem. 23, 24; 2 Tim. 4:10.

12. Nĩ mweke ũrĩkũ tũrĩ naguo ũmũthĩ, na nĩ mĩeke ĩrĩkũ tũgaakorũo nayo tene na tene?

¹² Angĩkorũo nĩ tũgũthiĩ na mbere kũhunjia tũrĩ na mĩtũkĩ, tũkũbatara kũregana na maũndũ maingĩ marĩa marĩ thĩinĩ wa mũtabarĩre ũyũ. Tũkũbatara kwĩrutanĩria ‘nĩ getha tũkona muoyo ũrĩa muoyo ma.’ (1 Tim. 6:18, 19) No kũhoteke nĩ ũĩ wega atĩ muoyo wa tene na tene gũkũ thĩ rungu rwa Ũthamaki wa Ngai nĩ ũgaatũhe mĩeke ya gũkenera maũndũ mega. Ĩndĩ, mahinda-inĩ maya, mweke wa gũteithia andũ nĩguo makaahonoka Hari–Magedoni nĩ wa mwanya mũno.

13. Tondũ nĩ tũtuĩkĩte Akristiano-rĩ, tũngĩhota atĩa gũthiĩ na mbere tũrĩ na mĩtũkĩ?

¹³ Tondũ andũ aingĩ thĩinĩ wa thĩ ĩrĩa tũratũũra marĩ toro kĩĩroho-rĩ, nĩ kĩĩ kĩngĩtũteithia gwĩthema kĩyo giitũ gĩtigathire? Tũrabatara kũririkana atĩ kũrĩ hĩndĩ ĩmwe twarĩ nduma-inĩ kĩĩroho, nĩ ta twakuĩte nĩ ũndũ wa mehia maitũ. O na kũrĩ ũguo, nĩ twarahũrirũo na ta ũrĩa Paulo oigire tũkĩgĩa na ũtheri wa Kristo. Na ithuĩ rĩu tũrĩ na itemi rĩa gũtuĩka ũtheri kũrĩ andũ. (Thoma Aefeso 5:14.) Thutha wa kuuga ũguo, Paulo aandĩkire ũũ: ‘Wĩmenyagĩrĩrei mũno mĩthiĩre ĩrĩa mũthiaga nayo, mũtigathiage na ĩrĩa ya irimũ, tiga o ĩrĩa ya andũ ogĩ, na mũtigate ihinda rĩrĩa rĩagĩrĩru rĩa gwĩkaga wega, nĩ ũndũ matukũ maya tũrĩ namo nĩ moru.’ (Ef. 5:15, 16) O na gũtuĩka kũrĩ na waganu mũingĩ ũguo-rĩ, rekei ‘tũtigate ihinda rĩrĩa rĩagĩrĩru’ rĩa gwĩka maũndũ marĩa mangĩtũteithia gũikaraga twĩiguĩte kĩĩroho.

TŨRATŨŨRA MAHINDA-INĨ MA BATA MŨNO

14-16. Wĩra wa kũhunjia ũhoro wa Ũthamaki nĩ wa mĩtũkĩ rĩu gũkĩra hingo ĩngĩ o yothe nĩkĩ?

¹⁴ Ũtungata wa Gĩkristiano ũkoretwo ũrĩ wa mĩtũkĩ, ĩndĩ rĩu nĩ wa mĩtũkĩ gũkĩra  hĩndĩ ĩngĩ o yothe. Kuuma mwaka wa 1914, kĩmenyithia kĩrĩa gĩtaarĩirio thĩinĩ wa Kiugo kĩa Ngai nĩ kĩonekete wega. (Mat. 24:3-51) Mĩoyo ya andũ ĩrĩ handũ hairũ gũkĩra hĩndĩ ĩngĩ o yothe. O na gũtuĩka ihinda inyinyi ihĩtũku nĩ gũkoretwo na ngirimiti cia thayũ, thirikari iria nene irĩ na matharaita ma mbaara ma nyukilia 2,000 marĩa metereire kũrugũrio. Maita maingĩ thirikari nĩ ikoretwo ikĩribota “kũũra” kwa indo cia gũthondeka matharaita ma nyukilia. Hihi no kũhoteke imwe cia indo icio irĩ moko-inĩ ma imaramari? Andũ amwe moigaga atĩ andũ no maniinwo na njĩra hũthũ nĩ mbaara yambĩrĩirio nĩ imaramari. O na kũrĩ ũguo, mbaara toguo ũgwati ũrĩa ũng’etheire ũtũũro wa andũ.

¹⁵ Riboti ĩmwe ya mwaka wa 2009 ya The Lancet na University College London yoigire atĩ, “ũgarũrũku wa rĩera nĩguo ũgwati ũrĩa mũnene makĩria ũgũmĩire ũgima wa mwĩrĩ thĩinĩ wa thĩ yothe hĩndĩ ya karine ya 21.” Ĩgĩcoka ĩkiuga ũũ: “Thĩinĩ wa mĩaka ĩroka mathĩna ma mwĩrĩ marĩa moimanaga na ũgarũrũku wa rĩera, nĩ mekũhutia andũ aingĩ na matũme ũgima mwega wa mwĩrĩ na mĩoyo ya andũ bilioni nyingĩ ĩkorũo ũgwati-inĩ.” Moimĩrĩro no makorũo arĩ wanangi mũnene kuumana na kuongerereka kwa maĩ iria-inĩ, wagi wa mbura, mĩiyũro ya maĩ, mĩrimũ mĩũru, ihuhũkanio, na mbaara nĩ ũndũ wa ũthĩni. Ĩĩni, mbaara na icanjama nĩ ihotomagia ũthii wa na mbere.

¹⁶ Andũ amwe no mecirie atĩ maũndũ marĩa makaahingia ũrathi wĩgiĩ matukũ ma kũrigĩrĩria makoimana na ũgwati wa mbaara ya nyukilia. Ĩndĩ andũ aingĩ matitaũkagĩrũo nĩ gĩtũmi kĩa ũrathi ũcio. Ũrathi ũcio ũkoretwo ũkĩhinga kwa ihinda rĩa mĩaka mĩingĩ, na ũcio nĩ ũira wa atĩ kũna Kristo nĩ ambĩrĩirie gwathana na atĩ mũico wa mũtabarĩre ũyũ wa maũndũ ũrĩ hakuhĩ. (Mat. 24:3) Gũtirĩ hĩndĩ ĩngĩ kũrĩ gwakorũo na maũndũ maingĩ meyumĩrĩtie wega marahingia ũrathi ũcio. Gaka nĩko kahinda ka andũ kwarahũka kĩĩroho. Ũtungata witũ no ũmateithie kwarahũka.

17, 18. (a) ‘Mahinda maya tũrĩ’ maratũhutia atĩa? (b) Nĩ maũndũ marĩkũ mangĩteithia andũ macenjie mawoni mao harĩ ndũmĩrĩri ya Ũthamaki?

¹⁷ No kahinda kanini gatigarĩte ga kuonania wendo witũ harĩ Jehova na kũrĩkia wĩra wa kũhunjia ũrĩa tũheetwo mahinda-inĩ maya ma kũrigĩrĩria. Ũndũ ũrĩa Paulo eerire Akristiano a karine ya mbere thĩinĩ wa Roma no ũtũteithie makĩria ũmũthĩ: “Na mũnyite ũhoro ũcio nĩ kũmenya ũrĩa hĩndĩ ĩno tũrĩ ĩtariĩ, atĩ rĩu thaa nĩ nginyu mũgurumũke toro, nĩ gũkorũo rĩu ũhoro witũ wa kũhonokio ũrĩ hakuhĩ kũrĩ rĩrĩa twaambĩrĩirie gwĩtĩkia.”—Rom. 13:11.

¹⁸ Maũndũ marĩa maarathĩtwo megiĩ mahinda ma kũrigĩrĩria no mateithie andũ mone bata wa maũndũ ma kĩĩroho. Angĩ nao nĩ monaga andũ nĩ marabatara ũteithio nĩ ũndũ wa kuona atĩ thirikari cia andũ nĩ iremetwo kũhiũrania na ũthĩni, ũgwati wa mbaara ya nyukilia, wĩki-naĩ, kana ũnũhi wa thĩ. Nao angĩ nĩ monaga atĩ nĩ marabatara maũndũ ma kĩĩroho nĩ ũndũ wa maũndũ marĩa meyoneire thĩinĩ wa famĩlĩ ciao ta mũrimũ, ndigano, kana gĩkuũ kĩa mũndũ mendete. Rĩrĩa tũrĩ ũtungata-inĩ, tũkoragwo twĩhaarĩirie gũteithia andũ ta acio.

GŨKORŨO TŨRĨ NA MĨTŨKĨ

19, 20. Kũmenya ũrĩa mahinda mehĩkĩte gũteithĩtie atĩa Akristiano amwe gũcenjia mũtũũrĩre wao?

¹⁹ Kũmenya ũrĩa mahinda mehĩkĩte nĩ gũtũmĩte Akristiano aingĩ mongerere ũtungata wao. Kwa ngerekano thutha wa gũthikĩrĩria programu ya kĩgomano kĩa mwanya kĩa mwaka wa 2006 kĩrĩa kĩarĩ na kĩongo “Uwe na Jicho Rahisi,” mũthuri na mũtumia wake arĩa maahikanĩtie ica ikuhĩ bũrũri-inĩ wa Ecuado nĩ maatuire itua rĩa kũhũthahũthia mũtũũrĩre wao. Makĩandĩka indo iria mataabataraga, na thutha wa mĩeri itatũ nĩ maathamĩte nyũmba yao ĩrĩa yarĩ na nyũmba ithatũ cia gũkoma magathiĩ nyũmba yarĩ na nyũmba ĩmwe tu ya gũkoma. Magĩcoka makĩendia indo imwe, na makĩrĩha mathirĩ mao mothe. Thutha wa ihinda inyinyi makĩambĩrĩria ũpainia wa gũteithĩrĩria  na magĩtĩkĩra rĩĩtana rĩa mũrori wa mĩthiũrũko rĩa gũtungatĩra thĩinĩ wa kĩũngano kĩmwe kĩrĩa kĩarĩ na bata mũnene.

²⁰ Mũrũ wa Ithe witũ ũmwe wa Amerika ya Rũgongo aandĩkire ũũ: “Tũgĩthiĩ kĩgomano kĩa mwanya kĩa 2006, tũrĩ na mũtumia wakwa twaninĩte mĩaka 30 kuuma twabatithio. Tũrĩ ngari-inĩ tũkĩinũka thutha wa programu ĩyo, nĩ twarĩrĩirie ũrĩa tũngĩhũthĩra ũtaaro ũrĩa warutĩtwo wa kũhũthahũthia mũtũũrĩre witũ. (Mat. 6:19-22) Twarĩ na mĩciĩ ĩtatũ, mũgũnda, ngari cia goro, gatarũ, na ngari yarĩ na nyũmba thĩinĩ. Nĩ ũndũ wa kuona atĩ nĩ twagĩte wĩcirio, tũgĩtua itua rĩa gũthingata ũtungata wa hĩndĩ ciothe. Mũirĩtu witũ aakoretwo arĩ painia wa hĩndĩ ciothe, na ithuĩ kũrĩ mwaka wa 2008 tũkĩambĩrĩria ũpainia wa hĩndĩ ciothe. Tũkoretwo na gĩkeno kĩnene mũno nĩ ũndũ wa kũrutithania wĩra na aarĩ na ariũ a Ithe witũ! Tũkoretwo tũgĩtungatĩra kũrĩa kũrĩ na bata mũnene wa ahunjia. Ningĩ, gũkorũo na maũndũ maingĩ ma gwĩka ũtungata-inĩ wa Jehova nĩ gũtũmĩte tũgĩe na ũkuruhanu wa hakuhĩ mũno nake. Ningĩ, kĩrathimo kĩrĩa kĩnene makĩria nĩ kuona andũ magĩcanjamũka thutha wa kũigua na gũtaũkĩrũo nĩ ma cia Kiugo kĩa Ngai.”

21. Nĩ ũmenyo ũrĩkũ ũtũtindĩkaga tũhunjie tũrĩ na mĩtũkĩ?

²¹ Nĩ tũĩ atĩ mũtabarĩre ũyũ mũũru wa maũndũ nĩ ũkũhobanĩrio nĩ “mũthenya ũrĩa wa cira, o na wa kũninwo kwa andũ arĩa matetigagĩra Ngai.” (2 Pet. 3:7) Ũmenyo witũ harĩ Kiugo kĩa Ngai ũtũtindĩkaga tũhunjie tũrĩ na kĩyo, gũũka gwa thĩna ũrĩa mũnene o hamwe na thĩ njerũ ĩrĩa ĩkaarũmĩrĩra. Tũgũthiĩ na mbere tũrĩ na mĩtũkĩ gũteithia andũ magĩe na kĩĩrĩgĩrĩro kĩa ma. Twaruta biũ wĩra ũcio wa mĩtũkĩ, tuonanagia atĩ kũna nĩ twendete Ngai o na andũ.

[Ciũria cia wĩruti]