‘Ũhoro Ũyũ Mwega wa Ũthamaki Nĩ Ũkaahunjio’
‘Ũhoro Ũyũ Mwega wa Ũthamaki Nĩ Ũkaahunjio’
“Ũhoro-ũyũ-Mwega wa ũthamaki nĩũkahunjio thĩ yothe, ũtuĩke ũira kũrĩ ndũrĩrĩ ciothe; na hĩndĩ ĩo nĩrĩo ithirĩro rĩgakinya.”—MATHAYO 24:14.
Ũguo nĩ Kuuga Atĩa? Luka mwandĩki wa Injiri oigire atĩ Jesu ‘aathiaga, akĩhunguraga matũũra o na mĩciĩ, akĩhunjagia ũhoro-ũrĩa-mwega wa ũthamaki wa Ngai.’ (Luka 8:1) Jesu we mwene oigire ũũ: ‘Nĩ njagĩrĩirũo kũhunjia ũhoro-ũrĩa-mwega wa ũthamaki wa Ngai nĩ gũkorũo nĩkĩo ndatũmirũo.’ (Luka 4:43) Aatũmire arutwo ake makahunjie ũhoro ũrĩa mwega matũũra-inĩ na mĩciĩ-inĩ, agĩcoka akĩmeera ũũ: ‘Nĩ mũgaatuĩka aira akwa kinya . . . ituri ciothe cia thĩ.’—Atũmwo 1:8; Luka 10:1.
Ũrĩa Akristiano a Tene Maarũmagĩrĩra Ciugo Icio: Arutwo a Jesu meekire ũrĩa aamathĩte matekũrĩa marĩĩgu. “Matiigana gũtiga kũrutana na kũheana ũhoro wa Jesu atĩ nĩwe Kristo mĩthenya yothe, marĩ hekarũ-inĩ, o na marĩ kwao mĩciĩ.” (Atũmwo 5:42) Othe nĩ maahunjagia, to gakundi kanini ka mwanya geekaga ũguo. Mwandĩki wa historĩ Neander oigire atĩ, “Celsus, mwandĩki wa mbere kũmenereria Akristiano, aamanyũrũririe nĩ ũndũ, athondeki a ndigi, atumi a iratũ, athondeki a ndarũa, andũ o ũguo arĩa mataarĩ na gathomo o na kanini nĩ maahunjagia injiri na kĩyo.” Ibuku-inĩ rĩake rĩĩtagwo The Early Centuries of the Church, Jean Bernardi aandĩkire ũũ: “[Akristiano] nĩ mangĩathiire kũndũ guothe na maarie na mũndũ o wothe. Barabara-inĩ na mataũni-inĩ, kũndũ-inĩ kwa mũingĩ na mĩciĩ-inĩ. Metĩtwo kana matetĩtwo. . . . Nginya ituri ciothe cia thĩ.”
Nĩ a Mareka Ũguo Ũmũthĩ? Mũhunjia wa Angirikani David Watson aandĩkire atĩ, “ũndũ ũmwe ũtũmĩte andũ marware kĩĩroho nĩ kanitha kwaga kuoya na ũritũ wĩra wa kũhunjia na kũrutana.” Ibuku-inĩ rĩake rĩĩtagwo Why Are the Catholics Leaving? José Luis Pérez Guadalupe aandĩkire ũhoro wa ndini cia Kĩevanjeli, cia Kĩadventisti, na iria ingĩ akiuga atĩ, “matihunjagia nyũmba kwa nyũmba.” No akĩandĩka ũhoro wĩgiĩ Aira a Jehova oigire: “Mahunjagia na mũbango nyũmba kwa nyũmba.”
Ũndũ ũmwe wa mwanya waaririo nĩ Jonathan Turley thĩinĩ wa Cato Supreme Court Review, 2001-2002 nĩ atĩ: “Ũngĩgweta Aira a Jehova, andũ aingĩ mambagĩrĩria gwĩciria ũhoro wa ahunjia maraceera mĩciĩ-inĩ iitũ mathaa matagĩrĩire. Aira a Jehova mahunjagia nyũmba kwa nyũmba to ũndũ wa gũtheremia wĩtĩkio wao, ĩndĩ mekaga ũguo tondũ ũcio nĩ ũndũ wa bata harĩ wĩtĩkio wao.”
[Gathandũkũ karatathi ga 9]
Wee nĩ Wonete Arĩa Marĩ na Rũũri Rũu?
Kũringana na maũndũ ma Kĩĩmandĩko marĩa marĩrĩirio icunjĩ-inĩ icio, ũgwĩciria nĩ a ũmũthĩ, marĩ na rũũri rũu rwa Ũkristiano wa ma? O na gũtuĩka nĩ kũrĩ ikundi na ndini ngiri nyingĩ ciĩĩtaga cia Gĩkristiano-rĩ, ririkana ũrĩa Jesu eerire arũmĩrĩri ake: “To mũndũ ũrĩa ũnjĩtaga, Mwathani ũyũ, Mwathani ũyũ, ũgatonya ũthamaki-inĩ wa Igũrũ; no ũrĩa wĩkaga ũrĩa Awa ũrĩa wĩ Igũrũ endaga.” (Mathayo 7:21) Gũkũũrana arĩa mareka wendi wa Ithe witũ—arĩa marĩ na rũũri rwa Akristiano a ma—na kũnyitanĩra nao no gũtongorie harĩ irathimo cia tene na tene rungu rwa Ũthamaki wa Ngai. Tũgũkũũria ũhoe Aira a Jehova, arĩa marakũreheire ngathĩti ĩno, ũhoro makĩria wĩgiĩ Ũthamaki wa Ngai na irathimo iria ũkaarehe.—Luka 4:43.
