‘Mũriũ nĩ Endete Kũguũria Ithe’
‘Mũriũ nĩ Endete Kũguũria Ithe’
‘Gũtirĩ mũndũ ũũĩ Ithe witũ tiga o Mũriũ, na ũrĩa o wothe Mũriũ endaga kũguũrĩria.’—LUK. 10:22.
ŨNGĨCOKIA ATĨA?
Nĩkĩ Jesu nĩwe warĩ mwagĩrĩru makĩria kũguũria ũhoro wa Ithe?
Jesu aaguũririe Ithe harĩ andũ arĩa angĩ atĩa?
Ũngĩhũthĩra njĩra irĩkũ kũguũria Ithe witũ ũkĩĩgerekania na Jesu?
1, 2. Nĩ kĩũria kĩrĩkũ kĩanarigithia andũ aingĩ, na nĩkĩ?
‘NGAI nũũ?’ Kĩũria gĩkĩ nĩ kĩrigithagia andũ aingĩ. Kwa ngerekano, o na gũtuĩka andũ aingĩ arĩa meĩtaga Akristiano metĩkĩtie Ngai nĩ Ũtatũ-rĩ, aingĩ nĩ metĩkagĩra atĩ mũndũ ndangĩhota gũtaũkĩrũo nĩ ũrutani ũcio. Mwandĩki ũmwe mũhunjia oigire ũũ: “Ũcio nĩ ũrutani ũkĩrũkĩte ũhoti wa meciria ma andũ. Nĩ ũkĩrĩte ũhoti wa mwĩcirĩrie wa ndũire kana ũũgĩ wa mũndũ.” Nao, andũ aingĩ arĩa metĩkanagia na ũrutani wa atĩ indo nĩcio cieyumĩririe, metĩkĩtie gũtirĩ Ngai. Moigaga atĩ magegania mothe ma ũũmbi nĩmo meyumĩririe o ũguo. O na kũrĩ ũguo-rĩ, handũ ha kuuga atĩ gũtirĩ Ngai, Charles Darwin oigire ũũ: “Ũndũ ũrĩa ingiuga nĩ atĩ, ũrutani ũcio wothe nĩ ũkĩrũkĩte ũũgĩ wa andũ.”
2 Andũ aingĩ, a wĩtĩkio ũtiganĩte, maaneyũria ciũria ciĩgiĩ kana Ngai arĩ kuo. Ĩndĩ, nĩ ũndũ wa kwaga macokio mangĩtũma maiganĩre, magatiga gũthiĩ na mbere gũcaria Ngai. Nĩ ma, Shaitani nĩ ‘atumumarĩtie meciria ma arĩa matetĩkĩtie.’ (2 Kor. 4:4) Nokĩo andũ aingĩ matukanĩirũo na magakorũo matoĩ ũhoro wa ma wĩgiĩ Ithe witũ, Mũũmbi wa igũrũ na thĩ!—Isa. 45:18.
3. (a) Nũ watũguũrĩirie ũhoro wa Mũũmbi? (b) Tũkwarĩrĩria ciũria irĩkũ?
3 O na kũrĩ ũguo, harĩ bata andũ merute ma ĩkoniĩ Ngai. Nĩkĩ? Nĩ ũndũ no arĩa tu makayagĩra “rĩĩtwa rĩa Jehova” makaahonokio. (Rom. 10:13, New World Translation) Gũkaĩra rĩĩtwa rĩa Ngai gũkonainie na kũmenyana na Jehova we Mwene. Jesu Kristo nĩ aamenyithirie arutwo ake ũndũ ũcio wa bata. Nĩ aamaguũrĩirie Ithe witũ. (Thoma Luka 10:22.) Nĩkĩ kĩngĩatũmire Jesu ahote kũguũria Ithe gũkĩra mũndũ ũngĩ o wothe? Jesu eekire ũguo atĩa? Ningĩ tũngĩĩgerekania na Jesu atĩa kũguũria Ithe witũ harĩ andũ arĩa angĩ? Rekei twarĩrĩrie ciũria icio.
JESU KRISTO NĨWE WARĨ MWAGĨRĨRU MAKĨRIA
4, 5. Nĩkĩ Jesu nĩwe warĩ mwagĩrĩru makĩria kũguũria ũhoro wa Ithe?
4 Jesu aarĩ mwagĩrĩru kũna kũguũria Ithe. Nĩkĩ? Tondũ o na indo iria ingĩ irĩ muoyo ciothe itanombwo, “Mũriũ wa Ngai wa mũmwe,” aatũũraga igũrũ arĩ kĩũmbe gĩa kĩĩroho agĩcoka gũciarũo gũkũ thĩ arĩ mũndũ wĩtagwo Jesu. (Joh. 1:14; 3:18) Githĩ ũcio ti mweke wa mwanya mũno! Rĩrĩa gũtaarĩ kĩndũ kĩngĩ kĩombĩtwo, Mũriũ ũcio nĩ aakenagĩra mũno wendo wa Ithe nake akĩĩruta ũhoro Wake hamwe na ngumo Ciake. Mũriũ ũcio na Ithe no mũhaka nĩ maateretaga na njĩra nene, nĩ ũndũ ũcio makĩendana mũno ihinda-inĩ rĩa mĩaka ĩtangĩtarĩka. (Joh. 5:20; 14:31) Githĩ to mũhaka Mũriũ akorũo nĩ aagĩire na ũmenyo mũrikĩru mũno wĩgiĩ ngumo cia Ithe!—Thoma Akolosai 1:15-17.
5 Ithe witũ nĩ aamũrire Mũriũ atuĩke mwaria wake, nĩwe “Ũhoro wa Ngai.” (Kũg. 19:13) Kwoguo, Jesu nĩwe warĩ mwagĩrĩru makĩria kũguũrĩria arĩa angĩ ũhoro wa Ithe. Johana mwandĩki wa Injiri ndaahĩtirie rĩrĩa oigire atĩ, Jesu, ũcio wĩtagwo “Ũhoro,” arĩ “gĩthũri-inĩ gĩa Ithe.” (Joh. 1:1, 18) Ciugo icio cia Johana, ikonainie na ũndũ andũ maamenyerete gwĩka hĩndĩ ya kũrĩa irio. Mũgeni ũmwe nĩ angĩetiranirie na kĩrumia arĩ hakuhĩ na ũrĩa ũngĩ maikaranĩtie nake. Makuhanĩrĩirie ũguo, warĩ ũndũ mũhũthũ kwaranĩria. Kwoguo Mũriũ, arĩ hau “gĩthũri-inĩ,” nĩ aateretaga maũndũ marikĩru hamwe na Ithe.
6, 7. Ũkuruhanu gatagatĩ-inĩ ga Ithe na Mũriũ wathiaga na mbere ũkĩongererekaga atĩa?
6 Ũkuruhanu wa Ithe na Mũriũ wathiaga o ũkĩongererekaga. Mũriũ ũcio agĩtuĩka ‘ũrĩa [Ngai] aakenaga nĩwe mũthenya o mũthenya.’ (Thoma Thimo 8:22, 23, 30, 31.) Kwoguo nĩkĩo, ũkuruhanu wao wagĩaga na hinya o ũrĩa mararutithania wĩra na o ũrĩa Mũriũ aathiaga na mbere kwĩruta gũtũkia ngumo cia Ithe. Rĩrĩa ciũmbe ingĩ irĩ na ũũgĩ ciombirũo, Mũriũ nĩ eyonagĩra ũrĩa Jehova aikaranagia na o kĩmwe gĩacio, na hatarĩ nganja agĩtĩa ngumo cia Ngai makĩria.
7 Ningĩ thitango ĩrĩa Shaitani aacokire kũrehe kwerekera ũnene wa Jehova nĩ yaaheire Mũriũ kamweke ga kwĩruta ũrĩa Jehova angĩahũthĩrire wendo, kĩhooto, ũũgĩ, na hinya wake rĩrĩa acemania na ũndũ mũritũ. Ũndũ ũcio, nĩ ũngĩahaarĩirie Jesu kũhiũrania na moritũ marĩa we mwene aacokire gũcemania namo ũtungata-inĩ wake gũkũ thĩ.—Joh. 5:19.
8. Ũhoro ũrĩa ũrĩ thĩinĩ wa Injiri ũtũteithagia atĩa kwĩruta maũndũ maingĩ megiĩ ngumo cia Ithe witũ?
8 Nĩ ũndũ wa ũkuruhanu wake wa hakuhĩ hamwe na Jehova, Mũriũ aatarĩirie Ithe na njĩra ndikĩru gũkĩra mũndũ ũngĩ o wothe. Hihi no kuoneke njĩra ĩngĩ njega ya gũtũmenyithia Ithe witũ, ĩkĩrĩte gũthuthuria ũrĩa Mũriũ wake wa mũmwe aarutanire na agĩĩka? Kwa ngerekano-rĩ, ta wĩcirie ũrĩa ũngĩkorũo ũrĩ ũndũ mũritũ kũmenya biũ ũrĩa kiugo “wendo” kiugĩte korũo tũthomaga tu ũrĩa mabuku ma gũtaarĩria ciugo moigaga. Ĩndĩ, tũngĩĩcũrania ũhoro ũrĩa ũheanĩtwo gĩtaũ nĩ aandĩki a Injiri wĩgiĩ ũtungata wa Jesu na ũrĩa aatangĩkagĩra andũ, no tũtaũkĩrũo makĩria nĩ ciugo ici, “Ngai nĩwe wendani.” (1 Joh. 4:8, 16) No taguo ũhoro-inĩ wĩgiĩ ngumo ingĩ cia Ngai iria Jesu aaguũrĩirie arutwo ake rĩrĩa aarĩ gũkũ thĩ.
ŨRĨA JESU AAGUŨRIRIE ITHE
9. (a) Jesu aguũririe Ithe na njĩra irĩkũ igĩrĩ nene? (b) Heana ngerekano ĩronania ũrĩa Jesu aaguũririe Ithe kũgerera ũrutani wake.
9 Jesu aaguũririe Ithe atĩa harĩ arutwo ake na arĩa mangĩatuĩkire arũmĩrĩri ake thutha ũcio? Eekire ũguo na njĩra igĩrĩ: kũgerera ũrutani na mĩthiĩre yake. Rekei twambe twĩcirie ũhoro wa ũrutani wa Jesu. Maũndũ marĩa Jesu aarutire arũmĩrĩri ake moonanagia nĩ oĩ wega ũrĩa Ithe aiguaga, meciria make, na njĩra ciake. Kwa ngerekano, Jesu aaringithanirie Ithe na mũndũ ũratangĩkĩra rũũru rwake ũrĩa ũthiaga gũcaria ng’ondu ĩmwe ĩngĩũra. Jesu oigire atĩ rĩrĩa mũndũ ũcio ona ng’ondu ĩyo yũrĩte, ‘amĩkenagĩra kũrĩ ũrĩa angĩkenera icio ingĩ mĩrongo kenda na kenda itorĩĩte.’ Ngerekano ĩyo yaarĩ ya kũrutana ũndũ ũrĩkũ? Jesu aatarĩirie ũũ: “O ũguo nake Ithe wanyu, ũrĩa wĩ Igũrũ, ndendaga o na hanini kamwe ga twana tũu kore.” (Mat. 18:12-14) Ũngĩĩruta ũndũ ũrĩkũ wĩgiĩ Jehova kuumana na ngerekano ĩyo? O na ũngĩkorũo rĩmwe nĩ ũiguaga ta ũtarĩ kĩene kana ta ũtiganĩirio-rĩ, Ithe witũ wa igũrũ nĩ akenagio nĩwe na nĩ akũrũmbũyagia. Maitho-inĩ make, wee ũrĩ kamwe ga “twana tũu.”
10. Jesu aaguũririe Ithe atĩa kũgerera mĩthiĩre yake?
10 Njĩra ya kerĩ ĩrĩa Jesu aguũririe Ithe harĩ arutwo ake yaarĩ kũgerera mĩthiĩre yake. Kwoguo rĩrĩa mũtũmwo Filipu eerire Jesu: “Tuonie Ithe witũ,” Jesu nĩ angĩoigire ũũ: “Mũndũ ũnyonete niĩ nĩonete Ithe witũ.” (Joh. 14:8, 9) Wĩcirie ngerekano cigana ũna ciĩgiĩ ũrĩa Jesu onanirie ngumo cia Ithe. Rĩrĩa mũndũ ũmwe warũarĩte “mangũ mwĩrĩ wothe” oririe Jesu amũhonie, aahutirie mũndũ ũcio akĩmwĩra ũũ: ‘Nĩngwenda. Honio ũthere.’ Hatarĩ nganja rĩrĩa mũndũ ũcio aahonirio, nĩ onire guoko kwa Jehova kũgerera ũndũ ũcio Jesu eekire. (Luk. 5:12, 13) Ningĩ, hĩndĩ ĩrĩa Lazaro aakuire, no mũhaka arutwo makorũo nĩ maahutirio ngoro nĩ tha cia Ithe witũ, rĩrĩa Jesu ‘aacakaire o roho-inĩ thĩinĩ, agĩtangĩka’ o na “akĩrĩra maithori.” O na gũtuĩka Jesu nĩ aamenyaga nĩ ekũriũkia Lazaro, nĩ aaiguire ũũru ngoro nĩ ruo rũrĩa famĩlĩ ya Lazaro na arata ao maarĩ naruo. (Joh. 11:32-35, 40-43) Hatarĩ nganja, o nawe harĩ icunjĩ ũthomaga thĩinĩ wa Bibilia igakũhotithia kuona tha cia Ithe witũ kũgerera ciĩko cia Jesu.
11. (a) Rĩrĩa Jesu aatheririe hekarũ-rĩ, aguũririe ũndũ ũrĩkũ wĩgiĩ Ithe? (b) Nĩkĩ gĩtũmaga gĩĩko kĩrĩa Jesu eekire gĩa gũtheria hekarũ gĩtũũmĩrĩrie?
11 No hihi, wĩrutaga atĩa kuumana na gĩĩko kĩrĩa Jesu eekire gĩa gũtheria hekarũ? Ta hũra mbica: Jesu aathondekire mũcarica wa mĩkanda, akĩrutũrũra arĩa meendagia ng’ombe na ng’ondu. Akĩhurunja mbeca cia arĩa maakũranagia mbia na agĩkurumania metha ciao. (Joh. 2:13-17) Gĩĩko kĩu gĩatũmire arutwo maririkane ciugo cia ũrathi cia Mũthamaki Daudi: ‘Kĩyo kĩrĩa ndĩ nakĩo kĩa nyũmba yaku nĩkĩo kĩndĩte.’ (Thab. 69:9) Ikinya rĩu irũmu Jesu oire, rĩonanirie wendi wake mũnene wa kũrũĩrĩra ũthathaiya wa ma. Hihi nĩ ũrona ũrĩa Ithe witũ atariĩ kũgerera ũndũ ũcio? Gĩĩko kĩu gĩtũririkanagia atĩ, Ngai arĩ na hinya ũtangĩgereka wa kũniina waganu biũ thĩinĩ wa thĩ, ningĩ arĩ na wendi mũnene wa gwĩka ũguo. Marakara macio manene Jesu onanirie nĩ ũndũ wa uuni-watho monanagia no mũhaka Ithe witũ akorũo nĩ aiguaga ũũru mũno ona ũrĩa waaganu ũingĩhĩte thĩinĩ wa thĩ ũmũthĩ. Githĩ ũndũ ũcio ndũtũũmagĩrĩria mũno rĩrĩa tũrahiũrania na waagi wa kĩhooto!
12, 13. Nĩ ũndũ ũrĩkũ ũreruta wĩgiĩ Jehova kũgerera ũrĩa Jesu aaikaranagia na arutwo ake?
12 Rekei twarĩrĩrie kĩonereria kĩngĩ—ũrĩa Jesu aaikaranagia na arutwo ake. Arutwo maaikaraga magĩkararanagia nĩ ũrĩkũ warĩ mũnene. (Mar. 9:33-35; 10:43; Luk. 9:46) Nĩ ũndũ wa gũikarania na Ithe ihinda inene, Jesu nĩ aamenyaga ũrĩa Jehova aiguaga nĩ ũndũ wa mwerekera ta ũcio wa gwĩtũgĩria. (2 Sam. 22:28; Thab. 138:6) Ningĩ-rĩ, Jesu nĩ onete Shaitani ũrĩa Mũcukani akĩonania mĩerekera o ta ĩyo. Kĩũmbe kĩu kĩĩkĩrĩri kĩendaga o kũgĩa na ngumo na ũnene. Nĩkĩo, no mũhaka Jesu nĩ aaiguaga ũũru mũno ona mwerekera wa gwĩtũgĩria ũgĩthiĩ na mbere gatagatĩ-inĩ ka arutwo arĩa aarutĩte! Nginya arĩa aathuurĩte matuĩke atũmwo ake maarĩ naguo! Moonanirie mwerekera ũcio nginya mũthenya wa mũthia wa ũtũũro wa Jesu gũkũ thĩ. (Luk. 22:24-27) O na kũrĩ ũguo, Jesu aathiire na mbere kũmarũnga arĩ na ũhoreri, ategũte mwĩhoko atĩ mũthia-inĩ nĩ mangĩerutire kũgĩa na mwerekera wa wĩnyihia o ta wake.—Afil. 2:5-8.
13 Hihi nĩ ũrona guoko gwa Ithe witũ kũgerera ũrĩa Jesu aarũngire mĩerekera mĩũru ya arutwo ake arĩ na ũkirĩrĩria? Hihi ciĩko-inĩ na mĩario-inĩ ya Jesu nĩ ũrona Ithe witũ, ũrĩa ũtatiganagĩria andũ ake o na gũtuĩka nĩ mahĩtagia maita maingĩ? Githĩ kũgĩa na ũmenyo ũcio wĩgiĩ ngumo cia Ngai meciria-inĩ gũtiratwĩkĩra ngoro tũmũkuhagĩrĩrie rĩrĩa twahĩtia nĩguo twĩrire mehia maitũ?
MŨRIŨ AAGUŨRIRIE ITHE EYENDEIRE
14. Jesu onanirie atĩa atĩ nĩ eendaga kũguũria Ithe?
14 Andũ aingĩ arĩa mathanaga na gĩthũri mageragia gũtũũria andũ rungu rwao na matarĩ ũndũ maramenya na njĩra ya kũmahitha maũndũ. No, Jesu nĩ eerutĩire kwaria maũndũ marĩa oĩ megiĩ Ithe, akĩguũrĩria andũ arĩa angĩ ũhoro Wake biũ. (Thoma Mathayo 11:27.) Hamwe na ũguo, Jesu nĩ aaheire arutwo ake ‘ũũgĩ [nĩguo mahote] gũkũũrana ũrĩa wa ma,’ Jehova Ngai. (1 Joh. 5:20) Ũguo nĩ kuuga atĩa? Jesu nĩ aahingũrire arũmĩrĩri ake meciria nĩguo mahote gũtaũkĩrũo nĩ maũndũ marĩa aarutanaga megiĩ Ithe. Ndaaigire ũhoro wa Ithe ũrĩ kĩriga na njĩra ya kũrutana atĩ nĩ ũmwe thĩinĩ wa Ũtatũ ũrĩa ũtangĩmenyekana ũrĩa ũtariĩ.
15. Jesu eegiragĩrĩria kwĩra arutwo ake maũndũ mamwe megiĩ Ithe nĩkĩ?
15 Hihi Jesu aaguũririe maũndũ mothe marĩa oĩ megiĩ Ithe? Aca, nĩ eegirĩrĩirie na njĩra ya ũũgĩ kwaria maũndũ maingĩ marĩa oĩ. (Thoma Johana 16:12.) Nĩkĩ? Nĩ ũndũ ihinda-inĩ rĩu, arutwo ake ‘matingĩahotire gwĩtiiria’ maũndũ macio. Ĩndĩ-rĩ, o ta ũrĩa Jesu aataarĩirie, maũndũ maingĩ nĩ mangĩaguũririo ‘mũteithia’ akinya, roho mũtheru, ũrĩa ũngĩamatongoririe “ũhoro-inĩ ũrĩa wa ma wothe.” (Joh. 16:7, 13) O ta ũrĩa aciari ogĩ mangĩaga kwĩra ciana ciao maũndũ mamwe nginya ciambe inenehe ũndũ ingĩhota kũmanyita, no taguo Jesu eetereire arutwo mambe makũre kĩĩroho nĩguo mahote gũtaũkĩrũo maũndũ mangĩ megiĩ Ithe. Jesu nĩ aaroraga maũndũ marĩa matangĩahotire arĩ na wendo.
WĨGEREKANIE NA JESU GŨTEITHIA ARĨA ANGĨ MAMENYE JEHOVA
16, 17. Nĩkĩ kĩngĩtũma ũhote kũguũria Ithe witũ harĩ andũ arĩa angĩ?
16 Rĩrĩa wamenyana na mũndũ biũ na wakenio nĩ ũmũndũ wake mwega-rĩ, githĩ ndũiguaga ũkĩenda kwĩra andũ angĩ ũhoro wake? Jesu nĩ aaragia ũhoro wĩgiĩ Ithe, rĩrĩa aarĩ gũkũ thĩ. (Joh. 17:25, 26) Hihi ithuĩ no tũhote kwĩgerekania nake kũguũrĩria andũ angĩ ũhoro wa Jehova?
17 O ta ũguo tuona, Jesu aarĩ na ũmenyo mũrikĩru mũno wĩgiĩ Ithe gũkĩra andũ arĩa angĩ. No nĩ eerutĩire kwaria mamwe ma maũndũ marĩa oĩ, o na akĩhe arũmĩrĩri ake ũhoti wa meciria wa gũtaũkĩrũo nĩ maũndũ mamwe marikĩru megiĩ ũrĩa Ngai atariĩ. Nĩ ũndũ wa gũteithio nĩ Jesu, githĩ tũtirĩkĩtie kũmenya Ithe witũ na njĩra ĩrĩa andũ aingĩ ũmũthĩ matamũĩ? Tũrĩ na ngaatho nyingĩ mũno nĩ Jesu gũtũguũrĩria Ithe erutĩire kũgerera ũrutani na mĩthiĩre yake! Ĩĩ-ni, nĩ twagĩrĩirũo kwĩraha nĩ ũndũ wa kũmenya Ithe witũ. (Jer. 9:24; 1 Kor. 1:31) O ũrĩa tũkoretwo tũkĩĩrutanĩria gũkuhĩrĩria Jehova, noguo nake atũkuhĩrĩirie. (Jak. 4:8) Nĩ ũndũ ũcio, no tũhote kũmenyithia arĩa angĩ maũndũ marĩa tũmenyete. Tũngĩka ũguo atĩa?
18, 19. Ũngĩhũthĩra njĩra irĩkũ kũguũria Ithe witũ harĩ andũ arĩa angĩ? Taarĩria.
18 Tũrabatara kwĩgerekania na Jesu kũguũria Ithe witũ kũgerera ciugo na ciĩko ciitũ. Ririkana atĩ andũ aingĩ arĩa tũhunjagĩria matiũĩ Ngai nũ. Mawoni mao megiĩ Ngai no makorũo mathũkĩtio nĩ ũrutani wa maheeni. No tũmamenyithie maũndũ marĩa tũũĩ megiĩ rĩĩtwa rĩa Ngai, muoroto wake harĩ andũ, na ũrĩa atariĩ ta ũrĩa Bibilia ĩguũrĩtie. Ningĩ-rĩ, no twarĩrĩrie na arĩa tũrĩ a wĩtĩkio ũmwe, maũndũ mamwe thĩinĩ wa Bibilia marĩa maguũrĩtie ũrĩa Ngai atariĩ na njĩra tũtaramenyete hau kabere. Na njĩra ĩyo, o nao no magunĩke.
19 Ĩ nakuo kũguũria Ithe witũ kũgerera mĩthiĩre yaku rĩrĩa ũrerutanĩria kwĩgerekania na Jesu? Rĩrĩa andũ mona wendo wa Kristo kũgerera mĩthiĩre iitũ, nĩ marĩgucagĩrĩrio harĩ Ithe witũ na harĩ Jesu. (Ef. 5:1, 2) Mũtũmwo Paulo aatwĩkĩrire ngoro ‘twĩgerekanagie nake, o ta ũrĩa egerekanagia na Kristo.’ (1 Kor. 11:1) Githĩ ti gĩtĩo kĩnene mũno tũheetwo gĩa gũteithia andũ mone Jehova kũgerera mĩthiĩre iitũ! Ĩĩ, rekei ithuothe tũthiĩ na mbere kwĩgerekania na Jesu na njĩra ya kũguũria Ithe witũ harĩ andũ arĩa angĩ.
[Ciũria cia Wĩruti]
