Wee Nĩ Wonanagia Riri wa Jehova Ũtũũro-inĩ Waku?
Wee Nĩ Wonanagia Riri wa Jehova Ũtũũro-inĩ Waku?
“Nĩ kwenenia twenenagia [kuonania] ũtheri wa riri wa Mwathani [Jehova, NW].”—2 KOR. 3:18.
ŨNGĨCOKIA ATĨA?
Tũngĩgoocithia Jehova atĩa o na gũtuĩka tũrĩ ehia?
Mahoya maitũ na gũthiĩ mĩcemanio ya Gĩkristiano gũtũteithagia atĩa kuonania riri wa Ngai?
Nĩ kĩĩ kĩngĩtũteithia gũthiĩ na mbere kũgoocithia Jehova?
1, 2. Nĩkĩ no kũhoteke twĩrĩgĩrĩre kwĩgerekania na ngumo cia Jehova?
ITHUOTHE nĩ tũtũkĩtie aciari aitũ na njĩra ĩmwe kana ĩrĩa ĩngĩ. Kwoguo, ti ũndũ mũnene kũigua mũndũ akĩĩra kahĩĩ, ‘Wee ũhaana o ta baba wanyu.’ Nako kairĩtu kahota kwĩrũo, ‘Ũtũmaga ndirikane mami wanyu.’ Ciana kaingĩ ciĩgerekanagia na ũrĩa cionaga aciari acio magĩka. Ĩ ithuĩ na ithuĩ? Hihi no twĩgerekanie na Jehova, Ithe witũ wa igũrũ? O na gũtuĩka tũtirĩ twamuona, no tũmenye ngumo ciake cia goro tũngĩĩruta Kiugo gĩake, twĩrorere ũũmbi wake, na twĩcũranie Maandĩko na makĩria ciugo na ciĩko cia Jesu Kristo, Mũrũ wa Ngai. (Joh. 1:18; Rom. 1:20) No tũhote kuonania riri wa Jehova.
2 Mbere ya Ngai kũũmba Adamu na Hawa, aarĩ na ma biũ atĩ andũ nĩ mangĩahotire kũhingia wendi wake, monanie ngumo ta ciake, na mamũgoocithie. (Thoma Kĩambĩrĩria 1:26, 27.) Tũkĩĩmenyeria wĩyamũrĩri Ngai, twagĩrĩirũo kuonania ngumo cia Ũrĩa waatũũmbire. Tũngĩka ũguo, tũgũkorũo na mweke wa mwanya wa kuonania riri wa Ngai tũtekũrora mĩikarĩre, gĩthomo, kana kabira iitũ. Nĩkĩ? Tondũ “Ngai ndatĩagĩra andũ maũthĩ: no thĩinĩ wa ndũrĩrĩ ciothe mũndũ ũrĩa ũmwĩtigagĩra na ageka maũndũ ma ũthingu nĩetĩkagĩrũo nĩwe.”—Atũm. 10:34, 35.
3. Akristiano maiguaga atĩa rĩrĩa maratungatĩra Jehova?
3 Akristiano aitĩrĩrie maguta nĩ monanagia riri wa Jehova. Nĩkĩo Paulo, mũtũmwo waciarĩtwo na roho aandĩkire ũũ: “Ithuĩ ithuothe, tũrĩ na mothiũ matahumbĩirũo, nĩ kwenenia twenenagia [kuonania] ũtheri wa riri wa Mwathani [Jehova] ta icicio, tũgakĩgarũragwo ũrĩa tũhaana o nginya tũkaya kũgĩa na mũhianĩre o ta wake, tũkiumaga harĩ riri ũmwe, tũgakinyagĩra ũrĩa ũngĩ.” (2 Kor. 3:18) Rĩrĩa mũnabii Musa aaikũrũkire kuuma Kĩrĩma gĩa Sinai ena ihengere cia Maathani marĩa Ikũmi, ũthiũ wake nĩ waakengaga tondũ wa kwaranĩria na Jehova. (Tham. 34:29, 30) O na gũtuĩka Akristiano matirĩ magerera ũndũ-inĩ ta ũcio na mothiũ mao matirutaga ũtheri-rĩ, nĩ macangararaga mena gĩkeno makĩĩra andũ arĩa angĩ igũrũ rĩgiĩ Jehova, ngumo ciake, na muoroto wake wa magegania harĩ andũ. Kwoguo, tũrĩ Akristiano aitĩrĩrie maguta kana a ng’ondu ingĩ, tũhaana o ta icicio na njĩra ya atĩ nĩ tuonanagia riri wa Jehova ũtũũro-inĩ na ũtungata-inĩ witũ. (2 Kor. 4:1) Wee hihi nĩ wonanagia riri wa Jehova mĩthiĩre-inĩ ya ũngai na wĩra-inĩ waku ũrĩ mũhunjia ũtatĩragĩria wa Ũthamaki?
NĨ TWĨRIRAGĨRIA KUONANIA RIRI WA JEHOVA
4, 5. (a) O ta Paulo nĩ mbaara ĩrĩkũ tũkoragwo nayo? (b) Wĩhia ũtũthũkĩtie atĩa?
4 Tũrĩ ndungata cia Jehova, nĩ twĩriragĩria gũtĩithia na kũgoocithia Mũũmbi witũ ũndũ-inĩ o wothe ũrĩa tũreka. O na kũrĩ ũguo, kaingĩ maũndũ marĩa twĩriragĩria gwĩka timo twĩkaga. Paulo nĩ aahiũranagia na thĩna ta ũcio we mwene. (Thoma Aroma 7:21-25.) Agĩtaarĩria kĩrĩa gĩtũmaga tũkorũo na mbaara ĩyo, Paulo aandĩkire ũũ: “Andũ othe maanahĩtia, magakĩaga gũkinyĩrĩra riri wa Ngai.” (Rom. 3:23) Nĩ ma, nĩ ũndũ wa kũgaya wĩhia wa Adamu, andũ othe nĩ maaingĩrire waathani-inĩ mũũru wa ‘gũthamakagĩrũo nĩ Wĩhia.’—Rom. 5:12; 6:12.
5 Wĩhia nĩ kĩĩ? Nĩ ũndũ o wothe wĩ mũgarũ na ngumo cia Jehova, njĩra ciake, ithimi ciake, na wendi wake. Wĩhia nĩ ũthũkagia ũkuruhanu wa mũndũ na Ngai. Ũtũmaga mũndũ aremwo kuonania riri wa Ngai, o ta ũrĩa kĩndũ kĩngĩtũma mũikia wa mĩguĩ aremwo kũringa kĩrĩa ekuorotete. No twĩhie tũkĩmenyaga kana tũtekũmenya. (Ndar. 15:27-31) Wĩhia nĩ ũrĩ hinya mũingĩ igũrũ rĩa andũ na nĩ ũmamũranagia na Mũũmbi wao. (Thab. 51:5; Isa. 59:2; Kol. 1:21) Kwoguo, andũ nĩ maraihanĩrĩirie mũno na Jehova makaaga gũkinyĩra mweke wa mwanya wa kuonania riri wake. Hatarĩ nganja, wĩhia nĩguo wonje ũrĩa mũũru mũno andũ makoragwo naguo.
6. Tũngĩonania atĩa riri wa Ngai o na tũrĩ ehia?
6 O na gũtuĩka tũrĩ ehia, Jehova nĩ eyonanĩtie atĩ nĩwe “Ngai mwene kĩĩrĩgĩrĩro giitũ.” (Rom. 15:13) Nĩ athondekete njĩra ya kũniina mehia kaimana, nayo nĩ igongona rĩa Jesu Kristo rĩa ũkũũri. Rĩrĩa tuonania wĩtĩkio harĩ igongona rĩu, tũticokaga gũtuĩka “ngombo cia wĩhia,” ĩndĩ tũgĩaga na ũhoti wa kuonania riri wa Jehova. (Rom. 5:19; 6:6; Joh. 3:16) Gũtũũria ũkuruhanu ũcio mwega na Ngai gũtũmaga tũkorũo na ma atĩ Jehova nĩ egũtũrathima rĩu na ihinda rĩũkĩte atũhe ũkinyanĩru na muoyo wa tene na tene. O na gũtuĩka tũrĩ ehia, githĩ ti kĩrathimo kĩnene gwĩtĩkĩrũo nĩ Jehova tũrĩ andũ mangĩonania riri wake!
KUONANIA RIRI WA NGAI
7. Nĩ ũndũ ũrĩkũ ũtwĩgiĩ arĩ o mũhaka twĩtĩkĩre nĩguo tũhote kuonania riri wa Ngai?
7 Nĩguo tũhote kuonania riri wa Ngai, no mũhaka twĩtĩkĩre atĩ tũrĩ na mĩerekera ya wĩhia. (2 Maũ. 6:36) Nĩ tũbatiĩ gwĩtĩkĩra atĩ tũrĩ na mĩerekera ya kwĩhia na twĩrutanĩrie kũmĩtooria nĩguo tũthiĩ na mbere nginya tũkaahota kũgoocithia Ngai biũ. Kwa ngerekano, angĩkorũo nĩ tũingĩrĩte rĩhia-inĩ rĩũru rĩa kwĩrorera mbica cia ũũra-thoni, no mũhaka twĩtĩkĩre atĩ nĩ tũrabatara gũteithio kĩĩroho—na twethe ũteithio ũcio. (Jak. 5:14, 15) Rĩu nĩrĩo ikinya rĩa mbere harĩ kũgĩa na ũtũũro ũratĩithia Ngai biũ. No mũhaka tũikarage tũgĩĩthuthuragia kuona kana nĩ tũratũũra kũringana na ithimi cia ũthingu cia Jehova tũrĩ ndungata ciake. (Thim. 28:18; 1 Kor. 10:12) O na mĩerekera iitũ ya kwĩhia ĩngĩkorũo ĩtariĩ atĩa, no mũhaka tũthiĩ na mbere kũrũa nayo nĩguo tuonanie riri wa Ngai.
8. O na gũtuĩka tũtirĩ akinyanĩru, twagĩrĩirũo nĩ gwĩka atĩa?
8 Jesu nowe mũndũ ũrĩa woonanirie riri wa Ngai na ũtaigana kũmũhĩtĩria ũtũũro-inĩ wake wothe. O na gũtuĩka tũtirĩ akinyanĩru ta Jesu, no tũhote na nĩ twagĩrĩirũo kwĩrutanĩria kũrũmĩrĩra kĩonereria gĩake. (1 Pet. 2:21) Jehova nĩ athimaga kĩyo giitũ hamwe na ũrĩa tũrathiĩ na mbere, na agatũrathima twerutanĩria na ngoro yothe kũmũgoocithia.
9. Bibilia ĩtũteithagia atĩa kuonania riri wa Ngai wega makĩria?
9 Kiugo kĩa Jehova no gĩtũthererie njĩra nĩguo tũthiĩ na mbere. Gũthuthuria Maandĩko na njĩra ndikĩru hamwe na gũthoma Bibilia tũgĩĩcũranagia nĩ maũndũ ma bata. (Thab. 1:1-3) Gũthoma Maandĩko o mũthenya nĩ gũgũtũteithia tũthiĩ na mbere. (Thoma Jakubu 1:22-25.) Ũrutani wa Bibilia nĩguo mũthingi wa wĩtĩkio witũ na noguo wĩkĩraga hinya itua riitũ rĩa gwĩthema gwĩka mehia maritũ tũkahota gũkenia Jehova.—Thab. 119:11, 47, 48.
10. Mahoya mangĩtũteithia atĩa gũtungatĩra Jehova na njĩra njega makĩria?
10 Nĩguo tuonanie riri wa Ngai, ningĩ no mũhaka ‘tũrũmanagĩrĩrie kũhoya.’ (Rom. 12:12) No tũhote, o na nĩ twagĩrĩirũo kũhoyaga Jehova atũteithagie tũmũtungatĩre na njĩra ĩtĩkĩrĩkĩte. Nĩguo twĩke ũguo, no tũmũhoye roho mũtheru, wĩtĩkio makĩria, hinya wa kũregana na magerio, na ũhoti wa ‘kũheana ũhoro ũrĩa wa ma na mũheanĩre mũrũngĩrĩru.’ (2 Tim. 2:15; Mat. 6:13; Luk. 11:13; 17:5) O ta ũrĩa kaana kehokaga ithe-rĩ, noguo twagĩrĩirũo kwĩhoka Ithe witũ wa igũrũ, Jehova. Tũngĩmũhoya atũteithie kũmũtungatĩra na njĩra njega makĩria, no tũkorũo na ma atĩ nĩ egwĩka ũguo. Kĩrekei tũtikaanone ta tũramũthumbũra! Ithenya rĩa ũguo, nĩ tũmũgoocage kũgerera mahoya, tũkamũcokagĩria ngatho, tũgeetha ũtongoria wake, makĩria rĩrĩa tũrĩ magerio-inĩ, na tũkamũũria atũteithie kũmũtungatĩra na njĩra ĩragoocithia rĩĩtwa rĩake itheru.—Thab. 86:12; Jak. 1:5-7.
11. Mĩcemanio ya kĩũngano ĩtũteithagia atĩa kuonania riri wa Ngai?
11 “Ngombo ĩrĩa ĩĩhokekete na njũgĩ” nĩyo Ngai ehokeire ĩrorage ng’ondu ciake cia goro. (Mat. 24:45-47; Thab. 100:3) Ngombo ĩyo nĩ ĩrũmbũyagia mũno ũrĩa athathaiya arĩa angĩ maronania riri wa Jehova. Mĩcemanio nĩ ĩtũteithagia gwĩka ũgarũrũku na kwagĩria ngumo ciitũ cia Gĩkristiano, o ta ũrĩa mũtumi wa nguo athondekaga nguo iitũ nĩguo tũhaane wega. (Ahib. 10:24, 25) Kwoguo rekei tũkinyage thaa iria ciagĩrĩire, tondũ twamenyera gũcererũo, nĩ tũrĩũragĩrũo nĩ maũndũ mamwe ma ‘gũtũthondeka’ kĩĩroho nĩguo tũhaane ũrĩa Jehova endaga ndungata ciake ciikare.
REKEI TWĨGEREKANAGIE NA NGAI
12. Tũngĩĩgerekania na Ngai atĩa?
12 Nĩguo tũhote kuonania riri wa Jehova, no mũhaka ‘twĩgerekanagie na Ngai.’ (Ef. 5:1) Njĩra ĩmwe ya kwĩgerekania na Jehova nĩ gũkũria muonere ta wake wa maũndũ. Kũgeria gũtũũra na njĩra ĩngĩ o yothe nĩ kũmwagĩra gĩtĩo na no gũtũthũkie. Tondũ thĩ ĩrĩa tũratũũra ĩrĩ rungu rwa ũrĩa mũũru, Shaitani Mũcukani, no mũhaka twĩrutanĩrie gũthũũra maũndũ marĩa Jehova athũire na kwenda mũno marĩa Jehova endete. (Thab. 97:10; 1 Joh. 5:19) Tũrabatara gũkorũo na ma ngoro-inĩ ciitũ atĩ njĩra ĩrĩa iiki njega ya gũtungatĩra Ngai nĩ gwĩkaga maũndũ mothe nĩguo tũmũgoocithie.—Thoma 1 Akorintho 10:31.
13. Nĩkĩ no mũhaka tũthũũre mehia, na ũndũ ũcio ũtũtindĩkaga gwĩka atĩa?
13 Jehova nĩ athũire mehia, na o na ithuĩ nĩ twagĩrĩirũo kũmathũũra. Hatarĩ nganja, twagĩrĩirũo gwĩthema maũndũ moru o ũrĩa wothe tũngĩhota, no ti gwĩthima tũngĩmakuhĩrĩria nginya ha tũtegũtoorio nĩ mehia. Kwa ngerekano, nĩ twagĩrĩirũo kwĩgitĩra tũtikaingĩre mũtego-inĩ wa aregenyũki, rĩhia rĩngĩtũma tũtige kwagĩrĩra kũgoocithia Ngai. (Gũcok. 13:6-9) Kwoguo rekei tũtikanakuruhane o na hanini na aregenyũki kana mũndũ ũngĩ wĩĩtaga mũrũ wa Ithe witũ no wagagĩra Ngai gĩtĩo. Ũguo nĩguo twagĩrĩirũo gwĩka o na angĩkorũo nĩ wa famĩlĩ iitũ. (1 Kor. 5:11) Kũgeria gũkararania na aregenyũki kana arĩa macambagia ithondeka rĩa Jehova gũtingĩtũguna. Ma nĩ atĩ, tũtiagĩrĩirũo gũtuĩria ũhoro ũrĩa maandĩkĩte kana ũrĩa wĩ Intaneti-inĩ, amu ũndũ ũcio no ũthũũkie ũkuruhanu witũ na Jehova.—Thoma Isaia 5:20; Mathayo 7:6.
14. Rĩrĩa tũrerutanĩria kuonania riri wa Ngai, nĩ ngumo ĩrĩkũ twagĩrĩirũo kuonania, na nĩkĩ?
14 Kuonania wendo nĩ njĩra ĩmwe nene ya kwĩgerekania na Ithe witũ wa igũrũ. Ĩĩ-ni, twagĩrĩirũo gũkorũo tũrĩ endani o take. (1 Joh. 4:16-19) Hatarĩ nganja, wendo ũrĩa tũkoragwo naguo gatagatĩ-inĩ gaitũ nĩ ũtũmaga tũmenyeke tũrĩ arutwo a Jesu na ndungata cia Jehova. (Joh. 13:34, 35) O na gũtuĩka gũkorũo tũrĩ na mehia ma kĩĩmerera rĩmwe nĩ gũtũhĩngithagia, no mũhaka tũmethemage na tũkonania wendo hingo ciothe. Gũkũria wendo na ngumo ingĩ cia ũngai nĩ gũgũtũteithia twĩtheme gwĩka arĩa angĩ ũũru na kwĩhia.—2 Pet. 1:5-7.
15. Wendo ũkoragwo na moimĩrĩro marĩkũ harĩ ũkuruhanu witũ na andũ arĩa angĩ?
15 Wendo ũtũmaga twende gwĩka andũ arĩa angĩ maũndũ mega. (Rom. 13:8-10) Kwa ngerekano, wendo nĩ ũrĩtũmaga tũikarage tũrĩ ehokeku harĩ ũrĩa tũhikanĩtie nake. Wendo harĩ athuri a kĩũngano, na gũtĩa wĩra wao, nĩ kũrĩtũteithagia gwathĩkĩra na kwĩnyihĩria ũtongoria wao. Ciana iria ciendete aciari a cio nĩ imaathĩkagĩra na ikamatĩa na itiaragia ũũru igũrũ rĩao. Tũngĩkorũo na wendo harĩ andũ arĩa angĩ, tũtingĩmahũthia kana kũmaarĩria na njĩra ĩramaagĩra gĩtĩo. (Jak. 3:9) Nao athuri arĩa mendete ng’ondu cia Ngai nĩ maikaranagia nacio na wororo.—Atũm. 20:28, 29.
16. Kuonania wendo kũrĩtũteithagia atĩa ũtungata-inĩ witũ?
16 Ngumo ya wendo ningĩ nĩ yagĩrĩirũo kuoneka ũtungata-inĩ witũ. Nĩ ũndũ wa wendo witũ mũnene harĩ Jehova, tũtirĩĩtĩkagĩra kũhĩngĩka rĩrĩa andũ amwe maarega gũtũthikĩrĩria. Ithenya rĩa ũguo, tũrĩthiaga o na mbere kũhunjia ũhoro ũrĩa mwega. Wendo nĩ ũrĩtũmaga twĩhaaragĩrie wega na tũkerutanĩria kũgĩa na moimĩrĩro mega ũtungata-inĩ. Tũngĩenda Ngai na andũ arĩa angĩ biũ, tũtirĩonaga wĩra wa kũhunjia ũhoro wa Ũthamaki ũrĩ mũrigo kana ta arĩ o wĩra tu. Handũ ha ũguo, tũrĩwonaga ũrĩ gĩtĩo kĩnene na tũkaũruta tũkenete.—Mat. 10:7.
THIĨ NA MBERE KŨGOOCITHIA JEHOVA
17. Nĩkĩ nĩ tũgunĩkaga twetĩkĩra atĩ nĩ tũnyihĩirũo nĩ riri wa Ngai?
17 Andũ arĩa aingĩ thĩinĩ wa thĩ mationaga ũritũ wa mehia, no ithuĩ nĩ tũwonaga. Ũndũ ũcio nĩ ũtũmaga tuone bata wa kũrũa na mĩerekera iitũ ya wĩhia. Gwĩtĩkĩra tũrĩ ehia gũtũteithagia kũmenyeria thamiri ciitũ nĩguo igatũtongoria gwĩka ũrĩa kwagĩrĩire rĩrĩa merirĩria ma kwĩhia maingĩra meciria na ngoro-inĩ ciitũ. (Rom. 7:22, 23) Nĩ ma, no tũkorũo tũtarĩ na hinya, ĩndĩ Ngai no atũhe hinya wa gwĩka ũrĩa kwagĩrĩire ũndũ-inĩ o wothe.—2 Kor. 12:10.
18, 19. (a) Nĩ kĩĩ gĩtũhotithagia kũhootana tũkĩrũa na mbũtũ cia maroho moru? (b) Twagĩrĩirũo gũtua itua rĩrĩkũ?
18 Nĩguo tũgoocithie Jehova, ningĩ no mũhaka tũhũrane na mbũtũ cia maroho moru. Matharaita ma kĩĩroho marĩa Ngai atũheete nĩ matũteithagia gwĩka ũguo. (Ef. 6:11-13) Shaitani ageragia ũrĩa wothe angĩhota nĩguo aheo riri ũrĩa wagĩrĩire o Jehova wiki. Ningĩ Mũcukani athiaga na mbere kũgeria gũthũkia ũkuruhanu witũ na Jehova. No githĩ rĩtikoragwo rĩrĩ ihũra inene harĩ Shaitani rĩrĩa ithuĩ na andũ angĩ matarĩ akinyanĩru milioni nyingĩ, athuri, atumia, na ciana tũratũũria wĩkindĩru witũ na tũkagoocithia Ngai! Kwoguo, rekei tũthiĩ na mbere kũgooca Jehova, o ta ciũmbe iria irĩ igũrũ iria ciugaga: “Wee Mwathani witũ, Ngai witũ-rĩ, wee nowe wagĩrĩirũo nĩ kũgoocagwo na gwĩkĩrĩrũo, na ũgĩage na ũhoti; amu nĩwe wombire indo ciothe, na kwenda gwaku nĩkuo gwatũmire igĩe na ciũmbĩke.”—Kũg. 4:11.
19 Rekei tũtue itua irũmu rĩa gũtũũra tũgoocaga Jehova, o na gũthiĩ atĩa. Nĩ akenaga mũno kuona andũ aingĩ ehokeku makĩĩrutanĩria ũrĩa wothe mangĩhota kwĩgerekania nake na kuonania riri wake. (Thim. 27:11) Itua riitũ rĩrotuĩka o ta rĩa Daudi, ũrĩa wainire ũũ: “Nĩ ngatho ndĩrĩgũcokagĩria na ngoro yakwa yothe, Mwathani, wee Ngai wakwa, ndũũre o ngoocaga rĩĩtwa rĩaku tene o na tene.” (Thab. 86:12) Ĩ tũtiĩriragĩria mũno mũthenya ũrĩa tũkoonania riri wa Jehova na njĩra nginyanĩru na tũhote kũmũgooca tene na tene! Ũndũ ũcio nĩguo andũ othe aathĩki magaakenera. Hihi nĩ ũronania riri wa Jehova Ngai ihinda-inĩ rĩrĩ, ũrĩ na itanya rĩa gwĩka ũguo tene na tene?
[Ciũria cia wĩruti]
[Mbica karatathi ka 30]
Hihi wee nĩ wonanagia riri wa Jehova na njĩra ici?
