WĨRUTE KUUMANA NA KIUGO KĨA NGAI

Kwĩna Ũhoro Ũrĩkũ Mwega Wĩgiĩ Ndini?

Gĩcunjĩ gĩkĩ kĩrĩ na ciũria hihi wanoria na nĩ kĩronania harĩa ũngĩona macokio ma ciũria icio thĩinĩ wa Bibilia yaku. Aira a Jehova no makenere kwarĩrĩria macokio macio hamwe nawe.

1. Hihi ndini ciothe nĩ njega?

Thĩinĩ wa ndini nyingĩ nĩ gũkoragwo na andũ meendaga gũkenia Ngai. Nake nĩ amonaga na akamarũmbũiya. O na kũrĩ ũguo, kĩeha nĩ atĩ, andũ amwe mahũthagĩra ndini gwĩka ũũru. Kahinda-inĩ kahĩtũku, atongoria a ndini o na maanaherithia akararia ao. (2 Akorintho 4:3, 4; 11:13-15) Ũmũthĩ naguo, riboti cia mohoro cionanagia atĩ, atongoria a ndini imwe makoretwo makĩgathĩrĩria ũtoi na wĩki naĩ, kana makanyita mbaara mbaru, kana magakorũo makĩhũthĩra ciana ũũru.—Thoma Mathayo 24:3-5, 11, 12.

Bibilia ĩrutanaga atĩ ndini nĩ mĩthemba ĩĩrĩ—ndini ya ma na ya maheeni. Ndini ya maheeni ndĩrutanaga ma ĩgiĩ Ngai. No Jehova Ngai endaga andũ mamenye ma ĩrĩa ĩmũkoniĩ.—Thoma 1 Timotheo 2:3-5.

2. Kwĩna ũhoro ũrĩkũ mwega wĩgiĩ ndini?

Ngai ndendaga andũ maheenio nĩ ndini iria ituaga atĩ nĩ imwendete no itirarutana ma ĩrĩa ĩmũkoniĩ. Ma nĩ atĩ, arũmĩrĩri aingĩ a ndini icio nĩ mendete ũrata na thĩ ĩno ĩrĩ rungu rwa Shaitani, ũrĩa Mũcukani. (Jakubu 4:4; 1 Johana 5:19) Kiugo kĩa Ngai kiugaga atĩ ndini iria ciĩrutagĩra harĩ thirikari cia andũ handũ ha Ngai ihaana ta mũmaraya. Bibilia ĩĩtaga mũmaraya ũcio ‘Babuloni Ũrĩa Mũnene,’ rĩĩtwa riumanĩte na itũũra rĩrĩa rĩa tene kũrĩa ũthathaiya wa maheeni waambĩrĩirie thutha wa Kĩguũ kĩa hĩndĩ ya Nuhu. Ica ikuhĩ, Ngai nĩ arĩniina o rĩmwe ndini iria iheenagia na ikahinyĩrĩria andũ.—Thoma Kũguũrĩrio 17:1, 2, 5, 17; 18:8, 23, 24.

 3. Ngai akaarehe gĩkeno harĩ thĩ yothe atĩa?

Kũniinwo kwa ndini ya maheeni kũrĩa gũkuhĩrĩirie nĩ ũhoro mwega. Nĩ gũgaatũma ũhinyanĩrĩria thĩinĩ wa thĩ ũthire. Ndini cia maheeni itigaacoka kũhĩtithia na kũgayũkania andũ rĩngĩ. Andũ othe makaanyitanĩra ũthathaiya-inĩ wa Ngai ũrĩa ũmwe wa ma.—Thoma Isaia 11:9; Kũguũrĩrio 18:20, 21; 21:3, 4

4. Andũ a ngoro theru magĩrĩirũo gwĩka atĩa?

Jehova ndariganĩirũo nĩ andũ a ngoro theru arĩa manyaganĩte thĩinĩ wa ndini cia maheeni thĩ yothe. Rĩu araacokanĩrĩria andũ ta acio matuĩke kĩndũ kĩmwe na njĩra ya kũmaruta ũhoro wa ma.—Thoma Mika 4:2, 5.

Jehova nĩ anyitaga ũgeni arĩa marenda kũmũtungatĩra matuĩke a famĩlĩ yake. Nĩ tũgunĩkaga mũno o na arata na andũ a famĩlĩ mangĩaga gũkena twambĩrĩria gũtungatĩra Jehova. Tũtuĩkaga arata a Ngai, tũkagĩa “nyũmba” kana famĩlĩ ĩrĩ na wendo, hamwe na kĩĩrĩgĩrĩro kĩa muoyo wa tene na tene.—Thoma Mariko 10:29, 30; 2 Akorintho 6:17, 18.

Nĩgetha wone ũhoro makĩria, rora gĩcunjĩ gĩa 15 na 16 kĩa ibuku rĩrĩ, rĩrĩa rĩcabĩtwo nĩ Aira a Jehova. Bibilia Ĩrutanaga Atĩa Kũna?

 [Mbica karatathi ka 26]

The Complete Encyclopedia of Illustration/J. G. Heck