Hari–magedoni Andũ Amwe Moigaga Nĩ Kĩĩ?

“Na nĩmaakĩmonganirie kũndũ kũrĩa gwĩtagwo na Kĩhibirania, Hari–Magedoni.”​—KŨGUŨRĨRIO 16:16.

WĨCIRAGIA ũhoro wa kĩĩ waigua kiugo “Hari–Magedoni”? Rĩngĩ na rĩngĩ wĩciragia ũhoro wa gĩcanjama kĩnene. O na gũtuĩka kiugo kĩu kĩonekaga o rita rĩmwe thĩinĩ wa Bibilia-rĩ, nĩ kĩgwetagwo kaingĩ nĩ atongoria a ndini na nyũmba cia mohoro.

Hihi mawoni ma andũ aingĩ megiĩ Hari–Magedoni nĩ maringanaga na ũrĩa Bibilia ĩrutanaga? Nĩ harĩ bata kũmenya macokio. Nĩkĩ? Tondũ kũmenya ma ĩgiĩ Hari–Magedoni no gũkwehererie guoya ũrĩa ũtagĩrĩire, gũgũteithie ũgĩe na mawoni mega megiĩ mahinda marĩa maroka, na ũgĩe na muonere ũrĩa wagĩrĩire wĩgiĩ Ngai.

Wĩcirie ũhoro wa ciũria ici ithatũ, na ũringithanie ũrĩa andũ aingĩ moigaga igũrũ rĩgiĩ Hari–Magedoni na ũrĩa Bibilia ĩrutanaga kũna.

  1.HIHI HARI–MAGEDONI NĨ GĨCANJAMA GĨKAAREHWO NĨ ANDŨ?

Kaingĩ aandĩki a mohoro na arĩa mathuthuragia maũndũ nĩ mahũthagĩra kiugo “Hari–Magedoni” magĩtaarĩria icanjama iria irehagwo nĩ andũ. Kwa ngerekano-rĩ, Mbaara ya 1 na ya 2 ya Thĩ cianetwo Hari–Magedoni. Thutha wa mbaara icio, andũ maarĩ na guoya atĩ Amerika (U.S.) na Ũrũmwe wa Sovieti (Soviet Union) nĩ cingĩokanĩrĩire cikĩhũthĩra matharaita ma nyukiria. Nyũmba cia mohoro cikĩaria ũhoro wa njũkanĩrĩro ĩyo yaatanyĩtwo ciamĩtire “Hari–Magedoni ya nyukiria.” Mahinda-inĩ maya, athuthuria arĩa makoragwo na guoya atĩ ũnũhi wa thĩ nĩ ũkaarehe ũgarũrũku wa hinahi wa rĩera nĩ marutĩte mũkaana wa gũũka kwa “Hari–Magedoni ya rĩera.”

Mawoni ma andũ: Mahinda marĩa maroka ma thĩ na mĩoyo ĩrĩa ĩrĩ thĩinĩ wayo ĩhocetie biũ harĩ andũ. Thirikari cingĩaga kũhũthĩra ũũgĩ, thĩ ĩgũthũka ũndũ ĩtangĩthondekeka.

Ũrĩa Bibilia ĩrutanaga: Ngai ndegwĩtĩkĩria andũ manange thĩ biũ. Bibilia ĩtwĩraga na ma atĩ Jehova a ndombire thĩ “hatarĩ ũrĩa yatariĩ.” Ĩndĩ, aamĩũmbire “ĩtũũragwo nĩ andũ.” (Isaia 45:18) Handũ ha gwĩtĩkĩria andũ manange thĩ biũ, Ngai nĩ ‘akaaniina arĩa mamĩũnũhaga.’​—⁠Kũguũrĩrio 11:18.

2.HIHI HARI–MAGEDONI NĨ GĨCANJAMA KĨA NDŨIRE?

Rĩmwe na rĩmwe aandĩki a mohoro metaga icanjama nene cia ndũire “Hari–Magedoni.” Kwa ngerekano-rĩ, mwaka wa 2010, riboti ĩmwe yaaririe ũhoro wa “ ‘Hari–Magedoni’ thĩinĩ wa Haiti.” Riboti ĩyo yaaragĩrĩria ũhoro wa gũthĩnĩka, wanangĩku, na ikuũ irĩa ciarehirũo nĩ gĩthingithia kĩnene kĩrĩa kĩagũmĩire bũrũri ũcio. Aandĩki a mohoro na athondeki a thenema matihũthagĩra kiugo kĩu o harĩ maũndũ marĩa mekĩkĩte ĩndĩ nĩ nginya harĩ marĩa monaga ta mageekĩka. Kwa ngerekano, maanahũthĩra kiugo “Hari–Magedoni” makĩaria ũhoro wa moimĩrĩro ma njata nene ĩrĩa andũ megeragĩria atĩ nĩ ĩkaagũtha thĩ.

Mawoni ma andũ: Hari–Magedoni nĩ kĩũndũ gĩũkaga gĩterĩgĩrĩirũo kĩrĩa kĩũragaga nginya andũ matarĩ na mahĩtia. Hatirĩ ũndũ ũngĩka wĩgitĩre kĩũndũ kĩu.

Ũrĩa Bibilia ĩrutanaga: Hari–Magedoni ti kĩũndũ gĩgoka gĩterĩgĩrĩirũo kĩniine andũ othe. Ithenya rĩa ũguo-rĩ, hĩndĩ ya Hari–Magedoni, no andũ arĩa oru tu makaaninwo. Bibilia ĩĩranagĩra atĩ no ihinda inyinyi “ũrĩa mwaganu acoke aagwo; ũkabara wega gĩikaro kĩu gĩake, na ndangĩkorũo ho.”​—⁠Thaburi 37:10.

3.HIHI NGAI NĨ AKAANINA THĨ HĨNDĨ YA HARI–MAGEDONI?

Andũ aingĩ a ndini metĩkĩtie atĩ nĩ gũgaakorũo na njũkanĩrĩro ya mũico gatagatĩ ka wega na ũũru na moimĩrĩro magaakorũo arĩ gũthira gwa thĩ ĩno. Ũthuthuria ũmwe wekirũo thĩinĩ wa Amerika nĩ Princeton Survey Research Associates woonanirie atĩ gĩcunjĩ kĩa 40 harĩ igana kĩa andũ agima arĩa maahoirũo ũhoro metĩkĩtie atĩ thĩ ĩgaathira hĩndĩ ya “mbaara ya Hari–Magedoni.”

 Ũrutani wa andũ: Andũ matiombĩtwo matũũre gũkũ thĩ tene na tene, o nayo thĩ ndĩombĩtwo ĩtũũre tene na tene. Ngai ombire andũ arĩ na muoroto wa atĩ nĩ kũrĩ hĩndĩ othe magaakua.

Ũrĩa Bibilia ĩrutanaga: Bibilia yugaga wega atĩ Ngai ‘akĩrĩire thĩ igũrũ rĩa itina ciayo, ndĩkae gũkenyenyeka o na tene.’ (Thaburi 104:5) Bibilia ĩkĩaria ũhoro wa atũũri a thĩ, yugaga ũũ: “Arĩa athingu nĩo makagaya thĩ, na gũtũũra mamĩtũũre o nginya tene.”​—Thaburi 37:29.

Hatarĩ nganja, ũrutani wa Bibilia igũrũ rĩgiĩ Hari–Magedoni nĩ ngũrani na mawoni maingĩ ma andũ. Kwoguo-rĩ, ma nĩ ĩrĩkũ?

[Kohoro ka magũrũ-inĩ]