Hihi nĩ ũrenda kũmenya ma ĩgiĩ Ngai—we nũũ, ithimi ciake, na wendi wake nĩ ũrĩkũ? Thĩinĩ wa Kiugo gĩake, Bibilia, Jehova Ngai nĩ aguũrĩtie ma ĩrĩa yothe ĩmwĩgiĩ. No ti mũndũ wothe ũngĩthoma Bibilia na ataũkĩrũo biũ nĩ ma ĩyo. Nĩkĩ? Tondũ gũtaũkĩrũo nĩ ma ta ĩyo ya kĩĩroho nĩ gĩtĩo; ti andũ othe maheagwo gĩtĩo kĩu. Rekei twarĩrĩrie ũrĩa Jesu oigire ũndũ-inĩ ũcio.—Thoma Mathayo 11:25.

Mũhari ũcio wambagĩrĩria na ciugo ici: “Hĩndĩ ĩo Jesu agĩcoka akiuga atĩrĩ.” Kwoguo, kwahoteka ũndũ ũrĩa Jesu arenda kuuga ũroimana na ũndũ ũrĩa wakorũo wekĩka. Akorũo arũithia andũ arĩa mateendaga gũtuĩka arũmĩrĩri ake a matũũra matatũ ma Galili kũrĩa aaringĩte ciama. (Mathayo 11:20-24) Wahota kwĩyũria ũũ: ‘Kũngĩahotekire atĩa mũndũ one ciama cia Jesu na aage gwĩtĩkia ma iria aarutanaga na kũmũrũmĩrĩra?’ Andũ acio maagire gũtuĩka arũmĩrĩri a Jesu nĩ ũndũ wa mwerekera wao wa kũũmia ngoro.—Mathayo 13:10-15.

Jesu nĩ aamenyaga atĩ, nĩguo tũtaũkĩrũo nĩ ma ya kĩĩroho ĩrĩa ĩrĩ thĩinĩ wa Bibilia, tũrabatara maũndũ merĩ: ũteithio wa Ngai na mwerekera ũrĩa wagĩrĩire wa ngoro. Jesu arataarĩria ũũ: “Awa, Mwathani wa Igũrũ o na wa thĩ, ndakũgatha nĩ ũndũ nĩũhithĩte andũ arĩa ogĩ na imenyi maũndũ macio, ũkamaguũrĩria tũkenge.” Hihi nĩ wona kĩrĩa kĩngĩtũma tuuge atĩ gũtaũkĩrũo nĩ ma ya kĩĩroho ĩrĩa ĩrĩ thĩinĩ wa Bibilia nĩ gĩtĩo? Jehova, “Mwathani wa Igũrũ o na wa thĩ,” no ahithe kana aguũrie ma ĩyo kũringana na wendi wake. No mũndũ o wothe nĩ akoragwo na mweke wa gũtaũkĩrũo nĩ ma ĩyo; Ngai ndarĩ mũthutũkanio. Nĩ na mũthingi ũrĩkũ aguũragĩria andũ amwe ma ya Bibilia na akaaga kũguũrĩria angĩ?

Jehova onagia andũ arĩa enyihia ũtugi no ti arĩa etĩi. (Jakubu 4:6) Ahithaga ma kuuma kũrĩ “andũ arĩa ogĩ na imenyi”—arĩa mwĩtĩo wa gũkorũo marĩ na ũũgĩ na gĩthomo gĩa gũkũ thĩ ũtũmaga mone ta matarabatara gũteithio nĩwe. (1 Akorintho 1:19-21) No aguũragia ma ĩyo kũrĩ “tũkenge”—andũ arĩa mokaga kũrĩ we na ngoro theru, makonania wĩnyihia ta wa ciana. (Mathayo 18:1-4; 1 Akorintho 1:26-28) Jesu, Mũrũ wa Ngai, nĩ eeyoneire we mwene andũ a mĩthemba ĩyo yerĩ. Atongoria aingĩ a ndini, arĩa maarĩ etĩi na maarĩ na gĩthomo kĩa igũrũ, matiataũkĩirũo nĩ ndũmĩrĩri ya Jesu, no ategi a thamaki arĩa maarĩ enyihia nĩ maataũkĩirũo. (Mathayo 4:18-22; 23:1-5; Atũmwo 4:13) O na kũrĩ ũguo, andũ amwe arĩa maarĩ atongu na athomu arĩa moonanirie wĩnyihia wa ma nĩ maatuĩkire arũmĩrĩri a Jesu.—Luka 19:1, 2, 8; Atũmwo 22:1-3.

Reke tũcokerere kĩũria kĩrĩa gĩkũũrĩtio kĩambĩrĩria-inĩ: Hihi no wende kũmenya ma ĩgiĩ Ngai? Angĩkorũo nĩguo-rĩ, no ũkene kũmenya atĩ Ngai ndeendete andũ arĩa meyonaga marĩ na ũũgĩ wa gũkũ thĩ. Mũgarũ na ũguo, endete arĩa matonagwo marĩ a bata nĩ arĩa marĩ na ũũgĩ wa gũkũ thĩ. Ũngĩĩruta Kiugo kĩa Ngai ũrĩ na mwerekera ũrĩa wagĩrĩire wa meciria na ngoro, no ũkorũo ũrĩ ũmwe wa arĩa Jehova aheaga kĩheo kĩa goro—ũtaũku wa ma ĩmwĩgiĩ. Kũmenya ma ĩyo nĩ gũgũtũma ũtũũro waku ũkorũo na gĩkeno rĩu na gũgũtongorie ũkoona ‘muoyo ũrĩa wa ma’—ũtũũro ũtarĩ mũthia thĩinĩ wa thĩ njerũ ĩrĩa ĩroka ica ikuhĩ kũrĩa gũgaatũũra ũthingu. *—1 Timotheo 6:12, 19; 2 Petero 3:13.