Ndaaciarĩirũo Moundsville, taũni ĩtarĩ inegene ĩrĩ rũĩ-inĩ rwa Ohio mwena wa rũgongo wa West Virginia, U.S.A. Ndaarĩ wa kerĩ harĩ ciana inya, iria ithatũ ciacio ciarĩ imwana, kwogwo maita maingĩ mũciĩ gwitũ twakoragwo tũcanjamũkĩte. Aciari akwa maarĩ aruti wĩra na kĩyo, ehokeku na endi andũ. Tũtiarĩ atongu, no hĩndĩ ciothe nĩ twakoragwo na kĩrĩa twabataraga. Marĩ Aira a Jehova, aciari akwa merutanĩirie biũ gũtũruta mawatho ma Bibilia rĩrĩa twarĩ anyinyi.

O na kũrĩ ũguo, ndatuĩka tinĩnja, ngoro yakwa nĩ yambĩrĩirie kwehera kuuma kũrĩ maũndũ marĩa ndaarutĩtwo. Ndaarĩ na nganja kana ũtũũro ũtongoretio nĩ mawatho ma Bibilia no ũkorũo na bata kana no ũtũme mũndũ aiganĩre. Ndeeciragia atĩ gũkorũo na wĩyathi wa gwĩka ũrĩa wothe ndendaga noyo yarĩ njĩra ya kuona gĩkeno. Thutha wa kahinda kanini, ngĩtiga gũthiĩ mĩcemanio ya Gĩkristiano. Mũrũ na mwarĩ wa maitũ o nao makĩrema o ta niĩ. Aciari aitũ nĩ maageririe gwĩka o ũrĩa mangĩahotire gũtũteithia, no nĩ twaregire.

Ndiamenyaga atĩ wĩyathi ũrĩa nderiragĩria nĩ ũngĩandongoririe ũkombo-inĩ wa maũndũ moru. Mũthenya ũmwe rĩrĩa ndainũkaga mũciĩ kuuma cukuru, mũrata wakwa akĩhe thigara. Ngĩtĩkĩra. Kuuma mũthenya ũcio, ndetĩkĩrire mĩtugo ĩngĩ mĩingĩ mũno ya gũthũkia. Thuutha wa ihinda, nĩ ndahũthagĩra ndawa cia ũrĩu na njohi na ngaikara mũtũũrĩre wa ũmaramari. Thuutha wa mĩaka ĩigana ũna ĩrĩa yarũmĩrĩire, nĩ ndathiire na mbere kũgeria ndawa cia ũrĩu iria ithũkagia mũndũ makĩria na ngĩtuĩka ngombo ya nyingĩ ciacio. Nĩ ũndũ wa kwĩingĩria makĩria ũkombo-inĩ ũcio, ngĩambĩrĩria kwendia ndawa icio nĩguo hote gũthiĩ na mbere na mũtũũrĩre ũcio.

O na ndageria kwaga gũtindanĩra na thamiri yakwa, hĩndĩ ciothe nĩ yandirikanagia atĩ mũtũũrĩre ũrĩa ndatũũraga warĩ mũũru. O na kũrĩ ũguo, ndonaga atĩ nĩ ndethũkĩtie na ndingĩekire ũgarũrũku. O gũtuĩka ndakoragwo thiũrũrũkĩirio nĩ andũ maruga-inĩ na mĩthako-inĩ, maita maingĩ ndonaga ta ndĩ nyiki na nguĩte ngoro. Rĩmwe na rĩmwe, nĩ ndeciragia ũrĩa aciari akwa maarĩ ega na ngarigwo ndamehereire nĩkĩ.

O na gũtuĩka nĩ ndakuĩte ngoro ngona ta itangĩagarũrĩire mĩthiĩre yakwa, andũ angĩ maarĩ o na mwĩhoko harĩ niĩ. Mwaka wa 2000, aciari akwa makĩĩnyita ũgeni kĩrũrũngano-inĩ kĩa ng’ongo kĩa Aira a Jehova. Tũgĩthiĩ hamwe nao itarĩ na wendi mũnene. Ngĩmaka kuona nginya mũrũ na mwarĩ wa maitũ o nao nĩ mookire.

Ndĩ kĩrũrũngano-inĩ, ngĩririkana atĩ nĩ ndokĩte o kũu nĩ ũndũ wa kũinĩra andũ nyĩmbo kĩndũ ta mwaka ũmwe waahĩtũkĩte. Ngũrani ĩrĩa ndonire nĩ yahutirie ngoro yakwa mũno. Hĩndĩ ĩyo ndokĩte kũina, kũu guothe kwaihũire gĩko na ndogo ya thigara. Andũ aingĩ arĩa mokĩte kuo matiarĩ na ũrata, na ndũmĩrĩri nyĩmbo-inĩ yarĩ ya kĩeha. No kĩrũrũngano-inĩ, ndaathiũrũrũkĩirio nĩ andũ akenu biũ—andũ maanyitire ũgeni macanjamũkĩte, o na gũtuĩka tũtionanĩte kwa ihinda rĩa mĩaka mĩingĩ. Kũu guothe kwarĩ gũtheru, na ndũmĩrĩri ĩrĩa yaheanagwo yarĩ ya kĩrĩgĩrĩro kĩa mahinda mokĩte. Ndona ũrĩa ma cia Bibilia ciarĩ na moimĩrĩro mega harĩ andũ, ndeyũragia kĩrĩa gĩatũmĩte ndĩmĩrege!—Isaia 48:17, 18.

Thuutha wa kĩrũrũngano, ngĩtua itua rĩa gũcoka kĩũngano-inĩ gĩa Gĩkristiano. Mũrũ na mwarĩ wa maitũ, nĩ ũndũ wa ũrĩa moonire kĩrũrũngano-inĩ, magĩtua itua rĩa gũcoka o nao. Ithuothe atatũ tũgĩtĩkĩra kwĩruta Bibilia.

Mũhari ũmwe wa Bibilia ũrĩa wahutirie mũno makĩria warĩ Jakubu 4:8, ũrĩa ugaga ũũ: “Kuhĩhĩriai Ngai, nake nĩekũmũkuhĩhĩria inyuĩ.” Ngĩmenya atĩ ingĩendire gũkuhĩrĩria Ngai, no mũhaka ingĩatheririe ũtũũro wakwa. Hamwe na mogarũrũku mangĩ, nĩ ndabataraga gũtiga kũhũthĩra thigara na kũhũthĩra ndawa cia ũrĩu na njohi.—2 Akorintho 7:1.

Ngĩtigana na arata akwa a tene na ngĩcaria arata erũ gatagatĩ-inĩ ka athathaiya a Jehova. Mũthuri wa kĩũngano ũrĩa twerutire Bibilia nake nĩ aandeithirie mũno. Aahũragĩra thimũ maita maingĩ na akagerera mũciĩ nĩguo one ũrĩa ndĩrathiĩ na mbere. Nginyagia ũmũthĩ, nĩ ũmwe wa arata akwa arĩa a hakuhĩ.

Mwaka-inĩ wa 2001, ngĩonania wĩyamũrĩri wakwa harĩ Ngai na njĩra ya kũbatithio na maĩ, na mũrũ na mwarĩ wa maitũ magĩka o ũguo. No ũgerie kũhũũra mbica ya gĩkeno kĩrĩa kĩarĩ na aciari akwa na mũrũ wa maitũ mũnini ũrĩa warĩ mwĩhokeku rĩrĩa famĩlĩ itũ yagĩire na ũrũmwe harĩ gũthathaiya Jehova.

Ndatũũraga ndĩciragia atĩ mawatho ma Bibilia nĩ mahingagĩra mũndũ, no rĩu ndĩmonaga marĩ ũgitĩri mũnene. Bibilia nĩ yaheire hinya wa gũtiga kũhũthĩra na kwendia ndawa cia ũrĩĩu na ngĩtuĩka mũndũ mwega.

Ndĩ na gĩtĩo gĩa gũkorũo ndĩ gĩcunjĩ kĩa ũrũmwe wa aarĩ na ariũ a Ithe witũ wa thĩ yothe arĩa mathathaiyagia Jehova. Andũ acio hatarĩ nganja nĩ mendanĩte, na makoragwo na ũrũmwe harĩ gũtungatĩra Ngai. (Johana 13:34, 35) Ũrũmwe-inĩ ũcio nĩ ndonire kĩrathimo kĩa mwanya mũno—mũtumia wakwa, Adrianne, ũrĩa nyendete mũno. Gũtungatĩra Mũtũũmbi tũrĩ hamwe nĩ ũndũ ũtũrehagĩra gĩkeno mũno.

Ithenya rĩa gũthingata mũtũũrĩre wa kwĩyenda, rĩu ndĩrutagĩra ndĩ ndungata ya hĩndĩ-ciothe, ngĩruta andũ ũrĩa o nao mangĩgunĩka kuumana Kiugo kĩa Ngai. Ũcio nĩguo wĩra ũrĩa ũndeheire gĩkeno kĩrĩa kĩnene makĩria. No njuge ndĩ na ũũma biũ atĩ Bibilia nĩ ĩgarũrĩte mũtũũrĩre wakwa. Rĩu nĩ ngĩĩte na wĩyathi wa ma.