KUUMA NGOTHI-INĨ:TWĨRUTAGA ATĨA KUUMA KŨRĨ MUSA?
Musa Aarĩ Ũ?
Wĩciragia atĩa rĩrĩa waigua rĩĩtwa Musa? Hihi wĩciragia ũhoro wa . . .
- kaana karĩa kaahithĩtwo gĩkabu-inĩ nĩ nyina thĩinĩ wa Rũĩ rwa Nailo?
- mwana ũrĩa warereirũo ũtonga-inĩ wa Misiri nĩ mwarĩ wa Firauni—ĩndĩ ndaigana kũriganĩrũo atĩ aarĩ Mũisiraeli?
- mũthuri ũrĩa watũũraga arĩ mũrĩithi bũrũri-inĩ wa Amidiani mĩaka 40?
- mũthuri ũrĩa waaranĩirie na Jehova * kĩhinga-inĩ kĩrĩa gĩaakanaga mwaki?
- mũthuri ũrĩa warũgamire mbere ya mũthamaki wa Misiri akĩmũria na ũcamba arekererie Aisiraeli moime ũkombo-inĩ?
- mũthuri ũrĩa watongoririo nĩ Ngai akamenyithie Amisiri ũhoro wa Mahũra Ikũmi rĩrĩa mũthamaki wao omĩirie Ngai ngoro?
- mũthuri ũrĩa watongoririe Aisiraeli makiuma Misiri?
- mũthuri ũrĩa Ngai aahũthĩrire kũgayũkania Iria Itune?
- mũthuri ũrĩa waheire Aisiraeli Maathani Ikũmi ma Ngai?
MUSA aahĩtũkĩire maũndũ-inĩ macio mothe na mangĩ. No kũhoteke nĩkĩo mũthuri ũcio mwĩhokeku aheetwo gĩtĩo kĩnene nĩ Akristiano, Ayahudi, na Aithĩramu.
Hatarĩ nganja, Musa aarĩ mũnabii wekire “maũndũ manene ma kũguoyohania.” (Gũcokerithia Maathani 34:10-12) Nĩ eetĩkĩrire kũhũthĩrũo nĩ Ngai na njĩra nene. O na kũrĩ ũguo, Musa aarĩ o mũndũ ta ithuĩ. O ta mũnabii Elija—ũrĩa woonekire thĩinĩ wa kĩoneki marĩ na Musa hĩndĩ ya ũtungata wa Jesu gũkũ thĩ—Musa ‘aarĩ mũndũ wombĩtwo mũũmbĩre ũmwe na ithuĩ.’ (Jakubu 5:17; Mathayo 17:1-9) Musa aahiũranirie na mathĩna maingĩ o ta marĩa tũhiũranagia namo, na akĩmatoria.
Hihi no wende kũmenya ũrĩa aamatoririe? Wĩcirie ũhoro wa ngumo ithatũ njega harĩ iria Musa aarĩ nacio na ũrĩa tũngĩĩruta kuumana na kĩonereria gĩake.
^ kib. 7 Jehova nĩrĩo rĩĩtwa rĩa Ngai ta ũrĩa rĩguũrĩtio thĩinĩ wa Bibilia.
