Jesu, Hitho ya Kũgĩa na Ũtũũro ũrĩ na Muoroto
HIHI kũna Jesu nĩ aarĩ na ũtũũro ũrĩ na muoroto? Aarereirũo kũndũ gũtaarĩ na ũtonga, na ũtũũro-inĩ wake wothe aarĩ na indo nini cia kĩĩmwĩrĩ. Ndaarĩ na “handũ o na ha kũigĩrĩra mũtwe.” (Luka 9:57, 58) Makĩria ma ũguo, nĩ aamenetwo nĩ andũ, akĩigĩrĩrũo igenyo, na mũthia-inĩ akĩũragwo nĩ thũ ciake.
Wahota kuuga atĩrĩ, ‘Ũtũũro ta ũcio tiguo niĩ ingiuga ũrĩ na muoroto!’ No nĩ harĩ maũndũ mangĩ megiĩ ũtũũro wa Jesu tũbatiĩ gwĩciria. Rekei tũthuthurie maũndũ mana megiĩ ũtũũro wake.
1. JESU AARI NA MUOROTO ŨTŨŨRO-INĨ—GWĨKA WENDI WA NGAI.
“Irio ciakwa nĩ njĩkage ũrĩa ekwenda, ũrĩa wandekirie.”—Johana 4:34.
Kũgerera ciugo na ciĩko ciake, Jesu nĩ eerutanagĩria kũhingia wendi wa Ithe wa igũrũ, Jehova. * Jesu nĩ aakenagĩra mũno gwĩka wendi wa Ngai. Ma nĩ atĩ, aaringithanagia gwĩka wendi wa Ngai na irio, ta ũrĩa honanĩtio rĩandĩko-inĩ rĩu rĩ hau igũrũ. Ta rora wone kĩrĩa gĩatũmire aringithanie ũndũ ũcio.
Jesu aaririe ciugo icio mathaa-inĩ ma mĩaraho. (Johana 4:6) Rũcinĩ ruothe aakoretwo atuĩkanĩtie irĩma-inĩ cia Samaria, kwoguo no mũhaka akorũo nĩ aahũtiĩ. O na arutwo ake nĩ maamũringĩrĩirie makĩmwĩra: “Rabii, ndũrĩe irio.” (Johana 4:31) Kũgerera macokio make, Jesu nĩ onanirie atĩ nĩ aakenagĩra na agekĩrũo hinya nĩ gwĩka wendi wa Ngai. Na githĩ maũndũ macio matironania mũndũ warĩ na ũtũũro ũrĩ na muoroto?
2. JESU NĨ EENDETE ITHE MŨNO.
“Nĩnyenda Ithe witũ.”—Johana 14:31.
Jesu aarĩ na ũkuruhanu wa hakuhĩ mũno na Ithe wa igũrũ. Wendo wake mũnene harĩ Ngai nĩ watũmaga amenyithie andũ ũhoro wĩgiĩ Ithe—rĩĩtwa, mĩoroto, na ngumo Ciake. Kũgerera ciugo, ciĩko, na mĩerekera yake, Jesu nĩ onanirie biũ ũrĩa Ithe atariĩ, ũũ atĩ rĩrĩa twathoma ũhoro wake, nĩ tuonaga ũrĩa Ithe ahaana kũna. Nĩkĩo rĩrĩa Filipu eerire Jesu: “Tuonie Ithe witũ,” Jesu aamũcokeirie akĩmwĩra: “Mũndũ ũnyonete niĩ nĩonete Ithe witũ.”—Johana 14:8, 9.
Jesu eendete Ithe mũno ũũ atĩ aarĩ na wendi wa kũmwathĩkĩra o nginya gũkua. (Afilipi 2:7, 8; 1 Johana 5:3) Wendo ũcio mũnene harĩ Ngai nĩguo watũmire ũtũũro wa Jesu ũkorũo na muoroto.
3. JESU NĨ EENDETE ANDŨ.
“Gũtirĩ mũndũ wĩ na wendani mũnene kũrĩ ũyũ, atĩ mũndũ arute muoyo wake nĩ ũndũ wa arata ake.”—Johana 15:13.
Tondũ tũrĩ andũ matarĩ akinyanĩru, tũtikoragwo na ũũma biũ wĩgiĩ ihinda rĩrĩa rĩũkĩte. Bibilia ĩtaaragĩria ũũ: “Kwĩhia kwa mũndũ ũmwe-rĩ, nĩkuo gwatũmire mehia matonye gũkũ thĩ, nakĩo gĩkuũ gĩgĩtonya nĩ ũndũ wa mehia; tondũ ũcio gĩkuũ gĩgĩkĩhunja kũrĩ andũ othe, nĩ gũkorũo nĩmaakĩĩhirie othe.” (Aroma 5:12) Tũtingĩhota gwĩthema gĩkuũ, tondũ nĩkĩo moimĩrĩro ma mehia.—Aroma 6:23.
Wega nĩ atĩ, Jehova nĩ ũndũ wa gũtwenda nĩ atũheete kĩhonia. Nĩ aarekire Jesu, Mũrũwe mũkinyanĩru na ũtaarĩ na wĩhia, anyamarĩke na akue nĩguo akũũre andũ kuuma ũkombo-inĩ wa mehia na gĩkuũ. Nĩ ũndũ wa wendo harĩ Ithe, na harĩ andũ, Jesu nĩ eetĩkĩrire kũruta muoyo wake mũkinyanĩru nĩ ũndũ witũ. (Aroma 5:6-8) Wendo ũcio nĩ watũmire ũtũũro wake ũkorũo na muoroto. *
4. JESU NĨ OĨ ATĨ NĨ EENDETWO NĨ ITHE NA AGETĨKĨRĨKA NĨWE.
“Ũyũ nĩwe Mũrũ wakwa nyendete mũno, nĩngenaga nĩ ũndũ wake.”—Mathayo 3:17.
Jehova aagwetire ciugo icio arĩ igũrũ hĩndĩ ya ũbatithio wa Jesu. Na njĩra ĩyo Jehova onanirie cara rũkũ atĩ nĩ endete Mũrũwe, Jesu, na nĩ aamwĩtĩkĩrĩte. Nĩkĩo Jesu oigire ũũ arĩ na ũũma: ‘Ithe witũ nĩ anyendete’! (Johana 10:17) Nĩ ũndũ wa kũmenya atĩ nĩ eendetwo na agetĩkĩrĩka nĩ Ithe, Jesu aahiũranagia na ũkararia na inyũrũri arĩ na ũmĩrĩru. Ũndũ ũcio wamũteithirie kũgĩa na ũigananĩru nginya hĩndĩ ya kũragwo. (Johana 10:18) Ũmenyo wa Jesu atĩ Ithe nĩ aamwendete na akamwĩtĩkĩra nĩ watũmire agĩe na ũtũũro ũrĩ na muoroto.
Hatarĩ nganja Jesu aarĩ na ũtũũro ũrĩ na muoroto. Kwoguo, no twĩrute maũndũ maingĩ kuumana nake megiĩ ũrĩa tũngĩtũũra ũtũũro ũrĩ na muoroto. Gĩcunjĩ kĩrĩa kĩrũmĩrĩire nĩ gĩkwarĩrĩria mamwe ma motaaro marĩa Jesu aaheire arũmĩrĩri ake megiĩ ũtũũro.
^ kib. 6 Jehova nĩ rĩĩtwa rĩa Ngai ta ũrĩa rĩonanĩtio Bibilia-inĩ.
^ kib. 15 Nĩgetha wone ũhoro makĩria wĩgiĩ thogora wa ũkũũri wa gĩkuũ kĩa Jesu-rĩ, rora gĩcunjĩ gĩa 5 kĩa ibuku Bibilia Ĩrutanaga Atĩa Kũna? rĩrĩa rĩcabĩtwo nĩ Aira a Jehova.
