Kuhĩrĩria Ngai
“Hoyai, na Nĩmũkũheo”
“Mwathani, tũrute o na ithuĩ kũhoya Ngai.” (Luka 11:1) Jesu oririo ũndũ ũcio nĩ ũmwe wa arutwo ake. Agĩcokia, Jesu aaheanire ngerekano igĩrĩ iria itũrutaga ũrĩa tũngĩhoya na tũiguo nĩ Ngai. Angĩkorũo waneyũria kana Ngai nĩ aiguaga mahoya maku, no wende kũmenya macokio ma Jesu.—Thoma Luka 11:5-13.
Ngerekano ya mbere yarĩrĩirie mũndũ ũrĩa ũrahoya. (Luka 11:5-8) Rũgano-inĩ rũu, mũndũ ũmwe nĩ aagĩire na mũgeni ũtukũ gatagatĩ na ndaarĩ na irio cia kũmũhe. Harĩ we, gũcaria irio nĩ kwabataraga mĩtũkĩ. O na kũrĩ ũtukũ ũguo, nĩ aathire kwa mũratawe kũhoya mũgate. Mũratawe nĩ aambire kũrega gũũkĩra, tondũ aarĩ toro biũ ena famĩlĩ yake. No nĩ aathire na mbere kũgũthagũtha ategwĩtigĩra nginya mũratawe agĩũkĩra akĩmũhe kĩrĩa aabataire. *
Ngerekano ĩyo ĩratũruta ũndũ ũrĩkũ wĩgiĩ mahoya? Jesu aratwĩra atĩ tũbatiĩ gũthiĩ na mbere kũhoya, kũmaatha, na kũringaringa tũtegũtigithĩria. (Luka 11:9, 10) Nĩkĩ? Hihi Jesu arenda kuga atĩ rĩrĩa tũrahoya nĩ ta tũringaringaga mũrango wa Ngai ũtaiguaga mahoya? Aca. Ũndũ ũrĩa Jesu ararutana nĩ atĩ, ngũrani na mũrata ũcio ũtoire ikinya narua, Ngai nĩ endaga mũno kũhingĩria arĩa mamũhoyaga mena wĩtĩkio mabataro mao. Tuonanagia wĩtĩkio ta ũcio rĩrĩa twahoya tũtegũtigithĩria. Tweka ũguo, tuonanagia atĩ kũna nĩ tũrabatara kĩrĩa tũrahoya na atĩ nĩ twĩtĩkĩtie Ngai no atũhe, angĩkorũo nĩ kĩringaine na wendi wake.—Mariko 11:24; 1 Johana 5:14.
Ngerekano ya kerĩ yarĩrĩirie ‘Mũigua wa mahoya,’ Jehova. (Thaburi 65:2) Jesu oririe ũũ: “Na rĩrĩ, nĩ ũrĩkũ wanyu wĩ ithe wa mũndũ, na mũrũ wake angĩmwĩtia . . . kĩũngũyũ, aamũne nyamũ-ya-thĩ handũ ha kĩũngũyũ? Ningĩ angĩmwĩtia itumbĩ, aamũne kang’aurũ?” Macokio nĩ maroneka wega—gũtirĩ ithe wendete ciana ciake ũngĩĩka ũguo. Jesu aatarĩirie ngerekano ĩyo ũũ: Angĩkorũo maithe o na matarĩ akinyanĩru nĩ ‘maheaga ciana ciao iheo njega-rĩ, ĩ Ithe wanyu wĩ Igũrũ angĩkĩria atĩa kũhe roho mũtheru,’ kĩheo kĩrĩa kĩega mũno kũrĩ ciana ciake gũkũ thĩ ingĩmũhoya!—Luka 11:11-13; Mathayo 7:11.
Ngai nĩ endaga mũno kũhingĩria arĩa mamũhoyaga mena wĩtĩkio mabataro mao.
Ngerekano ĩno ĩratũruta ũndũ ũrĩkũ wĩgiĩ Jehova, ‘Mũigua wa mahoya’? Jesu arenda tuone Jehova ahaana Ithe mwendani wĩriragĩria mũno kũhingia mabataro ma ciana ciake. Kwoguo, athathaiya a Jehova no meigue marĩ na wĩyathi wa kũmwĩra mabataro mothe ma ngoro ciao. Nĩ ũndũ wa kũmenya atĩ hingo ciothe amendagĩra maũndũ mega, no mahote gwĩtĩkĩra macokio ma mahoya mao o na angĩkorũo timo marerĩgĩrĩire. *
Ũthomi wa Bibilia wa Ĩpuro
^ kib. 4 Ngerekano ĩyo ya Jesu yonanagia maũndũ meekagwo mũtũũrĩre-inĩ. Ayahudi monaga gũtugana ũrĩ ũndũ wa bata mũno. Famĩlĩ yarugaga mĩgate ya kũigana mũthenya ũcio, kwoguo kũhoya kwarĩ ũndũ wekagwo mũndũ angĩathirĩirũo nĩyo. Na mangĩakorirũo marĩ athĩni, famĩlĩ yothe yakomaga thĩ rumu ĩmwe.
^ kib. 7 Nĩgetha ũmenye makĩria ũrĩa ũngĩhoya na ũiguo nĩ Ngai, rora gĩcunjĩ gĩa 17 kĩa ibuku Bibilia Ĩrutanaga Atĩa Kũna? rĩrĩa rĩcabĩtwo nĩ Aira a Jehova.
