NĨGUO tũcokie kĩũria kĩu, reke twarĩrĩrie na njĩra nguhĩ matuĩro merĩ ma Ngai thĩinĩ wa Bibilia—Kĩguũ kĩa hĩndĩ ya Nuhu na kũniinwo kwa Akanaani.

ŨRĨA ANDŨ MOIGAGA: “Ngai ndonanirie tha rĩrĩa aarehire kĩguũ kĩrĩa kĩaniinire andũ othe tiga o Nuhu na famĩlĩ yake.”

ŨRĨA BIBILIA ĨRUTANAGA: Ngai oigire ũũ: “Ndikenaga nĩ ũndũ wa gĩkuũ kĩa mũndũ mwaganu; no rĩrĩ, nĩ kaba mũndũ ũcio mwaganu agarũrũke atigane na mĩthiĩre ĩo yake nĩguo atũũre muoyo.” (Ezekieli 33:11) Kwoguo hĩndĩ ya Nuhu Ngai ndaakeneire kũniina andũ aganu. No eekire ũguo nĩkĩ?

Bibilia yonanagia atĩ rĩrĩa Ngai atuĩrĩire andũ aganu hĩndĩ ĩyo ya tene, aigire ‘kĩonereria harĩ andũ arĩa mangĩikaraga matetigĩrĩte Ngai thutha ũcio.’ (2 Petero 2:5, 6) Aigire kĩonereria kĩrĩkũ?

Mbere, Ngai onanirie atĩ o na gũtuĩka ndakenagio nĩ kũniina andũ, nĩ onaga arĩa matarĩ tha na manyamaragia arĩa angĩ na agatũma manyitwo nĩ moimĩrĩra ma ciĩko ciao. Ica ikuhĩ, nĩ ekũniina wagi wothe wa kĩhooto na mĩnyamaro.

Kerĩ, kĩonereria kĩu kĩa Ngai kĩa mahinda ma tene kĩonanagia atĩ, nĩ aheanaga mũkaana na njĩra ya wendo mbere ya gũtuĩra andũ. Nuhu aarĩ mũhunjia wa ũthingu, no andũ matiamũiguire. Bibilia yugaga ũũ: ‘matiatindanĩire kinya rĩrĩa kĩguũ kĩu kĩnene gĩokire gĩkĩmatwara othe.’—Mathayo 24:39.

Hihi Ngai no arũmagĩrĩra ithimi icio? Ĩĩ. Kwa ngerekano, nĩ aahete andũ ake Isiraeli mũkaana atĩ mangĩekire maũndũ ma waganu ta marĩa meekagwo nĩ ndũrĩrĩ iria ciamarigicĩirie, nĩ angĩetĩkĩririe thũ imahithũkĩre; cianange Jerusalemu; na imatware ithamĩrio. Nĩ meekire maũndũ marĩa maakanĩtio, o na makĩruta ciana magongona. Hihi Jehova nĩ aamoeire ikinya? Ĩĩ, no nĩ thutha wa kũmatũmĩra anabii maita maingĩ nĩguo magarũrĩre mĩthiĩre yao atanoya ikinya. O na ningĩ nĩ oigire ũũ: “Mwathani Jehova ndarĩ ũndũ angĩĩka atamenyithĩtie ndungata ciake anabii, ndundu ĩo yake.”—Amosi 3:7.

ŨRĨA ŨNDŨ ŨCIO ŨGŨKONIĨ: Kĩonereria kĩa mahinda mahĩtũku kĩgiĩ matuĩro ma Jehova nĩ  gĩtũheaga mwĩhoko. Kwoguo no tweterere tũrĩ na ma atĩ Ngai nĩ agatuĩra arĩa matũmaga andũ manyamarĩke. Bibilia yugaga ũũ: “Arĩa mekaga ũũru nĩ kũng’ũrio makang’ũrio . . . No rĩrĩ, andũ arĩa ahoreri nĩo makagaya thĩ, na matũũre mekenagĩra tondũ wa kũingĩhĩrũo nĩ thayũ.” (Thaburi 37:9-11) Hihi wee ũkuona atĩa igũrũ rĩgiĩ ituĩro rĩa Ngai rĩrĩa rĩkehereria andũ mĩnyamaro? Na githĩ ti rĩa tha?

ŨRĨA ANDŨ MOIGAGA: “Kũniinwo kwa Akanaani kuonanagia Ngai ndarĩ tha, na no kũringithanio na njũragano cia andũ kĩmumu cia kĩĩrĩu.”

ŨRĨA BIBILIA ĨRUTANAGA: “Nĩ gũkorũo mĩthiĩre yake [Ngai] yothe nĩ ya kĩhooto. Nake nĩwe Mũrungu ũrĩa mwĩhokeku, o na wa kĩhooto.” (Gũcokerithia Maathani 32:4) Ituĩro rĩa Ngai rĩtingĩringithanio na mbaara cia andũ. Nĩkĩ? Tondũ ndahaana ta mũndũ, wee no ahote gũthoma ngoro ũguo nĩ kuuga, ũrĩa mũndũ ahaana.

Kwa ngerekano, rĩrĩa Ngai atuĩrĩire matũũra ma Sodomu na Gomora na akiuga nĩ ekũmaniina, Iburahimu mũndũ waarĩ mwĩhokeku nĩ eyũragia kana itua rĩu nĩ rĩngĩgakorũo rĩrĩ rĩa kĩhooto. Ndeciragia ũrĩa Ngai wĩ kĩhooto ‘angĩninanĩria andũ arĩa athingu o na arĩa aaganu hamwe.’ Ngai arĩ na wetereri nĩ aamwĩrire atĩ, kũngĩkoneka andũ ikũmi ehokeku Sodomu, ndangĩkaniina itũũra rĩu nĩ ũndũ wa wao. (Kĩambĩrĩria 18:20-33) Ũhoro wa ma nĩ atĩ, Ngai nĩ aathuthuririe ngoro ciao na akĩona harĩa waganu wao wakinyĩte.—1 Maũndũ ma Matukũ ma Tene 28:9.

Ũndũ ũmwe na ũcio, Ngai nĩ atuĩrĩire na kĩhooto Akanaani maniinwo. Akanaani acio maarĩ andũ mataarĩ tha o na hanini, tondũ maacinaga ciana ciao irĩ muoyo magongona-inĩ mao. * (2 Athamaki 16:3) Akanaani acio nĩmoĩ atĩ Jehova nĩ aathĩte Aisiraeli meyoere bũrũri wao wothe. Arĩa maaregire gũthiĩ nĩguo marũe na Isiraeli, maatiarũaga nao tu, ĩndĩ marũaga na Jehova ũrĩa wonanĩtie atĩ aarĩ hamwe na andũ ake.

Makĩria ma ũguo, Ngai nĩ onanirie tha kũrĩ Akanaani arĩa matigire waganu wao na magĩĩtĩkĩra ithimi cia Jehova ciĩgiĩ mĩtugo. Kwa ngerekano, Mũkanaani mũmaraya wetagwo Rahabu, nĩ aahonokirio, o hamwe na andũ a nyũmba yao. Ningĩ, rĩrĩa Akanaani arĩa maikaraga itũũra rĩa Gibeoni maahoire maiguĩrũo tha, othe nĩ mahonokirio hamwe na ciana ciao.—Joshua 6:25; 9:3, 24-26.

ŨRĨA ŨNDŨ ŨCIO ŨGŨKONIĨ: No twĩrute ũndũ wa bata kuumana na ituĩro rĩa Akanaani. Nĩ tũrakuhĩrĩria mũno ihinda rĩrĩa rĩarathĩtwo “mũthenya ũrĩa wa cira, o na wa kũninwo kwa andũ arĩa matetigagĩra Ngai.” (2 Petero 3:7) Angĩkorũo nĩ twendete Jehova, nĩtũkagunĩka rĩrĩa akaniina mĩnyamaro na njĩra ya kweheria arĩa mareganaga na wathani wake wa kĩhooto.

Jehova nĩ atũririkanagia na njĩra ya wendo atĩ, matua marĩa aciari matuaga nĩ mahutagia ciana ciao. Kiugo gĩake kiugaga ũũ: “Tondũ ũcio thuura muoyo, nĩgetha ũtũũre muoyo, wee mwene, o na njiaro ciaku, wendage Jehova Ngai waku, na wathĩkagĩre uuge wake, na wĩgwatanagie nake.” (Gũcokerithia Maathani 30:19, 20) Hihi icio nĩ ciugo cia Ngai ũtarĩ tha kana nĩ cia Ngai wendete andũ na wendaga matue matua mega?