Ndaaciarĩirũo gataũni-inĩ kanini ga Texcoco. Hĩndĩ ĩyo barabara nyingĩ cia kũu ciarĩ cia tĩĩri na ciarĩ na rũkũngũ rũingĩ mũno. Andũ aingĩ kuuma icagi iria ciarĩ hakuhĩ makuuaga indo na ndigiri magĩthiĩ kwendia. Twarĩ famĩlĩ thĩni mũno, na ndaarĩ wa mũgwanja harĩ ciana kenda. Baba aatumaga guaraches (nginyĩra) nĩguo arũmbũiye mabataro ma famĩlĩ. No aakuire ndĩ wa mĩaka mũgwanja. Kuuma hĩndĩ ĩyo, mami nĩ eerutanagĩria mũno gwethera famĩlĩ gĩa kũrĩa.

Guuka nĩ aathakaga ngita na nĩwe watongoragia gĩkundi kĩa athaaki a inanda arĩa mainaga nyĩmbo cia ndini. Hakuhĩ andũ othe a famĩlĩ iitũ nĩ mathaakaga kĩnanda. Mami aarĩ mũini wa kwaya ya kanitha, mama nake nĩ ainaga na agathaaka piano. Nĩ twendete mũno maũndũ ma ndini—niĩ ndaarĩ kahĩĩ gatungati kanitha-inĩ wa Gatoreki, na ndeeriragĩria gũtuĩka mũmishonarĩ wa Gatoreki. O hĩndĩ ĩyo, nĩ ndendete mũno kwĩrorera vidio cia mathako ma mbaara. O ũrĩa ndeeroragĩra vidio icio, noguo ndathiaga na mbere kwenda mbaara na ũhinya.

Ndĩ taũni-inĩ ya Puebla nĩ ndaingĩrire cukuru yarutanaga maũndũ ma ndini. Muoroto wakwa waarĩ gũtuĩka mũhunjia wa Gatoreki. No mwaka-inĩ wakwa wa mũthia cukuru-inĩ ĩyo, ngĩambĩrĩria gũthũũra ciĩko cia Kanitha wa Gatoreki. Mũmathĩa ũmwe nĩ endaga tũkomanie nake. Nĩ ndaaregire, no ũndũ ũcio ũkĩarahũra wendi wakwa wa kwenda kũhikania. Makĩria ma ũguo, nĩ ndonaga ũrĩa ahunjia amwe maikaraga mũtũũrĩre wa ũhinga. Na mũthia-inĩ, ngĩtiganĩria muoroto wakwa wa gũtuĩka mũhunjia.

 Nĩ ndatuire itua rĩa gũthomera maũndũ ma ũini cukuru-inĩ wa National Conservatory of Music thĩinĩ wa mũciĩ mũnene wa Mexico. Ndaarĩkia cukuru, ngĩhikania, na tũkĩgĩa ciana inya. Hĩndĩ ĩyo ndarutaga wĩra wa kũina Kanitha-inĩ wa Gatoreki, nĩguo hingie mabataro ma famĩlĩ yakwa.

Kuuma kĩambĩrĩria kĩhiko giitũ kĩarĩ na mathĩna. Nĩ ũndũ wa gũkorũo nĩ twaiguanagĩra ũiru na kũiganĩra marakara ngoro nĩ twarũaga kaingĩ. Twambĩrĩirie na kũrumanaga, na thutha ũcio kũrũaga. Thutha wa mĩaka 13, tũgĩtigana.

Ndacemanirie rĩa mbere na Aira a Jehova thutha wa gũtigana na mũtumia wakwa. Aira erĩ a Jehova mookire gwakwa makĩnjũria kana nĩ ngwenda kwĩruta Bibilia. Ndeciragia nĩ njũĩ maũndũ maingĩ ma ndini, kwoguo ngĩhaarĩria kũmoonia ũrĩa njũĩ kũmakĩra. Ndamoragia ciũria nditũ ngĩciria matingĩhota gũcokia. No ũndũ wa magegania nĩ atĩ, hĩndĩ ciothe maacokagia wega makĩhũthĩra Bibilia. Ngĩambĩrĩria kuona hatirĩ ũndũ ndoĩ. O na kũrĩ ũguo, tondũ ndaarĩ na mĩhang’o mĩingĩ na mũtumia wakwa ndendete Aira a Jehova, ngĩtiga kwĩruta.

Thutha wa mĩaka ĩtano, nĩ ndambĩrĩirie kwĩruta na Aira a Jehova rĩngĩ na hĩndĩ ĩyo ndaikaranagia na mũtumia ũngĩ wetagwo Elvira. Tondũ Elvira ndakararagia Aira a Jehova, nĩ ndaathire na mbere kwĩruta Bibilia itegũtĩrĩria. O na kũrĩ ũguo, nĩ ndoire ihinda inene kũgarũrĩra mũtũũrĩre wakwa wa tene.

Nĩ ndaamenyire atĩ angĩkorũo nĩ ngwenda gũtungatĩra Jehova na ngoro yakwa yothe, nĩ ndabataraga gwĩka mogarũrũku manene. Mbere, ngĩtiga kũinaga Kanitha-inĩ wa Gatoreki, na kwoguo ngĩambĩrĩria gwetha wĩra ũngĩ nĩguo hote kũrũmbũiya mabataro ma famĩlĩ yakwa. (Kũguũrĩrio 18:4) Ningĩ nĩ ndabataraga kwandĩkithia kĩhiko giitũ na Elvira.

No ũndũ ũrĩa waarĩ mũritũ makĩria waarĩ kwĩgirĩrĩria marakara makwa moru. Maandĩko maya merĩ ma Bibilia nĩ mandeithirie: Thaburi 11:5, rĩrĩa rĩonanagia atĩ Jehova nĩ athũire ũhinya na 1 Petero 3:7, rĩrĩa rĩandutire atĩ angĩkorũo nĩ ngwenda Jehova aiguage mahoya makwa, no mũhaka heage mũtumia wakwa gĩtĩo. O ũrĩa ndecũranagia maandĩko macio na kũhoya ũteithio wa Jehova, o kahora nĩ ndahotire kũgirĩrĩria marakara makwa.

Rĩu nĩ ngenagĩra mũtũũrĩre wa famĩlĩ ũrĩ na gĩkeno. Nĩ ndĩrageria gũcokia ũrata na ariũ akwa arĩa twagĩte na mũtumia wa tene na nĩ ndĩrageria mũno gũteithia famĩlĩ yakwa kũgĩa na wĩtĩkio mũrũmu.

Ndĩ mũnini, ndaarĩ na muoroto wa gũtuĩka mũhunjia na ndeithagie andũ. Rĩu nĩ nyonaga atĩ mũtũũrĩre wakwa nĩ ũrĩ na muoroto. Nũmbũyagia mabataro ma famĩlĩ yakwa na njĩra ya kũrutana nyĩmbo. Nĩ njokagĩria Jehova ngatho mũno nĩ kũũngirĩrĩria, na kũũhe mweke wa kũgarũrĩra mũtũũrĩre wakwa na gũtuĩka mũndũ mwega!