NŨ ŨTARĨ watangĩka mũno ũtũũro-inĩ nginya akahoya ũteithio kũrĩ mũndũ ũngĩ? Rĩrĩa tũratangĩka kaingĩ tũhoyaga ũteithio kũrĩ mũrata ũrĩ tha na wanacemania na thĩna wa mũthemba ũcio. Mũrata mwega nĩ ũrĩa ũrĩ tha na ũĩ wega thĩna witũ.

Andũ amwe makoragwo na mawoni ta macio ũhoro-inĩ wĩgiĩ mahoya. Handũ ha kũhoya Ngai ũrĩa harĩ o monaga arĩ mũtũgĩru mũno na wa gwĩtigĩrũo, monaga nĩ kaba kũhoya atheru. Moigaga atĩ atheru no mamaiguĩre tha, tondũ manahiũrania na mathĩna marĩa andũ aingĩ macemanagia namo. Kwa ngerekano, andũ arĩa maanate indo cia bata harĩ o, monaga arĩ wega kũhoya “Mũtheru” Anthony wa Padua ũrĩa wĩrĩkanaga atĩ nĩwe ũroraga indo iria ciũraga kana kũiyũo. Rĩrĩa marahoera nyamũ ciao iria ndwaru, monaga arĩ wega kũhoya “Mũtheru” Francis wa Assisi kana kũrĩ “Mũtheru” Jude Thaddeus rĩrĩa mathuthĩkĩte ngoro mũno.

No tũngĩmenya atĩa kũringana na Maandĩko kana hihi nĩ wega kũhoya atheru? Tondũ rĩrĩa tũrahoya nĩ kwaria tũkoragwo tũkĩaria na Ngai-rĩ, no twende kũmenya ũũ: Hihi nĩ aiguaga mahoya maitũ? Ningĩ githĩ ti wega kwĩyũria ũũ: Ngai aiguaga atĩa rĩrĩa tũrahoya atheru?

Ũndũ ũcio wa kũhoya atheru uumanĩte na ũrutani wa Kanitha wa Gatoreki ũrĩa ũrutanaga atĩ nĩ wega kũhoya kũgerera atheru. Moigaga atĩ “mũndũ no aiguĩrũo tha angĩthaithana kũgerera mũndũ ũrĩa wagĩrĩire maitho-inĩ ma Ngai,” kũringana na New Catholic Encyclopedia. Kwoguo, mũndũ ũrĩa ũhoyaga atheru akoragwo na mwĩhoko atĩ nĩ ekũiguĩrũo tha cia mwanya tondũ atheru acio nĩ arathime nĩ Ngai.

Hihi ũguo nĩguo Bibilia ĩrutanaga? Andũ amwe moigaga atĩ kũgerera maandĩko marĩa mũtũmwo Paulo aandĩkire, nĩ aaigire mũthingi wa kũhoyaga atheru. Kwa ngerekano, aandĩkĩire Akristiano a Roma ũũ: “Na rĩrĩ, ariũ a Ithe witũ, nĩndamũthaitha nĩ ũndũ wa Mwathani witũ Jesu Kristo, o na ningĩ nĩ ũndũ wa wendani ũrĩa twĩkĩrĩtwo nĩ Roho, atĩ mũgianagĩre hamwe na niĩ mũkĩhoyaga Ngai nĩ ũndũ wakwa.” (Aroma 15:30) Hihi Paulo nĩ kũũria oragia Akristiano acio mamũthaithanĩrĩre harĩ Ngai? Aca tiguo. O na korũo noguo-rĩ, nũ ũngĩathaithanĩire ũrĩa ũngĩ, nĩ Paulo mũtũmwo wa Kristo-ĩ, kana nĩo? Ũrĩa Paulo eendaga kuonania nĩ atĩ nĩ wega kũũria Mũkristiano ũrĩa ũngĩ atũririkane mahoya-inĩ. No ũndũ ũcio nĩ ngũrani na kũhoya kũrĩ mũndũ ũrecirĩrio arĩ igũrũ atĩ nĩguo amenyithie Ngai mathĩna maku. Nĩkĩ hihi?

Thĩinĩ wa Injiri ya mũtũmwo Johana, Jesu oigĩte ũũ: “Nĩ niĩ njĩra, na nĩ niĩ ũhoro-ũrĩa-wa-ma, na nĩ niĩ muoyo; gũtirĩ mũndũ ũkinyaga gwĩ Ithe  witũ, atokĩire harĩ niĩ.” (Johana 14:6) Ningĩ oigĩte ũũ: “Ithe witũ nĩ akaamũhe ũndũ o wothe mũkahoya na rĩĩtwa rĩakwa.” (Johana 15:16, The New Jerusalem Bible) Jesu ndoigire atĩ twagĩrĩirũo kũmũhoya arĩ we, nake acoke amenyithie Ngai mahoya maitũ. Ithenya rĩa ũguo, nĩgetha Ngai athikĩrĩrie mahoya maitũ, no mũhaka tũmũhoe arĩ we kũgerera Jesu no ti kũgerera mũndũ ũngĩ o na ũrĩkũ.

Rĩrĩa arutwo a Jesu maamũririe amarute kũhoya, aamacokeirie ũũ: “Rĩrĩa mũkũhoya Ngai, ugagai atĩrĩ, Ithe witũ [wĩ Igũrũ], Rĩĩtwa rĩaku nĩrĩamũrũo.” (Luka 11:2) Nĩ ũhoro wa ma atĩ, “rĩrĩa,” kana hĩndĩ ciothe tũkĩhoya, twagĩrĩirũo kũhoya Ngai we mwene no ti Jesu kana mũndũ ũngĩ o wothe. Kũringana na morutani maya ma ĩmwe kwa ĩmwe ma Jesu-rĩ, na githĩ tũtirona hatarĩ nganja atĩ mahoya maitũ magĩrĩirũo kwerekerio kũrĩ Ngai kũgerera Jesu Kristo no ti kũrĩ “mũtheru” o na ũrĩkũ?

Mahoya nĩ ma bata mũno ũthathaiya-inĩ witũ, na gũthathaiya mũndũ ũngĩ tiga Ngai ti ũrutani wa Bibilia. (Johana 4:23, 24; Kũguũrĩrio 19:9, 10) Na nĩkĩo twagĩrĩirũo kwerekeria mahoya maitũ kũrĩ Ngai tu.

Mahunjio-inĩ make ma Kĩrĩma-inĩ, Jesu nĩ aaheanire ngerekano ya mwana akĩhoya ithe irio. Hihi ithe no ahe mwana wake ihiga amwĩtĩtie mũgate? Kana amũhe nyoka handũ ha thamaki? (Mathayo 7:9, 10) Ũcio nĩ ũndũ mũciari wĩ wendo atangĩka!

Ta tua rĩu ũrĩ mũciari. Harĩ ũndũ wa bata mũno mwana waku arenda gũkwĩra. Nĩ ũkũrĩtie ũrata wa hakuhĩ mũno nake, na ningĩ nĩ ũkoragwo ho hĩndĩ ciothe rĩrĩa aragũbatara. O na kũrĩ ũguo, nĩ ũndũ wa gwĩtigĩra ũrĩa ũkuuga, akoria mũndũ ũngĩ aarie nawe ithenya rĩake. Ũngĩigua atĩa? Ĩ angĩkorũo nĩ emenyeretie kwaragia nawe kũgerera mũndũ ũcio na nĩ aronania atĩ nĩ egũthiĩ na mbere gwĩka ũguo? Hihi no ũkenio nĩ ũndũ ũcio? Hatarĩ nganja ndũngĩkena! Aciari arĩa mendete ciana ciao mendaga imaarĩrie na njĩra ya ĩmwe kwa ĩmwe, na imoorie ũndũ o wothe itarĩ na guoya.

Akĩonania ũrĩa andũ mangĩhũthĩra ngerekano ĩyo ya mwana akĩhoya ithe irio, Jesu eerire andũ ũũ: “Hakĩrĩ ũguo-rĩ, mwagĩkorũo inyuĩ, na mũrĩ oru-rĩ, nĩmũũĩ kũhe ciana cianyu iheo njega, ĩ Ithe wanyu wĩ Igũrũ angĩkĩria atĩa kũhe indo njega arĩa mamũhoyaga?” (Mathayo 7:11) Hatarĩ nganja, mũciari nĩ arĩ wendi mũnene wa kũhe mwana wake indo iria njega. Ithe witũ wa igũrũ akoragwo na wendi mũnene o na makĩria wa gũthikĩrĩria na gũcokia mahoya maitũ.

Ngai endaga tũmũhoye na njĩra ya ĩmwe kwa ĩmwe o na angĩkorũo nĩ tũritũhĩirũo mũno nĩ mehia maitũ. Ndaheaga mũndũ ũngĩ o na ũrĩkũ wĩra wa gũthikagĩrĩria mahoya maitũ. Bibilia ĩtwĩraga ũũ: ‘Rekereria Jehova mũrigo waku; nake nĩwe ũrĩgũtiiragĩrĩra.’ (Thaburi 55:22) Handũ ha kwĩhoka atheru kana mũndũ ũngĩ o wothe akũhoere, twagĩrĩirũo kũgĩa na mawoni marĩa magĩrĩire kwerekera Jehova Ngai.

Ithe witũ wa igũrũ nĩ atũrũmbũyagia tũrĩ mũndũ ũmwe ũmwe. Nĩ endaga gũtũteithia rĩrĩa tũrĩ na mathĩna na nĩ atwĩkĩraga ngoro tũmũkuhĩrĩrie. (Jakubu 4:8) Na githĩ tũtikenaga mũno kũgĩa na mweke wa gũkuhĩrĩria Ngai, Ithe witũ, o we “mũigua wa mahoya”?—Thaburi 65:2.