Hihi ũrĩ wathutũkanio? Ũkĩimwo wĩra, ũkĩaga kũhingĩrio ũndũ mũna o na kana ũkĩhũthio nĩ ũndũ wa kũrĩa uumĩte, kana ũrĩa ũhaana? Angĩkorũo nĩguo, menya ndũrĩ wiki. Haha harĩ na ũhoro mwega: O na gũtuĩka maũndũ macio ma kwaganĩra gĩtĩo marĩ kũndũ guothe thĩinĩ wa thĩ-rĩ, igũrũ tiguo kũhaana. Mũtũmwo Mũkristiano Petero oigire atĩ, “Ngai ndatĩagĩra andũ maũthĩ kana ndarĩ mũthutũkanio.”—Thoma Atũmwo 10:34, 35.

Petero aaririe ciugo icio arĩ kũndũ mũndũ atangĩerĩgĩrĩire, mũciĩ kwa mũndũ wa Ndũrĩrĩ, wetagwo Korinelio. Petero aarĩ Mũyahudi, na aatũraga mahinda-inĩ marĩa Ayahudi monaga andũ a Ndũrĩrĩ marĩ thahu na matangĩanyitanĩire nao. Gũkĩrĩ ũguo-rĩ, nĩ kĩĩ Petero eekaga gwa Korinelio? Nĩ Jehova wabangĩte mũcemanio ũcio. Petero nĩ onetio kĩoneki akĩĩrũo ũũ: “Kĩndũ kĩrĩa Ngai atheretie, wee tiga gũgĩtua atĩ ti kĩamũre.” Petero ndaamenyaga atĩ mũthenya ũmwe mbere ya amũceereire, Korinelio nĩ onetio kĩoneki akerũo amũtũmanĩre oke. (Atũmwo 10:1-15) Rĩrĩa Petero aamenyire atĩ ũndũ ũcio uumĩte kwĩ Jehova, agĩitĩka kwaria.

Petero akiuga atĩrĩ, “Ti itherũ ndĩ kuona atĩ Ngai ndatĩagĩra andũ maũthĩ kana ndarĩ mũthutũkanio.” (Atũmwo 10:34) Kiugo “mũthutũkanio” na Kĩngiriki nĩ kuuga “gwĩtĩkĩra mothiũ.” (The Kingdom Interlinear Translation of the Greek Scriptures) Akĩarĩrĩria kiugo gĩkĩ, mũthomi ũmwe oigire ũũ: “Kĩonanagia ũrĩa mũcirithania aroraga gĩthithi kĩa mũndũ na akamũtuĩra kũringana na ũrĩa we amuona no ti kũringana na ũrĩa watho ugĩte.” Ngai ndathutũkanagia andũ nĩ ũndũ wa rũrĩrĩ rwao, kũrĩa mũndũ oimĩte, ũhoti wa mũndũ kana ũndũ ũngĩ o wothe.

Ithenya rĩa ũguo, Jehova aroraga ũrĩa Ngoro ciitũ itariĩ. (1 Samueli 16:7; Thimo 21:2) Petero aacokire akiuga ũũ: “Thĩinĩ wa ndũrĩrĩ ciothe mũndũ ũrĩa ũmwĩtigagĩra na ageka maũndũ ma ũthingu nĩetĩkagĩrũo nĩwe.” (Atũmwo 10:35) Mũndũ wĩtigĩrĩte Ngai nĩ ũrĩa ũmũtĩĩte na ũmwĩhokaga na agethema ũndũ o wothe ũngĩmũrakaria. Mũndũ wĩkaga maũndũ ma ũthingu nĩ ũrĩa wĩkaga ũrĩa Ngai endaga. Jehova nĩ akenagio nĩ mũndũ ũmwĩtigagĩra na ageka maũndũ marĩa magĩrĩire.—Gũcokerithia Maathani 10:12, 13.

Ciugo icio cia Petero no itwĩkĩre ngoro angĩkorũo twanathutũkanio. Jehova nĩ aragucĩrĩria andũ kuuma mabũrũri mothe ũthathaiya-inĩ wa ma. (Johana 6:44; Atũmwo 17:26, 27) Nĩ athikagĩrĩria na agacokia mahoya ma ndungata ciake atekũrora rũrĩrĩ, bũrũri, kana ũhoti wa mũndũ. (1 Athamaki 8:41-43) Tũrĩ na ma atĩ Jehova arĩ igũrũ onaga andũ othe marĩ rũrĩrĩ rũmwe—rũrĩrĩ rwa andũ. Na githĩ ti wega kwĩruta makĩria ũhoro wĩgiĩ Ngai ũcio ũtarĩ mũthutũkanio?