KUUMA NGOTHI-INĨ: HIHI NĨ KŨRĨ NDINI TŨNGĨHOKA?

Nĩkĩ Arĩ Wega Ũthuthurie Ndini Yaku?

Ta tua ũrenda gũthĩnjwo ũrĩ na mũrimũ mũũru mũno. No wende gũkorũo na mwĩhoko biũ harĩ ndagĩtarĩ ũrĩa ũragũthĩnja tondũ ũtũũro waku ũrĩ moko-inĩ make. Nĩ ũndũ ũcio-rĩ, na githĩ ti wega gũthuthuria rekondi yake?

O ũndũ ũmwe na ũcio, nĩ wega ũthuthurie ndini yaku na kinyi. Angĩkorũo ũrĩ ndini-inĩ, nĩ kũiga ũkoragwo ũigĩte ũtũũro waku wa kĩĩroho moko-inĩ mayo, o hamwe na kĩĩrĩgĩrĩro gĩaku gĩa gũkaahonoka.

Jesu nĩ aatũrutire ũrĩa tũngĩthuthuria na tũkũũrane ndini ya ma. Oigire ũũ: “O mũtĩ, ũmenyekaga nĩ ũndũ wa maciaro maguo mwene.” (Luka 6:44) Kwa ngerekano, ũngĩthuthuria kanitha kana ndini o yothe-rĩ, wĩyũrie, ĩciaraga maciaro marĩkũ? Hihi atongoria a yo no mbeca meciragia ũhoro wa cio? Hihi arũmĩrĩri ayo nĩ mahũthagĩra mootaro ma Bibilia ũhoro-inĩ wĩgiĩ mbaara na mĩtugo? Ningĩ-rĩ, hihi nĩ kũrĩ ndini tũngĩhoka? Tũgũkũũria ũthome icunjĩ iria irũmĩrĩire.

[Mbica karatathi ka 3]

[Mbica karatathi ka 3]

“O mũtĩ, ũmenyekaga nĩ ũndũ wa maciaro maguo mwene.”—Luka 6:44