Nĩwe ‘Ũhũnagia Wega Ngoro Ciitũ’
KUHĨRĨRIA NGAI
Nĩwe ‘Ũhũnagia Wega Ngoro Ciitũ’
Hihi Jehova nĩ atũrũmbũyagia kũna, kana o na ndatindanagĩra na mathĩna ma andũ gũkũ thĩ? Macokio ma Bibilia megiĩ kĩũria kĩu nĩ matwĩkĩraga ngoro mũno. Hatarĩ nganja Ngai nĩ atũrũmbũyagia, na nĩ endaga tũkenere ũtũũro. O mũthenya nĩ arekaga andũ makenere wega wake mũingĩ, o na arĩa matamũcokagĩria ngatho. Ta wĩcirie ciugo cia mũtũmwo Paulo.
Paulo eerire andũ a itũũra rĩa Lusitera arĩa mataarĩ athathaiya a Ngai ũũ: “Nake [Ngai] nĩaatiganĩirie ndũrĩrĩ ciothe ithiage na mĩthiĩre yacio nyene mahinda marĩa ma njiarũa iria ithirĩte. Ĩndĩ ndakĩigana gwĩtiga atarĩ na ũira wa kũmuumbũra atĩ arĩ ho, nĩ ũndũ wa ũrĩa aatuganaga, akamuuragĩria mbura yumĩte igũrũ na akamũrehagĩre imera cia gũciaraga irio, nĩguo mũhũnio wega, na ngoro cianyu ciiyũrũo nĩ gĩkeno.” Paulo eendaga kwĩra andũ acio atĩa?
Andũ a Lusitera nĩ mangĩataũkĩirũo o na ihenya nĩ ciugo icio cia ma cia Paulo. Maarĩ arĩmi na maaikaraga bũrũri warĩ mũnoru na woiraga mbura nyingĩ. Ĩndĩ o ta ũrĩa Paulo aamaririkanirie, Ngai nĩwe Kĩhumo kĩa mbura na imera cia irio. Kwoguo, hĩndĩ yothe mangĩagethire kwa ũingĩ na marĩe irio njega, maakoragwo magĩkenera wega wa Ngai.
Ciugo icio cia Paulo kũrĩ andũ a Lusitera nĩ itũrutaga maũndũ maigana ũna ma bata megiĩ Jehova Ngai.
Jehova nĩ atũheaga wĩyathi wa gwĩthurĩra. Ta rora wone atĩ Jehova nĩ aarekereirie Ndũrĩrĩ ciothe “ithiage na mĩthiĩre yacio nyene.” Ibuku rĩmwe rĩandĩkĩirũo ataũri a Bibilia riugaga atĩ ciugo icio no itaũrũo “gũthiĩ na mĩthiĩre ĩrĩa ĩngĩamakenirie” kana “gwĩka ũrĩa moonaga arĩ wega.” Jehova nderaga mũndũ amũtungatĩre kĩa hinya. Nĩ atũhete wĩyathi wa gwĩthurĩra, ũhoti wa gũthuura ũrĩa tũkũhũthĩra ũtũũro witũ.
Jehova nĩ endaga tũmũmenye. Paulo aatarĩirie atĩ, Ngai ndaigana “gwĩtiga atarĩ na ũira.” Ibuku rĩu rĩkũgwetetwo hau kabere riugaga atĩ ciugo icio no itaũrũo, “nĩ eyonanĩtie wega kũrĩ andũ we nĩ Ngai wa mũthemba ũrĩkũ.” Ũũmbi wa Ngai nĩ ũrutaga ũira mwega wĩgiĩ ‘ngumo ciake iria itonekaga’ o hamwe na wega, ũũgĩ, hinya, na wendo wake. (Aroma 1:20) Jehova nĩ aguũrĩtie maũndũ makĩria mamwĩgiĩ thĩinĩ wa Bibilia. (2 Timotheo 3:16, 17) Na githĩ ndũkuona atĩ nĩ endaga tũmũmenye?
Jehova nĩ endaga tũgĩe na gĩkeno. Paulo oigire atĩ Ngai ahũnagia ‘wega ngoro ciitũ, na ikaiyũrũo nĩ gĩkeno.’ O na mũndũ mwĩhia na ũtetigĩrĩte Jehova no arĩe irio ahũne nginya ngoro yake ĩiganĩre na agĩe na gĩkeno ũtũũro-inĩ. Ĩndĩ Ngai nĩ endaga tũgĩe na gĩkeno kĩa ma na gĩa gũtũũra. Ũndũ ũcio no ũhoteke tũngĩĩruta ma ĩrĩa ĩmwĩgiĩ na tũmĩhũthĩre ũtũũro-inĩ witũ.
Ithuothe nĩ tũkenagĩra wega wa Jehova o mũthenya. Na githĩ ti wega wĩrute makĩria ũrĩa ũngĩcokeria Ngai ngatho o we ũhũnagia ngoro yaku ‘wega na ĩkaiyũrũo nĩ gĩkeno’?
Thoma gĩcunjĩ kĩa Bibilia mweri-inĩ wa Julaĩ
[Mbica karatathi ka 11]
O mũthenya Ngai nĩ arekaga andũ makenere wega wake mũingĩ, o na arĩa matamũcokagĩria ngatho
