Athomi Aitũ Maroria Atĩrĩ . . .

Andũ amwe magĩte kũgwetwo marĩtwa nĩkĩ thĩinĩ wa Bibilia?

Thĩinĩ wa ibuku rĩa Ruthu, harĩ mũndũ wĩtĩtwo Ng’ania waregire kũruta wĩra ũrĩa aaheetwo ta ũrĩa Watho wa Musa wonanĩtie. (Ruthu 4:1-12) Hihi no tuuge atĩ andũ arĩa othe matagwetetwo marĩtwa thĩinĩ wa Bibilia magĩte kũgwetwo tondũ maarĩ oru kana matiarĩ a bata?

Aca tiguo. Ta wĩcirie ũhoro wa mũndũ ũngĩ. Jesu eerire arutwo ake mathiĩ itũũra-inĩ “kwĩ Ng’ania [“mũndũ mũna,” The Holy Bible in Gĩkũyũ Language]” nĩguo mahaarĩrĩrie nyũmba nĩ ũndũ wa Bathaka yake ya mũico. (Mathayo 26:18) Hihi no tuuge atĩ mũndũ ũcio wĩtĩtwo “Ng’ania” mũhari-inĩ ũcio aarĩ mũndũ mũru kana atĩ aagire kũgwetwo tondũ ndaarĩ wa bata? Tiguo o na hanini; hatarĩ nganja “mũndũ mũna” ũrĩa ũgwetetwo mũhari-inĩ ũcio aarĩ mũrutwo wa Jesu. Agĩte kũgwetwo rĩĩtwa tondũ tirĩo rĩarĩ rĩa bata ũhoro-inĩ ũcio.

Ningĩ Bibilia nĩ ĩgwetete marĩtwa ma andũ aingĩ maarĩ oru; na ĩkaaria ũhoro wa andũ aingĩ maarĩ ehokeku matagwetetwo marĩtwa. Kwa ngerekano, rĩĩtwa rĩa mũtumia wa mbere, Hawa, nĩ rĩũĩkaine wega. O na kũrĩ ũguo, nĩ aatũmire Adamu ehie nĩ ũndũ wa mwĩyendo na ũremi wake, na agĩtũingĩria thĩna-inĩ ithuothe. (Aroma 5:12) Mũgarũ na Hawa, rĩĩtwa rĩa mũtumia wa Nuhu rĩtigwetetwo thĩinĩ wa Maandĩko, no nĩ tũgunĩkaga mũno nĩ ũndũ wa wathĩki wake agĩteithĩrĩria mũthuriwe wĩra-inĩ wake wa bata. Hatarĩ nganja, kũu ti kuuga atĩ ndaarĩ wa bata kana atĩ Jehova ndaamwĩtĩkĩrĩte.

Kũrĩ andũ angĩ matagwetetwo marĩtwa thĩinĩ wa Bibilia meekire maũndũ manene na ma bata magĩtungatĩra Jehova. Ũmwe nĩ kairĩtu karĩa kaarĩ ngombo kwa Naamani, mũnene wa mbũtũ ya Suriata ũrĩa warĩ na mangũ. Keerire mũtumia wa Naamani ũhoro wĩgiĩ mũnabii wa Jehova thĩinĩ wa Isiraeli karĩ na ũmĩrĩru. Ũndũ ũcio ũgĩtũma Naamani ahonio na njĩra ya kĩama. (2 Athamaki 5:1-14) Nake mwarĩ wa Jefitha ũrĩa warĩ mũtirĩrĩri bũrũri thĩinĩ wa Isiraeli, nĩ aatũigĩire kĩonereria kĩega kĩa wĩtĩkio. Nĩ aaregire na kwĩyendera kwaga kũhika na kũgĩa ciana nĩgetha ahingie mwĩhĩtwa ũrĩa ithe eehĩtĩte. (Atiirĩrĩri Bũrũri 11:30-40) Ũndũ ũmwe na ũcio, thaburi makĩria ma 40 ciaandĩkirũo nĩ andũ matagwetetwo marĩtwa, na nĩ kũrĩ anabii aingĩ maarutire mawĩra ma bata marĩ na wĩhokeku matagwetetwo marĩtwa.—1 Athamaki 20:37-43.

Kĩonereria kĩngĩ kĩega makĩria nĩ kĩa araika arĩa ehokeku. Makoragwo marĩ milioni nyingĩ mũno, ĩndĩ no Jibiraili na Mikaeli tu magwetetwo marĩtwa thĩinĩ wa Bibilia. (Danieli 7:10; Luka 1:19; Judasi 9) Acio angĩ othe matigwetetwo marĩtwa. Kwa ngerekano, Manoa, ithe wa Samsoni, oririe mũraika ũmwe ũũ: “Wĩtagwo atĩa, nĩ getha rĩrĩa maũndũ macio uugĩte makahingio tũgagũtĩa?” Nake mũraika ũcio akĩmũũria atĩrĩ, “Ũkũrĩũria nĩkĩ?” Nĩ ũndũ wa wĩnyihia, mũraika ũcio nĩ aaregire kũheo gĩtĩo kĩrĩa kĩagĩrĩire kũheo Ngai wiki.—Atiirĩrĩri Bũrũri 13:17, 18.

Bibilia ndĩtaaragĩria kũndũ guothe kĩrĩa gĩtũmĩte andũ amwe magwetwo na angĩ mage kũgwetwo marĩtwa. Ĩndĩ no twĩrute maũndũ maingĩ kuumana na andũ ehokeku arĩa maatungatagĩra Ngai mategũthingata ngumo kana gũtũũgĩrio.

[Mbica karatathi ka 10]