BIBILIA NĨ ĨGARŨRAGA MĨTŨŨRĨRE YA ANDŨ

“Nĩ ndambĩrĩirie gwĩciria na njĩra ndikĩru kũrĩa ũtũũro wakwa warorete”

Ta ũrĩa rũheanĩtwo nĩ Allan Hancock

RĨRĨA AACIARIRŨO: 1941

BŨRŨRI: AUSTRALIA

HISTORĨ: KŨNYUA THIGARA NA ŨRĨU

MŨTŨŨRĨRE WAKWA WA HAU KABERE: Ndarereirũo gataũni-inĩ getagwo Warialda, karĩa gakoragwo New South Wales. Aikari a Warialda nĩ arĩmi a mahiũ na irio cia mũgũnda. Taũni ĩyo nĩ thaka na ndĩkoragwo na wĩki-naĩ mũingĩ.

Nĩ niĩ irigithathi harĩ ciana ikũmi, na ndambĩrĩirie kũruta wĩra ndĩna mĩaka 13 nĩguo ndeithĩrĩrie kũhingia mabataro ma famĩlĩ itũ. Ndarutaga wĩra mĩgũnda-inĩ, tondũ ndiarĩ na gĩthomo kĩnene. Ndĩna mĩaka 15, ndarutaga wĩra wa kũhooreria mbarathi cia gĩthaka na gũcirĩithia.

Kũruta wĩra mĩgũnda-inĩ kwarĩ na wega na ũũru wakuo. Nĩ ndakenagĩra wĩra wakwa o na ũthaka wa mĩgũnda-inĩ. Mathaa ma hwaĩ-inĩ nĩ ndahurũkaga nja ngĩota mwaki ngĩroragĩra mweri na njata, na ngĩiguaga tũmĩnungo twega twa mahũa ma gĩthaka. Nĩ ndĩraririkana wega ngĩciria atĩ no mũhaka gũkorũo na Ũrĩa wombire indo icio cia magegania. O na kũrĩ ũguo, ndĩ kũu mĩgũnda-inĩ nĩ ndeingĩririe thĩinĩ wa mĩtugo mĩũru. Ngĩambĩrĩria kũhũthĩra ciugo njũru na kũnyua thigara, na ũndũ ũcio ũgĩtuĩka mũtugo ũtũũro-inĩ wakwa.

Rĩrĩa ndakinyirie mĩaka 18 ngĩthamĩra Sydney. Ngĩgeria kũria wĩra wa njeshi no ndioirũo tondũ ndiarĩ mũthomu. No nĩ ndonire wĩra ũngĩ na ngĩikara kũu mwaka ũmwe. Hĩndĩ ĩyo nĩrĩo ndacemanirie na Aira a Jehova riita rĩa mbere. Makĩnyita ũgeni mĩcemanio-inĩ yao na ndĩ kũu ngĩona atĩ ũhoro ũrĩa marutanaga nĩ wa ma.

Kahinda kanini thutha ũcio, ngĩciria gũcoka mĩgũnda-inĩ. Nĩ ũndũ ũcio ngĩthiĩ Goondiwindi, Queensland. Ndĩ kũu ngĩandĩkwo wĩra na ngĩhikania, no ngĩambĩrĩria kũnyua.

 Thutha wa kũhikania, tũkĩgĩa ciana igĩrĩ, na hĩndĩ ĩyo ngĩambĩrĩria gwĩciria na njĩra ndikĩru kũrĩa ũtũũro wakwa warorete. Ngĩririkana maũndũ marĩa ndaiguĩte Sydney mũcemanio-inĩ wa Aira a Jehova na ngĩtua itua rĩa kuoya ikinya.

Nĩ ndonire ngathĩti ya tene ya Mũrangĩri yarĩ na andirethi cia wabici ya Aira a Jehova bũrũri-inĩ wa Australia. Ngĩmatũmĩra marũa nĩguo mahe ũteithio. Nao makĩndũmĩra Mũira wa Jehova warĩ mwega mũno. Akĩambĩrĩria kũnduta Bibilia ihinda inini thutha ũcio.

ŨRĨA BIBILIA YAGARŨRIRE MŨTŨŨRĨRE WAKWA: O ũrĩa nderutaga Bibilia, noguo ndonaga bata wa kũgarũrĩra ũtũũro wakwa na njĩra nene. Rĩandĩko rĩmwe rĩahutirie ngoro mũno nĩ 2 Akorintho 7:1. Rĩtwĩraga ũũ: “Nĩtwĩtheragiei tũtiganage na ũndũ o wothe ũrĩa ũthũkagia mũndũ mwĩrĩ.”

Ngĩtua itua rĩa gũtiga kũnyua thigara na kũrĩo. Tondũ nĩ ndahũthĩrĩte njohi na thigara mĩaka mĩingĩ, ndwarĩ ũndũ mũhũthũ gũtigana nacio. No nĩ ndehotorete gũikara mũtũũrĩre ũrakenia Ngai. Ũndũ ũrĩa wandeithirie mũno nĩ gwathĩkĩra ũtaaro ũyũ wa Aroma 12:2: “Na mũtikahaananie ũhoro wanyu na wa andũ a gũkũ thĩ, no rĩrĩ, mũgarũrũke ũndũ ũngĩ nĩ ũndũ wa ngoro cianyu gũthondekwo meciria ma cio makerũhio.” Ngĩmenya atĩ nĩguo ngarũrĩre mĩtugo yakwa, nĩ ndabataraga gũkũria mwĩcirĩrie ũngĩ na kũmĩona ĩrĩ mĩũru, ta ũrĩa Ngai amĩonaga. Kũgerera ũteithio wake, nĩ ndatooririe mũtugo wa kũnyua thigara na kũrĩo.

No ũndũ ũrĩa warĩ mũritũ makĩria nĩ gũtiga kũhũthĩra ciugo njũru. Nĩ ndamenyaga ũtaaro wa Aefeso 4:29 ũrĩa ugaga ũũ: “Tigagai kwaria ciugo njũru na tũnua twanyu.” O na kũrĩ ũguo, ndiahotire o rĩmwe gũtiga kwaria ciugo njũru. Nĩ ndateithĩkire nĩ ũndũ wa gwĩcũrania rĩandĩko rĩa Isaia 40:26. Riugaga ũũ ũhoro-inĩ wĩgiĩ njata: “Ta tiirai maitho manyu na igũrũ mũmenye ũrĩa warĩũmbire, o we ũcio uumagaragia mbũtũ ciarĩo agĩcitaraga; icio ciothe-rĩ, aciĩtaga marĩĩtwa ma cio o ĩmwe ĩmwe mwanya; tondũ wa ũrĩa hinya wake ũnenehete mũno, o na ũndũ wa ũrĩa ũhoti wake wĩ na hinya, gũtirĩ o na ĩmwe yacio yagaga gũkorũo ho.” Ngĩona atĩ angĩkorũo Ngai arĩ na hinya wa kũũmba indo icio ciothe-rĩ, hatarĩ nganja nĩ angĩaheire hinya wa kũgarũrĩra mũtũũrĩre nĩguo njĩke wendi wake. Kũgerera mahoya na kĩyo kĩingĩ, o kahora nĩ ndahotire gũtiga kwaria ciugo njũru.

ŨRĨA NG’UNĨKĨTE: Ndarĩ na mĩeke mĩnini mũno ya kwaranĩria na andũ tondũ kũrĩa ndarĩithagia mĩgũnda-inĩ gũtiarĩ na andũ aingĩ. O na kũrĩ ũguo, maũndũ marĩa ndĩrutaga gĩthomo-inĩ kĩa Aira a Jehova nĩ mandeithĩtie kũhota kwaranĩria na andũ na njĩra njega. Ningĩ gĩthomo kĩu nĩ kĩndeithĩtie ngahota kũhunjĩria andũ ũhoro ũrĩa mwega wa Ũthamaki wa Ngai.—Mathayo 6:9, 10; 24:14.

Ngoretwo ngĩtungata ndĩ mũthuri wa kĩũngano mĩaka ĩigana ũna. Nyonaga kĩrĩ gĩtĩo kĩnene gwĩka ũrĩa wothe ndahota gũteithĩrĩria Akristiano arĩa angĩ. O na kũrĩ ũguo, kĩrathimo kĩrĩa kĩnene makĩria ngenagĩra nĩ gũtungatĩra Jehova hamwe na mũtumia wakwa na ciana citũ.

Nĩ njokagĩria Jehova ngatho nĩ ũndũ wa kũhe mweke wa gũtuĩka ũmwe wa arĩa marutĩtwo nĩwe o na itarĩ mũthomu. (Isaia 54:13) Nĩ njĩtĩkanagia biũ na Thimo 10:22 ĩrĩa yugaga ũũ: “Kĩrathimo kĩa Jehova nĩkĩo kĩrehage ũtonga.” Muoroto witũ tũrĩ famĩlĩ nĩ kwĩruta makĩria ũhoro wa Jehova na kũmũtungatĩra tene na tene. ▪

[Mbica karatathi ka 8]

[Mbica karatathi ka 8]

[Mbica karatathi ka 9]

“Ngĩmenya atĩ nĩguo ngarũrĩre mĩtugo yakwa, nĩ ndabataraga gũkũria mwĩcirĩrie ũngĩ”