Gĩkuũ nĩ ta toro, tondũ arĩa makuĩte matirĩ ũndũ moĩ na gũtirĩ ũndũ mangĩhota gwĩka. O na kũrĩ ũguo, Mũheani wa muoyo no ahote gũcokia muoyo arĩa makuĩte na njĩra ya kũmariũkia. Akĩonania ũũma wa ũndũ ũcio, Ngai nĩ aahotithirie Jesu kũriũkia andũ maigana ũna.—Thoma Kohelethu 9:5; Johana 11:11, 43, 44.

Ngai nĩ eranĩire atĩ andũ arĩa makuĩte marĩ kĩririkano-inĩ gĩake, nĩ makaariũkio thĩinĩ wa thĩ njerũ ĩrĩ na ũthingu. Arĩa makaariũkio no mũhaka maikare mbĩrĩra-inĩ nginya rĩrĩa Ngai akaamariũkia. Ngai Mwene Hinya Wothe nĩ eriragĩria kũhũthĩra hinya wake kũriũkia arĩa makuĩte.—Thoma Ayubu 14:14, 15.

Hĩndĩ ĩrĩa Ngai akariũkia andũ, nĩ makaahota kwĩmenya, mamenye arata ao, o na andũ a famĩlĩ ciao. O na gũtuĩka mwĩrĩ wa mũndũ nĩ ũbuthaga na ũgaitĩka, Ngai no ahote kũmũriũkia arĩ na mwĩrĩ ũngĩ mwerũ.—Thoma 1 Akorintho 15:35, 38.

O na kũrĩ ũguo, no andũ anyinyi mariũkagio magatũũre igũrũ. (Kũguũrĩrio 20:6) Aingĩ arĩa makariũkio magatũũra paradiso gũkũ thĩ. Makaambĩrĩria mũtũũrĩre ũngĩ mwerũ, merĩgĩrĩire gũtũũra tene na tene.—Thoma Thaburi 37:29; Atũmwo 24:15.