Ataramu a maũndũ megiĩ ũgima mwega wa meciria moigaga atĩ, nĩguo andũ makenere ũtũũro, nĩ mabataraga maũndũ ma kĩĩroho. Ũndũ ũcio nĩ wonanagio nĩ ũrĩa andũ makoragwo na wendi wa kũhingia muoroto mũna, kana wa gũtungatĩra kĩndũ kana mũndũ ũroneka arĩ mũnene kũmakĩra. Nĩgetha mahingie wendi ũcio, andũ amwe mahũthagĩra mahinda mao kwĩrorera ũũmbi, gũthikĩrĩria nyĩmbo, na maũndũ mangĩ ta macio. Ĩndĩ, o na meka maũndũ macio, mationaga gĩkeno kĩa ma.

Arĩa mathomaga Bibilia, nĩ moĩ atĩ andũ moombirũo marĩ na wendi wa kũhingia mabataro mao ma kĩĩroho. Ibuku rĩa Kĩambĩrĩria rĩonanagia atĩ Ngai omba Adamu na Hawa, nĩ aaragia nao kaingĩ na kwoguo makĩgĩa na ũrata wa hakuhĩ nake. (Kĩambĩrĩria 3:8-10) Ngai ndoombire andũ metongoragie; aamombire marĩ na wendi wa kwaranagĩria nake arĩ Mũũmbi wao. Na Bibilia nĩ yonanĩtie ũguo kũndũ kũingĩ.

Kwa ngerekano, Jesu oigire ũũ: “Gũkena-rĩ, nĩ arĩa mahũtagĩra maũndũ marĩa ma ũthingu.” (Mathayo 5:6) Kũringana na ciugo icio, nĩguo mũndũ akenagĩre ũtũũro, no mũhaka ahingie wendi ũrĩa ombirũo naguo wa kĩĩroho. Tũngĩhingia wendi ũcio atĩa? Jesu oigire ũũ: “Ti mũgate wiki ũtũũragia mũndũ muoyo, no kiugo o gĩothe kĩrĩa kiumaga kanua ka Ngai.” (Mathayo 4:4) Nĩ na njĩra irĩkũ kiugo o gĩothe kĩa Ngai kana motaaro make marĩa marĩ thĩinĩ wa Bibilia, mangĩtũhotithia gũtũũra ũtũũro ũrĩ na gĩkeno na muoroto? Reke twarĩrĩrie njĩra ithatũ cia bata.

Ũmũthĩ, kũrĩ na ataramu aingĩ mũno a kũheana motaaro megiĩ ihiko, wendo, famĩlĩ, gĩkeno, kũniina ngucanio, na ũrĩa mũndũ angĩgĩa na ũtũũro ũrĩ na muoroto. O na kũrĩ ũguo-rĩ, nũũ wagĩrĩire kũhe andũ ũtaaro maũndũ-inĩ macio mothe tiga Jehova Ngai Mũũmbi wao?

 Kwa ngerekano: Ũngĩgũra kĩndũ ta kamera kana thimũ, nĩ ũheagwo ibuku rĩa gũgũteithia kũmenya ũrĩa ũngĩmĩhũthĩra na njĩra ĩrĩa yagĩrĩire. Bibilia no ĩringithanio na ibuku ta rĩu. Nĩrĩo ibuku rĩa motaaro rĩrĩa Ngai, o we Mũũmbi wa andũ amaheete rĩgiĩ ũtũũro wao. Ibuku rĩrĩ rĩa motaaro nĩ rĩtaarĩirie ũrĩa andũ mangĩhũthĩra ũtũũro wao na magĩe na gĩkeno.

O ta ibuku rĩu rĩa gũteithia mũndũ ũrĩa angĩhũthĩra kĩndũ, Bibilia o nayo nĩ ĩtwĩraga maũndũ marĩa tũngĩĩthema nĩguo tũtigathũkie ũtũũro witũ. Motaaro ma andũ maahota kuoneka marĩ mega, ma kũguucĩrĩria, o na moneke marĩ mahũthũ, no githĩ to tũgĩe na ũtũũro ũrĩ na gĩkeno, tũngĩrũmĩrĩra motaaro marĩa tũheagwo nĩ Mũũmbi witũ?

O na Jehova agĩtũheaga motaaro-rĩ, ndatũtindĩkagĩrĩria tũmarũmĩrĩre. Ithenya rĩa ũguo, arĩ Mũũmbi witũ wĩ wendo, atwĩraga ũũ: “Niĩ nĩ niĩ Jehova Ngai waku ũrĩa ũkũrutaga maũndũ ma gũkũguna, o we ũrĩa ũgũtongoragia na njĩra ĩrĩa wagĩrĩirũo nĩ kũgera. Hĩ! Na arĩ korũo nĩwaiguĩte maathani makwa! Kũngĩakorirũo nĩ ũguo-rĩ, thayũ ũrĩa ũngĩagĩire naguo ũngĩahaanire o ta rũũĩ rũgũtherera, o naguo ũthingu waku ũngĩahaanire o ta ndihũ cia maĩ ma iria.” (Isaia 48:17, 18) Na njĩra ĩngĩ, tũngĩrũmĩrĩra ũrĩa tũtaaragwo nĩ Ngai, nĩ tũkũgĩa na ũtũũro mwega. Ũguo nĩ kuuga atĩ, nĩguo tũgĩe na ũtũũro mwega na ũrĩ na gĩkeno, nĩ tũrabatara Ngai.

Andũ amwe monaga ta matarabatara Ngai, tondũ nĩ marigagwo kĩrĩa gĩtũmaga andũ manyamarĩke mũno, o na kũrĩ Ngai ũrĩ wendo. Kwa ngerekano, nĩ meyũragia ũũ: ‘Nĩ kĩĩ gĩtũmaga andũ matarĩ na mahĩtia manyamarĩke?’ ‘Nĩ kĩĩ gĩtũmaga ciana iciarũo irĩ na wathe wa mwĩrĩ?’ ‘Nĩkĩ kwagĩte kĩhooto ũguo?’ Icio nĩ ciũria cia bata mũno, na kũmenya macokio ma cio no gũtũteithie mũno, ũtũũro-inĩ witũ. Handũ ha kugaga nĩ wendi wa Ngai rĩrĩa kwagĩa na mathĩna-rĩ, reke tuone ũrĩa Kiugo kĩa Ngai, Bibilia, gĩcoketie ciũria icio.

Thĩinĩ wa mũrango wa gatatũ wa ibuku rĩa Kĩambĩrĩria, nĩ tũthomaga ũrĩa Shaitani aahũthĩrire nyoka kũheenia Adamu na Hawa maage gwathĩkĩra Jehova Ngai, marĩe itunda rĩrĩa maakanĩtio rĩa mũtĩ ũrĩa wa kũmenyithania wega na ũũru. Shaitani eerire Hawa ũũ: “Ti atĩ no mũhaka mũgakua, nĩ gũkorũo Ngai nĩoĩ atĩ mũthenya ũrĩa mũkamarĩa, hĩndĩ ĩo maitho manyu nĩmakahingũka, mũtuĩke o ta Ngai, mũmenyage wega o na ũũru.”—Kĩambĩrĩria 2:16, 17; 3:4, 5. 

Rĩrĩa oigire ũguo, Shaitani eendaga kuonania atĩ Ngai nĩ wa maheeni, na atĩ ndathanaga na njĩra ya kĩhooto. Mũcukani ningĩ eendaga kuonania atĩ, andũ mangĩmwathĩkĩra arĩ we, no magĩe na ũtũũro mwega. Hihi ũũma wa maũndũ macio ũngĩamenyekire wega na njĩra ĩrĩkũ? Jehova onire atĩ, ũndũ ũcio nĩ wabataraga ihinda nĩguo araika na andũ othe meyonere kana hihi maũndũ  macio Shaitani oigĩte nĩ ma ma. Na njĩra ĩngĩ, Ngai nĩ kũhe aaheire Shaitani na arĩa mamũnyitaga mbaru ihinda monanie kana hihi andũ no mahote gwĩtongoria hatarĩ Ngai.

Wee ũkuona atĩa? Hihi andũ no mahote gwĩtongoria hatarĩ Ngai, na magĩe na ũtũũro mwega? Maũndũ marĩa magũmĩire andũ kwa ihinda rĩa mĩaka mĩingĩ ta mĩnyamaro, wagi wa kĩhooto, mĩrimũ, ikuũ, o hamwe na wĩki-naĩ, gũthũka kwa mĩtugo, mbaara, na maũndũ mangĩ ta macio, nĩ monanagia atĩ andũ matingĩhota gwĩtongoria hatarĩ Ngai. Bibilia ndĩonanagia atĩ Ngai nĩwe ũtũmaga andũ manyamarĩke, ithenya rĩa ũguo, yugaga ũũ kuonania ũndũ ũrĩa mũnene ũtũmaga andũ manyamarĩke: “Mũndũ agĩaga na ũhoti wa gwatha ũrĩa ũngĩ, agagĩĩthũkia we mwene.”—Kohelethu 8:9.

Gũkĩrĩ ũguo-rĩ, na githĩ ũndũ ũcio ndũronania wega atĩ nĩ tũrabatara Ngai, nĩguo atũteithie tũmenye kĩrĩa gĩtũmaga tũnyamarĩke, na atũhe kĩhonia? Hihi Ngai akaaniina mĩnyamaro atĩa?

Kwa ihinda iraya, andũ nĩ makoretwo makĩĩrirĩria kĩhonia gĩa gũtũũra matekũrwara, mategũkũra, na mategũkua. Nĩ ũndũ ũcio, nĩ mahũthĩrĩte mahinda, hinya, indo na mbeca nyingĩ mũno, ĩndĩ mationaga kĩhonia. Andũ amwe o na nĩ mahũthagĩra mĩthaiga, ũgo na ũragũri, na makamenyeria mwĩrĩ makĩgeria gwetha kĩhonia. No matanya mao matikinyanagĩra.

Ngai endaga andũ magĩe na ũtũũro ũrĩ na gĩkeno. Ũcio nĩguo warĩ muoroto wake rĩrĩa ombire andũ na ndarĩ aũteanĩria. (Kĩambĩrĩria 1:27, 28; Isaia 45:18) Jehova Ngai nĩ oigĩte na ma atĩ, uuge wake wothe nĩ ũkaahinga. (Isaia 55:10, 11) Bibilia nĩ ĩtwĩraga ũhoro wa kĩĩranĩro kĩa Ngai gĩa gũgaacokia Paradiso ĩrĩa yaateirũo nĩ Adamu na Hawa. Tũthomaga ũũ thĩinĩ wa ibuku rĩa mũthia rĩa Bibilia: “Nake [Jehova Ngai] nĩekũmagiria maithori mothe mathire maitho mao; nakĩo gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo; maũndũ marĩa ma mbere nĩ mathengu magathira.” (Kũguũrĩrio 21:4) Nĩ njĩra ĩrĩkũ Ngai akaahũthĩra kũhingia maũndũ macio, na tũngĩgunĩka atĩa nĩ kĩĩranĩro kĩu?

Mũrũ wa Ngai, Jesu Kristo, nĩ aarutire arutwo ake mahoyage wendi wa Ngai wĩkĩke. Andũ aingĩ nĩ moĩ ihoya rĩu, rĩrĩa amwe metaga Ihoya rĩa Mwathani, o na makarĩcokagĩra kaingĩ. Riugaga ũũ: “Ithe witũ wĩ Igũrũ, Rĩĩtwa rĩaku nĩrĩamũrũo. Ũthamaki waku ũũke. O ũrĩa wendete Wee, nĩwĩkagwo gũkũ thĩ, o ta ũrĩa wĩkagwo kũu Igũrũ.” (Mathayo 6:9, 10) Jehova Ngai akaahũthĩra Ũthamaki wake kũniina mĩnyamaro ĩrĩa ĩreheetwo nĩ mothamaki ma andũ, na arehe thĩ njerũ ĩrĩ na ũthingu o ta ũrĩa eranĩire. * (Danieli 2:44; 2 Petero 3:13) Tũngĩka atĩa nĩguo tũgunĩke nĩ kĩĩranĩro kĩu kĩa Ngai?

 Jesu oigire ũũ kuonania ikinya rĩrĩa twagĩrĩirũo nĩ kuoya: “Naguo muoyo wa tene na tene nĩ atĩrĩ, nĩ makũmenye wee Ngai ũrĩa ũmwe wa ma, na mamenye ũrĩa warekirie, na nĩwe Jesu Kristo.” (Johana 17:3) Hatarĩ nganja, nĩ tũrabatara ũteithio wa Ngai nĩguo tũgaatũũra tene na tene thĩinĩ wa thĩ njerũ ĩrĩa eranĩire. Na githĩ kĩĩranĩro kĩu ningĩ gĩtiatũma wone kĩrĩa gĩtũmaga tũbatare Ngai?

Mĩaka ngiri igĩrĩ mĩthiru Paulo arĩ Athene, nĩ eerire andũ a Athene, arĩa maakoragwo mehaarĩirie gũthikĩrĩria mawoni ma arĩa angĩ ũũ: “Nĩwe ũheaga andũ othe muoyo, o na hinya wa kũheeha, o na indo ciothe. Nĩ gũkorũo nĩ thĩinĩ wake we tũtũũraga muoyo, na tũkagĩa na hinya wa gwĩtwara, na wa gũikaraga tũrĩ o ho; o ta ũrĩa aandĩki amwe anyu a nyĩmbo nao moigĩte atĩrĩ, Tondũ o na ithuĩ-rĩ, tũrĩ a rũciaro rũake.”—Atũmwo 17:25, 28.

Ũrĩa Paulo eerire Aathene noguo kũrĩ o na ũmũthĩ. Mũũmbi witũ nĩwe ũtũheaga mĩhũmũ ya muoyo, irio iria tũrĩaga, na kĩrĩa tũnyuaga. Tũtingĩhota gũtũũra muoyo tũtarĩ na indo icio cia bata Jehova atũheaga. No nĩ kĩĩ gĩtũmaga Ngai athiĩ na mbere kũhe andũ othe indo icio, o na arĩa mateciragia ũhoro wake? Paulo oigire atĩ, “nĩ getha marongoragie Ngai makĩhambatagĩria marore kana hihi maahota kũmuona, o na atakĩrĩ haraya na mũndũ o na ũmwe witũ.”—Atũmwo 17:27.

Hihi no wende kũmenya Ngai makĩria, ũmenye ũhoro wĩgiĩ muoroto wake harĩ andũ na ũtaaro ũrĩa amaheete nĩgetha magaatũũra tene na tene? Angĩkorũo no wende, tũgũkũũria waranĩrie na mũndũ ũrĩa ũgũtigĩire ngathĩti ĩno, kana waranĩrie na arĩa mamĩcabĩte. Nĩ megũkena mũno kwaranĩria nawe.